1 Коринт 12
Сүнслэг бэлгүүд
Паул Христ дотор нэгдэх хэрэгцээ шаардлагаа олж мэдэхэд нь туслах үүднээс Коринтын гэгээнтнүүдэд захиа бичжээ. Тэрээр хэрэв бүх гишүүн Их Эзэнээс хүлээн авсан сүнслэг бэлгээ танин мэдэж, ашиглаж чадвал бие махбодын олон хэсэг нэгдмэл байдлаар хамтран ажилладаг шиг байж болно гэж заажээ. Энэ хичээл нь Их Эзэний бусдыг адисалж, Өөрийн Сүмийг хүчирхэгжүүлэхийн төлөө танд өгсөн сүнслэг бэлгүүдийг таньж мэдэхэд тань туслах зорилготой.
Сүнслэг бэлгүүд Их Эзэн Өөрийн Сүмийн бүх гишүүнийг сүнслэг бэлэг ба чадвараар адисалдаг. Семинарын суралцагч нэг бүрд үйлчилж, суралцагчдыг мөн ийн үйлдэхэд уриалахын тулд эдгээр сүнслэг бэлгийг нээн илрүүлж, хөгжүүлж, өсгөн нэмэгдүүлэхээр хичээ.
Суралцагчийн бэлтгэл: Суралцагчдыг хүлээн авсан сүнслэг бэлгүүдээсээ нэгийг эсвэл хоёрыг тодорхойлоход урь. Тэд үүнийг хийхэд гэр бүлийн гишүүд өөрсдийн хайрлаж итгэдэг хүмүүсээсээ тусламж хүсэж болох юм. Суралцагчдаас бэлгүүдийнхээ талаар болон бусдыг адислахад тэдгээрийг хэрхэн ашиглаж буй талаар тунгаан бодохыг хүс.
Боломжит суралцах үйл ажиллагаа
Бэлгүүд хүлээн авах
Ангид бэлгийн боодолтой илгээмж авчраад, энэ хэлэлцүүлгийн үеэр үзүүлэх талаар бодож үз.
-
Та утга учиртай ямар бэлэг хүлээн авсан бэ?
-
Энэ бэлэг нь таны амьдралд ямар нөлөө үзүүлсэн бэ? Энэ нь танд юу хийх боломжийг олгосон бэ?
-
Танд уг бэлгийг өгсөн хүний талаар ямар сэтгэгдэл төрсөн бэ?
Та 1 Коринт 12 -ыг судлахдаа Тэнгэрлэг Эцэгийн Өөрийн хүүхдүүдэд өгдөг сүнслэг бэлгүүдийн талаар судлах болно. Тэр яагаад эдгээр бэлгийг өгдөг талаар олж мэдээд, танд өгсөн бэлгийг тодорхойлоход туслах урам зоригийг Ариун Сүнснээс эрэлхийл.
Их Эзэн бидэнд сүнслэг бэлгүүд өгдөг
“Сүнслэг бэлгүүд нь Бурханы Өөрийн хүүхдүүдэд Ариун Сүнсний хүчээр дамжуулан өгдөг адислал эсвэл чадварууд юм” (Сайн мэдээний сэдвүүд, “Сүнслэг бэлгүүд” topics.ChurchofJesusChrist.org).
Судрын дараах хэсгүүдээс судлахдаа бүлгээрээ ажиллах нь суралцагчдад тустай байж болно. Бүлгийн гишүүн тус бүр өөр өөр шүлгийг уншаад, олж мэдсэн зүйлсээ бүлгийнхээ бусад гишүүнд мэдээлж болно.
1 Коринт 12:3–11 -ийг унших замаар сүнслэг бэлгүүдийн талаар олж мэд. ( 11-р шүлэг дэх “тус тусад нь” гэдэг үг нь “ганцаарчлан” эсвэл “нэг нэгээр нь” гэсэн утгатай болохыг анхаарна уу.)
-
Эдгээр шүлэгт жагсаасан зарим сүнслэг бэлэг юу вэ?
Олон төрлийн сүнслэг бэлэг байдаг. Бусдынх нь талаар судлахын тулд Моронай 10:8–18 ; Сургаал ба Гэрээ 46:11–26 ; Арван хоёр төлөөлөгчийн чуулгын ахлагч Марвин Ж.Эштоны (1915–1994) дараах мэдэгдлийг унш.
“Төдийлөн ил харагддаггүй зарим бэлгийн талаар ярилцья: асуух бэлэг; сонсох бэлэг; намуун, зөөлхөн дуу хоолойг анхааран сонсож, ашиглах бэлэг; уйлах чадвартай байх бэлэг; зөрчил сөргөлдөөнөөс зайлсхийх бэлэг; бусадтай эв нийцтэй байх бэлэг; хоосон давталтаас зайлсхийх бэлэг; зөв шударга зүйлсийг эрэлхийлэх бэлэг; бусдыг шүүхгүй байх бэлэг; Бурханаас удирдамж хүсэх бэлэг; шавь байх бэлэг; бусдад анхаарал халамж тавих бэлэг; тунгаан бодох чадвартай байх бэлэг; залбирал хэлэх бэлэг; хүчирхэг гэрчлэл үлдээх бэлэг; Ариун Сүнсийг хүлээн авах бэлэг.
(Marvin J. Ashton, “There Are Many Gifts,” Ensign, Nov. 1987, 20)
Суралцагчдад судлах цаг өгсний дараа тэднийг Их Эзэний талаар болон Түүний биднийг адислахыг хүсдэг бэлгүүдийн талаар олж мэдсэн үнэнээ хуваалцахад урь.
-
Их Эзэн эдгээр сүнслэг бэлгээр хэнийг адисалдаг вэ?
-
Энэ нь Их Эзэний талаар ойлгоход танд яаж тусалж байна вэ?
Таны танин мэдэж болох нэг үнэн бол Их Эзэн Өөрийн Сүмийн гишүүн тус бүрд бусдыг адислах дор хаяж нэг сүнслэг бэлгийг өгдөг.
Суралцагчдыг сүнслэг бэлгүүдийн талаар эргэцүүлэн бодоход урь. Хэрэв тэднийг суралцагчийн бэлтгэл үйл ажиллагааг хийхэд урьсан бол сүнслэг бэлгүүдийн талаар гэр бүлийн гишүүнтэйгээ эсвэл өөр хэн нэгэнтэй ярилцсан үеэ бодоход урь.
-
Тэнгэрлэг Эцэг, Есүс Христ хоёр таныг сүнслэг бэлгээр адисалсан гэдгийг мэдэх нь танд Тэдний талаар ямар бодол төрүүлж байна вэ?
-
Сүнслэг бэлэг хүлээн авснаа мэдэх нь тэнгэрлэг мөн чанараа харах өнцөгт тань хэрхэн нөлөөлсөн бэ?
-
Их Эзэн яагаад зөвхөн хэдхэн гишүүнд биш харин Сүмийн гишүүн бүрд сүнслэг бэлэг өгдөг гэж та бодож байна вэ?
Их Эзэн биднийг бие биенээ адислаасай хэмээн хүсдэг
Суралцагчдыг биеийн янз бүрийн хэсгийн талаар мөн тус бүр хэрхэн хэрэгтэй болохыг сурч мэдэх үед ангид том эд зүйлийг зөөх гэх зэрэг үүрэг даалгаврыг хийж гүйцэтгэхэд тэднийг урих талаар бодож үз. Өөр нэгэн сонголт бол суралцагчдад жижиг барилгыг барьж босгох, цаасыг хэдэн хэсэг болгон урж таслах эсвэл өөр ажлыг зөвхөн нэг гараа ашиглан хийх боломжийг олгох явдал байж болно.
1 Коринт 12:14–20 -ийг уншаад, бидний хүн нэг бүрийн оруулдаг хувь нэмрийн ач холбогдлыг хүлээн зөвшөөрөхөд бидэнд туслахын тулд Паулын ашигласан харьцуулалтыг олж мэд.
-
Судрын энэ хэсэгт Паул Сүмийг юутай харьцуулж байна вэ? Энэ харьцуулалт нь сүнслэг бэлгийн тухай танд юу зааж байна вэ?
-
Та бусдын сүнслэг бэлгийн ачаар хэрхэн адислагдаж байсан бэ?
Өөрсдөөсөө, ангийнхнаасаа эсвэл бусад үе тэнгийнхнээсээ олж харсан сүнслэг бэлгүүдээ сайн дураараа хуваалцах хэдэн суралцагчийг уриад, эдгээр бэлэг бусдыг хэрхэн адисалж болохыг тайлбарлахад тэднийг урих талаар бодож үз. Багшийн хувиар хичээлийн үеэр эсвэл ганцаарчлан тэднээс харж болох сүнслэг бэлгүүдийг хэлэх нь суралцагчдад тус болох эсэхийг бодож үз.
Таны хүлээн авсан сүнслэг бэлгүүд хэрхэн таныг адисалсныг мөн та гэр бүлийнхэн, тойрог, салбарынхан болон бусад хүнийг адислахад тэдгээрийг хэрхэн ашигласан талаар тунгаан бод. Та судлах тэмдэглэлдээ бэлгүүдийнхээ талаар Ариун Сүнснээс хүлээн авсан аливаа сэтгэгдлээ тэмдэглэж болно.
Дараах асуултуудын заримыг эсвэл бүгдийг ярилцаад, судлах тэмдэглэлдээ хариултаа бичихэд суралцагчдыг урь.
-
Өөрийнхөө болон сүнслэг бэлгүүдийнхээ талаар юуг ойлгоосой хэмээн Их Эзэн танаас хүсэж байна гэж та бодож байна вэ?
-
Сүнслэг бэлэггүй гэж бодож байгаа хэн нэгэнд та юу гэж хэлж урам зориг өгөх вэ?
-
Та ямар сүнслэг бэлгийг хүсдэг вэ? Та уг бэлгийг эрэлхийлэхийн тулд юу хийж болох вэ? (Их Эзэн биднийг сүнслэг бэлгүүдийг эрэлхийлэхэд урьсан; 1 Коринт 12:31 ; 14:1 ; Сургаал ба Гэрээ 46:7–9 -ийг үзнэ үү.)
-
Та сүнслэг бэлгүүдээ ямар арга замаар бусдыг адислахад ашиглаж болох вэ? Энэ нь хэрхэн танд Аврагчтай илүү адилхан болоход туслах вэ?
Бичсэн ямар нэг зүйлээ хуваалцахад суралцагчдыг урь. Сүнслэг бэлгүүдийн талаарх хувийн туршлагаа эсвэл гэрчлэлээ хуваалцах талаар бодож үз.
Тайлбар ба нөхцөл байдлын талаарх мэдээлэл
Би бусдад үйлчлэхийн тулд сүнслэг бэлгүүдээ хэрхэн ашиглаж болох вэ?
Тэргүүн зөвлөлийн ерөнхийлөгч асан Дийтр Ф.Угдорф бид хэрхэн Есүс Христийн үлгэр жишээг дагаж болох талаар ийн хуваалцсан.
Аврагчийн тухай бодохдоо Түүнийг урагш гараа сунгасан байхаар төсөөлдөг. Тэр биднийг тайтгаруулан эдгээхээр, адислан хайрлахаар гараа урагш сунгадаг. Тэр хэзээ ч хэн нэгнийг дорд үзэж байгаагүй бөгөөд даруу төлөв хүмүүсийг хайрлан, тэдний дунд амьдарч, тэдэнд үйлчлэн, итгэл найдвар ба авралыг санал болгосон юм.
Мөнх бус амьдралынхаа хугацаанд Тэрээр тийн үйлдэж байсан юм. Хэрэв Тэр өнөөдөр бидний дунд амьдарч байсан бол мөн л их үйлсийг хийх байсан. Бид Есүс Христийн Хожмын Үеийн Гэгээнтнүүдийн Сүмийн гишүүд, Түүний шавь нар нь болохын хувьд түүн лүгээ үйлдэн амьдрах ёстой.
Бид Түүний төгс жишээг даган амьдарснаар бидний гар Түүний гар, бидний нүд Түүний мэлмий, бидний зүрх сэтгэл Түүний зүрх сэтгэл болж чадна.
(Дийтр Ф.Угдорф, “Та нар миний гар,” 2010 оны 4-р сарын Ерөнхий чуулган, 80)
Би чухал сүнслэг бэлэг хүлээн авч чадахгүй байгаа мэт санагдвал яах ёстой вэ?
Далын ахлагч Жон К.Пингри сүнслэг бэлэг авсныгаа үл анзаарсан болохоо олж мэдсэн нэгэн эгчийн жишээг хуваалцсан.
Урам нь хугарсан залуу эмэгтэй нэгэн өдөр “Их Эзэн минь, хувь хүнийхээ хувьд миний үзүүлэх үйлчлэл юу вэ?” гэж асуужээ. Бурхан хариуд нь “Бусдад анхаарал хандуул” гэв. Харин энэ нь сүнслэг бэлэг байсан юм! Түүнээс хойш тэр эмэгтэй байнга мартагддаг байсан хүмүүст анхаарлаа хандуулах болсон бөгөөд Бурхан түүгээр дамжуулан ажиллаж, олон хүнийг адисалсан. Зарим сүнслэг бэлэг маань биднийг дэлхийн жишгээр нэр алдартай болгодоггүй ч тэдгээр нь Бурханд болон Түүний ажилд нэн чухал билээ.
(Бага Жон К.Пингри, “Чамд зориулсан ажил Надад буй,” 2017 оны 10-р сарын Ерөнхий чуулган, 19)
Сүмийн үүрэг даалгаврыг хангалттай сайн гүйцэтгэж чадахгүй байна гэж бодогдох үед би юу хийх ёстой вэ?
Тэргүүн зөвлөлийн ерөнхийлөгч асан Дийтр Ф.Угдорф ийн заасан.
Өөрийн тань дуудлага болон хариуцлагыг танаас илүү сайн хийж чадах чадварлаг, илүү туршлагатай бусад хүн байгаа хэмээн та бодож болох юм. Гэвч энэ үүрэгт ажлыг Их Эзэн танд ямар нэгэн шалтгаанаар өгсөн юм. Та л тэдэнд хүрч, зүрх сэтгэлд нь нөлөөлж чадах хүн нь байх ч юм уу. Танаас өөр хэн ч үүнийг таны хийдэг арга замаар хийж чадахгүй байж мэднэ.
(Дийтр Ф.Угдорф, “Зогсож байгаа газраасаа өргө,” 2008 оны 10-р сарын Ерөнхий чуулган, 68)
Нэмэлт суралцах үйл ажиллагаа
Хүн бүр чухал
Хэдийгээр хүн бүр өөр боловч бүх хүнийг Христ рүү ирж, Түүний Сүмд үйлчлэхэд урьсан болохыг ойлгоход нь суралцагчдад тусал. Энэ хичээлийг эвлүүлдэг зураг ашиглан дүрслэн харуулж болно. Цаасан дээр 1 Коринт 12:12 -ын үгсийг бичээд, цаасаа эвлүүлдэг зураг шиг янз бүрийн хэлбэртэй хэсгүүдэд хувааж, суралцагчдад эвлүүлэх боломж олгох талаар бодож үз. Суралцагчдыг шүлгийг уншаад, энэ нь Есүс Христийн Сүмийн талаар юу зааж байгааг ярилцахад урь.