Rebyo 12 sa Doktrinal nga Kahanas

Pangitaa ug Markahi: 1 Mga Taga-Corinto 6:19–20 hangtod Gipadayag 20:12

Mga kamot sa batan-ong lalaki naggunit og pula nga lapis nga pangmarka, samtang nagbasa ug nagtuon sa giablihan nga mga kasulatan diha sa paa. (horiz)

Ang usa sa mga katuyoan sa doktrinal nga kahanas mao ang pagtabang kaninyo sa pagpangita ug pagmarka sa mga pakisayran sa kasulatan ug mahinungdanong hugpong sa mga pulong sa kasulatan diha sa mga tudling sa kasulatan sa doktrinal nga kahanas. Kini nga leksiyon maghatag kaninyo og mga kahigayonan sa pagpangita ug pagmarka sa 13 ka mga tudling sa kasulatan nga makita sa ikaduhang katunga nga bahin sa Bag-ong Tugon.

Mga pakisayran sa kasulatan ug mahinungdanong hugpong sa mga pulong sa kasulatan

Handurawa nga ang inyong higala nakakita ninyo nga nagtuon ug nagmarka sa inyong mga kasulatan. Human makakita og usa ka panid nga adunay daghang marka niini, siya nangutana nganong inyo man nga gimarkahan ang inyong mga kasulatan.

• Unsaon ninyo pagtubag ang inyong higala?

Ang pagmarka o paglinya sa mga kasulatan usa ka epektibo nga paagi sa pag-ila sa pihong mga tudling sa kasulatan gikan sa uban, ug kini makapahimo nimo nga mas dali makakita sa mga tudling sa kasulatan sa umaabot. Niini nga leksiyon aduna kamoy higayon sa pagpangita ug pagmarka sa 13 ka mga tudling sa doktrinal nga kahanas nga anaa sa ikaduhang katunga nga bahin sa Bag-ong Tugon. Aron matabangan kamo nga mabuhat kini, ikonsiderar nga kopyahon ang mosunod nga tsart nganha sa inyong journal sa pagtuon.

Doktrinal nga Kahanas sa Bag-ong Tugon: 1 Mga Taga-Corinto–Pinadayag

1 Mga Taga-Corinto 6:19–20	“Ang inyong lawas mao ang templo sa Espiritu Santo.”
1 Mga Taga-Corinto 11:11	“Hinoon diha sa Ginoo ang babaye dili gawas sa lalaki ni ang lalaki gawas sa babaye.”
1 Mga Taga-Corinto 15:20–22	“Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang [K]risto.”
1 Mga Taga-Corinto 15:40–42	Diha sa Pagkabanhaw, adunay tulo ka ang-ang sa himaya.
Mga Taga-Efeso 1:10	“Usa ka laraw nga pagatumanon inig-abot sa tukma nga panahon, laraw sa paghiusa diha kang Kristo sa tanang mga butang.”
Mga Taga-Efeso 2:19–20	Ang Simbahan “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.”
2 Mga Taga-Tesalonica 2:1–3	“Ang adlaw [ni Kristo] … dili pa moabot, hangtod nga mahitabo una ang pagsupil.”
2 Timoteo 3:15–17	“Ang balaan nga kasulatan … makagagahom sa pagtudlo kanimo ngadto sa kaluwasan.”
Mga Hebreohanon 12:9	Ang Langitnong Amahan mao “ang Amahan sa mga espiritu.”
Santiago 1:5–6	“Kon aduna man kaninyoy nakulangan og kaalam, papangayoa siya sa Dios.”
Santiago 2:17–18	“Ang hugot nga pagtuo patay kon kini walay binuhatan.”
1 Pedro 4:6	“Ang maayong balita [gi]wali hangtod ngadto sa mga patay.”
Pinadayag 20:12	“Ug ang mga patay gipanaghukman … pinasikad sa ilang mga binuhatan.”

Rebyoha kining 13 ka tudling sa kasulatan sa doktrinal nga kahanas ug mahinungdanong hugpong sa mga pulong sa kasulatan, ug ikonsiderar ang pagmarka niini diha sa inyong mga kasulatan.

1. Papili og tulo niini nga mga tudling sa kasulatan sa doktrinal nga kahanas nga pamati ninyo makatabang aron mahiduol kamo sa Langitnong Amahan ug kang Jesukristo. Basaha ang mga tudling, ug ipasabot ang mosunod:

• Unsa ang gitudlo sa tudling mahitungod sa Langitnong Amahan o kang Jesukristo.

• Mga kamatuoran gikan sa tudling nga pamati ninyo mahimong importante kaninyo nga masayran ug ngano.

Sa sunod nga mga adlaw, sugdi pagsag-ulo ang pipila ka mga pakisayran sa kasulatan ug mahinungdanong hugpong sa mga pulong sa kasulatan gikan sa tsart. Hunahunaa kon sa unsang paagi nga ang pagkahibalo niini nga mga bersikulo makapanalangin sa inyong kinabuhi ug sa kinabuhi sa mga tawo nga inyong nailhan.