Mga Buhat 3

Ang Pag-ayo sa Tawo nga Bakol

Si Pedro mitunol sa iyang kamot ngadto sa usa ka tawo nga bakol ug mimando kaniya sa pagbarog ug sa paglakaw.

Usa ka tawo nga dili makalakaw sa iyang tibuok kinabuhi ang gidala didto sa templo sa Jerusalem kada adlaw aron siya makapangayo og kwarta. Iyang nasugatan si Pedro ug Juan, kinsa naghatag kaniya og mas dako nga gasa kay sa kwarta nga iyang gipangayo. Gamit ang awtoridad sa pagkapari ug sa ngalan ni Jesukristo, giayo ni Pedro ang maong tawo. Kadto nga kasinatian naghatag kang Pedro ug sa ubang Apostoles og daghang kahigayonan sa pagpamatuod kang Jesukristo. Kini nga leksiyon gituyo aron matabangan kamo nga mapalig-on ang inyong pagtuo nga ang Langitnong Amahan ug si Jesukristo makatabang kaninyo nga mabuntog ang mga hagit nga inyong giatubang.

Pagdawat sa gamhanang pag-ayo sa Dios

Unsa ang pipila ka pisikal, espirituwal, o emosyonal nga mga hagit o mga kasakit ang nasinati sa mga tawo sa ilang kinabuhi?

Pamalandongi ang usa ka hagit o kasakit nga inyong personal nga giatubang diin kamo gustong mangita og kahupayan o kalig-on sa Langitnong Amahan ug kang Jesukristo aron mabuntog. Isulat kini sa inyong journal sa pagtuon, ug ilakip usab ang inyong mga tubag sa mosunod nga mga pangutana:

Unsa nga mga aksiyon ang inyong nabuhat aron makadawat og tabang alang niini nga hagit o kasakit?
Unsa ang nahibaloan na ninyo mahitungod sa Langitnong Amahan ug kang Jesukristo nga naghatag kaninyo og kompiyansa nga Sila motabang kaninyo?
Unsa nga mga pangutana o mga kabalaka ang anaa kaninyo mahitungod sa pagbuntog niini nga hagit o kasakit?

Si Pedro ug si Juan miayo sa tawo nga bakol

Niini nga leksiyon, kamo adunay kahigayonan sa pagkat-on og pipila ka mga kamatuoran sa ebanghelyo gikan sa asoy sa Mga Buhat 3 diin si Pedro ug Juan miayo sa tawo nga bakol. Sa inyong pagtuon, hatagi og pagtagad ang espirituhanong mga pag-aghat nga inyong madawat. Tinguhaa ang paglig-on sa inyong hugot nga pagtuo nga si Jesukristo mahimong motabang kaninyo niining mga hagit nga inyong giatubang sa mortalidad.

Basaha ang Mga Buhat 3:1–3, nga mangita sa pipila ka mga detalye mahitungod niini nga tawo, kinsa sobra sa 40 anyos (tan-awa sa Mga Buhat 4:22). Mahimong makatabang ang pagkasayod nga ang “limos” nga gisulti sa mga bersikulo 2–3 mao ang mga butang nga gihatag sa mga tawo ngadto sa mga kabos.

Unsa ang pipila sa mga pulong nga lagmit inyong magamit sa paghulagway niini nga tawo ug sa iyang sitwasyon? Ngano man?
Unsa ang kasagarang mga paagi diin ang mga tawo tingali motubag ngadto sa usa nga anaa sa sitwasyon niini nga tawo?

Basaha ang Mga Buhat 3:4–8, nga mangita sa mga kamatuoran nga inyong makat-onan mahitungod sa pagbuntog sa inyong mga hagit o mga kasakit gikan niini nga asoy. Mahimo usab ninyong tan-awon ang “Peter and John Heal a Man Crippled since Birth [Si Pedro ug si Juan Miayo og Tawo nga Bakol sukad sa Pagkatawo]” (3:21), nga anaa sa ChurchofJesusChrist.org.

Peter and John Heal a Man Crippled Since Birth
With authority from Jesus Christ, Peter and John heal a man crippled since birth. Acts 3:1–8

Unsa ang labing mahinungdanon kaninyo gikan niini nga asoy?
Unsa ang natabang niini nga kasinatian kaninyo sa pagkat-on o pagbati mahitungod sa Langitnong Amahan ug kang Jesukristo?

Gitudloan ni Pedro ang kadtong nakasaksi sa milagro nga nahimo kadto pinaagi sa hugot nga pagtuo sa ngalan ni Jesukristo (tan-awa sa Mga Buhat 3:16). Usa ka kamatuoran nga atong makat-onan gikan niini nga asoy mao nga pinaagi sa hugot nga pagtuo kang Jesukristo, kita maayo.

Unsa ang inyong mapaambit gikan niini nga mga bersikulo nga mahimong makatabang sa usa ka tawo nga kasamtangang nakasinati og usa sa pisikal, espirituwal, o emosyonal nga mga hagit o mga kasakit nga inyong naila sa sayong bahin niini nga leksiyon?
Unsa ang atong mabuhat aron makadawat sa gahom sa Langitnong Amahan ug sa Manluluwas aron matabangan kita niini nga mga hagit?

Tan-awa ang “The Wounded Shall be Healed [Ang Samaran Mamaayo]” (5:45), nga anaa sa ChurchofJesusChrist.org. Paminawa ang pagpamatuod ni Elder Neil L. Andersen sa Korum sa Napulog Duha ka Apostoles, ug isulat ang bisan unsa nga mga pulong o hugpong sa mga pulong nga ganahan ninyo o mga impresyon nga inyong nabati samtang kamo nagtan-aw sa bidyo.

The Wounded Shall Be Healed
Our wounds in this life can come from any number of trials. Patiently move forward, and the Savior’s healing power will bring light, peace, and hope.

Si Elder NeilL. Andersen sa Korum sa Napulog Duha ka Apostoles mipamatuod sa gahom sa Manluluwas sa pag-ayo kanato:

Mga kaigsoonan, akong saad diha ninyo nga ang pagpalambo sa inyong [hugot nga] pagtuo diha ni Ginoong Jesukristo magdala kaninyo og dugang nga kalig-on ug mas dakong paglaom. Alang kaninyo, ang matarong, ang Tig-ayo sa atong mga kalag, sa Iyang panahon ug sa Iyang paagi, moayo sa inyong mga samad. Walay inhustisya, walay pagpanglutos, walay pagsulay, walay kasakit, walay pag-antos, walay samad—bisan unsa ka lawom, unsa ka dako, unsa kahapdos—ang dili malakip sa pagkahupay, sa kalinaw, ug malungtarong paglaum diha Kaniya kansang mahangopon nga mga bukton ug samaran nga mga kamot mohangop kanato balik sa Iyang presensiya.

(Neil L. Andersen, “Nasamdan”, Liahona, Nob. 2018, 86)

Unsa ang labing mahinungdanon kaninyo gikan sa mga pagtulon-an ni Elder Andersen?

Unsa nga mga kasinatian ang inyong nasinati o inyong nasayran mahitungod kon asa ang Manluluwas nakahatag og paglig-on o pag-ayo?

Magsulat diha sa piraso sa papel gamit ang ballpen o lapis.

Opsiyonal: Gustong Makakat-on pa og Dugang?

Nganong aduna may mga panahon nga dili kita makadawat sa pagkaayo gikan sa Manluluwas kon kanus-a ug sa unsang paagi nato kini gusto?

Si Presidente Russell M. Nelson mitudlo:

Nahibaloan nako nga, usahay, ang atong ubang labing mainiton nga pag-ampo ingon og wala tubaga. Kita matingala, “Ngano?” Nasayod ako niana nga pagbati! Nasayod ako sa mga kahadlok ug mga luha sa maong mga higayon. Pero nasayod usab ako nga ang atong mga pag-ampo dili ibaliwala. Dili mahitabo nga ang atong [hugot nga] pagtuo dili mamatikdan. Nasayod ako nga ang panglantaw sa maalamon nga Langitnong Amahan mas klaro kay sa atoa. Samtang nahibalo kita sa atong mortal nga mga problema ug kasakit, nasayod siya sa atong imortal nga kauswagan ug potensyal. Kon mag-ampo kita aron makahibalo sa Iyang kabubut-on ug motugyan sa atong mga kaugalingon niini uban sa pailob ug kaisog, ang langitnong pagkaayo mahitabo sa Iyang kaugalingong paagi ug panahon.

(Russell M. Nelson, “Jesukristo—ang Gamhanang Tig-ayo,” Liahona, Nob. 2005, 86)

Si Elder David A. Bednar sa Korum sa Napulog Duha ka Apostoles mitudlo:

Ang pagkamatarong ug hugot nga pagtuo sa tinud-anay gikinahanglan aron sa pag-ayo sa masakiton, bungol, ug bakol—kon ang ingon nga pag-ayo nagtuman sa mga katuyoan sa Dios ug sumala sa Iyang kabubut-on. Busa, bisan kon kita adunay lig-on nga pagtuo, daghang mga kalisdanan ang dili tangtangon. Ug dili tanan nga masakiton ang mamaayo. Kon ang tanang oposisyon gipugngan, kon ang tanang balatian gikuha, niana ang unang mga katuyoan sa plano sa Amahan mapakyas.

(David A. Bednar, “Pagdawat sa Kabubut-on ug Panahon sa Ginoo,” Liahona, Ago. 2016, 22)

Sa unsang paagi nako mabatonan ang makaayo nga gahom sa Manluluwas kon ako makasinati og espirituhanong mga kasakit?

Si Presidente Russell M. Nelson mitudlo:

Ang mga kasakitan magagikan sa espirituhanon ingon man usab sa pisikal nga mga hinungdan. Si Alma ang Batan-on nahinumdom nga ang iyang sala sakit kaayo nga siya gusto nga “hinginlan ug dili na igkita lakip ang kalag ug lawas, nga [siya] dili unta dad-on aron mobarog sa atubangan sa … Dios, aron hukman sa [iyang] mga buhat” [Alma 36:15]. Sa mao nga panahon, sa unsa nga paagi kita iyang maayo?

Mas makahinulsol kita! Kita mahimong mas makabig! Dayon ang “Anak sa Pagkamatarong” mas hingpit nga makapanalangin kanato pinaagi sa Iyang kamot sa pag-ayo.

… [Hugot nga] Pagtuo, paghinulsol, bunyag, pagpamatuod, ug malahutayon nga pagkakabig mosangpot ngadto sa makaayo nga gahom sa Ginoo.

(Russell M. Nelson, “Jesukristo—ang Gamhanang Tig-ayo,” Liahona, Nob. 2005, 86)