Seminary
Efeso 6:10–24

Efeso 6:10–24

“Isuot Ninyo ang Buong Kasuotang Pandigma ng Diyos”

Isang binatilyo na nakasuot ng kasuotang pandigma sa panahon ng Bagong Tipan na may espada at kalasag.

Tayo ay nasa digmaan para sa mga kaluluwa ng sangkatauhan. Binigyang-inspirasyon ng Ama sa Langit si Pablo na ituro kung paano natin madaraig ang mga pag-atake ni Satanas. Layunin ng lesson na ito na tulungan kang maunawaan kung ano ang ibinigay ng Diyos upang protektahan ka laban sa mga kasamaan ng mundo, suriin ang iyong kasalukuyang espirituwal na paghahanda, at gumawa ng plano na palakasin ang iyong mga espirituwal na proteksyon.

Si Satanas ay agresibo sa kanyang mga taktika

  • Ano sa palagay mo ang pinakamalaking pagkakaiba ng nararanasan mo bilang tinedyer at ng naranasan ng iyong mga magulang noong nasa edad mo sila?

Basahin ang sumusunod na pahayag ni Elder Robert D. Hales (1932–2017) ng Korum ng Labindalawang Apostol, at maghanap ng isang pagkakaiba na binigyang-diin niya:

Opisyal na larawan ni Elder Robert D. Hales ng Korum ng Labindalawang Apostol, 2003

Hindi kailanman naranasan ng inyong mga ama at lolo na maharap sa mga tuksong karaniwang kinakaharap ninyo. Nabubuhay kayo sa mga huling araw. Kung nais ng mga tatay ninyo na matukso noon, kailangan pa niyang lumabas at hanapin iyon. Hindi na ngayon! Ang tukso na ngayon ang naghahanap sa inyo! Tandaan ninyo iyan! Gusto ni Satanas na maangkin kayo, at “nag-aabang ang kasalanan sa pintuan” [Moises 5:23]. Paano ninyo malalabanan ang kanyang agresibong taktika?

(Robert D. Hales, “Tumayo nang Hindi Natitinag sa mga Banal na Lugar,” Liahona, Mayo 2013, 48–49)

  • Ano ang mga paraan na mahahanap tayo ng tukso ngayon sa halip na tayo ang naghahanap nito?

Isipin ang mga sumusunod na tanong, at isulat ang mga sagot mo sa iyong study journal.

  • Ano ang ilang paraan na personal kang sinusubukang tuksuhin ni Satanas?

  • Ano ang ginagawa mo upang humingi ng tulong sa Panginoon para mapaglabanan ang mga tukso ni Satanas? Ano ang nagawa mo nang mabuti? Ano ang kailangan mong gawin upang mas magpakabuti pa?

Sa pag-aaral mo ng lesson na ito, hingin ang patnubay ng Espiritu Santo upang matulungan kang malaman kung paano mo mahahanap at mas lubos na matatanggap ang proteksyon ng Tagapagligtas sa iyong buhay laban sa mga pag-atake ni Satanas.

Ang proteksyon ng Panginoon

Basahin ang Efeso 6:10–13, at alamin kung ano ang sinabi ni Pablo na nilalabanan ng mga Banal sa kanyang panahon.

  • Anong mga pagkakatulad ang nakikita mo sa nilalabanan ng mga Banal sa Efeso sa kanilang panahon at sa nilalabanan natin ngayon?

  • Bakit nais ng Ama sa Langit at ni Jesucristo na maprotektahan tayo laban sa kasamaan? Ano ang itinuturo sa atin ng hangaring ito tungkol sa Kanila?

  • Ano ang ipinagawa ni Pablo sa Efeso upang mapaglabanan ang mga kasamaang ito?

Mula sa Efeso 6:10–13, nalaman natin na kung isusuot natin ang kasuotang pandigma ng Diyos, mapaglalabanan natin ang kasamaan.

Ang kasuotang pandigma ng Diyos ay isang metapora o simbolo para sa proteksyong ibinibigay sa atin ng Ama sa Langit at ni Jesucristo. Sa digmaang kinakaharap natin, ang kasuotang pandigma ng Diyos ay espesyal na ginawa para sa iyo at sa mga panganib sa iyong buhay. Upang matulungan kang maunawaan ang banal na proteksyong ito, maaari mong kopyahin ang sumusunod na larawan sa iyong study journal o i-print ito. Isulat sa diagram ang iyong mga sagot sa sumusunod na aktibidad:

Isang kasuotang pandigma at kalasag ng isang sinaunang kawal na kumakatawan sa Kasuotang Pandigma o Baluti ng Diyos. May teksto para ipaliwanag ang iba’t ibang elemento ng kasuotang pandigma o baluti. Ayon sa Doktrina at mga Tipan 27: 15-18. “15 Dahil dito, pasiglahin ang inyong mga puso at magalak, at bigkisan ang inyong mga balakang, at magsuot kayo ng aking buong baluti, upang inyong mapaglabanan ang araw ng kasamaan, matapos na maisagawa ang lahat, upang kayo ay makatindig. 16 Tumindig, samakatwid, na ang inyong mga balakang ay may bigkis ng katotohanan, na may baluti sa dibdib ng kabutihan, at ang inyong mga paa ay may panyapak ng paghahanda ng ebanghelyo ng kapayapaan, na ipinadala ko sa aking mga anghel upang ipagkatiwala sa inyo; 17 Taglayin ninyo ang kalasag ng pananampalataya at sa pamamagitan nito ay masusubuhan ninyo ang lahat ng nag-aapoy na sibat ng masama; 18 At taglayin ninyo ang turbante ng kaligtasan, at ang espada ng aking Espiritu, na aking ibubuhos sa inyo, at ng aking salita na aking ihahayag sa inyo, at magsang-ayon sa nauukol sa lahat ng bagay na hinihingi ninyo sa akin, at maging matapat hanggang sa ako ay pumarito, at kayo ay dadalhin, na kung saan ako naroon kayo ay paroroon din. Amen.”

Basahin ang Efeso 6:14–18 upang matukoy ang bawat bahagi ng kasuotang pandigma o baluti ng Diyos, o panoorin ang “The Armor of God” (2:01), matatagpuan sa ChurchofJesusChrist.org. Isulat sa iyong diagram ang kinakatawan ng bawat piraso ng baluti. Maaaring makatulong na malaman na ang “nakasuot sa inyong mga paa” (Efeso 6:15) ay tumutukoy sa pagsusuot ng pamprotektang pantakip sa mga paa.

2:1

The Armor of God

Saints should put on the whole armor of God. Ephesians 6:11–17

Palalimin ang iyong pag-unawa sa mga piraso ng baluti ng Diyos sa pamamagitan ng paggawa sa sumusunod na aktibidad.

Pagsusulat sa isang papel gamit ang bolpen o lapis. 1. Sagutin ang mga sumusunod na tanong para sa kahit isang piraso ng baluti ni Cristo. Kung kailangan mo ng tulong, may ibinigay na halimbawa sa ibaba para sa “mga baywang [na] nabibigkisan ng katotohanan” (Efeso 6:14). Pumili ng isa sa iba pang piraso ng baluti para sa aktibidad na ito.

  1. Anong espirituwal na konteksto ang iniugnay ni Pablo sa pirasong ito ng baluti o kasuotang pandigma?

  2. Ano ang maaaring espirituwal na sinasagisag ng parte ng katawan na pinoprotektahan ng baluti?

  3. Paano natin isusuot ang pirasong ito ng baluti ng Panginoon upang matanggap ang Kanyang proteksyon laban sa kasamaan?

Para sa “mga baywang [na] nabibigkisan ng katotohanan” (Efeso 6:14), ang sumusunod ay maaaring mga sagot sa mga tanong sa itaas: (1) katotohanan; (2) kumakatawan ito sa ating kalinisang-puri o kadalisayang moral; at (3) malalaman natin ang mga katotohanan tungkol sa Ama sa Langit at sa Kanyang plano ng kaligtasan na makapaghihikayat sa atin na manatiling dalisay ang moralidad.

Pagsusuot ng buong baluti ng Tagapagligtas

Binigyang-diin ni Pablo at ng Tagapagligtas ang pagsusuot ng buong baluti o kasuotang pandigma ng Diyos (tingnan sa Efeso 6:11, 13; Doktrina at mga Tipan 27:15).

Pagsusulat sa isang papel gamit ang bolpen o lapis. 2. Sagutin ang mga sumusunod na tanong sa iyong study journal:

  • Anong mga panganib ang nakikita mo sa pagsusuot ng isang piraso lang ng baluti ng Panginoon? Sa palagay mo, bakit nais ng Ama sa Langit at ni Jesucristo na ganap kang maprotektahan?

  • Ano ang gagawin mo bawat araw upang mas ganap na maisuot ang buong baluti ng Diyos para maprotektahan ka laban sa mga tuksong kinakaharap mo?

  • Paano naging pagpapakita ng iyong pagmamahal at tiwala sa Ama sa Langit at kay Jesucristo ang pagbaling sa Kanila para humingi ng tulong?

Opsiyonal: Gusto Mo Bang May Matutuhan Pa?

Ano ang kahalagahan ng mga bahagi ng katawan na pinoprotektahan ng baluti ng Tagapagligtas?

Ipinahayag ni Pangulong Harold B. Lee (1899–1973):

Larawan ng ulo at balikat ng Pangulo ng LDS Church na si Harold B. Lee.

Mayroon tayong apat na bahagi ng katawan na sinabi ni Apostol Pablo na pinakamadaling punteryahin ng mga kapangyarihan ng kadiliman. Ang balakang, na sumisimbolo sa karangalan, kalinisang-puri. Ang puso na sumisimbolo sa ating pag-uugali. Ang ating mga paa, ang ating mga mithiin o layunin sa buhay at sa huli ay ang ating ulo, ang ating mga pag-iisip.

(Harold B. Lee, “Feet Shod with the Preparation of the Gospel of Peace,” Brigham Young University Speeches of the Year [Nob. 9, 1955], 2)

Ano ang magagawa ko upang maisuot ang buong baluti ng Diyos?

Itinuro ni Elder Neal A. Maxwell (1926-2004) ng Korum ng Labindalawang Apostol:

Huling opisyal na larawan ni Elder Neal A. Maxwell, 1992.

Sa paghuhubad ng likas na tao maisusuot na ang buong baluti ng Diyos, na hindi magkakasya noon! (tingnan sa Efeso 6:11, 13).

(Neal A. Maxwell, “Plow in Hope,” Ensign, Mayo 2001, 60)

Itinuro ni Pangulong M. Russell Ballard ng Korum ng Labindalawang Apostol:

Opisyal na larawan ni Pangulong M. Russell Ballard ng Korum ng Labindalawang Apostol, 2004.

Gusto kong isipin na ang espirituwal na baluting ito ay hindi isang buong piraso ng bakal na ginawa para magkasya sa katawan, kundi isang pinagdugtung-dugtong na mga kadena. Ang kadenang ito ay binubuo ng dose-dosenang maliliit na piraso ng bakal na magkakabit-kabit upang mas makagalaw ang nagsusuot nang hindi nababawasan ang proteksyon. Sinasabi ko ito dahil sa aking karanasan ay walang iisang dakila at malaking bagay na maaari nating gawin upang maprotektahan ang ating mga sarili sa espirituwal na paraan. Ang tunay na espirituwal na kapangyarihan ay nasa maraming maliliit na gawain na pinagsama-sama upang maging espirituwal na muog na nagpoprotekta at sumasangga laban sa lahat ng kasamaan.

(M. Russell Ballard, “Be Strong in the Lord,” Ensign, Hulyo 2004, 8)

Paano nauugnay ang mga temple garment sa baluti ng Diyos?

Ipinaliwanag ni Elder Carlos E. Asay (1926–99) ng Panguluhan ng Pitumpu:

Larawan ni Carlos E. Asay

Gayunman, may isa pang bahagi ng baluti na karapat-dapat nating isaalang-alang. Ito ang espesyal na kasuotang panloob na kilala bilang temple garment, o garment ng banal na priesthood, na isinusuot ng mga miyembro ng Ang Simbahan ni Jesucristo ng mga Banal sa mga Huling Araw na tumanggap ng kanilang endowment sa templo. Ang garment na ito, na isinusuot sa araw at gabi, ay may tatlong mahahalagang layunin: ito ay paalala sa mga sagradong tipang ginawa sa Panginoon sa Kanyang banal na bahay, isang nagpoprotektang pantakip sa katawan, at isang simbolo ng pagkadisente ng pananamit at pamumuhay na dapat maglarawan sa buhay ng lahat ng mapagpakumbabang tagasunod ni Cristo.

(Carlos E. Asay, “The Temple Garment: ‘An Outward Expression of an Inward Commitment,’” Ensign, Ago. 1997, 20)