កិច្ចការ ១៧:១៦–៣៤
« យើងរាល់គ្នាជាពូជព្រះ »
ពេលកំពុងរង់ចាំដៃគូផ្សព្វផ្សាយសាសនារបស់លោកដើម្បីចូលរួមជាមួយលោកនៅក្រុងអាថែន សាវកប៉ុលមានការព្រួយបារម្ភយ៉ាងខ្លាំងថាប្រជាជននៅក្រុងអាថែនជាអ្នកគោរពបូជារូបសំណាក ហើយមិនយល់ពីលក្ខណៈពិតរបស់ព្រះទេ ។ ដើម្បីជួយប្រជាជនអាថែនឲ្យយល់ និងខិតទៅកាន់តែជិតព្រះ ប៉ុលបានបង្រៀនដំណឹងល្អនៃព្រះយេស៊ូវគ្រីស្ទនៅក្នុងសាលាប្រជុំ និងទីផ្សារនានា ។ បន្ទាប់មក ពួកអ្នកប្រាជ្ញបានអញ្ជើញប៉ុលឲ្យពន្យល់ពី « សេចក្តីបង្រៀនថ្មី » ( កិច្ចការ ១៧:១៩ ) នៅកន្លែងមួយឈ្មោះភ្នំអើរីយ៉ូស ។ ប៉ុលបានបង្រៀនពួកអ្នកប្រាជ្ញអំពីលក្ខណៈពិតនៃព្រះ ហើយបានថ្លែងទីបន្ទាល់អំពីទំនាក់ទំនងដ៏ទេវភាពរបស់ពួកគេចំពោះទ្រង់ ។ មេរៀននេះអាចជួយអ្នកឲ្យស្គាល់ពីសារៈសំខាន់នៃអត្តសញ្ញាណរបស់អ្នកក្នុងនាមជាបុត្រាបុត្រីរបស់ព្រះ ។
ខ្ញុំជាកូនរបស់ព្រះ
សូមស្ដាប់ទំនុកតម្កើង « ខ្ញុំជាកូនរបស់ព្រះ » ( ទំនុកតម្កើង លរ ១៨៨ ) នៅលើកម្មវិធីបណ្ណាល័យដំណឹងល្អ ឬនៅលើគេហទំព័រ ChurchofJesusChrist.org ។ ឬមើលវីដេអូ «Child of God ( ២:៥៤ ) ដែលមាននៅគេហទំព័រ ChurchofJesusChrist.org ។ នៅពេលអ្នកស្តាប់ ឬច្រៀងតាម សូមសញ្ជឹងគិតពីសារៈសំខាន់ពីសារលិខិតនៃទំនុកតម្កើងនេះ ។
-
តើពាក្យ ឬឃ្លាអ្វីខ្លះពីទំនុកតម្កើងនេះ ដែលអ្នកយល់ឃើញថាមានសារៈសំខាន់ ? ហេតុអ្វី ?
អែលឌើរ ដូណល អិល ហលស្ត្រម នៃពួកចិតសិបនាក់បានអញ្ជើញយើងឲ្យសញ្ជឹងគិតអំពីសារលិខិតនៃបទ « ខ្ញុំជាកូនរបស់ព្រះ » ៖
ទំនុកតម្កើងជាទីពេញចិត្តនេះគឺជាទំនុកតម្កើងដែលត្រូវបានច្រៀងជាញឹកញាប់ក្នុងសាសនាចក្រនេះ ។ ប៉ុន្តែសំណួរវិភាគនោះគឺថា តើយើង ពិតជា ចេះបទនេះដែរឬទេ ? តើយើងចេះបទនេះនៅក្នុងគំនិតយើង និងនៅក្នុងចិត្តយើង និងនៅក្នុងព្រលឹងរបស់យើងដែរឬទេ ? តើមាតាបិតាសួគ៌ារបស់យើងគឺជាអត្តសញ្ញាណដំបូង និងមានខ្លឹមសារបំផុតដែរឬទេ ?
( ដូណល អិល ហលស្ត្រម « I Am a Child of God » Liahona ខែ ឧសភា ឆ្នាំ ២០១៦ ទំព័រ ២៦ )
សំណួរខាងក្រោមនេះត្រូវបានកែសម្រួលពីសេចក្តីថ្លែងការណ៍របស់អែលឌើរ ហលស្ត្រម ហើយអាចត្រូវបានឆ្លើយដោយចម្លើយ « បាទ/ចាស » ឬ « ទេ » ។ នៅពេលអ្នកឆ្លើយសំណួរទាំងនេះ សូមពន្យល់ពីមូលហេតុដែលអ្នកឆ្លើយសំណួរនីមួយៗតាមរបៀបដែលអ្នកបានឆ្លើយ ។
ពេញមួយមេរៀននេះ សូមពិចារណាអំពីការឆ្លើយតបរបស់អ្នកចំពោះសំណួរពីមុន និងអ្វីដែលចម្លើយរបស់អ្នកបង្ហាញអំពីអារម្មណ៍របស់អ្នកចំពោះព្រះវរបិតាសួគ៌ ។ សូមស្វែងរកការបំផុសគំនិតពីព្រះវរបិតាសួគ៌របស់អ្នក តាមរយៈព្រះវិញ្ញាណបរិសុទ្ធ ដើម្បីជួយអ្នកឲ្យយល់កាន់តែច្បាស់អំពីអត្តសញ្ញាណដ៏ទេវភាពរបស់អ្នកក្នុងនាមជាបុត្រាបុត្រីរបស់ព្រះ ហើយមានអារម្មណ៍ថាមានសេចក្តីស្រឡាញ់ដ៏ជ្រាលជ្រៅដែលទ្រង់មានចំពោះអ្នក ។
ប៉ុលផ្សព្វផ្សាយនៅក្រុងអាថែន
សាវកប៉ុលបានផ្សព្វផ្សាយនៅក្រុងអាថែន អំឡុងពេលធ្វើដំណើរទៅផ្សាយសាសនាជាលើកទីពីររបស់លោក ។ ប្រជាជននៅក្រុងអាថែនមានគំនិត ទស្សនៈ និងជំនឿខុសៗគ្នាជាច្រើន ។ ប៉ុលបានឃើញថាប្រជាជនមាន « រូបព្រះនៅពេញក្នុងទីក្រុងនោះ » ( កិច្ចការ ១៧:១៦ ) មានន័យថាពួកគេគោរពថ្វាយបង្គំរូបសំណាកជំនួសឲ្យព្រះ ។ ដូច្នេះ ប៉ុលបានផ្សព្វផ្សាយជារៀងរាល់ថ្ងៃអំពីព្រះយេស៊ូវគ្រីស្ទ និងការមានព្រះជន្មរស់ឡើងវិញរបស់ទ្រង់ ។ បន្ទាប់មក ប៉ុលត្រូវបាននាំទៅភ្នំអើរីយ៉ូស ជាកន្លែងដែលលោកត្រូវបានអញ្ជើញឲ្យផ្សព្វផ្សាយនៅចំពោះមុខពួកអ្នកប្រាជ្ញមួយក្រុម ( សូមមើល កិច្ចការ ១៧:១៧–២១ ) ។
សូមអាន កិច្ចការ ១៧:២២–២៣ ដោយរកមើលពីរបៀបដែលប៉ុលបានបង្រៀនសារលិខិតរបស់លោក ។ អ្នកក៏អាចមើលវីដេអូ « We Are the Offspring of God » ( 4:26 ) ចាប់ពីនាទីទី ០:០០ ដល់នាទីទី ១:៥៤ ដែលមាននៅលើគេហទំព័រ ChurchofJesusChrist.org ។
-
តើសិលាចារឹកនៅលើអាសនាដែលប៉ុល បានលើកឡើងអាចផ្តល់យោបល់អ្វីខ្លះអំពីជំនឿរបស់ប្រជាជនក្រុងអាថែនអំពីព្រះ ?
-
តើសិលាចារឹកនេះប្រៀបធៀបនឹងអ្វីដែលបទគម្ពីរបង្រៀនអំពីព្រះដោយរបៀបណា ?
ប្រជាជនក្រុងអាថែន ពីបុរាណបានជឿលើព្រះក្លែងក្លាយជាច្រើន ហើយបានសង់រូបសំណាក និងព្រះវិហារជាច្រើនដើម្បីថ្វាយបង្គំដល់រូបសំណាកទាំងនោះ ។ អាសនាដែលសង់សម្រាប់ « ព្រះដ៏ពុំស្គាល់ » ( កិច្ចការ ១៧:២៣ ) ប្រហែលជាប្រជាជនក្រុងអាថែនព្យាយាមឲ្យព្រះដែលពួកគេពុំស្គាល់ ឬព្រះផ្សេងណាមួយដែលមិនស្គាល់ព្រះនាមបានស្ងប់ព្រះទ័យ ។
-
តើការយល់ខុសទូទៅមួយចំនួនអ្វីខ្លះដែលអ្នកបានសម្គាល់ឃើញនៅក្នុងពិភពលោកសព្វថ្ងៃនេះអំពីព្រះ និងទំនាក់ទំនងរបស់យើងជាមួយទ្រង់ ?
-
ប្រសិនបើអ្នកមានឱកាសដើម្បីបង្រៀននរណាម្នាក់ដែលមិនបានដឹងច្រើនអំពីព្រះវរបិតាសួគ៌ តើអ្នកចង់ឲ្យពួកគេដឹងអ្វីខ្លះអំពីទ្រង់ ?
យើងរាល់គ្នាជាពូជព្រះ
សេចក្តីពិតមួយដែលអ្នកអាចនឹងសម្គាល់ឃើញពីការបង្រៀនរបស់ប៉ុលគឺ « យើងរាល់គ្នាជាពូជព្រះ » ( ខទី ២៩ ) ។
-
តើការធ្វើជាបុត្រាបុត្រីរបស់ព្រះ ខុសពីការធ្វើត្រឹមតែជាអ្វីដែលទ្រង់បង្កបង្កើតយ៉ាងដូចម្ដេច ?
ប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់ បានថ្លែងទីបន្ទាល់អំពីសារៈសំខាន់នៃសេចក្តីពិតថា « យើងរាល់គ្នាជាពូជព្រះ » ។
ការពិតជាមូលដ្ឋានដែលមានមាតាបិតាសួគ៌ា មិនមែនគ្រាន់តែជាសេចក្តីពិតរបស់ខ្ញុំ ឬសេចក្តីពិតរបស់អ្នកនោះទេ ។ វាគឺជាសេចក្តីពិតដ៏នៅអស់កល្បជានិច្ច ។ វាសរសេរធំៗ ដិត និងអក្សរពុម្ព ។ ការយល់ដឹងពីសេចក្ដីពិតនេះ——គឺជាការយល់ដឹងពិតប្រាកដ—វាជាការផ្លាស់ប្តូរជីវិត ។ វាផ្តល់ឲ្យអ្នកនូវអត្តសញ្ញាណដ៏វិសេសវិសាលដែលគ្មាននរណាម្នាក់អាចដកចេញពីខ្លួនអ្នកបានឡើយ ។ ប៉ុន្តែលើសពីនោះ វាគួរតែផ្តល់ឲ្យអ្នកនូវអារម្មណ៍នៃតម្លៃដ៏ធំធេង និងស្មារតីនៃគុណសម្បត្តិដ៏នៅជានិរន្តរ៍របស់អ្នក ។ ជាចុងក្រោយ វាផ្តល់ឲ្យអ្នកនូវគោលបំណងដ៏ទេវភាព សេចក្តីថ្លៃថ្នូរ និងភាពស័ក្តិសមនៅក្នុងជីវិត ។
( អិម រ័សុល បាឡឺដ « Children of Heavenly Father » [ Brigham Young University devotional, នៅថ្ងៃទី ៣ ខែ មីនា ឆ្នាំ ២០២០ ] ទំព័រ ២ នៅលើគេហទំព័រ speeches.byu.edu) ។
-
តើវាអាចធ្វើឲ្យមានភាពខុសគ្នាអ្វីខ្លះក្នុងជីវិតរបស់អ្នក និងក្នុងការសម្រេចចិត្តដែលអ្នកធ្វើដើម្បីដឹងថាអ្នកពិត « ជាពូជព្រះ » ?
-
តើអ្នកធ្លាប់មានបទពិសោធន៍អ្វីខ្លះ ដែលបានជួយអ្នកឲ្យយល់កាន់តែច្បាស់អំពីអត្តសញ្ញាណដ៏ទេវភាពរបស់អ្នកក្នុងនាមជាបុត្រម្នាក់របស់ព្រះ ?
ដើម្បីមើលឧទាហរណ៍អំពីរបៀបដែលការយល់ដឹងអំពីអត្តសញ្ញាណដ៏ទេវភាពរបស់នាងបានជះឥទ្ធិពលដល់ស្រ្តីម្នាក់ សូមមើលវីដេអូ « Am I a Child of God? » ( ១០:២៤ ) មាននៅលើគេហទំព័រ ChurchofJesusChrist.org ចាប់ពីនាទីទី ៣:២៤ ដល់នាទីទី ៥:២៣ ។
ជម្រើស ៖ តើចង់រៀនសូត្របន្ថែមទៀតទេ ?
តើព្រះគម្ពីរមរមនអាចពង្រឹងទំនាក់ទំនងរបស់ខ្ញុំជាមួយព្រះដោយរបៀបណា ?
ប្រធាន រ័សុល អិម ណិលសុន បានប្រកាស ៖
មានរឿងអស្ចារ្យមួយកើតឡើងពេលកូនម្នាក់របស់ព្រះស្វែងយល់ចង់ដឹងបន្ថែមទៀតអំពីទ្រង់ និងព្រះរាជបុត្រាដ៏ស្ងួនភ្ងារបស់ទ្រង់ ។ គ្មានកន្លែងណាផ្សេងទៀតដែលសេចក្ដីពិតទាំងនោះបានបង្រៀនយ៉ាងច្បាស់ ហើយពេញដោយអនុភាពជាងនៅក្នុងព្រះគម្ពីរមរមនឡើយ ។
( ប្រធាន រ័សុល អិម ណិលសុន « The Book of Mormon: What Would Your Life Be Like Without It? » Liahonaខែ វិច្ឆិកា ឆ្នាំ ២០១៧ ទំព័រ ៦១ ។
ហេតុអ្វីបានជាវាសំខាន់ក្នុងការយល់ពីអត្តសញ្ញាណពិតរបស់ខ្ញុំ ដែលជាកូនរបស់ព្រះ ?
អែលឌើរ ប្រាយអិន ខេ ថេលើរ ក្នុងពួកចិតសិបនាក់បានបង្រៀនដូចខាងក្រោម ៖
ម៉ូសេបានរៀនអំពីកេរដំណែលនៃភាពជាព្រះរបស់លោកដោយបានទូលជាមួយនឹងព្រះអម្ចាស់ទល់នឹងព្រះភ័ក្រ្តទ្រង់ ។ បន្ទាប់ពីបទពិសោធន៍នោះមក « អារក្សសាតាំងបានមកធ្វើការល្បួង » ដោយឈ្លាសវៃ ប៉ុន្តែមានបំណងកាចសាហាវដើម្បីបំភាន់អត្តសញ្ញាណរបស់ម៉ូសេ « ថា ៖ ម៉ូសេ ជាកូនមនុស្សអើយ ចូរថ្វាយបង្គំយើង ។ ហើយ … ម៉ូសេបានងើបមើលទៅអារក្សសាតាំង ហើយនិយាយថា ៖ តើអ្នកជានរណា ? ដ្បិតមើលចុះ ខ្ញុំជា បុត្រនៃព្រះ » [ ម៉ូសេ ១:១២–១៣ បានបន្ថែមការគូសបញ្ជាក់ ] ។
សង្គ្រាមដ៏ធំពីអត្តសញ្ញាណនៃភាពជាព្រះនេះ បន្តការជជែកវែកញែក ខណៈដែលសាតាំងបន្តបង្កើនយុទ្ធសាស្ត្រដើម្បីបំផ្លិចបំផ្លាញជំនឿ និងចំណេះដឹងរបស់យើងអំពីទំនាក់ទំនងយើងជាមួយនឹងព្រះ ។ ដោយអំណរគុណ យើងត្រូវបានប្រទានពរដោយមានចក្ខុវិស័យច្បាស់លាស់ និងការយល់ដឹងអំពីអត្តសញ្ញាណពិតរបស់យើងតាំងពីដើមដំបូងមកម្ល៉េះ ។
ការស្គាល់ព្រះវរបិតាយើងផ្លាស់ប្តូរអ្វីៗគ្រប់យ៉ាង ជាពិសេសដួងចិត្តរបស់យើង នៅពេលព្រះវិញ្ញាណដ៏ទន់ភ្លន់របស់ទ្រង់បញ្ជាក់អំពីអត្តសញ្ញាណពិតប្រាកដ និងតម្លៃដ៏ធំមហិមារបស់យើងនៅក្នុងព្រះនេត្រទ្រង់ ។ ព្រះទ្រង់យាងជាមួយយើងតាមផ្លូវនៃសេចក្តីសញ្ញា នៅពេលយើងស្វែងរកទ្រង់តាមរយៈការទូលអង្វរប្រកបដោយការអធិស្ឋាន ការស្រាវជ្រាវព្រះគម្ពីរ និងការព្យាយាមគោរពប្រតិបត្តិ ។
( ប្រាយអិន ខេ ថេលើរ « Am I a Child of God? » Liahona ខែ ឧសភា ឆ្នាំ ២០១៨ ទំព័រ ១២, ១៤ )
ប្រធាន ឌៀថើរ អេហ្វ អុជដូហ្វ នៃគណប្រធានទីមួយបានថ្លែងទីបន្ទាល់អំពីអត្តសញ្ញាណពិតរបស់យើងជាបុត្រី និងបុត្រារបស់ព្រះនៅក្នុងវីដេអូ « Our True Identity » ( ៣:៣៨ ) ដែលមាននៅលើគេហទំព័រChurchofJesusChrist.org ។