1–2 Tesalonika

Vakai Fakalūkufuá

ʻI he ngaahi tohi ʻa Paula ki he kakai Tesaloniká, naʻá ne fakahīkihikiʻi ai e Kāingalotú ʻi heʻenau faivelenga mo lavameʻa ʻi hono tokoniʻi e niʻihi kehé ke nau haʻu kia Sīsū Kalaisi ʻo fakafou ʻi heʻenau ngaahi sīpinga leleí. Naʻá ne lea fekauʻaki mo ha konga lahi ʻo ‘enau ngaahi fehuʻi fekauʻaki mo e Hāʻele ʻAnga Ua Mai ʻa Sīsū Kalaisí mo fakamahinoʻi ha niʻihi ʻo ʻenau ngaahi fetaʻemahinoʻakí. Naʻá ne kikiteʻi he ʻikai hoko ʻa e Hāʻele ʻAnga Ua Mai ʻa Sīsū Kalaisí kae ʻoua kuo ʻuluaki hoko ha liliu kovi, pe hē mei he moʻoní.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha:

1 Tesalonika 1–3

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke tāpuekina mo takiekina e niʻihi kehé ʻi heʻenau feinga ke ngāue fakaetauhi ʻo hangē ko ia naʻe fai ʻe hotau Fakamoʻui ko Sīsū Kalaisí.

Teuteu ʻa e tokotaha akó: Fakaafeʻi e kau akó ke nau fakakaukau ki ha taimi ne nau ongoʻi ai e ʻofa ʻa e Fakamoʻuí koeʻuhí naʻe tokoniʻi kinautolu ʻe ha taha. Poupouʻi kinautolu ke nau mateuteu ke vahevahe ʻa e founga naʻe tokoniʻi ai kinautolu ʻe he ngāue tokoni ʻa e tokotahá ni ke nau fie muimui ʻia Sīsū Kalaisí.

Ngaahi ʻAtá: Fakaʻaliʻali ha ngaahi ʻīmisi ʻokú ne fakatātaaʻi e ngāue fakaetauhi ʻa Sīsū Kalaisi ki he niʻihi kehé.
Vitiō: “Ngāue Fakaetauhi ʻo Hangē ko e Fakamoʻuí” (13:04; sio mei he taimi 0:45 ki he 1:54)

1 Tesalonika 4–5

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e ngaahi founga te nau lava ai ʻo moʻui ʻa ia ʻe tokoni ke nau mateuteu ki he taimi ʻe toe hāʻele mai ai ʻa Sīsū Kalaisi ki he māmaní.

Teuteu ʻa e tokotaha akó: Kole ki he kau akó ke nau fakakaukauloto pe ʻe fēfē ʻa e taimi ʻe toe hāʻele mai ai ʻa e Fakamoʻuí. Fakaafeʻi ke nau tali e ngaahi fehuʻi ko ʻení ʻi heʻenau tohinoa akó pe ʻi ha laʻipepa: Ko e hā ha meʻa ʻokú ke vēkeveke ai fekauʻaki mo e Hāʻele ʻAnga Ua Maí? Ko e hā ha meʻa ʻokú ke manavasiʻi aí?

ʻĪmisí: Fakaʻaliʻali ha fakatātā ʻokú ne fakatātaaʻi ʻa e Hāʻele ʻAnga Ua Mai ʻa Sīsū Kalaisí.
Laʻipepa tufa: Teuteu ha tatau ʻo e ngaahi laʻipepa tufa ʻo e lēsoní koeʻuhí ke maʻu ʻe he taha kotoa ha taha ʻo e ngaahi laʻipepa tufa ʻe tolú.

Fokotuʻu ki hono akoʻi he konifelenisi fakavitioó: Ko e founga ʻe taha ke vakaiʻi ai e ngaahi ʻekitivitī ako ʻe tolu ʻa e tokotaha akó ko hono ngāue ʻaki ʻa e konga ki he fetalanoaʻaki vitioó ke vahevahe e kau akó ki ha loki fetalanoaʻaki ʻe tolu. Vahe ha taki fakakulupu ki he loki takitaha, pea ʻave ki he kau taki ʻo e kulupú ʻa e ngaahi meʻa ʻi he laʻipepa tufá. Fakaafeʻi e kulupu takitaha ke nau muimui ki he ngaahi fakahinohino ʻi he laʻipepa tufá. ʻI heʻenau ʻosí, ʻai ke vahe ʻe he taki ʻo e kulupú ha tokotaha lea ke ne vahevahe mo e kalasí ʻa e meʻa ne aleaʻi ʻe he kulupú.

2 Tesalonika 2

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa hono moʻoni ʻo e Hē ʻa e Siasi ʻo e Fuakava Foʻoú mei he Moʻoní pea mo e mahuʻinga honofakafoki mai ʻa e Siasi ʻo e Fakamoʻuí ʻi he ngaahi ʻaho kimui ní.

Teuteu ʻa e tokotaha akó: Fakaafeʻi e kau akó ke kumi ʻa e “Hē mei he Moʻoní” ʻi he Ngaahi Tefito ʻo e Ongoongoleleí ʻi he ChurchofJesusChrist.org. ʻAi ke nau omiu mateuteu ke vahevahe ʻa e meʻa ne nau akó pe ʻeke ha faʻahinga fehuʻi pē ʻoku nau maʻu.

Laʻipepa Tufa: Teuteu ha tatau ʻo e “Mahino ʻo e Hē mei he Moʻoní mo e Fiemaʻu ke Fakafoki Mai e Ongoongoleleí” maʻá e tokotaha ako takitaha, pe teuteu ha founga ke fakaʻaliʻali ai e laʻipepa tufá.

Fokotuʻu ki hono akoʻi he konifelenisi fakavitioó: Fakakaukau ke fakaafeʻi ha taha ʻoku ʻikai ʻi he kalasí ke haʻu ʻo fakatātaaʻi e konga ʻo ha tokotaha fie-fanongo ʻi he kamataʻanga ʻo e lēsoní. Tuku ke akoʻi ʻe he kau akó ʻa e tokotahá ni fekauʻaki mo e Hē Fakaʻaufuli mei he Moʻoní mo Hono Fakafoki Mai ʻo e Ongoongoleleí.

Fakataukei Fakatokāteliné: 2 Tesalonika 2:1–3

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e folofola fakataukei fakatokāteliné mo e kupuʻi folofola mahuʻinga ki he 2 Tesalonika 2:1-3 , fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Teuteu ʻa e tokotaha akó: Fakaafeʻi e kau akó ke nau fakalaulauloto ki he fehuʻi ko ʻení pea omi mateuteu ke fakamatalaʻi e founga te nau tali ʻaki iá: “Ko e hā naʻe fiemaʻu ai ke hā mai ʻa e ʻOtuá kia Siosefa Sāmita ke fakafoki mai Hono Siasí kapau naʻe ʻosi fokotuʻu ʻa e tui faka-Kalisitiané pea ʻosi tui ha kakai tokolahi ki he Tohi Tapú?”

Fokotuʻu ki hono akoʻi he konifelenisi fakavitioó: ʻI he ʻekitivitī akoako fakahokó, fakakaukau ke vahevahe e kau akó ki ha kulupu ʻe tolu pea tuku ʻa e kulupu takitaha ki ha loki fetalanoaʻaki. ʻE lava ke teuteuʻi ʻe he kulupu takitaha ha tali ki ha taha ʻo e ngaahi tefitoʻi moʻoni ʻo hono maʻu ʻo e ʻilo fakalaumālié, pea ʻe lava leva ke toe fakataha mai e ngaahi kulupu ʻe tolú ʻo vahevahe.

Siviʻi Hono 10 Hoʻo Akó

Taumuʻa ‘o e lēsoní: ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi e ngaahi taumuʻa kuó ke fokotuʻú pea mo e tupulaki fakataautaha kuó ke aʻusia lolotonga hoʻo ako ʻa e Fuakava Foʻoú.

Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi taumuʻa ne nau fokotuʻu ʻi heʻenau ako e tohi Kalētiá ki he 2 Tesaloniká. ʻAi ke nau omi mateuteu ke vahevahe e fakalakalaka ne nau aʻusiá mo e ngaahi faingataʻa ne nau fehangahangai mo ia ʻi heʻenau ngāue ke aʻusia e ngaahi taumuʻa ko iá.

Meʻa ke fakaʻaliʻalí: Ko ha ʻīmisi kimuʻa pea ʻi he hili (before and after) ʻo ha meʻa naʻe fiemaʻu ke toe fakafoki ki hono tuʻunga kimuʻá, hangē ko ha kā. Ko ha ʻīmisi ʻo ha taha ʻoku tui teunga tau. ʻE lava foki ke tā ʻeni ʻi he palakipoé.