Ol Givhan Prinsipol
Kasem Help blong Helpem Ol Narawan
?Olsem wanem yumi yusum ol narawan taem yumi nidim help blong stap givhan? Tekpat long ol givhan intaviu mo fas Sandei kaonsel miting.
Liahona, Oktoba 2018
Taem Kathy i kasem sik we i spolem bren mo bak, i mekem hem i mas stap long wiljea nomo, nao hem i luk se hem i nidim help evri naet blong oli karemaot hem long jea i go long bed. Wok ia, i bigwan tumas blong wan memba nomo i mekem. Mekem se ol elda blong kworom oli toktok tugeta abaot situesen blong hem, mo oli disaed blong mekem wan taemtebol blong helpem hem evri naet.1
Taem yumi kam blong save ol nid mo ol paoa blong olgeta we yumi stap givim seves long olgeta, bae yumi faenem se yumi nidim help blong save lukluk long ol nid ia. Ol givhan intaviu mo fas Sandei kaonsel miting oli tufala janis blong toktok raon long wei blong yusum ol narawan long wan stret wei.
Ol Givhan Intaviu
Ol kwota intaviu ia bitwin ol givhan sista mo Rilif Sosaeti presidensi, o bitwin ol givhan brata mo presidensi blong kworom blong ol elda, oli wan ofisol ripot ia nao we yumi stap mekem abaot olgeta we yumi stap givhan long olgeta. Intaviu ia, i wan janis we i kam evri kwota blong: (1) blong kaonsel o toktok raon abaot ol samting we wanwan man, woman mo famli i gat blong yusum, ol nid mo ol jalenj blong olgeta; (2) blong faenemaot wanem nid nao kworom, Rilif Sosaeti, o wod kaonsel i save help wetem, mo (3) blong lanem samting aot long ol lida mo blong kasem gud toktok blong help long saed blong ol givhan wok.
Presiden blong kworom blong ol elda, mo presiden blong Rilif Sosaeti, tufala i talem ol impoten nid i go stret long bisop, mo bambae oli kasem kaonsel mo daereksen we i kam long hem.
Yu save faenem moa infomesen abaot ol givhan intaviu long ministering.lds.org/bis.
Mekem Ol Givhan Intaviu Oli Gat Mining
Blong sapotem toktok blong Presiden Russell M. Nelson se givhan program bae i wan poen we bae i olsem wan inj we rod blong Jos bae i swing long hem, Elda Gary E. Stevenson blong Kworom blong Olgeta Twelef Aposol i tijim: “Visen ia i save hapen nomo … folem hamas oli tijim ol givhan brata mo sista, mo hamas olgeta ia oli putum tingting blong olgeta blong holem givhan intaviu ia.”2Fo
help blong ol givhan brata mo sista:
-
Go long intaviu wetem tingting blong kasem advaes. Rere blong lanem samting.
-
Rere blong toktok raon long ol nid we yu nidim help blong stretem.
-
Lukluk nomo long wanem wanwan i gat mo save mekem, be i no ol nid nomo.
-
Kontaktem presidensi blong yufala i save toktok bitwin ol kwota intaviu, taem i gat nid from.
Faef help blong ol lida:
-
I no nid blong ol intaviu oli longfala, be putum inaf taem i stap blong mit long wan ples we yufala i save storian gud.
-
Tekem janis blong givhan long givhan brata o sista ia.
-
No askem ol kwestin we i givim tingting se yu stap kaontem ol visit nomo, o stap jekem se oli gat kontak oltaem (kaen kwestin olsem: “?Yu yu flatem givhan wok blong yu?”) Askem ol kwestin we i kam sapotem ol fasin (“?Wanem nao yu filim blong mekem taem yu bin stap prea from famli ia? ?Wanem i hapen taem yu bin mekem folem ol toktok ia blong Spirit?”).
-
Lisin wetem tru tingting, mo raetemdaon ol not.
-
Kaonsel tugeta. Ol givhan kompanion oli gat raet blong kasem revelesen long saed blong olgeta ia we oli gat wok blong givhan long olgeta.
Ol Kwestin mo Ansa abaot Ol Givhan Intaviu
?Wanem hem i wan givhan intaviu?
Hem i wan storian bitwin givhan brata mo wan memba blong presidensi blong kworom blong ol elda, o wan storian bitwin givhan sista mo wan memba blong presidensi blong Rilif Sosaeti, we i tekem ples long wan ples we i letem olgeta blong kasem insperesen we i kam long Tabu Spirit. Long en, ol givhan brata mo sista oli save kasem insperesen blong lukaot long, lavem, tijim mo kamfotem pipol long wei blong Sevya.
?Ol kwota intaviu ia, oli mas mekem fes tu fes?
Bae oli mekem fes tu fes, be oli save mekem tru long telefon, o onlaen sapos i no posibol nating blong mit fes tu fes. Bae i gud tumas, sapos situesen i gud, blong tufala kompanion i tekpat long intaviu.
?Wanem hem i wan givhan intaviu?
Ol givhan intaviu oli wan taem mo janis blong ol givhan brata mo sista blong luklukbak long ol situesen we i stap, mekem ol plan blong fiuja, mo mekem se help i kasem wanwan man, woman o famli we oli stap givhan long olgeta. Hem i wan janis blong tokbaot wanem risos kworom mo Rilif Sosaeti oli save givim.
?Olsem wanem nao bae mi wok wetem ol samting we oli konfidensiol o i no blong tokbaot olbaot?
Ol givhan brata mo sista oli serem ol konfidensiol infomesen nomo wetem kworom blong ol elda o wetem presiden blong Rilif Sosaeti—o i go stret long bisop. Konfidensiol infomesen o infomesen we i no blong tokbaot olbaot, oli no mas serem long fas Sandei kaonsel miting.
Ol Kaonsel Miting blong Fas Sandei
Antap long ol givhan intaviu, ol fas Sandei kaonsel miting oli wan nara wei blong yusum ol narawan long wok blong givhan. Long miting blong Rilif Sosaeti mo kworom blong ol elda, insperesen i save kam long olgeta we oli stap tru long Spirit mo tru long ol narawan we oli stap insaed long grup ia.
Stamba tingting blong wan kaonsel miting, hem i blong:
-
Toktok tugeta abaot ol lokol responsabiliti, janis, mo jalenj;
-
Lanem samting aot long ol tingting mo eksperiens blong wanwan long yumi; mo
-
“Mekem sam plan blong tekem aksen folem ol toktok o filing we yumi kasem long Spirit.”3
Ol kaonsel miting oli moa bitim ol storian; ol miting ia oli lidim yumi blong tekem aksen olsem wanwan man, woman, o olsem wan grup olsem we Spirit i talem long yumi. Ol memba oli save filim blong mekem wok blong Lod olsem wan risal blong ol miting ia.
Invitesen blong Tekem Aksen
“Prea blong yumi tedei,” Elda Jeffrey R. Holland blong Kworom blong Olgeta Twelef Aposol i talem, “i we, evri man mo woman—mo ol bigfala yang man mo yang woman blong yumi—bambae i gat moa dip komitmen blong kea long wanwan wetem hat blong hem, we stret lav blong Kraes nomo i pusum hem blong mekem olsem.”4