Seminelí
1–2 Tīmote; Taitusi; Filimone

1–2 Tīmote; Taitusi; Filimone

Vakai Fakalūkufuá

ʻE lava ke tokoni hono ako e ngaahi lea ʻa Paula ʻi he lēsoni ʻo e uike ní ke tali ha ngaahi fehuʻi lahi, hangē ko e “Ko e hā e fatongia ʻo ha pīsope?” “Ko e hā ha meʻaʻofa makehe kuo foaki mai ʻe he ʻOtuá ke tokoni ke tau ikunaʻi ʻaki e ngaahi faingataʻa ʻo e ngaahi ʻaho fakaʻosí?” “Te tau kātaki fēfē ki he ngataʻangá?” ʻI he kuohilí, kuó ke ako e ngaahi tohi ʻa Paula ki he kau mēmipa ʻo e siasí ʻi ha ngaahi kolo kehekehe. Te ke ako ʻi he uiké ni e ngaahi moʻoni ʻaonga naʻe tohi ʻe Paula ʻi ha ngaahi tohi ki ha niʻihi fakafoʻituitui ʻe toko tolu: Tīmote, Taitusi, mo Filimone.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha:

1 Tīmote 3:1–7; Taitusi 1:6–9

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino lelei ange ki he kau akó ʻa e ngaahi ʻulungaanga ʻo e kau pīsopé mo e kau palesiteni fakakoló pea mo e founga ʻe lava ke tokoniʻi ai kinautolu ʻe he kau tamaioʻeiki ko ʻeni ʻa e ʻEikí ʻi heʻenau moʻuí.

  • Teuteu ʻa e tokotaha akó: Fakaafeʻi e kau akó ke nau fakakaukau ki he fehuʻi ko ʻení pea haʻu mateuteu ki he kalasí ke vahevahe ʻenau ngaahi fakakaukaú. Kuo tāpuekina fēfē koe pe ko ho fāmilí ʻe he Tamai Hēvaní mo Sīsū Kalaisi ʻo fakafou ʻi ha pīsope pe palesiteni fakakolo?

  • Naunau maʻá e kau akó: Naunau ke hiki ha kiʻi fakamatala pe tohi ki heʻenau pīsopé

  • Meʻangāue: Ko ha foʻi pulu

  • Fokotuʻu ki hono akoʻi he konifelenisi fakavitioó: Kapau ʻe lava, fakakaukau ke fakaafeʻi ha pīsope lolotonga pe pīsope mālōlō ki he kalasí pea fakamoʻoni ki he fatongia mahuʻinga ʻo e kau pīsopé ʻi he Siasi kuo fakafoki maí. Manatuʻi ke maʻu ha ngofua mei hoʻo kouʻotineitá pe pule ʻo e polokalamá kimuʻa pea toki fakaafeʻi mai ha kau lea ki he kalasí. Kapau ʻokú ke fakaafeʻi ha pīsope mālōlō kae ʻikai ko ha pīsope lolotonga, fakapapauʻi ʻokú ke kole ha fakangofua mei he taki lakanga fakataulaʻeiki fakalotofonua ʻa e fakafoʻituituí.

1 Tīmote 4:12–16

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau feinga ke hoko ko ha sīpinga ʻo ha ākonga ʻa Sīsū Kalaisi ʻi heʻenau kei talavoú.

  • Teuteu ʻa e tokotaha akó: Fakaafeʻi e kau akó ke nau fakakaukau ki he fehuʻi ko ʻení pea teuteu ke vahevahe ʻenau ngaahi fakakaukaú: Kapau ʻe muimui atu ha taha ʻiate koe ʻi ha uike ʻe taha, ko e hā ha fakamoʻoni te nau fakatokangaʻi ʻokú ke feinga ke muimui kia Sīsū Kalaisi?

  • Fokotuʻu ki hono akoʻi he konifelenisi fakavitioó: ʻI he fakakaukau ʻa e kau akó fekauʻaki mo e kakai kuo hoko ko ha ngaahi sīpinga kiate kinautolu ʻi he ngaahi founga kehekehe naʻe fakamatalaʻi ʻe Paulá, fakaafeʻi e kau akó ke nau tohi ʻi he polokalama fetalanoaʻakí ʻa e hingoa ʻo ha toko taha pe toko ua ne nau fakakaukau ki ai. ʻE lava ke kau ʻi he ngaahi hingoa ko ʻení ha niʻihi kehe ʻi he kalasí. Hili iá pea kole ki ha kau ako ʻe niʻihi ke nau fakamatalaʻi ʻa e ʻuhinga ne nau hiki ai ha taha ʻo e ngaahi hingoa ne nau hikí pea vahevahe ʻa e founga kuo hoko ai ʻa e tokotaha ko iá ko ha faʻifaʻitakiʻanga kiate kinautolú. Fakaafeʻi e kau akó ke nau fakakaukau ki ha kakai ʻoku nau ʻilo he ʻahó ni mo ha kakai mei he kuohilí, tautautefito ki he Fakamoʻuí.

2 Tīmote 3

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ongoʻi ha holi ke ako ʻa e folofolá, ʻa ia ʻe lava ʻo tokoni ke maluʻi kinautolu mei he ngaahi kovi ʻo hotau kuongá.

  • Teuteu ʻa e tokotaha akó: Vahevahe ʻa e lea ko ʻeni ʻa Palesiteni Tōmasi S. Monisoní (1927–2018) mo e kau akó: “Ko hono [fakaʻaongaʻi] ha taimi he ʻaho takitaha ke ako e folofolá ʻe ʻikai toe veiveiua ʻene fakamālohia hotau fakavaʻe ʻo e tuí mo ʻetau fakamoʻoni ki he moʻoní” (“How Firm a Foundation,” Ensign pe Liahona, Nov 2006, 68). Fakaafeʻi e kau akó ke fakalaulauloto ki he fakamatala ko ʻení pea fakakaukau ki ha ngaahi aʻusia fakatgfautaha ʻokú ne fakahaaʻi ʻoku moʻoni.

  • Fokotuʻu ki hono akoʻi he konifelenisi fakavitioó: Ke kamata e lēsoní, fakakaukau ke kole ki he kau akó ke nau fokotuʻu ha fanga kiʻi fakaʻilonga emoji ʻi he polokalama fetalanoaʻakí ʻokú ne fakafofongaʻi e ongo ʻoku nau maʻu fekauʻaki mo e moʻui ʻi he ngaahi ʻaho fakaʻosí. (Hangē ko ʻení, mahalo te nau ongoʻi houngaʻia, manavasiʻi, pe fakatouʻosi.)

Fakataukei Fakatokāteliné: 2 Tīmote 3:15–17

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e folofola fakataukei fakatokāteliné mo e kupuʻi folofola mahuʻinga ki he 2 Tīmote 3:15–17 , fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

  • Teuteu ʻa e tokotaha akó: Fakaafeʻi e kau akó ke nau fakakaukau ki ha faʻahinga faingataʻa pē ʻokú ne taʻofi kinautolu mei hono ako fakaʻaho ʻo e folofolá. Poupouʻi ke nau fakakaukau ki ha ngaahi founga ʻe lava ke tokoniʻi ai kinautolu ʻe he ngaahi tefitoʻi moʻoni ʻo hono maʻu ʻo e ʻilo fakalaumālié ke nau ikunaʻi ʻenau ngaahi faingataʻaʻiá.

  • Fokotuʻu ki hono akoʻi he konifelenisi fakavitioó: Makehe mei hano fakaafeʻi e kau akó ke tohi e potufolofola fakataukei fakatokāteliné mo e kupuʻi lea mahuʻingá ʻi ha fakatātā ʻo ha tohi, ʻe lava ke ke fakaafeʻi e kau akó ke nau taipeʻi tuʻo tolu e potufolofolá mo e kupuʻi lea mahuʻingá ʻi he polokalama fetalanoaʻakí. Fakapapauʻi ke talaange ke nau taipeʻi e foʻi lea takitaha pea ʻoua naʻa hiki tatau mai pē (cut and paste). Mahalo ʻe ʻaonga ke sio pe ko e tuʻo fiha hono taipeʻi ʻe he kau akó e potufolofolá mo e kupuʻi lea mahuʻingá ʻi loto ʻi ha taimi pau (hangē ko ʻení, sekoni ʻe 90).

2 Tīmote 4

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi ʻa e kau akó ke nau hoko pe moʻui mateakiʻi ʻa e tuʻunga fakaākonga ʻo Sīsū Kalaisí ʻi he kotoa ʻo ʻenau moʻuí.

  • Teuteu ʻa e tokotaha akó: Fakaafeʻi e kau akó ke kumi ha potufolofola te nau lava ʻo vahevahe mo ha taha ʻokú ne ongoʻi loto-foʻi ʻi heʻenau feinga ke muimui ʻia Sīsū Kalaisí.

  • Ngaahi ʻīmisi ke fakaʻaliʻalí: Ko ha ʻīmisi ʻo ha tau mo ha ʻīmisi ʻo ha lova

  • Naunau maʻá e kau akó: Ko ha laʻipepa siʻisiʻi maʻá e tokotaha ako takitaha

  • Fokotuʻu ki hono akoʻi he konifelenisi fakavitioó: Kapau ʻe maʻu, fakakaukau ke fakaʻaongaʻi ha meʻangāue savea ʻoku ʻikai ʻilo ki ai ha taha (anonymous survey tool) ke fakaʻatā e kau akó ke nau vahevahe ha tūkunga ʻa ia ʻe ala ongoʻi ai ʻe ha taha ʻoku ʻahiʻahiʻi ia ke tuku ʻene feinga ke muimui ʻia Sīsū Kalaisí. Talaange ki he kau akó te nau lava ʻo fili ke vahevahe ʻa e ʻuhinga moʻoni naʻe fakakaukau ai ha taha ʻoku nau ʻofa ai ke taʻofi ʻene muimui kia Sīsū Kalaisí.