Doktrinal nga Kahanas: Lucas 24:36–39

“Ang Espiritu Walay Unod ug Mga Bukog ingon sa Inyong Nakita nga Ania Kanako”

Imahe

Ang nabanhaw nga si Jesukristo (nagsul-ob og puti nga kupo) nagbarog sa entrada sa Tanaman nga Lubnganan. Kristo gihulagway nga nagtan-aw ngadto sa kalangitan.

Sa inyong pagtuon sa Lucas 24:1–9, 36–48, inyong nakat-onan ang mahitungod sa Pagkabanhaw sa Manluluwas. Gamit ang tudling sa doktrinal nga kahanas sa Lucas 24:36–39, kini nga leksiyon makatabang kaninyo nga mapalambo ang inyong kahanas sa doktrina sa pagkabanhaw pinaagi sa pagsag-ulo sa pakisayran ug mahinungdanong hugpong sa mga pulong sa kasulatan, pagpasabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga kinabuhi.

Isag-ulo ug ipasabot

Hinumdomi nga human sa pag-antos sa Manluluwas didto sa Getsemani ug kamatayon sa krus, ang Iyang lawas gikuha ug gibutang sa usa ka lubnganan. Tulo ka adlaw ang milabay, si Jesukristo nabanhaw. Basaha ang tudling sa doktrinal nga kahanas sa Lucas 24:36–39 ug linyahi ang importanteng mga pulong o mga hugpong sa mga pulong nga gitudlo sa Manluluwas ngadto sa Iyang mga disipulo human sa Iyang Pagkabanhaw.

Handurawa nga kamo gisultihan nga motubag sa mosunod nga pag-aghat [prompt] alang sa “Mga Pangutana ug Mga Tubag” nga seksiyon diha sa Alang sa Kalig-on sa mga Kabatan-onan nga magasin. Hunahunaa kon unsa ang mahimo nimong ipakigbahin sa 2–3 nga mga kapahayag [sentence] lamang.

Unsay naka espesyal kaayo kabahin sa Pagkabanhaw ni Jesukristo?

1. Tubaga ang mosunod nga mga pangutana diha sa imong journal sa pagtuon:

Sa unsang paagi kaha ninyo matubag kini nga pag-aghat [prompt] sa duha ngadto sa tulo ka kapahayag?
Nganong importante man kaninyo ang Pagkabanhaw sa Manluluwas?

Aron mabansay ang pagsag-ulo niini nga pakisayran ug mahinungdanong hugpong sa mga pulong sa kasulatan, bahina ang panid sa inyong journal sa pagtuon ngadto sa upat ka mga bahin. Isulat ang pakisayran ug usa sa mga hugpong sa pulong (sama sa gipakita sa ubos) sa matag seksiyon. Ikonsiderar ang pagdrowing og usa ka yanong katugbang nga hulagway o icon aron sa pagrepresentar sa matag usa sa upat ka bahin sa pakisayran sa kasulatan ug nag-unang hugpong. Pagbansay sa pagsulti sa matag usa niini hangtod nga imo nang masulti kining tanan nga dili na magtan-aw. Lucas 24:36–39 Kay ang espiritu walay unod ug mga bukog, ingon sa inyong nakita nga ania kanako

Pagbansay sa paggamit

Daklit nga ribyoha ang mga parapo 5–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022). Usa ka paagi sa pagbuhat niini lagmit ang pagsuta kon makalista kamo sa tanang tulo ka mga baroganan gikan sa panumdoman. Dayon, sa inyong journal sa pagtuon, irekord giunsa ninyo paggamit, o magamit, ang kini nga mga baroganan sa inyong kinabuhi.

Karon ipraktis ang paggamit sa mga baroganan sa pag-angkon og espirituhanong kahibalo ug ang doktrina nga gitudlo sa Lucas 24:36–39 pinaagi sa pagbasa sa sitwasyon nga anaa sa ubos ug sa pagtubag sa mga pangutana nga nagsunod.

Usa sa imong suod nga mga higala, nga si Jinyoon, miuyon nga mokuha og mga leksiyon sa misyonaryo sa inyong balay. Si Jinyoon ug ang iyang pamilya bag-o lang mibalhin sa inyong lungsod, ug wala siyay nasabtan kaniadto o kahibalo mahitungod kang Jesukristo. Sa dihang gitudloan sa plano sa kaluwasan ug sa papel ni Jesukristo, si Jinyoon murag dili komportable apan walay gisulti nga bisag unsa. Unya, human milakaw ang mga misyonaryo, mipaambit siya nimo nga wala siya motuo sa konsepto sa pagkabanhaw ug sa kinabuhi human sa kamatayon.

2. Tubaga ang mosunod nga tulo ka pangutana diha sa inyong journal sa pagtuon. Kon nagkinahanglan kamo og tabang sa paggamit sa matag usa sa mga baroganan sa pag-angkon og espirituhanong kahibalo, ikonsiderar ang pagpamalandong sa mga pangutana nga nalista diha sa mga ulohan sa ubos.

Unsa kaha ang inyong buhaton o isulti aron matabangan si Jinyoon nga makasabot sa inyong tinguha sa pagtabang kaniya?
Unsa nga mga pangutana ang lagmit ninyong ipangutana aron mas masabtan kon unsa ang gituohan ni Jinyoon o nganong ingon siya niadto?
Unsaon ninyo paggamit sa matag usa sa tulo ka baroganan sa pag-angkon og espirituhanong kahibalo aron matabangan si Jinyoon?

Molihok inubanan sa hugot nga pagtuo

Unsaon kaha ninyo paglihok pinaagi sa hugot nga pagtuo niini nga sitwasyon?
Unsa kaha ang inyong ipaambit kang Jinyoon mahitungod sa paglihok pinaagi sa hugot nga pagtuo? Nganong importante man kini nga lakang sa pagpangita og mga tubag sa iyang mga pangutana?

Susiha ang mga konsepto ug mga pangutana inubanan sa mahangtorong panglantaw

Unsa kaha nga mga pangutana ang inyong ipangutana o mahangtorong mga kamatuoran ang inyong mapamatuod kang Jinyoon samtang mosulay kamo sa pagtabang niya nga makita ang iyang pangutana nga may mahangtorong panglantaw?
Sa unsang paagi kaha kini makatabang kang Jinyoon aron makasugod sa pagsabot niini gikan sa usa ka mahangtorong panglantaw?
Unsa ang nakatabang ninyo sa pagsabot sa Pagkabanhaw sa Manluluwas ug ang papel niini sa plano sa kaluwasan?

Tinguhaa ang dugang nga panabot pinaagi sa balaanong gitudlo nga mga tinubdan

Unsa nga piho nga mga kasulatan gikan sa Lucas 24 ang mahimo ninyong gamiton sa pagtubag ni Jinyoon? Unsa nga mga dugang nga kapanguhaan ang lagmit ninyong rebyohon sa dili pa kamo motubag? (Pipila sa mga materyal nga inyong natun-an sa miaging leksiyon sa Lucas 24 mahimong makatabang.)
Asa pa ninyo mahimong ma-refer si Jinyoon kon gusto niya nga magtuon pa og dugang sa iyang kaugalingon?