A group of young men and young women enjoy each others’ company as they visit together in Paris France.
Naʻe tohi ʻa Paula ki he Kāingalotu ʻi Kolinitoó ke tokoniʻi kinautolu ke nau ʻiloʻi ʻoku fiemaʻu ke nau uouangataha ʻia Kalaisi. Naʻá ne akoʻi kapau ʻe ʻiloʻi mo fakaʻaongaʻi ʻe he kāingalotú kotoa e ngaahi meʻafoaki fakalaumālie kuo nau maʻu mei he ʻEikí, ʻe lava ke nau hangē ko e ngaahi konga lahi ʻo ha sino ʻoku nau ngāue fakataha. ʻOku fakataumuʻa e lēsoni ko ʻení ke tokoniʻi koe ke ke fakatokangaʻi e ngaahi meʻafoaki fakalaumālie kuo foaki atu ʻe he ʻEikí ke tāpuekina ʻaki e niʻihi kehé mo fakamālohia Hono Siasí.
Ngaahi meʻafoaki fakalaumālié. ʻOku tāpuakiʻi ʻe he ʻEikí ʻa e kāingalotu kotoa pē ʻo Hono Siasí ʻaki ha ngaahi meʻafoaki fakalaumālie mo ha ngaahi ivi malava. Feinga ke ʻiloʻi, fakatupulaki, mo fakalahi e ngaahi meʻafoaki fakalaumālie ko ʻení ke tokoniʻi ʻa e tokotaha ako semineli takitaha, pea poupouʻi e kau akó ke nau fai e meʻa tatau.
Teuteu ʻa e tokotaha akó: Fakaafeʻi e kau akó ke nau feinga ke ʻiloʻi ha meʻafoaki fakalaumālie ʻe taha pe ua kuo foaki kiate kinautolú. Mahalo te nau fie kole ki he kau mēmipa ʻo e fāmilí pe niʻihi kehe falalaʻanga ʻoku nau ʻofa aí ke tokoni ange ke nau fai ʻeni. Kole ki he kau akó ke nau fakalaulauloto ki heʻenau ngaahi meʻafoakí mo e founga ʻoku nau fakaʻaongaʻi ai kinautolu ke tāpuekina e niʻihi kehé.
Ngaahi ʻEkitivitī Ako ʻOku Ala Fakahokó
Ko hono maʻu ʻo e ngaahi meʻafoaki fakalaumālié
Fakakaukau ke ʻomi ha kofukofu meʻaʻofa ki he kalasí pea fakaʻaliʻali ia lolotonga e fealēleaʻaki ko ʻení.
Ko e hā ha meʻaʻofa mahuʻingamālie kuó ke maʻu?
Ko e hā e lelei ʻo e meʻaʻofa ko ʻení ʻi hoʻo moʻuí? Ko e hā naʻá ne fakaʻatā koe ke ke fakahokó?
Ko e hā hoʻo ongo ki he tokotaha naʻá ne foaki atu e meʻaʻofá?
ʻI hoʻo ako ʻa e 1 Kolinitō 12 , te ke ako ai fekauʻaki mo e ngaahi meʻafoaki fakalaumālie ʻoku foaki ʻe he Tamai Hēvaní ki Heʻene fānaú. Fekumi ki he ʻuhinga ʻokú Ne foaki mai ai e ngaahi meʻafoaki ko ʻení, pea fekumi ki ha ueʻi fakalaumālie mei he Laumālie Māʻoniʻoní ke tokoni atu ke ke ʻiloʻi ha meʻaʻofa kuo foaki atu kiate koe.
ʻOku foaki mai ʻe he ʻEikí ha ngaahi meʻafoaki fakalaumālie kiate kitautolu
“Ko e ngaahi meʻafoaki fakalaumālié ko ha ngaahi tāpuaki pe ngaahi tuʻunga malava ia ʻoku foaki ʻe he ʻOtuá ki Heʻene fānaú ʻo fakafou ʻi he mālohi ʻo e Laumālie Māʻoniʻoní” (Ngaahi Tefito ʻo e Ongoongoleleí, “Ngaahi Meʻafoaki Fakalaumālie,” topics.ChurchofJesusChrist.org).
Mahalo ʻe ʻaonga ki he kau akó ke nau ngāue fakakulupu ʻi heʻenau ako e ngaahi potufolofola ko ʻení. ʻE lava ke lau ʻe he mēmipa takitaha ʻo e kulupú ha ngaahi veesi kehekehe pea lipooti ki he niʻihi kehe ʻi heʻenau kulupú ʻa e meʻa ne nau akó.
Ako fekauʻaki mo e ngaahi meʻafoaki fakalaumālié ʻaki haʻo lau ʻa e 1 Kolinitō 12:3–11 . (Fakatokanga‘i ange ko e fo‘i lea ko ia ko e “taki taha” he veesi 11 ‘oku ʻuhinga ia ki he “fakafoʻituitui” pe ko e “kakai takitaha.”)
Ko e hā ha ngaahi meʻafoaki fakalaumālie ‘oku lisi ʻi he ngaahi veesi ko ʻení?
ʻOku lahi e ngaahi meʻafoaki fakalaumālie kehekehe. Ke ako fekauʻaki mo e niʻihi kehé, lau ʻa e Molonai 10:8–18 ; Tokāteline mo e Ngaahi Fuakava 46:11–26 ; pea mo e lea ko ʻeni ʻa ʻEletā Māvini J. ʻEsitoni (1915–94) ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
Portrait of Marvin J. Ashton.
Tuku muʻa ke u fakamatala atu ha ngaahi meʻafoaki ʻe niʻihi ʻoku ʻikai mahino maʻu pē pe faʻa aleaʻi ka ʻoku fuʻu mahuʻinga fau … : ko e meʻafoaki ʻo e kolé; ko e meʻafoaki ʻo e fakafanongó; ko e meʻafoaki ʻo e fanongó mo hono fakaʻaongaʻi ha kihiʻi leʻo siʻí; ko e meʻafoaki ʻo e lava ke tangí; ko e meʻafoaki ʻo e fakaʻehiʻehi mei he fakakikihí; … ko e meʻafoaki ʻo e fekumi ki he meʻa ʻoku māʻoniʻoní; ko e meʻafoaki ʻo e fakamaau totonú; ko e meʻafoaki ʻo e fekumi ki he ʻOtuá ke maʻu ha fakahinohinó; … ko e meʻafoaki ʻo e tokangaʻi e niʻihi kehé; ko e meʻafoaki ʻo e lava ke fakalaulaulotó; ko e meʻafoaki ʻo e fakahoko e lotú; ko e meʻafoaki ʻo e fakahoko ha fakamoʻoni mālohí.
(Marvin J. Ashton, “There Are Many Gifts,” Ensign, Nov. 1987, 20)
Hili hono maʻu ʻe he kau akó ha taimi ke ako aí, fakaafeʻi kinautolu ke vahevahe e ngaahi moʻoni ne nau ako fekauʻaki mo e ʻEikí mo e ngaahi meʻafoaki ʻokú Ne finangalo ke tāpuakiʻi ʻaki kitautolú.
Ko hai ʻoku tāpuakiʻi ʻe he ʻEikí ʻaki e ngaahi meʻafoaki fakalaumālie ko ʻení?
Ko e hā ʻoku tokoni ai ʻeni ke mahino kiate koe fekauʻaki mo e ʻEikí?
Ko e moʻoni ʻe taha mahalo te ke fakatokangaʻi ʻoku foaki ʻe he ʻEikí ki he mēmipa takitaha ʻo Hono Siasí ha meʻafoaki fakalaumālie ʻe taha ke tāpuekina ʻaki e niʻihi kehé.
Fakaafeʻi e kau akó ke nau fakakaukauloto ki heʻenau ngaahi meʻafoaki fakalaumālié. Kapau naʻe fakaafeʻi kinautolu ke nau fai e teuteu ʻa e tokotaha akó ki he kalasí, fakaafeʻi kinautolu ke nau fakakaukau ki he fepōtalanoaʻaki ne nau fai mo ha mēmipa ʻo e fāmilí pe ko ha taha kehe ne nau talanoa ki ai fekauʻaki mo ʻenau ngaahi meʻafoaki fakalaumālié.
Ko e hā hoʻo ongo fekauʻaki mo e Tamai Hēvaní mo Sīsū Kalaisi, ʻi hoʻo ʻiloʻi kuó Na tāpuekina koe ʻaki ha meʻafoaki fakalaumālié?
ʻOku tākiekina fēfē nai ʻe hoʻo ʻilo kuo foaki atu kiate koe ha meʻafoaki fakalaumālié ʻa e anga hoʻo vakai ki ho tuʻunga fakalangí?
ʻOkú ke pehē nai ko e hā ʻoku foaki ai ʻe he ʻOtuá ha ngaahi meʻafoaki fakalaumālie ki he kāingalotu kotoa pē ʻo e Siasí kae ʻikai ko ha kāingalotu tokosiʻi pē?
ʻOku finangalo ʻa e ʻEikí ke tau fefaitāpuekinaʻaki
ʻI he ako ʻa e kau akó fekauʻaki mo e ngaahi konga kehekehe ʻo e sinó mo e founga ʻoku nau takitaha ʻaonga aí, fakakaukau ke fakaafeʻi e kau akó ke fakakakato ha ngāue ʻoku kau ai ha kau mēmipa tokolahi ʻo e kalasí, hangē ko hono ʻunuakiʻi ha meʻa lahi ʻi he loki akó. Ko ha meʻa ʻe taha ko hoʻo fakaʻatā e kau akó ke nau fakaʻaongaʻi ha nima pē ʻe taha lolotonga haʻanau ngāue fakataha ke langa ha kiʻi meʻa siʻisiʻi, haehae ha ʻū laʻipepa, pe fakahoko ha ngāue ʻe taha.
Lau ʻa e 1 Kolinitō 12:14–20 ke ʻiloʻi ʻa e fakafehoanaki naʻe fakaʻaongaʻi ʻe Paula ke tokoni ke tau fakatokangaʻi ai ʻa e mahuʻinga ʻo ʻetau ngaahi tokoni fakafoʻituituí.
Ko e hā ʻoku fakafehoanaki ki ai ʻe Paula ʻa e Siasí ʻi he potufolofola ko ʻení? Ko e hā ‘oku akoʻi atu ʻe he fakahā ko ʻení ʻo kau ki he ngaahi meʻafoaki fakalaumālié?
Kuo tāpuekina fēfē nai koe ʻo fakafou mai ʻi he ngaahi meʻafoaki fakalaumālie ʻa e niʻihi kehé?
Fakakaukau ke fakaafeʻi ha niʻihi te nau loto fiemālie ke vahevahe ʻa e ngaahi meʻafoaki fakalaumālie ʻoku nau fakatokangaʻi ʻiate kinautolú, ʻi honau kaungāakó, pe ʻi ha toʻu kehe, pea fakaʻaiʻai kinautolu ke nau fakamatalaʻi e founga ʻe lava ke tāpuekina ai ʻe he ngaahi meʻafoakí ni ʻa e niʻihi kehé. ʻI hoʻo hoko ko e faiakó, fakakaukau pe ʻe ʻaonga nai ki ha taha ʻo e kau akó haʻo talaange, lolotonga e kalasí pe fakataautaha, ʻa e ngaahi meʻafoaki fakalaumālie ʻoku hāsino meiate kinautolú.
Fakalaulauloto ki he founga kuo tāpuekina ai koe ʻe he ngaahi meʻafoaki fakalaumālie kuo foaki atú mo e founga te ke lava ai ʻo fakaʻaongaʻi kinautolu ke faitāpuekina ho fāmilí, uōtí pe koló, mo e niʻihi kehé. Mahalo te ke fie hiki ʻi hoʻo tohinoa akó ha faʻahinga ongo mei he Laumālie Māʻoniʻoní fekauʻaki mo hoʻo ngaahi meʻafoakí.
Aleaʻi ha niʻihi pe kotoa ʻo e ngaahi fehuʻi ko ʻení pe fakaafeʻi e kau akó ke tali kinautolu ʻi heʻenau tohinoa akó.
Ko e hā ʻokú ke ongoʻi ʻoku finangalo ʻa e ʻEikí ke mahino kiate koe fekauʻaki mo koé pea mo hoʻo ngaahi meʻafoaki fakalaumālié?
Ko e hā ha fakalotolahi te ke fai ki ha taha ʻokú ne ongoʻi hangē ʻoku ʻikai ke ne maʻu ha meʻafoaki fakalaumālié?
Ko e hā ha meʻafoaki fakalaumālie ʻokú ke fiemaʻu? Ko e hā te ke lava ʻo fai ke maʻu ai e meʻafoaki ko iá? (Kuo fakaafeʻi kitautolu ʻe he ʻEikí ke tau fekumi ki he ngaahi meʻafoaki fakalaumālié; vakai ki he 1 Kolinitō 12:31 ; 14:1 ; Tokāteline mo e Ngaahi Fuakava 46:7–9 .)
Ko e hā ha ngaahi founga te ke lava ai ʻo fakaʻaongaʻi hoʻo ngaahi meʻafoaki fakalaumālié ke faitāpuekina ʻaki e niʻihi kehé? ʻE tokoni fēfē nai ia ke tau hangē ange ai ko e Fakamoʻuí?
Fakaafeʻi e kau akó ke nau vahevahe ‘a e meʻa ne nau tohí. Fakakaukau ke vahevahe ha aʻusia fakataautaha pe fakamoʻoni ki he ngaahi meʻafoaki fakalaumālié.
Fakamatala Fakamahinó mo e Puipuituʻá
Te u fakaʻaongaʻi fēfē nai ʻeku ngaahi meʻafoaki fakalaumālié ke tokoniʻi e niʻihi kehé?
Naʻe vahevahe ‘e Palesiteni Tieta F. ‘Ukitofa, heʻene hoko ko emēmipa ‘o e kau Palesitenisī ʻUluakí he taimi ko iá, ʻa e founga te tau lava ai ʻo muimui ki he sīpinga ʻa Sīsū Kalaisí:
ʻĪmisi
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
ʻI heʻeku fakakaukauloto atu ki he Fakamoʻuí, ‘oku ou faʻa vakai ‘oku mafao mai Hono ongo toʻukupú ke fakafiemālieʻi, fakamoʻui, faitāpuekina mo ʻofeina kitautolu. Naʻá Ne talanoa maʻu pē mo e kakaí, kae ʻikai ke talanoa hifo, kiate kinautolu. Naʻá Ne ʻofa ʻi he māʻulaló mo e angavaivaí peá ne feohi mo kinautolu, ngāue fakaetauhi kiate kinautolu mo ʻoange ʻa e ʻamanaki leleí mo e fakamoʻuí.
Ko ʻEne ngāue ia ʻi he māmaní; naʻá Ne mei fai pehē kapau naʻá Ne ʻi heni he ʻahó ni; pea ko e meʻa ia ʻoku totonu ke tau fai heʻetau hoko ko ʻEne ākonga mo e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. …
ʻI heʻetau muimui ki Heʻene sīpinga haohaoá, ʻe hoko ai hotau nimá ko Hono toʻukupu; hotau matá, ko Hono fofonga; hotau lotó, ko Hono loto.
(Dieter F. Uchtdorf, “Ko Hoku Ongo Nimá Kimoutolu,” Ensign pe Liahona,Mē 2010, 68)
Naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
Elder David A. Bednar, Quorum of the Twelve Apostles official portrait. 2020.
ʻOku tau maʻu e ngaahi meʻafoaki fakalaumālié koeʻuhí ke tāpuekina ʻaki e niʻihi kehé. Kapau ko ʻetau fakaʻamú ke maʻu ha meʻafoaki koeʻuhí ʻoku tau fiemaʻu ia, mahalo he ʻikai ke tau maʻu ia. ʻI heʻetau feinga ke tokoniʻi e niʻihi kehé ʻo fakatatau mo e ngaahi akonaki ʻa Sīsū Kalaisí, ʻoku tāpuekina leva kitautolu ʻaki ha ngaahi meʻafoaki fakalaumālie mo ha ivi lahi ange ʻe malava ai ʻa e ngāue tokoní.
Naʻe vahevahe ʻe ʻEletā Sione C. Pingilei ko e Siʻí ʻo e Kau Fitungofulú ha sīpinga ʻo ha fefine naʻá ne ʻiloʻi naʻá ne maʻu ha meʻafoaki fakalaumālie naʻe ʻikai ke ne fakatokangaʻi:
ʻĪmisi
Official Portrait of Elder John C. Pingree, Jr. Photographed in March 2017.
ʻI ha ʻaho ʻe taha, naʻe tautapa ai ha fefine loto-foʻi ʻo pehē, “ʻEiki, ko e hā ʻeku ngāue fakatāutahá?” Naʻá Ne folofola mai, “Fakatokangaʻi e niʻihi kehé.” Ko ha meʻafoaki fakalaumālie ia! Talu mei he taimi ko iá, kuó ne maʻu ʻa e fiefia ʻi heʻene tokangaʻi e niʻihi ʻoku faʻa moʻungaloá, pea kuo ngāue ʻa e ʻOtuá ʻiate ia ke tāpuekina ai ha tokolahi. Neongo he ʻikai hoko ha niʻihi ʻo ʻetau ngaahi meʻafoaki fakalaumālié ke tau ʻiloa ai ʻi he ngaahi tuʻunga moʻui ʻo e māmaní, ka ʻoku nau mahuʻinga ki he ʻOtuá mo ʻEne ngāué.
(John C. Pingree Jr. “ʻOku ʻi ai Haʻaku Ngāue Ke Ke Fai,” Ensign pe Liahona, , Nōvema. 2017, 33-34)
Ko e hā ʻoku totonu ke u fai ʻi he taimi ʻoku ou ongoʻi taʻe-feʻunga ai ki hoku ngaahi fatongia ʻi he Siasí?
Naʻe akoʻi ʻe Palesiteni Tieta F. ʻUkitofa, ʻo e Kau Palesitenisī ʻUluaki mālōloó ʻo pehē:
ʻĪmisi
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
Mahalo te ke ongoʻi ʻoku ʻi ai ha niʻihi ia te nau mei malava ange ʻe kinautolu ʻo fakahoko pea nau taukei ange ke fua ho ngaahi fatongiá, ʻo lelei ange ia ʻiate koe, ka naʻe ʻi ai hono ʻuhinga ne ʻoatu ai ʻe he ʻEikí ho ngaahi fatongiá. Mahalo ʻoku ʻi ai ha kakai mo ha ngaahi loto, ko koe toko taha pē te ke lava ʻo tokoniʻi mo tākiekiná. Mahalo he ʻikai toe lava ʻe ha taha kehe ia ʻo fakahoko tatau ia mo koe.
(Dieter F. Uchtdorf, “Hikiʻi Hake ʻa e Feituʻu ʻOkú ke Tuʻu Aí,” Ensign pe Liahona, Nōvema 2008, 56)
Ngaahi ‘Ekitivitī Fakalahi ki he Akó
ʻOku mahuʻinga ʻa e tokotaha kotoa pē
Tokoni ke mahino ki he kau akó neongo ʻoku kehekehe ʻa e tokotaha kotoa pē, ka ʻoku fakaafeʻi ʻa e tokotaha kotoa pē ke haʻu kia Kalaisi pea ngāue ʻi Hono Siasí. ʻE lava ke fakatātaaʻi ʻa e lēsoni ko ʻení ʻaki hano fakaʻaongaʻi ha pāsolo. Fakakaukau ke hiki e ngaahi foʻi lea ki he 1 Kolinitō 12:12 ʻi ha laʻipepa pea kosi leva ʻa e laʻipepá ki ha ngaahi kongokonga kehekehe, hangē ko ha pāsoló, ke fokotuʻutuʻu ʻe he kau akó. Fakaafeʻi e kau akó ke nau lau ʻa e vēsí pea aleaʻi ʻa e meʻa ʻokú ne akoʻi fekauʻaki mo e Siasi ʻo Sīsū Kalaisí.
