Usa ka dako nga pundok sa katawhan ang gibunyagan diha sa usa ka suba atol sa panahon sa Pentecostes.
Sa wala pa ang Iyang kamatayon, miingon si Jesus sa Iyang Apostoles nga human Siya mawala, ang Amahan mopadala sa “ang Maghuhupay, kinsa mao ang Espiritu Santo” (Juan 14:26). Sama sa gisaad, ang Espiritu Santo mikunsad ngadto sa Napulog Duha ka Apostoles sa milagroso nga paagi sa adlaw sa Pentecostes. Ang tumong niini nga leksiyon mao ang pagtabang kaninyo aron mapalawoman ang inyong pagsabot sa mga paagi nga ang Espiritu Santo makapanalangin kaninyo ug makatabang kaninyo nga makat-on unsaon pagdapit niadtong mga panalangin nganha sa inyong kinabuhi.
Pagpalapad sa atong mga abilidad
Tinoa kon unsa kadako ang inyong pag-uyon sa mosunod nga pamahayag sa sukod nga usa hangtod pito, ug irekord ang inyong tubag sa inyong journal sa pagtuon: Masaligon ako nga ako makaila kon mabati nako ang Espiritu Santo sa akong kinabuhi.
Imahe
Diagram nga adunay mga pulong nga Dili Gayod Uyon ug Uyon Gayod.
Unsa nga mga pangutana ang aduna kamo mahitungod sa Espiritu Santo?
Sa inyong journal sa pagtuon, isulat ang ulohan nga “Mga Paagi nga ang Espiritu Santo makatabang kanako.” Pag-andam sa pagdugang og mga butang sa lista sa tibuok leksiyon.
Sa inyong pagtuon karon, makakita kamo og mga ehemplo kon giunsa sa Espiritu Santo paglihok diha sa mga kinabuhi sa mga tawo. Paghunahuna mahitungod og unsa ang inyong makat-onan gikan niini nga mga ehemplo mahitungod kon unsaon sa Espiritu Santo paglihok sa inyong kinabuhi. Usa ka kamatuoran nga gitudlo pag-ayo niini nga mga ehemplo mao nga pinaagi sa Espiritu Santo, ang Langitnong Amahan mitabang kanato nga moduol kang Jesukristo.
Ang Espiritu Santo gibubo sa adlaw sa Pentecostes
Sa wala pa ang Iyang kamatayon, si Jesus mitudlo sa Iyang mga disipulo nga ang Langitnong Amahan magpadala kanila sa Espiritu Santo human si Jesus mibiya gikan sa kalibotan. Siya mipamatuod nga ang Espiritu Santo mosangkap og kahupay, mohatag og direksiyon, ug mopamatuod Kaniya (tan-awa sa Juan 14:16, 26; 15:26).
Ang Pentecostes usa ka adlaw sa pagsaulog [holiday] sa mga Judio nga mahitabo sulod sa 50 ka adlaw human sa pasko sa Pagpalabay. Ang mga Judio gikan sa nagpalibot nga mga nasod mobiyahe ngadto sa Jerusalem alang niini nga nagsaulog sa unang ani sa panahon (tan-awa ang Giya ngadto sa mga Kasulatan, “ Pagkunsad sa Espiritu Santo,” scriptures.ChurchofJesusChrist.org). Basaha ang Mga Buhat 2:1–8, nga mangita kon giunsa pagtuman ang gisaad sa Manluluwas mahitungod sa pagdawat sa Espiritu Santo sa Apostoles nianang adlawa. (Timan-i nga ang “mga dila nga daw kalayo” diha sa bersikulo 3 nagpasabot sa usa ka pagpakita sa presensiya sa Espiritu.)
Sa mga bersikulo 4–8, ang Apostoles nakasinati sa gasa sa mga dila, “usa ka gasa sa Espiritu Santo nga nagtugot sa matag tawo nga gidasig sa pagsulti, sa pagsabot, o paghubad sa dili sinati nga mga pinulongan” (Giya ngadto sa Mga Kasulatan, “ Pinulongan, Gasa sa mga,” scriptures.ChurchofJesusChrist.org).
Sa unsang paagi ang Espiritu Santo mopanalangin sa mga disipulo ug niadtong mga naminaw kanila?
Sa unsang paagi kaha nga ang gasa sa mga dila mipalambo sa abilidad sa Apostoles sa pagtabang sa uban nga moduol kang Kristo?
Sa unsang paagi kaha nato masinati kining maong gasa karon?
Ikonsiderar ang padugang og mga panabot gikan sa mga bersikulo nga inyong natun-an hangtod karon ngadto sa lista nga inyong nabuhat sa inyong journal sa pagtuon.
Si Pedro nagpamatuod kang Jesukristo
Makita nato ang laing paagi nga ang Espiritu Santo makatabang kanato pinaagi sa pagtan-aw sa kaisog nga si Pedro mitudlo ug mipamatuod.
Ibutang sa hunahuna nga ang mga panghitabo nga gihulagway sa Mga Buhat 2 nahitabo dili pa dugay human sa paglansang sa krus ni Jesus, basaha ang Mga Buhat 2:22–24, 32–33, 36 ug pangitaa kon sa unsang paagi ang Espiritu Santo mitabang ni Pedro niini nga kahimtang aron sa pagsangyaw nga adunay kadasig ug kaisog mahitungod kang Jesukristo. (Tan-awa usab sa Mga Buhat 3:12–20.)
Unsay inyong nakita?
Unsay inyong nakat-onan gikan niining asoy mahitungod sa unsang paagi ang Espiritu Santo makatabang kaninyo? (Tan-awa usab sa Mga Buhat 1:8; 4:31.)
Idugang ang inyong mga hunahuna sa inyong lista diha sa inyong journal sa pagtuon.
Ang epekto sa pagpanudlo ni Pedro ngadto sa uban
Ang Espiritu Santo adunay epekto ngadto sa mga nakadungog sa panudlo ni Pedro mahitungod kang Jesukristo. Basaha ang Mga Buhat 2:37–38, 41, nga mangita kon sa unsang paagi ang Espiritu Santo mitabang niining mga tawhana. Ang pulong nga daw gikumot gikan sa bersikulo 37 nagpasabot nga naghingapin nga kaguol o pagbasol ug nagsugyot nga ang mga tawo nagtinguha nga mabag-o.
Unsay mipatigbabaw kaninyo niining mga bersikulo?
Sa unsang paagi nga ang “daw gikumot ang ilang kasingkasing” nakatabang niining mga tawhana nga mas mapaduol kang Jesukristo? (bersikulo 37).
Itandi unsa ang nahitabo sa mga tawo nga gitudloan ni Pedro sa panaad nga gihimo sa Dios ngadto sa Iyang mga sulugoon sa Doktrina ug mga Pakigsaad 100:5–8.
Unsa ang pipila sa mga ehemplo sa mga kausaban ang lagmit idasig sa Espiritu Santo kanato nga buhaton aron makatabang nato nga mahiduol kang Jesukristo?
Ikonsiderar ang pagdugang sa inyong mga panabot gikan sa Mga Buhat 2:37–38, 41 ngadto sa lista sa inyong journal sa pagtuon.
Pagpamalandong sa unsa ang inyong natun-an
1. Rebyoha ang lista nga inyong nabuhat diha sa inyong journal sa pagtuon mahitungod sa mga paagi diin ang Espiritu Santo makatabang kaninyo. Dayon tubaga ang mosunod nga mga pangutana diha sa imong journal sa pagtuon:
Unsa nga panalangin gikan sa Espiritu Santo ang labing nakadani kaninyo?
Nganong ang Espiritu Santo importante man aron matabangan kita nga mahiduol kang Jesukristo ug dalhon ang uban ngadto Kaniya?
Unsa nga mga lakang ang inyong mabuhat aron mas hingpit nga matagamtaman ang mga panalangin sa Espiritu Santo?
Opsiyonal: Gustong Makakat-on pa og Dugang?
Sa unsang paagi nga ang Espiritu Santo makatabang kanato nga mas maduol ngadto sa Langitnong Amahan ug ni Jesukristo?
Si Presidente Dallin H. Oaks sa Unang Kapangulohan nagtudlo:
Imahe
Presidente Dallin H. Oaks
Ang misyon sa Espiritu Santo mao ang pagpamatuod sa Amahan ug sa Anak (tan-awa sa Juan 15:26; 2 Nephi 31:18; 3 Nephi 28:11), aron paggiya kanato sa kamatuoran (tan-awa sa Juan 14:26; 16:13), ug sa pagpakita kanato sa tanang butang nga kinahanglan nga atong buhaton (tan-awa sa 2 Nephi 32:5). Kining personal nga linya sa komunikasyon uban sa atong Langitnong Amahan pinaagi sa Iyang Balaang Espiritu mao ang tinubdan sa atong pagpamatuod sa kamatuoran, sa atong kahibalo, ug sa personal nga paggiya kanato gikan sa mahigugmaong Langitnong Amahan. Usa kini ka mahinungdanong bahin sa Iyang kahibulongang plano sa ebanghelyo, nga nagtugot sa matag usa sa Iyang mga anak sa pagdawat og personal nga pagsaksi sa kamatuoran niini.
(Dallin H. Oaks, “Duha ka Linya sa Komunikasyon,” Liahona, Nob. 2010, 83)
Si Presidente M. Russell Ballard sa Korum sa Napulog Duha ka Apostoles mipamatuod:
Imahe
Presidente M. Russell Ballard
Sa higayon ang tagsa-tagsa … makabati sa Espiritu nga naglihok uban kanila, o kon ilang makita ang ebidensiya sa gugma ug kalooy sa Ginoo sa ilang kinabuhi, sila madasig ug malig-on sa espirituhanong paagi ug ang ilang pagtuo Kaniya molambo.
(M. Russell Ballard, “Now Is the Time,” Ensign, Nob. 2000, 75)
Unsa ang pagbati sa Espiritu Santo, ug unsaon ninyo pag-awhag niini?
Ang bidyo nga “Feeling the Holy Ghost” (3:17) naghatag og mga ehemplo sa mga paagi nga ang mga tawo mobati sa Espiritu Santo. Kini nga bidyo anaa sa ChurchofJesusChrist.org.
Ang bidyo nga “Having the Holy Ghost” (2:56), anaa sa ChurchofJesusChrist.org, naghatag og mga ehemplo kon unsaon sa pagdapit ang Espiritu Santo.
