Mga Buhat 6–7

Si Esteban Nag-alagad sama ni Kristo

Batan-ong lalaki ug batan-ong babaye nga nagtabang sa usa ka tigulang nga babaye sa iyang mga groseri.

Ang pag-atiman sa mga kabos ug uban pang nagkinahanglan og tabang kanunay nga usa ka importanteng bahin sa pagka Kristiyano. Sa dihang ang mga balo gipasagdan, ang Apostoles mipili ni Esteban ug sa laing unom pa aron sa pagpangalagad sa ilang mga panginahanglan. Makapasubo, bisan si Esteban mihimo og gamhanang mga milagro uban sa gahom sa Dios, gibato siya sa mga Judio tungod sa iyang pagpamatuod kang Jesukristo. Sa inyong pagtuon, pamalandong og mga paagi nga kamo makapanalangin sa uban pinaagi sa pagpaningkamot nga mosunod sa Langitnong Amahan ug kang Jesukristo, mahimong sama Kanila, ug magmatuod Kanila.

Ang konseho sa ward mao ang usa ka grupo sa mga miyembro nga adunay piho nga mga calling (bishop, presidente sa elders quorum, presidente sa Relief Society, presidente sa Young Women, presidente sa Primary, ug uban pa) kinsa nagtigom kanunay aron matubag ang lainlaing mga sitwasyon ug mga hagit sa ilang ward. Hunahunaa nga kamo adunay mosunod nga sitwasyon sa inyong ward o branch: Usa ka nag-inusara nga inahan nga ginganlan og Lydia ang adunay usa ka 16-anyos nga batang lalaki, usa ka 7-anyos nga batang babaye, ug usa ka 6-ka-bulan nga masuso. Si Lydia adunay operasyon karong semanaha ug moadto sa ospital sulod sa lima ka adlaw. Unsaon sa nagkalainlaing mga miyembro sa konseho sa ward pagtabang niini nga pamilya?

Ngano kaha nga ang mga konseho sa ward, o uban pang kaparehang organisasyon importante man?
Unsa lagmit ang mabati sa kadtong modawat sa maong tabang gikan sa usa ka konseho sa ward o pareha nga grupo?

Basaha ang Mga Buhat 6:1, nga mangita sa usa ka problema nga giatubang sa nag-unang Simbahan.

Tungod sa gidaghanon sa mga balo nga kabos o kondili nanginahanglan og tabang sa Simbahan, ang Napulog Duha naggahin og daghan sa ilang panahon aron pagsulay sa pagtabang kanila nga sila dili na makagahin sa ilang panahon alang sa pagsangyaw sa ebanghelyo sa paagi nga gisulti sa Manluluwas kanila.

Basaha ang Mga Buhat 6:2–8 ug ilha ang solusyon nga nasabotan sa Napulog Duha.

Magsulat diha sa piraso sa papel gamit ang ballpen o lapis.

Usa ka kamatuoran nga atong maila gikan niini nga mga bersikulo mao kini: Sa atong pagpalambo sa mga Kristohanong hiyas, mas makapangalagad kita ug makapanalangin niadtong kinsa nagkinahanglan.

Unsa ang pipila sa dugang nga mga kinaiya nga anaa ni Jesukristo nga nakatabang Niya pagpangalagad sa kadtong mga nagkinahanglan?

Paggahin og panahon aron mamalandong unsa kamaayo ang inyong pagpalambo niini nga Kristohanong mga kinaiya. Aduna bay bisan asa niini nga mga hiyas ang may kalabotan sa bisan unsa sa imong personal nga mga tumong alang sa Kabataan ug Kabatan-onan nga programa? Kon mao, paggahin og panahon sa pagsulat diha sa inyong journal sa pagtuon kon kumusta ang inyong pagpaningkamot sa pagpalambo niana nga hiyas. Kon wala, ikonsiderar ang paghimo og plano diha sa inyong journal sa pagtuon kon unsaon ninyo pagbuhat sa pagpalambo niana nga Kristohanong kinaiya aron kamo mas makapangalagad ug makapanalangin niadtong kinsa nagkinahanglan.

Ang pagpamatuod ug pagkamartir ni Esteban

Si Elder Bruce R. McConkie (1915–85) sa Korum sa Napulog Duha ka Apostoles misulat:

Ang dagkong mga butang dili dali moabot; ang mga panghitabo nga nag-uyog sa yuta midagan ngadto sa kabukiran sa pagsukol.

(Bruce R. McConkie, “Once or Twice in a Thousand Years,” Ensign, Nob. 1975, 18)

Ang pamahayag ni Elder McConkie magamit ngadto kang Esteban. Bisan og siya “naghimog dagkong mga milagro ug mga katingalahan atubangan sa katawhan[,] … may mga tawo nga misupak ug nakiglantugi [kaniya]” (Mga Buhat 6:8–9). Si Esteban gidala atubangan sa konseho sa mga Judio, ug bakak nga mga saksi ang gidala aron mopamatuod batok kaniya.

Sa dihang si Esteban mibarog atubangan sa mga lider sa Judio, iyang giasoy kon sa unsang paagi sulod sa mga henerasyon nga ang mga Judio misukol sa Espiritu Santo ug misalikway ug mipatay sa mga propeta nga gipadala sa Dios kanila. Si Esteban mipamatuod dayon nga kining masupilon nga mga kinaiya nagpadayon nianang adlawa, sa dihang ang mga katawhan mipatay gani ni Jesukristo, ang Anak sa Dios (tan-awa sa Mga Buhat 7:51–52).

Basaha ang Mga Buhat 7:54–60, nga mangita unsa ang gibuhat ni Esteban bisan pa niana nga kasuko ug pagsupak.

Kini nga painting naghulagway sa pagbato ni Esteban sama sa gihulagway diha sa Mga Buhat 7:54-60. Gikan sa usa ka nagsandig nga posisyon si Esteban miila pinaagi sa paglihok sa presensiya sa Amahan ug sa Anak kinsa nagbarog nga nagsul-ob og puti diha sa ibabaw sa painting diha sa kalangitan nga naabli. Kadtong mibato ni Esteban mibuhat sa ingon inubanan sa kasilag ug grabe nga kabayolente. Si Saulo migunit sa mga sinina sa duha kanila. Duha ka pari nga makita nga walay pakabana nagbarog sa tuo. Ang painting gipirmahan nga, “Walter Rane.”

Unsa ang labing mahinungdanon alang kaninyo diha sa asoy sa pagkamartir ni Esteban?

Sama sa gipakita sa asoy sa pagkamartir ni Esteban, ang mga maayong tawo ug mga ligdong nga tinguha kasagaran magsagubang og “mga kabukiran sa pagsukol.”

Sa unsang paagi nga kamo nakakita niini sa inyong kaugalingong kinabuhi?

Sama ni Esteban, sa inyong pagpili sa pagpakigbahin sa inyong mga tinuohan ug pagpamatuod sa Manluluwas ug sa Iyang ebanghelyo, makasinati kamo og pagsukol o bisan ang paglutos. Si Elder Jeffrey R. Holland sa Korum sa Napulog Duha ka Apostoles mitudlo:

Ako moingon sa tanan ug ilabi na sa kabatan-onan sa Simbahan nga kon wala pa kamo tawaga, moabot ang adlaw nga kamo pagatawgon sa pagpanalipod sa inyong tinuohan o tingali bisan sa paglahutay og personal nga mga pang-abuso tungod kay kamo mga miyembro sa Simbahan ni Jesukristo sa mga Santos sa Ulahing mga Adlaw. Ang maong mga higayon magkinahanglan og kaisog ug maayong pamatasan sa inyong bahin.

(Jeffrey R. Holland, “Ang Bili—ug mga Panalangin—sa Pagkadisipulo,” Liahona, Mayo 2014, 6)

Paggahin og panahon sa pagpamalandong unsaon ninyo pagpili sa pagpamatuod ug pagpanalipod sa inyong Langitnong Amahan ug sa Iyang Hinigugmang Anak sa tibuok niining umaabot nga semana.

Opsiyonal: Gustong Makakat-on pa og Dugang?

Mga Buhat 6:1–6. Kinsa ang gitawag aron motabang sa Apostoles sa temporal nga mga butang karon?

Ingon lamang nga ang Ginoo mitawag og pito ka takos nga lalaki sa pagtabang sa Napulog Duha sa pagsangkap alang sa temporal nga mga panginahanglan sa Simbahan ingon nga girekord diha sa basahon sa Mga Buhat, ang Ginoo nagtawag sa Presiding Bishopric sa pagtabang sa Napulog Duha sa pagsangkap alang sa temporal nga mga panginahanglan sa Simbhan karon. Ang Presiding Bishop ug ang iyang duha ka magtatambag nagserbisyo ubos sa direksiyon sa Unang Kapangulohan sa pagdumala sa temporal nga mga kalihokan sa Simbahan. Ang mga halad sa puasa mga importanteng bahin niini nga programa ug nagsangkap sa temporaryo, makapalahutay sa kinabuhi nga tabang alang sa kabos sa tibuok kalibotan. (Alang sa dugang impormasyon, tan-awa ang hilisgotan “Presiding Bishopric” diha sa newsroom.ChurchofJesusChrist.org.)

Moatubang ba ako sa paglutos o kinahanglan mopanalipod sa akong hugot nga pagtuo?

Tan-awa ang bidyo nga “Ang Bili—ug mga Panalangin—sa Pagkadisipulo” (anaa sa ChurchofJesusChrist.org) gikan sa time code 1:01 hangtod 2:31, o basaha ang pahayag sa ubos.

Ang Bili—ug mga Panalangin—sa Pagkadisipulo
Si Jeffrey R. Holland nag-awhag nato sa pagpuyo nga matinud-anon ug maisugon sa ebanghelyo, bisan og kini lisud.

Si Elder Jeffrey R. Holland sa Korum sa Napulog Duha ka Apostoles mihatag og usa ka ehemplo sa usa ka tawo nga gilutos samtang naningkamot sa pagpamatuod kang Kristo:

Usa ka sister missionary misulat bag-o lang ngari nako: “Ang akong kompanyon ug ako nakakita og tawo nga naglingkod sa plasa sa lungsod nga naniudto. Sa among pagduol, mitan-aw siya ug nakita ang among mga missionary name tag. Lain kaayo ang iyang tinan-awan, mitindog siya ug mihunat sa pagsumbag nako. Nakahupo dayon ko, pero iyang gitutho ang iyang gikaon diri nako ug nagsugod sa pagpamalikas kanamo. Mipalayo mi nga walay gisulti. Pagtrapo na nako sa akong nawong, nahinolan nako ang dinugmok nga patatas nga miigo sa luyo sa akong ulo. Usahay lisod nga mahimong misyonaryo kay diha-diha gusto unta akong mobalik, liaban kadtong gamayng tawo, ug ingnon, ‘NGANO MAN KA!’ Apan wala ko kini buhata.”

Alang niining mahalarong misyonaryo, moingon ko, pinalangga nga anak, ikaw sa imong kaugalingong ubos nga paagi miapil sa pundok sa inilang mga babaye ug mga lalaki kinsa, sama sa gisulti ni propeta Jacob sa Basahon ni Mormon “[mi]palandong sa kamatayon ni [Kristo], ug [mi]pas-an sa iyang krus ug [mi]antos sa pagbiay-biay sa kalibotan.” [Jacob 1:8].

(Jeffrey R. Holland, “Ang Bili—ug mga Panalangin—sa Pagkadisipulo,” Liahona, Mayo 2014, 6)