Mga Buhat 9:10–31

“Siya Usa ka Pinili nga Sudlanan Ngari Kanako, sa Pagdala sa Akong Ngalan”

Sa dihang ang Ginoo sa usa ka panan-awon mihangyo kang Ananias sa pagpangita ug pagpanalangin kang Saulo, si Ananias nagduhaduha sa sinugdanan tungod kay nakadungog siya “sa mangilngig nga mga kadaotan nga … gibuhat [ni Saulo]” (Mga Buhat 9:13). Si Jesukristo mitabang kang Ananias nga tan-awon si Saulo sama sa Iyang pagtan-aw kaniya. Kini nga leksiyon gituyo aron matabangan kamo nga makita ang potensiyal nga nakita sa Ginoo sa uban bisan pa man sa ilang mga kahuyang ug miaging mga kasaypanan.

Mga binilanggo ug mga leopardo

Usa ka Amerikanong warden sa prisohan kinsa naningkamot nga matabangan nga mahiuli sa kanhing kondisyon ang kadtong mga anaa sa iyang prisohan sa makausa gisultihan, “Wala ka ba mahibalo nga ang mga leopard dili makausab sa ilang puntik-puntik?” (tan-awa sa Thomas S. Monson, “Tan-awa ang Uban kon Unsa Sila sa Umaabot,” Liahona, Nob. 2012, 69).

• Unsa sa inyong hunahuna ang buot ipasabot niining tawhana bahin niini nga sultihon?

• Nakasaksi o nakasinati na ba kamo sa susama nga kinaiya?

Mitubag ang warden sa prisohan, “Angay nimong masayran nga dili [mga] leopard ang akong gitrabaho. Mga tawo ang akong [gitabangan], ug mangausab sila kada adlaw.” (“Tan-awa ang Uban kon Unsa Sila sa Umaabot,” 69).

• Nganong importante man nga motuo nga ang mga tawo mamahimong mag-usab? Unsa man ang nakalisod sa pagtuo niini?

Sa leksiyon karon atong itandi unsa ang panglantaw sa mga tawo kang Saulo ngadto sa panglantaw sa Manluluwas kaniya. Si Saulo agresibong naglutos sa mga kalalakin-an ug mga kababayen-an nga mga sumusunod ni Jesukristo. Pangitaa unsa ang inyong makat-onan gikan sa Manluluwas mahitungod sa paagi nga inyong gitan-aw ang inyong kaugalingon ug ang uban.

Si Jesukristo mitubag sa mga pag-ampo ni Saulo

Ang Manluluwas mipakita kang Saulo sa dihang nagpaingon siya sa Damasco aron sa pagsikop sa mga miyembro sa Simbahan ni Kristo. Ang kasinatian nakapabuta ni Saulo. Siya wala mikaon ni miinom sulod sa tulo ka adlaw, ug siya nag-ampo sa Dios alang sa tabang (tan-awa sa Mga Buhat 9:1–9, 11).

Basaha ang Mga Buhat 9:10–12, mangita kon sa unsang paagi ang Dios mipili sa pagtubag sa pag-ampo ni Saulo.

• Unsa ang inyong namatikdan niini nga mga bersikulo nga daw importante kaninyo?

• Ngano kaha sa inyong hunahuna nga ang Dios nagpadala man og usa ka tawo nga motabang kang Saulo inay nga yanong ayohon Niya mismo ang pagkabuta ni Saulo?

Basaha ang Mga Buhat 9:13–15 aron makita unsa ang kalainan sa pagtan-aw ni Ananias ug sa Ginoo kang Saulo. (Importante nga mahimatngonan nga kon unsa ang nadungog ni Ananias mahitungod kang Saulo tukma [tan-awa sa Mga Buhat 8:3; 9:1–2].)

Sa inyong journal sa pagtuon, pagdrowing og yanong hulagway nga magrepresentar kang Saulo. Sa pikas nga bahin sa inyong drowing, pagsulat og usa ka hugpong sa mga pulong nga mag-sumada kon unsa ang pagtan-aw ni Ananias ug sa uban ngadto kang Saulo. Sa pikas nga bahin, pagsulat og usa ka hugpong sa mga pulong nga mag-sumada kon unsa ang pagtan-aw sa Ginoo ngadto kaniya.

Si Ananias misalig sa pagtan-aw sa Ginoo ngadto kang Saulo. Basaha sa Mga Buhat 9:17–20 aron makita kon unsa ang sunod nga nahitabo.

Mahimo usab ninyong tan-awon ang bidyo nga “The Road to Damascus [Ang Dalan paingon sa Damasco],” anaa sa ChurchofJesusChrist.org, gikan sa time code 1:55 hangtod 5:21.

The Road to Damascus

Saul takes his journey to Damascus. While on the road, Jesus appears to Saul. He is blinded by the event. Ananias restores Saul’s sight. Saul is baptized. Acts 22

• Unsa sa inyong hunahuna ang importante mahitungod sa paagi nga si Jesus milantaw kang Saulo? Ngano man?

• Unsang mga baroganan ang atong makat-onan mahitungod ni Jesukristo gikan niini nga asoy?

Si Jesukristo makatabang kanato nga makita ang uban pinaagi sa Iyang mga mata

Paggahin og usa ka minuto sa paghunahuna kon giunsa ninyo pagtan-aw ang mga tawo nga kanunay ninyong gikaistorya ug gikauban. Tan-awa ang listahan sa mga tawo sa ubos, ug paggamit og duha ka pulong aron sa paghulagway sa inyong pagtan-aw sa matag usa.

• Usa ka ginikanan

• Usa ka igsoon

• Usa ka magtutudlo

• Usa ka higala

• Inyong kaugalingon

Ang ubang mga kasulatan ug mga pulong sa mga propeta mahimong makatabang nato aron mas masabtan unsa ang pagtan-aw sa Langitnong Amahan ug sa Manluluwas sa matag indibidwal. Basaha ang 1 Samuel 16:7; Doktrina ug mga Pakigsaad 18:10–13, ug ang mosunod nga pamahayag ni Elder Jeffrey R. Holland sa Korum sa Napulog Duha ka Apostoles.

“Duol kon unsa kamo,” nag-agda nato ang mahigugmaong Amahan [sa matag usa kanato], apan midugang Siya, “Ayaw pagplano nga magpabilin nga mao ra gihapon kamo.” Mopahiyom kita ug mohinumdom nga ang Dios determinado sa paghimo kanatong labaw pa kay sa atong mahunahuna.

(Jeffrey R. Holland, “Mga Awit nga Naawit ug Wala Maawit,” Liahona, Mayo 2017, 51)

Base sa unsay inyong nakat-onan, balik sa inyong listahan sa mga tawo ug karon paggamit og duha ka pulong aron ihulagway ang matag usa sama sa pagtan-aw sa Langitnong Amahan ug ni Jesukristo kanila.

1. Tubaga ang mosunod nga mga pangutana diha sa inyong journal sa pagtuon:

• Unsay inyong mabuhat aron mas makita ang mga tawo sama sa pagkakita sa Langitnong Amahan ug ni Jesukristo?

• Nganong mahimo mang lisod ang makanunayong pagtan-aw sa uban sa samang paagi sa pagtan-aw sa Manluluwas kanila?

• Nganong mapuslanon man nga sulayan ang pagtan-aw sa uban sa ingon niana nga paagi?

Bisan kon ang usa ka tawo nag-usab pinaagi sa pagpili sa pagsunod kang Jesukristo, usahay lisod tuohan nga sila tinuod nga nausab. Pipila sa mga tawo naglisod og tuo dihang si Saulo nausab gikan sa pagpanglutos sa mga Kristyano ngadto sa pagkahimong usa ka tinun-an ni Jesukristo mismo.

Basaha ang Mga Buhat 9:20–22, 26–27, mangita sa reaksiyon sa mga tawo kang Saulo karon nga siya nagwali na sa ebanghelyo ni Jesukristo.

• Unsa ang inyong namatikdan mahitungod sa reaksiyon sa mga tawo?

• Unsa ang inyong nakat-onan gikan kang Bernabe niini nga ehemplo?

2. Buhata ang mosunod diha sa inyong journal sa pagtuon:

Irekord unsa ang inyong gustong buhaton o mahinumdoman tungod sa inyong pagtuon karon. Kini mahimong maglakip og mga butang nga inyong mas maayong buhaton aron mas motan-aw sa uban sama sa pagtan-aw sa Ginoo kanila.

Opsiyonal: Gustong Makakat-on pa og Dugang?

Mga Buhat 9:15–17. Unsaon nga ang pagtan-aw nato sa atong kaugalingon ug sa uban sa paagi sama sa pagtan-aw sa Langitnong Amahan ngari kanato makadugang sa atong kamapaubsanon?

Si Elder Dale G. Renlund sa Korum sa Napulog Duha ka Apostoles mipakigbahin sa mosunod nga istorya aron makatabang sa pagtubag niini nga pangutana:

Latter-day Saints Keep on Trying

Dale G. Renlund teaches that being a Saint means to keep trying and encourages us to do so while allowing others the same opportunity.

Mga tuig ang milabay usa ka talagsaong batan-on [nga lalaki] nga ginganlan og Curtis gitawag sa pagmisyon. Siya ang matang sa misyonaryo nga gipangandoy sa matag mission president. Determinado siya ug kugihan. Kausa gihimo siya nga kompanyon ngadto sa usa ka misyonaryo nga bata-bataon, kiwaw nga makig-atubang sa uban, ug kulang sa kadasig sa paghimo sa mga buluhaton.

Usa ka adlaw, samtang nagbisikleta sila, nalingian ni Curtis ang iyang kompanyon nga dili masabtan nga nanaog sa iyang bisikleta ug naglakaw na lang. Sa hilom, nakatuaw sa Dios si Curtis sa kasagmuyo; pagkalisod nga sangonan ka og kompanyon nga kinahanglang dasigon og maayo aron mahimo ang buluhaton. Pagkataud-taod, dunay impresyon si Curtis, sama nga ang Dios miingon kaniya, “Kahibalo ka, Curtis, itandi ngari nako, kamong duha wala kaayoy kalainan.”

(Dale G. Renlund, “Ang mga Santos sa Ulahing mga Adlaw Magpadayon sa Pagpaningkamot,” Liahona, Mayo 2015, 58)

Mga Buhat 9:26–27. Unsaon nako pagtabang sa usa ka tawo nga gustong mag-usab?

Si Elder Jeffrey R. Holland sa Korum sa Napulog Duha ka Apostoles mipasabot:

Tugoti ang mga tawo nga maghinulsol. Tugoti ang mga tawo nga mouswag. Tuohi nga ang mga tawo mausab ug molambo. [Hugot nga pagtuo ba kana]? Oo! [Paglaom ba kana]? Oo! [Gugma nga putli ba kana]? Oo! Labaw sa tanan, kini mao ang gugma nga putli, ang tiunay nga gugma ni Kristo. Kon ang usa ka butang gilubong na sa nangagi, ipabilin kini nga nalubong. Ayaw gamita pagbalik-balik ang inyong gamay nga balde para sa balas ug pala para sa dagat aron sa pagkalot, pagwara-wara niini, ug dayon paglabay ngadto sa usa ka tawo, nga moingon, “Hoy! Nakahinumdom ka ba niini?” Splat!

Nan, tag-ana og unsa? Kana seguro moresulta ngadto sa usa ka bati nga panghitabo sa una nga gikalot sa inyong dapit nga labayanan og basura nga gitabonan og yuta uban sa tubag, “Oo, ako nakahinumdom niana. Nakahinumdom ba ikaw niini?” Splat.

Ug sa dili madugay ang matag usa mopagawas nianang pagbinayloay sa hugaw ug lapokon ug dili makalipay ug makapasakit, diin ang hangyo sa atong Amahan sa Langit mao ang pagkalimpyo ug pagkamabination ug kalipay ug pagkaayo.

Ang ingon niana nga pagpuyo sa nangagi, lakip ang nangaging mga sayop, dili gayod kini sakto! Dili kini mao ang ebanghelyo ni Jesukristo.

(Jeffrey R. Holland, “Ang Labing Maayo Moabot Pa,” Liahona, Ene. 2010, 20–21)