Mga Buhat 8:1–3; 9:1–20

“Unsa ang Buot Nimong Ipabuhat Kanako?”

Sa usa ka panahon sa “mapintas nga paglutos batok sa simbahan” (Mga Buhat 8:1), si Saulo mapugsanon nga misulod sa daghang mga panimalay, misikop ug mibilanggo niadtong mga mituo kang Jesukristo (tan-awa sa Mga Buhat 8:3). Sa dihang si Saulo mibiyahe paingon sa Damasco aron ipadayon ang pagpanghasi sa mga Santos, si Jesukristo mipakita sa iyang kaugalingon ngadto kang Saulo (tan-awa sa Mga Buhat 9:3–5). Uban sa dakong katingala, si Saulo nangutana sa Ginoo, “Unsa ang buot nimong ipabuhat kanako?” (Mga Buhat 9:6). Kini nga leksiyon gituyo aron pagtabang ninyo sa pagpamalandong unsa ang gibuhat sa Ginoo aron matabangan kamo nga magbag-o para sa mas maayo ug pagpangita aron mahibalo unsa ang ipabuhat Niya kaninyo.

Usa ka kausaban sa direksiyon

Pagpaligid og usa ka diyolen o bola tabok sa salog. Matikdi ang gipaspason ug direksiyon niini.

• Unsa ang gikinahanglan alang sa diyolen o bola aron mausab ang direksiyon?

• Itandi ang nagligid nga butang ngadto sa usa ka tawo, unsa ang pipila sa mga hinungdan nga ang usa ka tawo lagmit mausab alang sa mas maayo ug usbon ang direksiyon sa ilang kinabuhi? Unsa ang pipila ka mga hinungdan nga tingali dili nila kini buhaton?

Paghunahuna mahitungod sa direksiyon sa inyong kaugalingong kinabuhi. Sa unsang mga paagi kamo makabati sa paghigugma ug pagtugot sa Ginoo? Aduna bay bisan unsang kausaban sa direksiyon sa inyong kinabuhi nga lagmit gidapit kamo sa Ginoo nga inyong buhaton? Pagtinguha og pagpadayag alang niini nga mga pangutana samtang magtuon kamo niini nga leksiyon.

“Saulo, Saulo, nganong gilutos mo man ako?”

Ang Ginoo mitabang sa usa ka tawo nga ginganlan og Saulo aron mabag-o ang iyang kinabuhi. Sa sinugdanan, si Saulo usa ka Pariseo kinsa “naghimog kadaot sa simbahan” (Mga Buhat 8:3). Siya nagtugot sa kamatayon sa disipulo nga si Esteban (tan-awa sa Mga Buhat 7:58; 8:1; 22:20) ug “[mi]dakop ug [mi]bun-og [niadtong] nagtuo [sa Ginoo]” (Mga Buhat 22:19).

1. Kompletoha ang mosunod nga kalihokan diha sa inyong journal sa pagtuon:

Bahina ang usa ka panid sa inyong journal ngadto sa tunga, ug sulati og ulohan ang usa ka bahin nga “Giunsa sa Ginoo pagtabang si Saulo nga mag-usab.” Sulati og ulohan ang pikas bahin nga “Tubag si Saulo ngadto sa Ginoo.” Pagbasa og usa o daghan pang mga asoy mahitungod sa kasinatian ni Saulo sa dalan paingon sa Damasco, ug sulati ang tsart base sa unsa ang inyong nakit-an.

• Mga Buhat 9:3–20 (Si Lucas misulat mahitungod sa pagkakabig ni Saulo)

• Mga Buhat 22:6–16 (Gisultihan ni Saulo ang uban sa istorya sa iyang pagkakabig)

• Mga Buhat 26:12–20 (Si Saulo misugilon kang Hari Agrippa sa iyang pagkakabig)

Mahimong tan-awon usab ninyo ang bidyo nga “The Road to Damascus [Ang Dalan paingon sa Damasco]” (5:21), anaa sa ChurchofJesusChrist.org.

The Road to Damascus

Saul takes his journey to Damascus. While on the road, Jesus appears to Saul. He is blinded by the event. Ananias restores Saul’s sight. Saul is baptized. Acts 22

Base sa unsa ang inyong nasulat sa inyong journal, paghunahuna mahitungod sa unsa nga mga kamatuoran o mga leksiyon ang inyong nakat-onan gikan niini nga asoy.

Ang Ginoo nagtinguha sa atong kabag-ohan

Paggahin og higayon sa paghunahuna mahitungod sa usa ka kaila ninyo nga nabag-o tungod sa impluwensiya ni Jesukristo sa ilang kinabuhi.

• Sa inyong hunahuna giunsa kaha ni Jesukristo pag-impluwensiya kini nga tawo aron mag-usab?

Aron makakita og ehemplo sa usa ka tawo nga nagbag-o, tan-awa ang bidyo nga “His Grace: Change Is Possible through Christ [Iyang Grasya: Ang Pagbag-o Posible pinaagi ni Kristo]” (3:29), nga mangita kon giunsa sa Ginoo pagtabang ang usa ka tawo nga ginganlan og Kenny sa pag-usab sa dagan sa iyang kinabuhi. Kini nga bidyo anaa sa ChurchofJesusChrist.org.

His Grace: Change Is Possible Through Christ

Have you ever felt like you’re too far off the path to change? Kenny shares his story of how change is possible through God’s grace

Alang kang Saulo, kinsa kanunay giila sa iyang Latin nga ngalan nga Pablo (tan-awa sa Mga Buhat 13:9), ang pagsunod sa mga direksiyon sa Ginoo hingpit nga nakapausab sa iyang kinabuhi. Si Pablo mihunong sa paglutos sa mga Kristiyano ug hinuon nahimong gamhanang disipulo ni Jesukristo. Si Pablo mibiyahe ngadto sa daghang mga nasod isip usa ka misyonaryo ug mihimo og mga makapadasig ug makatudlo nga mga sulat ngadto sa mga Santos. Ang napulog upat niini nga mga sulat nalakip sa Bag-ong Tugon (tan-awa sa Giya ngadto sa mga Kasulatan, “Pablo,” scriptures.ChurchofJesusChrist.org). Ang desisyon ni Pablo nga mosunod kang Jesukristo nagpadayon sa pagpanalangin sa dili maihap nga mga tawo karon.

Kini nga infographic magpakita ninyo og pipila sa mga dagkong hitabo sa kinabuhi ni Pablo ug sa iyang mga biyahe isip misyonaryo. Mahimong makatabang ang pagrebyo niini matag karon og unya samtang inyong tun-an ang mga kasinatian ug mga sinulat ni Pablo.

Ang Ginoo nasayod usab kanato ug nagdapit kanato sa pagbuhat og mga kabag-ohan sa atong kinabuhi. Kini lagmit dagkong mga pagpahiangay, apan mahimo usab nga gagmay lang kini nga mga kabag-ohan.

2. Kompletoha ang mosunod nga kalihokan diha sa inyong journal sa pagtuon:

Sa inyong journal, bahina og katunga ang lahi nga panid ug sulati og ulohan ang usa ka bahin nga “Giunsa sa Ginoo pag-awhag kanako aron magbag-o” ug sa pikas nga bahin nga “Ang akong tubag sa Ginoo.” Pamalandongi ang mosunod nga mga pangutana aron matabangan kamo sa pagsulat og tubag sa inyong journal sa pagtuon ubos sa “Giunsa sa Ginoo pag-awhag kanako aron magbag-o.”

• Bisan tuod ang Ginoo lagmit wala magpakita kaninyo sa panan-awon, unsa ang Iyang nabuhat, o unsa ang Iyang ginabuhat, aron pagtabang kaninyo sa paghimo og positibo nga kabag-ohan sa inyong kinabuhi?

• Kinsa ang Iyang gipadala aron matabangan kamo nga magbag-o alang sa mas maayo?

Ubos sa “Ang akong tubag sa Ginoo,” pagsulat mahitungod sa unsaon ninyo pagtubag sa mga paningkamot sa Ginoo sa pagtabang ninyo nga magbag-o alang sa mas maayo.

Opsiyonal: Gustong Makakat-on pa og Dugang?

Mga Buhat 9:5. Unsay gipasabot sa “pagpatid batok sa mga tunokon”?

Usa ka hait nga bangkaw o lipak ang kasagarang gamiton sa pagtusok sa mga hayop aron sila mopadayon sa unahan. Ang mga hayop nga molihok pinaagi sa pagpatid inay nga mopadayon sa unahan mahimong mas makapasakit sa ilang kaugalingon. Pinaagi sa paggamit niini nga analohiya, ang Ginoo mitabang ni Saulo nga makakita nga ang pagpakig-away batok Kaniya magdala lamang og kasakit sa iyang kaugalingon.

Unsa nga mga kabag-ohan ang lagmit ipahimo sa Ginoo kanako?

Si Sister Becky Craven, Ikaduhang Magtatambag sa Kinatibuk-ang Kapangulohan sa Young Women, mitudlo:

Kini mahimong usa ka kausaban sa hunahuna, usa ka kausaban sa kinaiya, o usa ka kausaban sa direksiyon nga atong gipadulngan. Agig balos sa Iyang bililhon nga bayad alang sa matag usa kanato, ang Ginoo nangayo kanato og kausaban sa kasingkasing. Ang kausaban nga Iyang gihangyo kanato dili alang sa Iyang kaayohan apan alang kanato.

(Becky Craven, “Imo na ang Sukli,” Liahona, Nob. 2020, 58)

Unsa ang akong angay masabtan mahitungod sa akong mga pagpili ug sa direksiyon sa akong kinabuhi?

Si Elder Jeffrey R. Holland sa Korum sa Napulog Duha ka Apostoles mitudlo:

Ang Dios wala kaayo maghunahuna kon unsay nanghitabo sa inyong kagahapon apan siya naghunahuna kon unsa kamo karon ug, uban sa Iyang tabang, unsay gusto ninyong mahitabo.

(Jeffrey R. Holland, “Ang Labing Maayo Moabot Pa,” Liahona, Ene. 2010, 21)

Si Elder Dieter F. Uchtdorf sa Korum sa Napulog Duha ka Apostoles mitudlo:

Si Satanas gusto nga kita maghunahuna na nga kon kita makasala nakalabang na kita sa usa ka “punto nga wala nay pagbalik”—nga ulahi na kaayo aron sa pag-usab sa atong padulngan. …

Si Kristo miabot aron sa pagluwas kanato. Kon sayop nga dalan ang atong gitaak, ang Pag-ula ni Jesukristo maghatag kanato og kasegurohan nga … [ang] luwas nga pagbalik posible kon atong sundon ang plano sa Dios alang sa atong kaluwasan. …

Ang gasa sa Pag-ula ni Jesukristo naghatag kanato sa tanang mga higayon ug sa tanang mga dapit sa mga panalangin sa paghinulsol ug kapasayloan. Tungod niini nga gasa, ang oportunidad sa paghimo og luwas nga pagbalik gikan sa makuyaw nga dalan sa sala anaa kanatong tanan.

(Dieter F. Uchtdorf, “Punto sa Luwas nga Pagbalik,” Liahona, Mayo 2007, 99, 101)