Efeso 2

Jesucristo, ang Pangulong Batong Panulok

Maaaring nadama ng mga Banal na naninirahan sa Efeso na dating mga Gentil bago sila nagbalik-loob na sila ay tila “mga dayuhan at banyaga” (Efeso 2:19) habang sumasamba sila kasama ng mga Kristiyanong Judio. Ipinaalala ni Pablo sa mga Banal sa Efeso na sila ay nagkakaisa sa pamamagitan ni Jesucristo bilang “mga kapwa mamamayan … ng sambahayan ng Diyos” (Efeso 2:19). Ang simbahang kinabibilangan nila ngayon ay itinatag sa saligan ni Cristo at ng Kanyang mga apostol at propeta, at may kapangyarihan itong pagpalain sila nang magsama-sama sila nang may pananampalataya kay Jesucristo. Ang lesson na ito ay makatutulong sa iyo na tukuyin at hangarin ang mga pagpapalang matatamo dahil pinamumunuan ni Jesucristo ang Kanyang Simbahan ngayon sa pamamagitan ng mga propeta at apostol.

Pakiramdam na kabilang

• Bakit maaaring madama ng isang tao na tila hindi siya nabibilang bilang miyembro ng Ang Simbahan ni Jesucristo ng mga Banal sa mga Huling Araw?

• Kung tila nadarama ng isang tao na hindi siya kabilang sa Simbahan, anong payo ang ibibigay mo sa kanya?

Isipin kung ano ang nadarama mo tungkol sa Simbahan ng Panginoon. Kailan mo nadama na talagang kabilang ka sa Simbahan? May mga pagkakataon ba na nadama mong tila hindi ka kabilang? Ano sa palagay mo ang mga pagpapalang matatamo bilang miyembro ng Simbahan ni Cristo? Sa pag-aaral mo ng lesson na ito, alamin ang mga katotohanan tungkol sa ginawa ng Panginoon para sa atin na makapagdudulot ng pagkakaisa natin bilang mga miyembro ng Kanyang Simbahan.

Paggiba sa mga harang

Noong panahon ni Apostol Pablo, maaaring nadama ng mga hindi Judio na nagbalik-loob sa Kristiyanismo (o yaong mga dating Gentil) na hindi sila kabilang sa iba pang miyembro ng Simbahan at maaaring nadama nila na sila ay “mga dayuhan at banyaga” (Efeso 2:19). Halimbawa, sa templo sa Jerusalem, hindi sila maaaring lumampas sa “pader ng alitang humahati” (Efeso 2:14) patungo sa mga mas sagradong lugar ng templo kung saan ang mga Judio lamang, kabilang ang mga Kristiyanong Judio, ang makakapunta. Dagdag pa rito, hindi nabigyan noon ang mga Gentil ng mga pagpapala ng ebanghelyo hanggang sa magbigay ng paghahayag ang Ama sa Langit kay Pedro (tingnan sa Mga Gawa 10).

Sumulat si Pablo sa mga Banal sa Efeso, na marahil ay mga bagong binyag. Basahin ang Efeso 2:12–14, 18–21, at alamin kung paano pinagpala ng Panginoon ang mga taga Efeso. Maaaring makatulong na malaman na nagsimula ang mga talatang ito sa pag-anyaya ni Pablo sa mga Banal na ito na alalahanin ang kanilang buhay bago sila nagbalik-loob. Ang “sambahayan ng Diyos” (talata 19) na binanggit ni Pablo ay tumutukoy sa Simbahan ni Jesucristo.

Ang Efeso 2:19–20 ay isang doctrinal mastery passage. Maaari mong markahan ang mga doctrinal mastery passage sa partikular na paraan upang madali mong mahanap ang mga ito. Marami ka pang matututuhan tungkol sa doctrinal mastery passage na ito sa susunod na lesson.

Kung gusto mong mapanood ang paglalarawan sa video ng Efeso 2:10–22, maaari mong panoorin ang “Ye Are No More Strangers” (2:27), matatagpuan sa ChurchofJesusChrist.org.

Ye Are No More Strangers

Paul teaches that the Atonement of Jesus Christ is available for all of God's children. Ephesians 2:10–22

• Paano pinagpala ng Panginoon ang mga taga Efeso?

Sa pamamagitan ng Kanyang Pagbabayad-sala, inalis ni Jesucristo ang lahat ng hadlang na naghihiwalay sa mga Judio mula sa mga Gentil at naghihiwalay rin sa mga Gentil mula sa Diyos. Hindi na kinailangan ng mga Gentil na maging mga Judio, ipamuhay ang batas ni Moises, o magpatuli para makasapi sa Simbahan. Nang lumapit sila kay Jesucristo at tanggapin nila ang Kanyang ebanghelyo, sila ay naging kabilang sa “sambahayan ng Diyos” (Efeso 2:19)—bahagi ng mga pinagtipanang tao ng Diyos.

• Sa anong mga paraan giniba ng Tagapagligtas ang mga harang sa pagitan natin at ng ibang mga tao?

• Ano ang nadarama mo dahil “makakalapit … sa Ama” ang lahat (talata 18) sa pamamagitan ng “dugo ni Cristo” (talata 13)?

• Paano mo ibubuod ang mga pagpapala sa talata 19–21 sa isang taong nadaramang hindi siya nabibilang sa Simbahan ng Panginoon?

• Sa iyong palagay, bakit inihambing ni Pablo ang Simbahan sa isang sambahayan o pamilya?

Ang pangulong batong panulok

Noong panahon ni Pablo, ang pangulong batong panulok ay isang malaking bato na nakalagay sa sulok ng pundasyon. Sinusuportahan ng bawat batong panulok ang halos lahat ng bigat ng istruktura at pinagdudugtong ng mga ito ang mga pader. Ang anggulo at paglalagay ng lahat ng iba pang bato ay sinukat mula sa pangulong batong panulok.

Magdrowing ng representasyon ng inilarawan sa Efeso 2:19–21. Maaari mong lagyan ng label ang idinrowing mo gamit ang mga kataga mula sa scripture passage.

• Anong mga katotohanan ang matututuhan natin mula sa paraan kung paano itinatag ni Jesucristo ang Kanyang Simbahan?

1. Sagutin ang mga sumusunod na tanong sa iyong study journal:

• Ano ang nalalaman mo tungkol kay Jesucristo na angkop sa paghahambing sa Kanya sa isang pangulong batong panulok?

• Sa anong mga paraan natin maitatayo ang ating buhay sa Tagapagligtas at sa Kanyang mga apostol at propeta?

• Paano nakatutulong sa atin ang pagsasalig ng ating buhay kay Jesucristo at sa Kanyang mga propeta at apostol upang makahanap tayo ng lugar at layunin sa Simbahan?

Ang iyong saligan

Habang ginagawa mo ang ilan sa mga sumusunod na aktibidad, isipin ang mga tanong na ito:

• Ano ang ginagawa ko upang maitayo ang aking buhay sa saligan ng mga propeta at apostol, na si Jesucristo ang pangulong batong panulok? Anong mga pagpapala ang naranasan ko?

• Sa anong mga paraan nanaisin ng Panginoon na lubos kong maitayo ang aking buhay sa saligang ito?

2. Gawin ang kahit dalawa sa mga sumusunod na aktibidad:

1. Maglaan ng ilang sandali upang pagnilayan kung ano ang magiging buhay mo kung wala ngayon ang mga propeta at apostol ng Panginoon sa mundo. Isipin ang buhay kung wala ang kanilang awtoridad mula sa Panginoon, at ang kanilang mga inspiradong turo, patnubay, at halimbawa na katulad ng kay Cristo. Isulat sa iyong study journal kung paano mag-iiba ang buhay at kung ano ang mawawala sa iyo.

2. Kalaunan sa kanyang sulat, binanggit ni Pablo ang mga karagdagang pagpapalang dumarating sa pamamagitan ng mga propeta, apostol, at iba pang lider ng Simbahan. Basahin ang Efeso 4:11–14 at isiping markahan ang mga pagpapalang ito. Maaaring makatulong na malaman na ang ebanghelista o evangelist ay isang patriarch, at ang pastor ay tumutukoy sa isang lider ng kongregasyon, tulad ng stake o district president, bishop o branch president. Sumulat ng isa o dalawang paraan na naranasan mo ang mga pagpapalang ito.

3. Pumili ng isa o dalawang paksa sa Para sa Lakas ng mga Kabataan (buklet, 2011). Isulat ang mga partikular na paraan na nakatulong sa iyo ang gabay na ito mula sa mga apostol at propeta ng Panginoon.

4. Isipin kung paano ka natulungan ng mga propeta at apostol na makilala ang Tagapagligtas at maging katulad Niya. Isulat ang mga naisip mo sa iyong study journal. Ang mga sumusunod na video (matatagpuan sa ChurchofJesusChrist.org) ay maaaring makatulong sa iyo na magnilay at magsulat.

   • “Excerpts from ‘The Living Christ: The Testimony of the Apostles’” (2:45)

     Excerpts from "The Living Christ: The Testimony of the Apostles"

     As special witnesses of Jesus Christ, the First Presidency and the Quorum of the Twelve shared their testimony of Christ by recording excerpts from the original document, "The Living Christ: The Testimony of the Apostles."

   • “He Lives: Testimonies of Jesus Christ” (2:11)

Ano ang natutuhan mo?

Upang tapusin ang lesson na ito, pag-isipan ang natutuhan mo. Isipin kung paano ka naging kabilang sa “sambahayan ng Diyos” (Efeso 2:19) sa pagtatayo mo ng iyong buhay sa saligan ng mga propeta at apostol, na si Jesucristo ang pangulong batong panulok. Isipin kung paano mo pa lubos na itatayo ang iyong buhay sa saligan ng mga propeta at apostol, na ang Tagapagligtas ang pangulong batong panulok.

Opsiyonal: Gusto Mo Bang May Matutuhan Pa?

Efeso 2:14. Ano ang “gitnang pader ng alitang humahati” na binanggit ni Pablo?

Ang templo sa Jerusalem ay naglalaman ng ilang hukuman o lugar, at may ilang partikular na uri lamang ng mga tao ang maaaring makapasok sa bawat hukuman. Ang mga Gentil ay pinayagang umakyat sa bundok ng templo at makapasok sa panlabas na hukuman, na tinatawag na Hukuman ng mga Gentil. Gayunman, ang pinakaloob na bahagi ng templo ay hindi pwedeng pasukin ng mga Gentil dahil nahaharangan ito ng isang pader na mga isang metro ang taas. Kapag lumampas ang isang Gentil sa pader na ito, maaari siyang ipapatay. Natuklasan ng mga arkeologo ang dalawa sa mga marmol na bloke na bumubuo sa harang na pader na ito, at mababasa sa mga ito ang inskripsyon sa wikang Griyego at Latin: “Walang dayuhan ang lalampas sa mga harang na nakapalibot sa santuwaryo. Ang sinumang mahuling gumawa nito ay walang ibang sisihin kundi ang kanyang sarili para sa kanyang kamatayan na ipapataw sa kanya” (Richard Neitzel Holzapfel, Eric D. Huntsman, Thomas A. Wayment, Jesus Christ and the World of the New Testament [2006], 160).

Kasunod ng ikatlong paglalakbay ni Pablo bilang misyonero, pinaratangan si Pablo ng ilang Judio sa Jerusalem ng pagdadala ng mga Gentil nang lampas sa harang, na humantong sa kaguluhan at kalaunan sa pagdakip kay Pablo (tingnan sa Mga Bilang 1:51; Mga Gawa 21:27–29).

Efeso 2:20. Bakit nakasalig ang Simbahan ni Jesucristo sa mga apostol at propeta, na si Cristo ang pangulong batong panulok?

Ganito ang sinabi ni Elder Jeffrey R. Holland ng Korum ng Labindalawang Apostol tungkol sa saligan ng Simbahan ni Cristo:

Sa panahon ng Bagong Tipan, sa panahon ng Aklat ni Mormon, at sa makabagong panahon ang mga opisyal na ito ang bumubuo ng saligang bato ng totoong Simbahan, na nakapaligid at tumatanggap ng lakas mula sa pangulong bato sa panulok, na “bato ng ating Manunubos, na si [Jesu]cristo, ang Anak ng Diyos” [Helaman 5:12]. … Ang gayong pagsalig kay Cristo ay mananatiling proteksyon sa mga panahon na “kapag ipinadala ng diyablo ang kanyang malalakas na hangin, oo, ang kanyang mga palaso sa buhawi, oo, kapag ang lahat ng kanyang ulang yelo at kanyang malakas na bagyo ay humampas sa inyo.”

(Jeffrey R. Holland, “Mga Propeta, Tagakita, at Tagapaghayag,” Liahona, Nob. 2004, 7)