Rebyo 13 sa Doktrinal nga Kahanas

Sag-uloha ang mga Pakisayran ug ang Mahinungdanong Hugpong sa mga Pulong sa Kasulatan

Ang paghinumdom kon asa makita ang mga tudling sa kasulatan ug unsa ang ilang gitudlo mahimong makatabang kaninyo kon kamo nagpakigbahin sa mga kamatuoran sa ebanghelyo ngadto sa uban. Ang inyong pagtuon karon makatabang gayod kaninyo sa pagsag-ulo sa mga pakisayran sa kasulatan ug mga mahinungdanong mga hugpong sa mga pulong sa kasulatan alang sa pipila ka tudling sa doktrinal nga kahanas sa Bag-ong Tugon.

Sag-uloha ang mga mahinungdanong mga hugpong sa mga pulong sa kasulatan gamit ang mga hulagway

Kini nga leksiyon mahimong makatabang kaninyo sa pagrebyo sa mosunod nga mga tudling sa kasulatan sa doktrinal nga kahanas ug sa pagpamalandong sa unsang paagi nga ang mga kamatuoran nga gitudlo niini makatabang kaninyo sa daghang mga higayon. Kon wala pa ninyo markahi kini nga mga tudling sa kasulatan ug ang ilang mga mahinungdanong mga hugpong sa mga pulong diha sa inyong mga kasulatan, ikonsiderar ang pagbuhat sa ingon.

Pakisayran sa Kasulatan	Mahinungdanong Hugpong sa mga Pulong sa Kasulatan
Pakisayran sa Kasulatan 1 Mga Taga-Corinto 6:19–20	Mahinungdanong Hugpong sa mga Pulong sa Kasulatan “Ang inyong lawas mao ang templo sa Espiritu Santo.”
Pakisayran sa Kasulatan 1 Mga Taga-Corinto 11:11	Mahinungdanong Hugpong sa mga Pulong sa Kasulatan “Hinoon diha sa Ginoo ang babaye dili gawas sa lalaki ni ang lalaki gawas sa babaye.”
Pakisayran sa Kasulatan 1 Mga Taga-Corinto 15:20–22	Mahinungdanong Hugpong sa mga Pulong sa Kasulatan “Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang [K]risto.”
Pakisayran sa Kasulatan 1 Mga Taga-Corinto 15:40–42	Mahinungdanong Hugpong sa mga Pulong sa Kasulatan Diha sa Pagkabanhaw, adunay tulo ka ang-ang sa himaya.

Ihulagway ang mahinungdanong hugpong sa mga pulong

Ang mga hulagway ug uban pang mga biswal nga panan-awon mahimong makatabang kanato sa paghinumdom sa importanteng kasayoran. Hunahunaa kon sa unsang paagi nga ang paggamit og mga biswal makatabang kaninyo sa paghinumdom sa mga pakisayran sa kasulatan ug mahinungdanong mga hugpong sa mga pulong.

• Unsa ang girepresentar sa mosunod nga mga simbolo?

Ang mosunod mao ang mga ehemplo sa mga tudling sa doktrinal nga kahanas nga gihulagway gamit ang mga simbolo o mga imahe. Tan-awa ang mga imahe, ug tan-awa kon maila ba ninyo ang usa ka tudling sa doktrinal nga kahanas ug ang mahinungdanon niini nga hugpong sa mga pulong sa kasulatan.

1. Kompletoha ang mosunod nga kalihokan ug iapil kini diha sa inyong journal sa pagtuon:

Sa upat ka lainlaing mga kard nga sulatanan o sa gagmayng mga panid nga papel, isulat pag usab ang matag usa sa nalista na sa una nga mga tudling sa doktrinal nga kahanas. Sa pikas nga bahin sa matag kard, paghimo og hulagway nga makatabang kaninyo sa paghinumdom sa mga mahinungdanong hugpong sa mga pulong. Mahimo kamong magdrowing sa inyong kaugalingong mga hulagway o mogamit og mga biswal sama sa klip art, mga emoji, o mga litrato. Kini nga kalihokan wala nagkinahanglan nga kamo usa ka hanas nga artist. Ang inyong paghulagway kinahanglan halandomon apan dili makawala sa ligdong nga pagtahod o mohatag og taphaw nga pagtagad sa sagrado nga mga hilisgotan.

Kon kamo mahuman na, gamita ang inyong mga paghulagway sa pagrebyo sa mahinungdanong mga hugpong sa mga pulong sa kasulatan. Kon mahimo, ipakigbahin ang inyong mga paghulagway ngadto sa usa ka higala o sakop sa pamilya. Sulayi sa paghinumdom ang labing daghang mahinungdanong hugpong sa mga pulong kon mahimo.

Paggamit sa mga mahinungdanong hugpong sa mga pulong sa kasulatan ngadto sa kinabuhi

Aron marebyo ang mga tudling nga inyong gibansay sa pagsag-ulo, buhata ang mosunod nga pasulit, nga ilhon kon unsa nga tudling sa doktrinal nga kahanas ang mahimong labing maayong makatabang sa matag mosunod nga mga sitwasyon:

1. Usa ka batan-ong babaye nag-ingon, “Ako nakadungog gikan sa uban nga tungod kang Jesukristo ang tanan mabanhaw. Tinuod ba kana?”

2. Usa ka higala natingala nganong kinahanglan kitang mag-amping sa atong mga lawas kon kita mabanhaw ra man gihapon.

3. Usa ka higala wala maghunahuna nga ang kaminyoon mahimong bililhon nga paningkamot.

4. Usa ka apohang laki sa batan-ong lalaki bag-o lang namatay, ug ang batan-ong lalaki adunay mga pangutana mahitungod sa sunod nga kinabuhi.