Mga batan-ong lalaki ug mga batan-ong babaye nagtambong sa sayo sa buntag nga klase sa seminary sa Argentina.
Kini nga leksiyon gituyo aron matabangan kamo sa pagtimbang-timbang sa mga tumong nga imong gitakda ug sa personal nga pag-uswag nga imong nasinati sa panahon sa imong pagtuon sa Bag-ong Tugon.
Higugmaa ang Dios sa tibuok ninyong kasingkasing
Sa inyong journal sa pagtuon, pagdrowing og outline sa usa ka kasingkasing. Sa sulod o sa palibot sa kasingkasing, ilista ang mga butang nga inyong nakat-onan o nabati mahitungod sa Manluluwas nga nakapalambo sa inyong paghigugma alang Kaniya. Kon mahimo, pangutana og usa ka higala o miyembro sa pamilya unsa ang ilang ganahan mahitungod sa Manluluwas, ug idugang kini diha inyong lista. Tubaga ang mosunod nga mga pangutana diha sa ubos sa imong kasingkasing nga gidrowing.
Sa unsang paagi nga ang pagkat-on og dugang mahitungod sa gugma sa Langitnong Amahan ug ni Jesukristo alang kaninyo nakapadasig ninyo sa pagsulay og paghigugma Kanila nga mas labaw pa?
Sa unsang paagi nga ang inyong pagsabot sa Ilang gugma alang kaninyo nakatabang sa pagpalambo sa inyong gugma alang sa ubang tawo?
Hinumdomi nga ang Manluluwas nagtudlo nga makapakita kita og paghigugma Kaniya pinaagi sa paghupot sa mga sugo (tan-awa sa Juan 14:15). Si Jesukristo naghatag og hingpit nga ehemplo sa pagpakita og gugma ngadto sa Langitnong Amahan pinaagi sa pagsunod sa tanang mga sugo (tan-awa sa Juan 14:31).
Sa dihang nagtuon kamo sa Juan 14:15, lagmit inyong nasulat sa inyong journal ang mahitungod sa inyong mga tinguha sa paghupot sa mga sugo ug sa inyong mga motibo, o inyong mga rason, sa pagbuhat sa ingon. Kon mao, rebyoha ang inyong nasulat.
1. Tubaga ang mosunod nga mga pangutana diha sa imong journal sa pagtuon:
Unsa ang inyong nabati mahitungod sa inyong mga tinguha karon ug mga motibo sa paghupot sa mga sugo aron mapakita ang inyong paghigugma alang sa Langitnong Amahan ug kang Jesukristo? Itandi ang inyong mga tinguha ug mga motibo karon kaysa kon asa kamo niadtong sa sayo nga bahin sa tuig.
Unsang mga kausaban ang inyong namatikdan sa inyong paghigugma sa Langitnong Amahan ug kang Jesukristo sa dihang inyong gitun-an ang Bag-ong Tugon? Kon nakamatikod mo og bisan unsang kausaban, unsa kaha ang nagdala niining maong mga kausaban?
Aduna bay bisan unsang dugang nga mga kausaban nga inyong nabati nga kinahanglan ninyong buhaton aron mapakita o mapalambo ang inyong paghigugma sa Langitnong Amahan ug kang Jesukristo?
Ang Pag-ula ni Jesukristo: Unsa kaha ang inyong kinabuhi kon wala kini?
Paghunahuna og unsa ang inyong nakat-onan mahitungod sa maulaon nga sakripisyo ni Jesukristo gikan sa Bag-ong Tugon. Pamalandong sa makadiyot unsa ang kahulugan ni Jesukristo ug sa Iyang maulaon nga sakripisyo nganha kaninyo sa personal. Ikonsiderar kon unsa ang inyong kinabuhi kon wala kini.
Imahe
Paghulagway ni Jesus nga Nag-ampo diha sa Tanaman sa Getsemani samtang Iyang gipahigayon ang Pag-ula.
Karon nga nakagahin na kamo og higayon sa pagpamalandong, irekord ang pipila sa inyong mga hunahuna pinaagi sa pagtubag sa mosunod nga mga pangutana. Ilakip ang mahinungdanon nga mga detalye sa inyong mga tubag, ug ilakip ang mga tudling sa kasulatan nga nakaapekto ninyo mahitungod sa sakripisyo ni Jesukristo.
2. Tubaga ang mosunod nga mga pangutana diha sa imong journal sa pagtuon:
Sa unsang paagi nga ang inyong kinabuhi malahi kon ang Manluluwas wala pa unta nag-antos alang kaninyo didto sa Getsemani ug namatay alang kaninyo didto sa krus sa Kalbaryo?
Sa unsang paagi nga ang inyong kinabuhi malahi kon si Jesukristo wala makabuntog sa kamatayon pinaagi sa Iyang mahimayaong Pagkabanhaw?
Unsa kaha ang mahitabo sa plano sa kaluwasan sa Langitnong Amahan kon wala ang maulaon nga sakripisyo ni Jesukristo?
Si Presidente M. Russell Ballard, Akting nga Presidente sa Korum sa Napulog Duha ka Apostoles, mitudlo:
Imahe
Opisyal nga litrato ni Presidente M. Russell Ballard sa Korum sa Napulog Duha ka Apostoles, 2004.
Salamat na lang, si Jesukristo maisogon nga mituman niini nga sakripisyo sa karaan nga Jerusalem. … Si Jesus andam nga nag-antos aron kitang tanan makaangkon sa oportunidad nga mahugasan aron malimpyo—pinaagi sa pagbaton og hugot nga pagtuo diha Kaniya, sa paghinulsol sa atong mga sala, sa pagpabunyag pinaagi sa tukmang awtoridad sa pagkapari, sa pagdawat sa makapalimpyo nga gasa sa Espiritu Santo pinaagi sa kompirmasyon, ug sa pagdawat sa tanang gikinahanglang mga ordinansa. Kon wala ang Pag-ula sa Ginoo, walay usa niini nga mga panalangin ang maanaa kanato, ug dili kita mahimong takos ug andam nga mobalik sa pagpuyo sa presensiya sa Dios.
(M. Russell Ballard, “Ang Pag-ula ug ang Bili sa Usa ka Kalag,” Liahona, Mayo 2004, 85)
Pagpakigbahin sa maayong balita ni Jesukristo
Karon nga kamo nakapamalandong na sa kaimportante sa maulaon nga sakripisyo ni Jesukristo, basaha ang mosunod nga pamahayag ni Presidente Russell M. Nelson.
Imahe
Opisyal nga litrato ni Presidente Russell M. Nelson nga gikuha niadtong Enero 2018
Ang pulong nga ebanghelyo nagpasabot nga “maayong balita.” Ang maayong balita mao ang Ginoong Jesukristo ug ang Iyang mensahe sa kaluwasan. Si Jesus miila sa ebanghelyo nga maglakip sa Iyang misyon ug sa Iyang pangalagad dinhi sa mortalidad.
(Russell M. Nelson, “Ang Tigulang nga mga Misyonaryo ug ang Ebanghelyo,” Liahona, Nob. 2004, 81)
3. Kompletoha ang mosunod nga kalihokan diha sa imong journal sa pagtuon:
Unsa nga maayong balita ang gusto ninyong ipaambit sa uban mahitungod kang Jesukristo ug sa Iyang balaanon nga misyon? Handurawa nga ang Simbahan naglunsad og usa ka kampanya sa social media aron sa pagpakatap og pagkasayod mahitungod sa kinabuhi ug mga pagtulon-an ni Jesukristo nga narekord diha sa upat ka Ebanghelyo. Ang Simbahan naghangyo og mga post sa social media alang sa maong kampanya.
Pagsulat og mubo nga post nga nagpasabot sa inyong maayong balita mahitungod kang Jesukristo. Paghunahuna mahitungod sa usa ka butang nga inyong nakat-onan gikan sa mga Ebanghelyo (Mateo, Marcos, Lucas, ug Juan) nga espesyal alang kaninyo ug nga nakatabang ninyo nga makabati nga mas duol kang Jesukristo. Pananglitan, mahimo ninyong pilion ang usa ka butang nga gitudlo ni Jesus, usa ka milagro nga Iyang gibuhat, usa ka sambingay, usa ka sugilanon kon giunsa Niya pakighalubilo sa uban, usa ka hiyas nga Iyang gipanig-ingnan, o usa ka bahin sa Iyang maulaon nga sakripisyo, kamatayon, ug Pagkabanhaw. Kon mibati kamo nga komportable, mahimo ninyong i-post ang inyong maayong balita sa social media o ipakigbahin kini sa laing tawo. Ilakip ang mosunod nga mga detalye diha sa inyong post:
Paghimo og usa ka ulohan o titulo alang sa inyong post.
Ipasabot kon sa unsang paagi ang maayong balita sa Manluluwas nahimong mahinungdanon nganha kaninyo ug nakatabang kaninyo nga mabati nga mas duol Kaniya.
Ilakip ang usa ka piho nga tudling sa kasulatan gikan sa mga Ebanghelyo (Mateo, Marcos, Lucas, o Juan).
Ilakip ang inyong pagpamatuod ug sa unsang paagi kini nga maayong balita mahimong makabenepisyo sa uban.