Siviʻi Hono 10 Hoʻo Akó
Kalētia–2 Tesalonika
ʻOku fakataumuʻa e lēsoni ko ʻení ke tokoniʻi koe ke ke vakaiʻi e ngaahi taumuʻa kuó ke fokotuʻú pea mo e ako mo e tupulaki fakatāutaha kuó ke aʻusia lolotonga hoʻo ako e Fuakava Foʻoú.
Ko hono fakamahuʻingaʻi e ngaahi tokoni ʻa e kau akó. ʻOku maʻu ʻe he tokotaha ako takitaha ʻa e ivi ke tokoni ki he ako ʻa e niʻihi kehé. Tokoni ke mahino kiate kinautolu ko e taimi ʻoku nau kau ai ʻi he kalasí, te nau lava ʻo fakaʻaiʻai ha ola lelei ‘i he kau ako kehé. Poupouʻi e kau akó ke nau fakafanongo fakamātoato ʻi he taimi ʻoku lea ai honau kaungā akó pea ke nau fai ha tali ki heʻenau ngaahi fakamatalá. ʻOku ʻomi ʻe he tokotaha ako takitaha ha fakakaukau makehe ki he kalasí te ne lava ʻo tāpuekina e kau ako kehé.
Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi taumuʻa ne nau fokotuʻu ʻi heʻenau ako e tohi Kalētiá ki he 2 Tesaloniká. ʻAi ke nau haʻu mateuteu ke vahevahe e fakalakalaka ne nau maʻú mo e ngaahi faingataʻa ne nau fehangahangai mo ia ʻi heʻenau ngāue ke aʻusia e ngaahi taumuʻa ko iá.
Ngaahi ʻEkitivitī Ako ʻOku Ala Fakahokó
Ko hoʻo fakalakalaka fakalaumālié
ʻOku fakataumuʻa e lēsoni ko ʻení ke tokoniʻi e kau akó ke nau vakaiʻi e ngaahi taumuʻa kuo nau fokotuʻú, ko ʻenau malava ke fakamatalaʻi e ngaahi akonaki ʻi he Fuakava Foʻoú, pea mo e founga ʻoku liliu ai honau ʻulungāngá, loto-holí, mo ʻenau malava ke moʻui ʻaki e ongoongoleleí. Mahalo ne fakamamafaʻi ʻi he ako ʻe he kau akó ʻa e Kalētiá–2 Tesaloniká e ngaahi moʻoni makehe mei he ngaahi moʻoni ʻi he ngaahi ʻekitivitī ko ʻení. Kapau ko ia, ʻe lava ke fulihi e ngaahi ʻekitivitií ke fakakau ai e ngaahi moʻoni ko iá.
Fakakaukau ki ha meʻa te ke malava, talēniti, pe ʻulungaanga ʻokú ke fakatupulaki ʻa ia ʻoku fiemaʻu ki ai ha feinga hokohoko maʻu pē.
-
Ko e hā ʻokú ne fakaʻaiʻai koe ke ke fakaʻaongaʻi e taimi mo e ngāue ʻoku fiemaʻu ke ke fakalakalaka aí?
-
ʻI hoʻo ngāue mālohi ke fakalakalaká, ko e hā ʻokú ke ʻamanaki ʻe hoko ʻe tokoni ke ke ʻiloʻi ʻoku ʻaonga hoʻo ngaahi feingá?
ʻOku tau maʻu ha ngaahi faingamālie lahi lolotonga hotau taimi ʻi he māmaní ke ngāue ke hoko ʻo hangē ko e Fakamoʻuí, ʻa ia ʻokú ne teuteuʻi kitautolu ke toe foki ʻo nofo mo Ia mo ʻetau Tamai Hēvaní. ʻE lava ke ʻaonga ke toutou vakaiʻi ʻetau fakalakalaká mo fai ha ngaahi liliu pē ʻe fiemaʻú.
Ko e taumuʻa ʻo e lēsoni ko ʻení ke ke maʻu ai ha ngaahi faingamālie ke vakaiʻi hoʻo fakalakalaka fakalaumālié. Te ke maʻu e faingamālie ke vakaiʻi e meʻa kuó ke ako mai ʻi he Fuakava Foʻoú pea vakaiʻi hoʻo fakalakalaka fekauʻaki mo e ngaahi taumuʻa kuó ke fokotuʻu koeʻuhí ko e meʻa kuó ke akó.
Toʻo ha kiʻi taimi ke ke fakakaukau ai ki hoʻo ako kimuí ni ʻa e Fuakava Foʻoú mo e ngaahi ngāue kuó ke fai koeʻuhí ko e meʻa kuó ke akó. Mahalo te ke fie fakamanatu ʻa e meʻa kuó ke hiki ʻi hoʻo tohinoá pe ko e meʻa kuó ke fakaʻilongaʻi kimuí ni ʻi hoʻo folofolá ke ʻiloʻi ʻa e ngaahi taumuʻa kuó ke fokotuʻú mo e ngaahi ongo kuó ke maʻú.
ʻE lava ke hiki ʻe he kau akó ʻenau ngaahi fakakaukaú ʻi heʻenau tohinoa akó. ʻI hano maʻu ʻe he kau akó ha taimi feʻungá, fakaafeʻi ke nau vahevahe ʻa e meʻa naʻa nau tohí. ʻE lava ke tokoni ʻa e ngaahi fehuʻi ko ʻení ke ʻilo ʻe he kau akó ʻa e meʻa ke vahevahé.
-
Ko e hā kuó ke ako mei he Fuakava Foʻoú kuó ne tokoniʻi koe ke ke toe ofi ange kia Sīsū Kalaisí?
-
Ko e hā kuó ke ako fekauʻaki mo Ia mei he Fuakava Foʻoú ʻa ia kuo makehe kiate koé?
Kapau ʻe vahevahe ʻe he kau akó ha ngaahi aʻusia fakaako mahuʻinga ʻoku kehe mei he ngaahi meʻa ʻoku hiki atu ʻi laló, tuku ha taimi ke tokoniʻi kinautolu ke vakaiʻi ʻa e meʻa kuo nau akó mo e founga kuo nau tupulaki ai koeʻuhí ko ʻenau ngaahi aʻusiá. Pea ka ʻikai, fakaʻaongaʻi ha ʻekitivitī ʻe taha mei heni pe fakaʻaongaʻi kotoa ia.
ʻEkitivitī A: Ko Hono Fakamatalaʻi ʻo e Hē Fakaʻaufuli mei he Moʻoní mo hono Fakafoki Mai ʻo e Ongoongoleleí
Sio ki he ongo fakatātā ko ʻení, pea fakakaukau ki he ʻuhinga ʻo e fakafoki mai ha meʻá.
-
Ko e hā ka fiemaʻu ai ke toe fakafoki mai ha meʻa?
-
ʻE lava fēfē ke fakafehoanaki ʻa e ngaahi ʻīmisi ko ʻení ki he Hē mei he Moʻoní mo Hono Fakafoki Mai ʻo e Ongoongoleleí?
Ke toe vakaiʻi ʻa e fehokotaki ʻi he Vahaʻa ʻo e Hē mei he Moʻoní mo hono Fakafoki Mai ʻo e Ongoongoleleí, fakakakato ʻa e ʻekitivitī ko ʻení:
Fakakaukauloto ʻoku akoʻi ʻe he kau faifekaú ha taha ʻo ho ngaahi kaungāmeʻá ʻi homou ʻapí. ʻOku nau kole atu ke ke akoʻi ha konga ʻo e lēsoni hokó ʻi he Hē mei he Moʻoní mo hono Fakafoki Mai ʻo e Ongoongoleleí. ʻOkú ke ʻiloʻi ʻoku maheni ho kaungāmeʻá mo e Tohi Tapú, ko ia ʻoku hangē ha fakakaukau lelei ke fakaʻaongaʻi ha ngaahi veesi mei he Fuakava Foʻoú lolotonga e lēsoní.
Fakaʻaongaʻi ʻa e Ngāue 3:21 ; ʻEfesō 1:10 ; ʻEfesō 2:19–22 ; mo e 2 Tesalonika 2:1–3 (pe ngaahi veesi kehe te ke filí), hiki e meʻa te ke ala lea ʻaki lolotonga e lēsoní ke tokoni ke mahino ki ho kaungāmeʻá e ʻuhinga ʻe fiemaʻu ai ke fakafoki mai ʻe he Fakamoʻuí ʻEne ongoongoleleí ki he māmaní.
ʻE lava ke fakaafeʻi e kau akó ke vahevahe ʻenau ngaahi talí ʻi ha ngaahi hoa, ʻi ha fanga kiʻi kulupu iiki, pe fakakalasi.
ʻEkitivitī E: Fakatupulaki hoʻo ʻofa kia Sīsū Kalaisí mo hoʻo holi ke tauhi kiate Iá
Kapau naʻe fai ʻe he kau akó ha tohi ki honau tuʻunga ʻi he kahaʻú ʻi he lēsoni “Filipai 3,” fakakaukau ke fakaʻaongaʻi ʻa e ʻekitivitī ko ʻení ke tokoni ke nau fakafuofuaʻi ʻenau ʻofa ki he ʻOtuá.
ʻI he lēsoni “Filipai 3,” naʻe ʻoatu kiate koe ʻa e faingamālie ke fai ha tohi ki ho kahaʻú ʻa ia naʻá ke ʻiloʻi ai ʻa e ngaahi feilaulau te ke lava ʻo fai ʻe tokoni ke ke ʻiloʻi lelei ange ai ʻa Sīsū Kalaisi mo teuteu ki he moʻui taʻengatá.
Kapau naʻá ke fakaʻaongaʻi ʻa e faingamālie ko ʻení, vakai ki he tohi naʻá ke fakahokó. Fakafehoanaki e ngaahi ongo ʻokú ke lolotonga maʻu kau kia Sīsū Kalaisí pe ko hoʻo ngaahi holi ke tauhi kiate Iá mo e ngaahi ongo mo e ngaahi holi naʻá ke maʻu ʻi hoʻo fai e tohi ko iá. Kapau ʻoku ʻi ai ha meʻa ʻokú ke fie tānaki ki he tohí ʻo makatuʻunga ʻi hoʻo ngaahi aʻusia kimuí ni maí, ongoʻi tauʻatāina ke fai ia he taimí ni.
Fakakaukau ke fakaafeʻi ha niʻihi te nau loto-fiemālie ke vahevahe ha faʻahinga ʻilo pe fakakaukau ne nau maʻu ʻi heʻenau toe vakaiʻi ʻenau ngaahi tohí. ʻE ala tokoni ʻa e ngaahi fehuʻi ko ʻení ki he kau akó ke nau fakakaukauloto mo vahevahe ʻenau ngaahi fakakaukaú.
-
ʻI hoʻo toe vakaiʻi hoʻo tohí, naʻá ke fakatokangaʻi nai ha liliu fekauʻaki mo hoʻo ʻofa kia Sīsū Kalaisí? Kapau ko ia, ʻokú ke pehē ko e hā naʻe liliu aí?
-
Ko e hā ha ngaahi aʻusia kimuí ni kuó ne fakatupulaki hoʻo ʻofa ki he ʻOtuá mo hoʻo loto fiemālie ke tauhi kiate Iá?
-
ʻOkú ke ongoʻi ko e hā ha niʻihi ʻo e ngaahi sitepu hoko te ke lava ʻo fakahoko ke tokoniʻi koe ke fakatupulaki hoʻo ʻofa ki he ʻOtuá?
‘Ekitiviti F: ʻOku totonu ke tui ʻe he Kāingalotú e teunga tau kakato ʻo e ʻOtuá
-
Ko e hā ʻokú ke manatuʻi fekauʻaki mo e teunga tau ʻo e ʻOtuá? Ko e hā ʻokú ke manatuʻi fekauʻaki mo e ʻuhinga ʻo e konga takitaha? Kapau ʻokú ke fiemaʻu tokoni, vakai ki he ʻEfesō 6:14–18 ki he ngaahi talí.
Fakakaukau ke tā ʻa e fakatātā ko ʻení ʻi he palakipoé pea fakaafeʻi e kau akó ke nau haʻu pea tānaki atu ʻa e ʻuhinga fakalaumālie ki he konga takitaha ʻo e teunga taú.
-
Te ke fakamatalaʻi fakanounou fēfē ʻa e ʻuhinga ʻo e “ʻai kiate kimoutolu ʻa e [teunga] tau kotoa ʻo e ʻOtuá”? ( ʻEfesō 6:11).
Tā ha fakatātā ʻo ha kiʻi tangata vaʻakau (stick figure) ʻi hoʻo tohinoá.
-
ʻOku ʻuhinga ki he hā ke tui ʻa e [teunga] tau ʻo e ʻOtuá?
Tā ha konga pe kongokonga ʻo e [teunga] taú ʻokú ne fakafofongaʻi e ngaahi ngāue ko iá.
-
Kuó ke aʻusia nai ha ngaahi ola mei hoʻo ngaahi feingá? Kapau ko ia, ko e hā kuó ke aʻusiá? Kapau ʻoku ʻikai, ko e hā ha ngaahi ola ʻokú ke pehē ʻe lava ke maʻu ʻi he hokohoko atu hoʻo feingá?