Mga Buhat 4–5

Pagsunod sa Dios Kaysa sa Tawo

Sila si Pedro ug Juan gidakop ug gipriso tungod sa pag-ayo ug pagpamatuod sa ngalan ni Jesukristo. Sila sa wala madugay gibuhian ug giingnan nga dili na mosulti o motudlo sa Iyang ngalan. Apan si Pedro ug Juan mipadayon sa pagpamatuod kang Jesukristo, ug sila gidakop ug gipriso pag-usab. Usa ka anghel ang mipagawas kanila gikan sa prisohan ug gisultihan sila nga mobalik ug mopadayon sa pagsangyaw kang Kristo, diin ilang gibuhat. Ang mga lider sa Judio mipadakop kanila og usab ug gibunalan sila. Ang mga lider misugo kanila nga moundang sa pagsangyaw kang Kristo, apan si Pedro ug Juan mitubag nga sila kinahanglan motuman sa Dios kaysa mga tawo. Si Pedro ug Juan nagmaya nga sila nag-antos sa paglutos alang kang Jesukristo. Sa inyong pagtuon karon, paghunahuna mahitungod kon unsaon ninyo pagpalambo sa inyong tinguha nga mosunod sa Dios labaw sa tanan.

Pagbarog sa unsay tinuod

Unsa ang pipila sa mga sitwasyon diin lagmit makapahagit kaninyo o sa uban ang pagtuman sa Dios tungod sa mga pagpamugos gikan sa uban?
Unsa may nakapalisod niining mga sitwasyon?

Si Presidente Thomas S. Monson (1927–2018) miingon:

Sa atong pagpakabuhi matag adlaw, [hapit] dili kapugngan nga ang atong [hugot nga] pagtuo hagiton. Tingali usahay makita nato ang atong kaugalingon nga gilibotan sa uban ug sa gihapon nagbarog nga gamay ra o gani nagbarog nga nag-inusara kabahin sa unsay mahimong dawaton ug unsay dili. Aduna ba kitay moral nga kaisog sa pagbarog nga lig-on alang sa atong mga gituohan, bisan kon ang pagbuhat sa ingon nagkinahanglan nga magbarog kita nga mag-inusara?

(Thomas S. Monson, “Magmaisogon sa Pagbarog nga Mag-inusara,” Liahona, Nob. 2011, 60)

Tubaga ang mosunod nga mga pangutana diha sa inyong journal sa pagtuon:

Unsaon ninyo pagsukod ang inyong pagkaandam motuman sa Dios kaysa magpadala sa mga pagpamugos gikan sa uban?
Unsa ang pipila sa umaabot nga mga sitwasyon diin kamo mahimong mopili sa pagtuman sa Dios kaysa uban?

Sa inyong pagtuon niini nga leksiyon, pangitaa ang mga kamatuoran ug mga pananglitan nga makatabang kaninyo nga makabati og nagtubo nga tinguha sa pagtuman sa Dios labaw sa tanan.

Gidakop sila si Pedro ug Juan tungod sa pagsangyaw ug pag-ayo pinaagi sa ngalan ni Jesukristo

Nag-atubang sila si Pedro ug Juan sa mga sitwasyon diin sila kinahanglan nga mopili taliwala sa pagtuman sa Dios o pagpadala sa pagpamugos gikan sa uban. Human maayo ang tawo nga bakol didto sa templo ug sa pagsangyaw sa ngalan ni Jesukristo, si Pedro ug Juan gidakop, gipriso, ug gisukit-sukit sa mga lider sa Judio (tan-awa sa Mga Buhat 3:1–11; 4:1–7).

Basaha ang Mga Buhat 4:8–21, nga mangita kon giunsa ni Pedro ug Juan pagtubag niini nga sitwasyon. Ikonsiderar ang pagmarka sa mga pulong o mga hugpong sa mga pulong niini nga mga bersikulo nga pamati ninyo importante o makadasig kaninyo sa pagpili sa pagtuman sa Dios labaw sa tanan. Tingali mahimo kamo nga motan-aw sa “Peter and John Are Judged [Gihusgahan si Pedro ug Juan]” (2:51), nga anaa sa ChurchofJesusChrist.org, samtang kamo magsunod diha sa inyong mga kasulatan.

Peter and John Are Judged
Peter and John preach in the name of Jesus Christ and are brought before the leaders of the Jews for questioning. Acts 4:5–21

Unsa nga mga pulong o mga hugpong sa mga pulong ang nagpatigbabaw diha kaninyo niini nga mga bersikulo? Ngano man?

Basaha ang Mga Buhat 5:12–32 ug ipadayon ang inyong pagtuon niini nga asoy. Mahimo usab ninyong ikonsiderar ang pagmarka sa bisan unsang doktrina, mga baroganan, o mga hugpong sa mga pulong nga pamati ninyo importante kaninyo. O makatan-aw kamo sa “Peter and John Continue Preaching the Gospel [Si Pedro ug si Juan Padayon nga Nagsangyaw sa Ebanghelyo]” hangtod sa time code 3:51.

Peter and John Continue Preaching the Gospel
Peter and John continue preaching and healing in the name of Jesus Christ, despite the attempts of the authorities to stop them. Acts 5:12–42

Unsa man ang inyong nakit-an?
Unsa nga mga kamatuoran ang inyong nakat-onan gikan niini nga asoy?

Usa sa mga kamatuoran nga atong makat-onan gikan niini nga asoy mao nga kon kita mopili sa pagtuman sa Dios kaysa mahadlok sa uban, nan Siya maanaa kanato.

Paghunahuna mahitungod sa mga sitwasyon nga inyong nabantayan sa sinugdanan niining leksiyon diin lagmit makapahagit sa pagtuman sa Dios tungod sa pagpamugos gikan sa uban.

Magsulat diha sa piraso sa papel gamit ang ballpen o lapis.

Usa ka moderno nga ehemplo

Si Elder Thierry K. Mutombo sa Seventy mipakigbahin og usa ka ehemplo sa usa ka pamilya nga mipili sa pagtuman sa Dios kaysa mga tawo. Aron maminaw niini nga asoy, tan-awa ang “Kamo Mahimong Gawasnon,” anaa sa ChurchofJesusChrist.org, gikan sa time code 6:43 hangtod 8:51.

Ye Shall Be Free
Elder Mutombo teaches that Jesus Christ is the Light of the World and that He can guide us in dark and troubling times.

Unsa ang nakapadani ninyo pag-ayo mahitungod kon giunsa niini nga pamilya pagtubag ang ilang mga hagit?
Ngano kaha nga importante kaayo ang hugot nga pagtuo niini nga pamilya kang Jesukristo niini nga sitwasyon?

Si Pedro ug si Juan gibuhian

Ang mga lider sa Judio naghisgot unsa ang angay buhaton kang Pedro ug Juan. Usa ka tinahod kaayo nga lider sa Judio nga ginganlan og Gamaliel midasig nila aron tugotan si Pedro ug Juan nga molakaw tungod kay siya nakasabot nga kon si Pedro ug Juan tinuod nga naghimo sa buhat sa Dios, ang mga lider nga Judio dili makapaundang niini (tan-awa sa Mga Buhat 5:29–39).

Basaha ang Mga Buhat 5:40–42, ug ikonsiderar ang pagmarka sa mga pulong o mga hugpong sa mga pulong nga naghulagway unsa ang gibati ni Pedro ug Juan human masinati unsa ang ilang gibuhat.

Opsiyonal: Gustong makakat-on pa og dugang?

Unsa kaha kon ako mobati nga wala mohaom sa grupo tungod kay mipili ako nga motuman sa Langitnong Amahan?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

May panahon nga kamo mobati og kamingaw ug wala masabti—Ako mibati—tungod kay wala kamo mahiangay sa kadaghanan. Pagmapasalamaton nga ang inyong matarong nga kinabuhi nag-umol kaninyo aron dili kamo mahiangay diin dili kamo nahisakop. Kini usa lamang ka lumalabay nga panahon sa personal nga pagsulay ug paglambo. Kini mahulipan sa igong panahon kauban ang mga tinuod nga higala ug mas dako nga kalipay.

(Richard G. Scott, “The Power of Righteousness,” Ensign, Nob 1998, 68)

Unsaon nako pagdepensa ang akong mga pagtuo?

Si Elder Jeffrey R. Holland sa Korum sa Napulog Duha ka Apostoles mipasabot:

Pagmalig-on. Pagpuyo nga matinud-anon sa ebanghelyo bisan og ang uban sa inyong palibot dili matinud-anon. Panalipdi ang inyong mga tinuohan uban sa maayong pamatasan ug kamanggiloy-on, [apan] panalipdi kini.

(Jeffrey R. Holland, “Ang Bili—ug mga Panalangin—sa Pagkadisipulo,” Liahona, Mayo 2014, 9)

Giunsa sa Manluluwas pagpakita nga Siya mituman sa Langitnong Amahan labaw sa tanan?

Ang mosunod nga mga bidyo sa Biblia naghulagway sa tinguha sa Manluluwas nga moalagad sa Dios kaysa mosunod sa mga ideya sa mga tawo.

Tan-awa ang “Jesus Forgives Sins and Heals a Man Stricken with Palsy [Si Jesus Mipasaylo og mga Sala ug Miayo sa usa ka Tawo nga Paralitiko]” (2:57) aron makita kon giunsa sa Manluluwas sa pagpakita ang Iyang gahom ug kaandam sa pagpasaylo sa sala kon ang uban mikwestiyon niini.

Jesus Forgives Sins and Heals a Man Stricken with Palsy
Jesus shows that He has power to both forgive sins and heal physical infirmities. Mark 2:1–12

Tan-awa ang “Jesus Heals A Lame Man on the Sabbath [Si Jesus Miayo sa usa ka Lalaki nga Bakol sa Igpapahulay]” (2:23) aron makita kon giunsa sa Manluluwas pag-ayo ang usa ka tawo bisan kon ang mga lider sa Judio nagtuo nga dili kadto angay nga buhaton sa Igpapahulay.

Jesus Heals a Lame Man on the Sabbath
Jesus performs a miracle by healing an invalid on the Sabbath day. John 5:2–12

Tan-awa ang “Go and Sin No More [Lumakaw Ka, ug Ayaw Na Pagpakasala]” (3:21) aron makita kon sa unsang paagi ang Manluluwas wala mohimaraot sa uban bisan kon ang uban mipugos Kaniya sa pagbuhat sa ingon.