“ʻOku Faʻa Fakapoto Koe ki he Fakamoʻuí … [ʻe he] Ngaahi Tohi Māʻoniʻoní”
ʻĪmisi
A young man sits on his bed and reads the scriptures. He is dressed in a blue suit and reading in Spanish.
ʻE lava ke faitāpuekina hoʻo moʻuí ʻe he ako folofola maʻu peé ʻi ha ngaahi founga lahi, kau ai hono tokoniʻi koe ke ke lavaʻi ha ngaahi faingataʻa lahi ʻi he ngaahi ʻaho fakaʻosí. ʻE lava ke tokoni atu ʻa e lēsoni ko ʻení ke ke ako maʻuloto ʻa e folofola fakataukei fakatokāteliné mo e kupuʻi lea folofola mahuʻinga ki he 2 Tīmote 3:15–17 , fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.
FakafaivaʻíʻE lava ke tokoni ʻa e fakafaivaʻí ke maʻu ʻe he kau akó ha aʻusia mahuʻinga ʻi hono fakamatalaʻi e ngaahi moʻoni ʻo e ongoongoleleí pea mahino lelei ange ʻa e founga te nau lava ai ʻo ngāue ʻi he ngaahi tūkunga moʻoni ʻo e moʻuí.
Teuteu ʻa e tokotaha akó: Fakaafeʻi e kau akó ke nau fakakaukau ki ha faʻahinga faingataʻa pē ʻokú ne taʻofi kinautolu mei hono ako fakaʻaho ʻo e folofolá. Poupouʻi ke nau fakakaukau ki ha ngaahi founga ʻe lava ke tokoniʻi ai kinautolu ʻe he ngaahi tefitoʻi moʻoni ʻo hono maʻu ʻo e ʻilo fakalaumālié ke nau ikunaʻi honau ngaahi faingataʻaʻiá.
Ngaahi ʻEkitivitī Ako ʻOku Ala Fakahokó
ʻOku teuteuʻi ʻa e lēsoni fakataukei fakatokāteline ko ʻení ke akoʻi hili ʻa e lēsoni “2 Tīmote 3,” ʻa ia ko e lēsoni fakamatala ia ki he potufolofola fakataukei fakatokāteline 2 Tīmote 3:15-17 . Kapau ʻoku fiemaʻu ke hiki e lēsoni fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni fakamatala fekauʻaki mo iá lolotonga e uike ko iá.
Ako maʻuloto pea fakamatalaʻi
Tā ha fakatātā ʻo ha tohi folofola ʻoku fakaava ʻokú ne fakafonu ha konga lahi pe kotoa ʻo ha laʻipepa. ʻI ʻolunga ʻi hoʻo fakatātaá, tohiʻi ‘a e 2Tīmote 3:15–17. Hiki ʻi hoʻo fakatātaá ʻa e kupuʻi lea mahuʻinga ʻOku Faʻa Fakapoto Koe ki he Fakamoʻuí … [ʻe he] Ngaahi Tohi Māʻoniʻoní. ʻUfiʻufiʻi ʻa e kupuʻi leá ʻaki ha meʻa pea toe tohiʻi ia fakatatau mo ʻenau manatú. Vakaiʻi pe ʻoku tonu pea toutou fai ʻa e ngāué kae ʻoua kuó ke fakafonu hoʻo fakatātaá.
Hili hono tā ʻe he kau akó ‘enau ngaahi fakatātaá, fakakaukau ke vahevahe e kau akó ke nau tauhoa pea fakaafeʻi kinautolu ke nau taufetongi ʻi hono hiki e kupuʻi lea mahuʻinga ʻo e potufolofolá.
Naʻá ke ako ʻi he lēsoni kimuʻá ko e taimi ʻoku tau ako ai e folofolá, te tau lava ʻo maʻu ha poto te ne tataki kitautolu ki he fakamoʻuí ʻi he tui kia Sīsū Kalaisí. Toe lau ʻa e 2 Tīmote 3:15–17 , ʻo kumi ki he fakamoʻoni ʻo e tefitoʻi moʻoni ko ʻení, kae pehē ki he ngaahi tāpuaki kehe ʻe lava ke tau maʻu mei hono ako ʻo e folofolá.
Fakakaukau ke vahevahe e kau akó ki ha fanga kiʻi kulupu iiki koeʻuhí ke nau lava ʻo fakatātaaʻi ʻa e tūkunga ko ʻení. Feinga ke ʻunu takai holo he lokí ke fanongo ki he founga ʻoku akoʻi ai ʻe he “kau faifekaú” ʻa e “fiefanongó.” Fakakaukau ke fehuʻi ange kimui ange pe ko e hā naʻe ongoʻi ʻe he kau akó naʻe faingofua pe faingataʻa fekauʻaki mo e meʻa naʻa nau aʻusiá.
Fakakaukauloto ko ha faifekau koe ʻokú ke akoʻi ha finemui ko Selavi. Kuo tali lelei ʻe Selavi ʻa e pōpoaki ʻo hono Fakafoki Mai ʻo e Ongoongoleleí ka kuó ne momou ke lau e ngaahi potufolofola kuó ke fokotuʻu mo ho hoá. Lolotonga ha ʻaʻahi, ʻokú ke fehuʻi kia Selavi pe ko e hā naʻá ne taʻofi ia mei hono lau ʻo e folofolá. Naʻá ne tali mai ʻoku ʻikai ke ne saiʻia ʻi hono lau e folofolá mo pehē ʻoku taʻeoli.
Fakaʻaongaʻi ʻa e 2 Tīmote 3:15–17 , ʻo hiki ha tali ʻo fakamatalaʻi e ngaahi tāpuaki mo e ngaahi lelei ʻo e ako folofolá ʻi ha founga te ne fakaʻaiʻai ʻa Selavi. Kapau ʻe lava, fakakaukau ke tānaki atu ha ngaahi aʻusia mo ha fakamoʻoni fakatāutaha ko ha konga hoʻo talí.
Akoako hono fakaʻaongaʻí
Kapau naʻe fiemaʻu ke ke fakamatalaʻi fakanounou e ngaahi tefitoʻi moʻoni ʻe tolu ʻo hono maʻu ha ʻilo fakalaumālié ʻi ha foʻi sētesi pē ʻe taha, ko e hā te ke lea ʻakí?
‘O ka fiemaʻu, toe vakaiʻi ʻa e palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻi he konga Fakamatala ki he ʻElito ʻo e Fakataukei Fakatokāteliné (2022).
Fakakaukau ke fakaafeʻi ha tokotaha ako ke ne fili pea lau leʻolahi ha taha ʻo e ngaahi sētesi fakanounou mei ha taha ʻo e ngaahi tefitoʻi moʻoni ʻe tolu ki hono maʻu ʻo e ʻilo fakalaumālié. Kole ki he kalasí ke nau talaatu ʻa e tefitoʻi moʻoni ʻoku fekauʻaki mo e sētesí. Toutou fai e ʻekitivitī ko ʻení.
Neongo kapau ʻoku tau ʻilo mo mahino kiate kitautolu e ngaahi tāpuaki ʻo e ako folofolá, ka ʻe kei faingataʻa pē he taimi ʻe niʻihi ke fakahoko maʻu pē mo fakahoko lelei.
Ko e hā ha ngaahi pole te ne lava ʻo ʻai ke faingataʻa ʻa e ako folofola maʻu pē mo fakahoko lelei iá?
Fakakaukau ke hiki e ngaahi tali ʻa e kau akó ʻi he palakipoé.
Lolotonga e ʻekitivitī ko ʻení, fakakaukau ke fakahoko ha lotu fakalongolongo maʻa hoʻo kau akó ke nau ongoʻingofua e ngaahi ueʻi ʻa e Laumālié ke nau lava ʻo fakaʻaongaʻi e ngaahi tefitoʻi moʻoni ʻo hono maʻu ʻo e ʻilo fakalaumālié maʻanautolú.
Fekumi ki he fakahinohino ʻa e Laumālie Māʻoniʻoní ke tokoni atu ke ke ʻiloʻi ha faingataʻa ʻe taha pe ua ʻokú ne taʻofi koe mei hono ako maʻu pē mo ola lelei hoʻo ako e folofolá. (Kapau ʻoku ʻikai ke ke fehangahangai mo ha ngaahi faingataʻa, fakakaukau ki ha ngaahi faingataʻa ʻe ala fehangahangai mo ha kaungāmeʻa pe mēmipa ʻo e fāmilí.)
Hiki hifo ha founga ʻe tolu te ke ala fakaʻaongaʻi ai e ngaahi tefitoʻi moʻoni ki hono maʻu ʻo e ʻilo fakalaumālié ke tokoniʻi koe ke ke ikunaʻi e ngaahi faingataʻa ko ʻení. Mahalo ‘e lava ke tokoni atu e ngaahi fehuʻi mo e ngaahi fakakaukau ko ʻení.
Fakakaukau ke hiki e ngaahi fehuʻi ʻe tolu ko ʻení ʻi he palakipoé.
Te ke lava foki ʻo fakaafeʻi e kau akó ke nau fakakaukau ki he founga ʻe lava ke liliu ai ʻe he ako folofola tuʻo lahi mo fakamātoató ʻenau fakalakalaka taʻengatá. Te nau lava ʻo fakakaukau ki ha ngaahi aʻusia lelei kuo nau ʻosi maʻu pea mo e ngaahi moʻoni taʻengata ne nau ako mei he ngaahi aʻusia ko iá.
Te ke sivisiviʻi fēfē e ngaahi faingataʻa ki hoʻo ako folofolá ʻaki ha fakakaukau ʻoku taʻengatá?
ʻE tokoniʻi fēfē koe ʻe he ngaahi moʻoni ʻi he 2 Tīmote 3:15–17 ke ke maʻu ha fakakaukau ʻoku taʻengatá ʻi he taimi ʻokú ke fefaʻuhi ai mo e ako folofolá?
‘E anga fēfē haʻo fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí?
Ko ha ngaahi fakakaukau ʻeni:
Kumi ha ngaahi potufolofola fekauʻaki mo hono ako ʻo e folofolá ʻi he Fakahinohino ki he Ngaahi Folofolá ʻoku maʻu ʻi he ChurchofJesusChrist.org, ʻo kumi e ngaahi tāpuaki mo e ngaahi talaʻofa ʻe ala tokoni ki hoʻo faingataʻaʻiá. ʻE ala ʻaonga e ngaahi potufolofola hangē ko e Sōsiua 1:8 ; 2 Nīfai 32:3 ; mo e Tokāteline mo e Ngaahi Fuakava 1:37 .
Fehuʻi ki ha taha ʻokú ke falala ki ai fekauʻaki mo e ʻuhinga ʻoku nau ako fakaʻaho ai ʻenau folofolá mo e founga ʻoku nau fokotuʻu atu ke ikunaʻi ai ho faingataʻaʻiá.
Kumi e ngaahi fakamatala ʻa e Kau Taki Māʻolungá pe fakamatala ʻi he ngaahi makasini ʻa e Siasí ʻe ala tokoní. Hangē ko ʻení, ʻe ala tokoni ʻa e fakamatala ko ʻení ki ha taha ʻoku faingataʻaʻia ke maʻu ha taimi ki hono ako e folofolá.
Naʻe akoʻi ʻe ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻĪmisi
Final official portrait of Elder Richard G. Scott of the Quorum of the Twelve Apostles, 2004. Passed away 22 September 2015.
ʻOku mahuʻinga ange ʻa e keinanga ʻi he folofola ʻo e ʻOtuá he ʻaho kotoa peé ʻi he mohé, akó, ngāué, polokalama televīsoné, vaʻinga vitioó pe mītia fakasōsialé. Mahalo ʻoku fiemaʻu ke ke ʻilo e meʻa ʻoku mahuʻinga kiate koé, ke ke tuku ha taimi ke ako e folofola ʻa e ʻOtuá. Kapau ʻoku pehē, fai ia!
(Richard G. Scott, “Fakamuʻomuʻa ke Mahuʻinga Taha Hoʻo Ngāueʻi e Tuí,” Ensign pe Liahona, Nōvema 2014, 93)
Fakaʻaongaʻi ha ngaahi miniti siʻi ke kamata ʻi ha taha ʻo hoʻo ngaahi fakakaukaú.
Te ke lava fēfē ʻo ngāue ʻi he tuí ke ikunaʻi e ngaahi fakafeʻātungia ki hono ako fakaʻaho ʻo e folofolá? Hiki ha ngaahi fakakaukau ʻi hoʻo tohinoa akó.
Hili ha taimi feʻunga, fakaafeʻi ha kau ako ʻe niʻihi ke vahevahe ha meʻa mahuʻinga ne nau aʻusia lolotonga e lēsoni ko ʻení. Fakamanatu kiate kinautolu ko e lahi tahá, ʻoku tau fehangahangai mo ha ngaahi faingataʻa ke ola lelei ai ʻetau ako fakaʻaho e folofolá, pea ʻe ala tokoni hono vahevahe ʻenau ngaahi fakakaukaú, ʻiló, mo e aʻusiá ki he niʻihi kehe ʻi he kalasí. Tānaki atu foki mo e ngaahi ʻilo mo e fakamoʻoni fakatāutahá.
Toe vakaiʻi ʻo e fakataukei fakatokāteliné
Lolotonga ha lēsoni ʻe hoko mai, tuku ha ngaahi miniti siʻi ke toe vakaiʻi ai e veesifolofola mo e kupuʻi lea mahuʻinga ki he potufolofola fakataukei fakatokāteline ko ʻení ʻo fakaʻaongaʻi e ʻekitivitī ako maʻuloto tatau mei he konga kimuʻa ʻo e lēsoni ko ʻení.
Ngaahi ʻEkitivitī Fakalahi ki he Akó
Ngaahi maʻuʻanga tokoni kuo fokotuʻu fakalangí
ʻI he fakakaukau ʻa e kau akó ki he founga ke fekumi ai ki ha tokoni ʻo fakafou ʻi he ngaahi maʻuʻanga tokoni kuo fokotuʻu fakalangí, fakakaukau ke fakaafeʻi ha tokotaha ako ke fekumi ʻi he ʻinitanetí ke ʻiloʻi pe ko e tohi ʻe fiha ʻoku lolotonga maʻu ai ʻa e “tokoni pē kiate kitá.” ʻOku ngalingali te nau sio ki ha ngaahi fili ʻe lau mano. ʻE lava ke ke ʻeke ange ha ngaahi fehuʻi peheni:
ʻOkú ke pehē ko e hā ʻoku lahi ai e ngaahi tohi tokoni pē kiate kita ʻi he māmaní?
ʻE lava fēfē ke hoko ʻa e folofolá ko ha maʻuʻanga tokoni mo ha tataki mālohi ki heʻetau moʻuí?
Fakaafeʻi e kau akó ke fakafekauʻaki e 2 Tīmote 3:15–17 mo e Tokāteline mo e Ngaahi Fuakava 88:118 , pea fehuʻi ki he kau akó pe ʻoku nau pehē ko e hā e ʻuhinga ʻa e ʻEikí ki he “ngaahi tohi lelei tahá.” Fakakaukau ke fakamanatu ki he kau akó ʻoku lahi ha ngaahi maʻuʻanga tokoni mahuʻinga ʻi he māmaní ke tokoniʻi kitautolu ke tau fakatupulaki ʻa e potó mo ikunaʻi e ngaahi faingataʻá. Fakaafeʻi e kau akó ke nau toe vakaiʻi e palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné pea feinga ke ʻiloʻi e ngaahi foʻi lea pe kupuʻi lea ʻokú ne fakaʻilongaʻi e folofola māʻoniʻoní ko ha maʻuʻanga tokoni mahuʻinga ʻo e potó mo e ʻiló ki heʻenau moʻuí.
Ko ha sīpinga ʻo e ngāue ʻi he tuí
Fakakaukau ke fehuʻi ki he kau akó pe ko e hā te nau lava ʻo fai ke ngāue ai ʻi he tuí kapau ʻoku faingataʻa ke mahino kiate kinautolu ʻa e folofolá. Hili hono vahevahe ʻe he kau akó ʻenau ngaahi fakakaukaú, ʻe lava ke ke tānaki atu ha niʻihi pe kotoa ʻo e ngaahi sīpinga ko ʻení.
Lotua ha mahino kimuʻa pea ke akó.
Lau e ngaahi ʻuluʻi fakamatala ʻo e vahé ke maʻu ha vakai fakalūkufua.
Akoako fekumi ke mahino e folofola ʻi he lotú mo e seminelí ʻaki haʻo fai ha ngaahi fehuʻi ki he kau faiakó.
Laukonga maʻu pē mo ha taha ʻokú ke falala ki ai, hangē ko ha mātuʻa, ʻa ia ʻe lava ʻo tokoni ke fakamatalaʻi atu e folofolá kiate koe.
Fakaʻaongaʻi e ngaahi tohi lēsoni ʻoku maʻu ʻi he Gospel Library app pe ChurchofJesusChrist.org, hangē ko e Tohi Lēsoni ʻa e Tokotaha Ako Seminelí.