Si Felipe (tawo sa Bag-ong Tugon) nagtudlo sa ebanghelyo ngadto sa usa ka Etiopianhon samtang sila nagsakay sa usa ka karwahe. Laing tawo nga gihulagway nga nagmaneho sa mga kabayo ug karwahe. Usa ka lanaw o suba ang makita kilid sa dalan nga ilang giagian. Pakisayran sa Kasulatan: Mga Buhat 8:26-39
Si Felipe usa ka madasigon ug matinud-anon nga misyonaryo kinsa miadto sa desiyerto subay sa mando sa Ginoo. Ang Espiritu nagtultol kang Felipe ngadto sa usa ka Etiopianhon nga tawo nga nagbasa sa mga kasulatan sakay sa iyang karwahe. Dihang si Felipe nangutana kon ang tawo nakasabot sa unsay iyang gibasa, siya mitubag, “Unsaon nako pagkasabot niini kon walay motudlo kanako?” (Mga Buhat 8:31). Tungod kay si Felipe nakasabot ug nahigugma sa mga kasulatan, siya nakatudlo sa Etiopianhon mahitungod kang Jesukristo sa paagi nga nakagiya kaniya aron motuo ug mabunyagan. Sa inyong pagtuon sa Mga Buhat 8:26–40, pamalandong unsaon ninyo paggamit sa mga kasulatan aron matabangan ang uban nga motuo ug moadto ngadto kang Jesukristo.
Paggamit sa husto nga mga himan
Ang paggamit sa husto nga himan makatabang kaninyo nga mas paspas o mas sayon ra nga makatukod o makaayo og mga butang. Handurawa unsa kalisod nga magtukod o mag-ayo og mga butang kon walay husto nga mga himan. Ikonsiderar unsa ang gamit sa mosunod nga mga himan.
Imahe
Martilyo
Imahe
Gabas
Imahe
Kombinasyon nga Katala
Kanus-a man nga mapuslanon kini nga mga himan?
Unsaon ninyo nga epektibo kining magamit?
Sa susamang paagi, ang pihong mga himan ug mga kahanas mahimong magamit sa pagtukod ug pag-ayo sa atong tinguha sa pagsunod sa Manluluwas ug pagpuyo sa Iyang ebanghelyo.
Unsa ang pipila sa espirituhanong mga himan o mga kahanas nga nakatabang kaninyo sa paglambo diha sa ebanghelyo?
Unsaon ninyo paggamit niini nga mga himan aron sa pagdapit og laing tawo nga moduol ngadto sa Manluluwas?
Usa niini nga mga himan mao ang atong abilidad sa pagsabot ug paggamit sa mga kasulatan, ilabi na nga kini nagtudlo ug nagpamatuod mahitungod kang Jesukristo. Pamalandong sa makadiyot kon unsa ka kakomportable nga mogamit sa mga kasulatan sa pagdapit sa uban nga moduol ngadto kang Jesukristo. Sa inyong pagtuon niini nga leksiyon, tinguhaa ang giya pinaagi sa Espiritu Santo aron mahibalo unsaon ninyo nga mas magamit ang mga kasulatan aron sa pagtabang sa pagdala sa uban ngadto sa Manluluwas.
Si Felipe gitawag didto sa desiyerto
Ang Mga Buhat 8 nagtala og pipila ka kasinatian ni Felipe, usa sa pito ka igsoong lalaki nga gitawag sa Apostoles ngadto sa pangalagad (tan-awa sa Mga Buhat 6:3–6). Aron makalingkawas sa nagkadaghan nga pagpanglutos didto sa Jerusalem, si Felipe miadto sa Samarya aron makapadayon sa pagpakigbahin sa ebanghelyo. Pinaagi sa pagkapari, siya mihimo og mga milagro, miayo sa daghang tawo, ug “nagwali kang Kristo ngadto kanila” (tan-awa sa Mga Buhat 8:5–8). Sa inyong pagtuon sa mosunod nga asoy, pangitaa ang mga himan nga gigamit ni Felipe aron molampos sa wala damhang tahas nga iyang nadawat gikan sa Ginoo.
Basaha ang Mga Buhat 8:26–39, ug handurawa ang mga hitabo nga gihulagway niini nga asoy. Mahimo ninyong markahan ang mga pulong ug mga hugpong sa mga pulong nga makahuloganon alang kaninyo. (Timan-i nga ang usa ka eunuch mao ang usa ka sinaligan nga alagad, ug si Esaias mao ang Griyegong ngalan ni propeta Isaias.)
1. Tubaga ang mosunod nga mga pangutana diha sa inyong journal sa pagtuon:
Sa unsang mga paagi nga ang Ginoo migiya ni Felipe? Nganong importante man ang pagsunod sa mga pag-aghat sa Ginoo samtang kita mosulay sa pagtabang sa uban aron moduol ngadto Kaniya?
Sa unsang paagi nga si Felipe nakagamit sa iyang kahibalo sa mga kasulatan aron sa pagtudlo sa Etiopianhon mahitungod kang Jesukristo?
Unsa nga mga leksiyon ang labing importante kaninyo niini nga asoy?
Taliwala sa daghang mga kamatuoran niini nga asoy, kamo lagmit nakaila og usa ka baroganan sama sa mosunod: Kon kita nakasabot sa mga kasulatan ug nagtudlo mahitungod sa Manluluwas gikan niini, matabangan nato ang uban nga moduol ngadto Kaniya.
Paggamit sa mga kasulatan sa pagtudlo mahitungod kang Jesukristo
Sa dihang ang Etiopianhon nangutana kon ang kasulatan nga iyang gibasa mahitungod ni propeta Isaias o “ubang lalaki,” matikdi nga ang kahibalo ni Felipe sa mga kasulatan naghimo kaniya nga hinanaling magsugod “sa maong parehang kasulatan, ug [nagwali] ngadto kaniya si Jesus” (Mga Buhat 8:34–35).
Ang tudling sa kasulatan nga gibasa sa Etiopianhon anaa sa Isaias 53, usa ka maanindot nga propesiya mahitungod sa atong Manluluwas, si Jesukristo. Mahimo ninyong i-cross-reference o i-link ang Mga Buhat 8:32–33 ngadto sa Isaias 53:7–8.
Handurawa nga kamo anaa sa kahimtang ni Felipe ug adunay kahigayonan sa pagpakigbahin sa inyong pagpamatuod kang Jesukristo ngadto sa usa ka higala. Basaha ang Isaias 53:3–9, nga may pagtagad sa unsa ang inyong hunahuna ug gibati mahitungod sa Manluluwas samtang kamo nagbasa.
2. Tubaga ang mosunod nga mga pangutana diha sa inyong journal sa pagtuon:
Unsa ang gusto ninyong mahibaloan, mabati, o masabtan sa inyong higala mahitungod kang Jesukristo gikan niini nga tudling? Ngano man?
Unsaon ninyo paggamit sa inyong nahibaloan ug nabati mahitungod kang Jesukristo aron madasig ang inyong higala nga mas mosunod Kaniya?
Napalig-on pinaagi sa pagpangandam
Tungod sa mga paningkamot ni Felipe, ang Etiopianhon nakabig ug nabunyagan (tan-awa sa Mga Buhat 8:36–38). Sama kang Felipe, kita makadasig ug makaawhag sa uban nga mosunod ug mahimong susama kang Jesukristo. Si Elder Ulisses Soares sa Korum sa Napulog Duha ka Apostoles nagtudlo nga ang atong personal nga pagpangandam mahimong makatabang kanato sa pagdasig sa uban nga mas magpaduol ngadto sa Dios:
Imahe
Elder Ulisses Soares, Korum sa Napulog Duha ka Apostoles opisyal nga hulagway.
Kon kita tinud-anay, kinasingkasing, lig-on, ug sinsero nga magtinguhang makakat-on sa ebanghelyo ni Jesukristo ug motudlo niini sa usag usa uban sa tinuod nga katuyoan ug ubos sa impluwensya sa Espiritu, kining mga pagtulun-an mahimong makapausab sa [mga] kasingkasing ug modasig og tinguha nga magpuyo sumala sa mga kamatuoran sa Dios.
(Ulisses Soares, “Unsaon Nako Pagkasabot?,” Liahona, Mayo 2019, 8)
3. Tubaga ang usa sa mosunod nga duha ka hugpong sa mga pangutana diha sa inyong journal sa pagtuon:
Unsa nga mga pagpahiangay ang inyong mabuhat sa inyong personal nga pagtuon sa kasulatan nga mag-andam kaninyo sa pagtabang sa uban nga moduol kang Kristo? Sa unsang mga paagi lagmit kining pagbag-o maglig-on sa inyong pagkamasaligon sa paggamit sa mga kasulatan?
Unsang bahin sa pagtuon sa kasulatan karon ang nakatabang kaninyo nga mobati nga mas duol ngadto sa Langitnong Amahan ug kang Jesukristo? Ngano sa inyong hunahuna nga kana nga bahin mas nakaimpluwensiya kaninyo pag-ayo kaysa sa uban?
Ang mga eunuch mao ang gipakapon nga mga lalaki nga nag-alagad sa daghang karaan nga Near ug Middle Eastern nga mga katilingban. Sila nag-alagad isip mga sundalo, nagbantay sa harianong mga harem, og kasagaran nagkupot og sinaligang mga posisyon sa korte. Ang Etiopianhong eunuch sa Mga Buhat 8:26–39 mao ang responsable sa panudlanan sa Etiopianhong korte.
Ang usa ka matinud-anong estudyante pwede mahimong usa ka dinasig nga magtutudlo
Si Elder Ulisses Soares sa Korum sa Napulog Duha ka Apostoles nagtudlo:
Imahe
Elder Ulisses Soares, Korum sa Napulog Duha ka Apostoles opisyal nga hulagway.
Sa konteksto sa pagkat-on ug sa pagtudlo sa ebanghelyo, usahay susama kita sa Etiopianhon—nagkinahanglan kita sa tabang sa matinud-anon ug dinasig nga magtutudlo; ug usahay susama kita ni Felipe—kinahanglan kitang motudlo ug molig-on sa uban diha sa ilang pagkakabig.