Seminelí
1 Kolinitō 8–13

1 Kolinitō 8–13

Vakai Fakalūkufuá

ʻI he hokohoko atu e tohi ʻa Paula ki he kakai Kolinitoó, naʻá ne akoʻi kuo pau ke tau fili ke fakamavahe kitautolu mei he ʻahiʻahí. Naʻá ne fakamatalaʻi ʻoku fakataumuʻa ʻa e kakai tangatá mo fafiné ke nau ngāue fakataha mo fepoupouaki ʻi heʻenau muimui ki he ʻEikí. Naʻá ne akoʻi kapau ʻe ʻiloʻi mo fakaʻaongaʻi ʻe he kāingalotú kotoa ʻa e ngaahi meʻafoaki fakalaumālie kuo nau maʻu mei he ʻEikí, ʻe lava ke nau hangē ko e ngaahi konga lahi ʻo ha sino ʻoku nau ngāue fakataha. Naʻá ne tohi fakaikiiki foki fekauʻaki mo e ʻofa faka-Kalaisí, pe manavaʻofá, mo e ʻuhinga ʻoku totonu ke tau fiemaʻu ai iá.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

1 Kolinitō 10

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau falala kia Sīsū Kalaisi ke ikunaʻi ʻa e ʻahiʻahí.

  • Teuteu ʻa e tokotaha akó: Fakaafeʻi e kau akó ke nau ako ʻa e “1 Kolinitō 10:1–13: ʻOku ʻOmi ʻe he ʻOtuá ha Founga ke Hao ai mei he ʻAhiʻahí” ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻoú 2023. ʻI heʻenau akó, te nau lava ʻo fakalaulauloto ki he fehuʻi ko ʻení: “Ko e hā e faʻahinga haoʻanga mei he ʻahiʻahí kuo ʻomi ʻe he Tamai Hēvaní maʻaú?”

1 Kolinitō 11

Taumuʻa ʻo e lēsoní: ʻE tokoni ʻa e lēsoni ko ʻení ke mahino lelei ange ki he kau akó ʻa e ʻuhinga ʻoku fefiemaʻuʻaki ai ʻe he kakai tangatá mo fafiné kinautolu kae lava ke nau maʻu e ngaahi tāpuaki māʻolunga taha ʻi he palani ʻa e Tamai Hēvaní.

  • Teuteu ʻa e tokotaha akó: Fakaafeʻi e kau akó ke nau fakamanatu ha taimi kuo nau mamata ai ki he fengāueʻaki fakataha ʻa ha kakai tangata mo fafine mo nau fepoupouʻaki. Poupou’i kinautolu ke nau fakakaukau ki he founga ʻoku tākiekina lelei ai ʻe he ngaahi fakakaukau, ivi, mo e mālohinga kehekehe ʻo e kakai tangata mo fafiné ʻa e nofomalí, fāmilí, koló, mo e ngaahi vā fetuʻutaki ʻi he Siasí.

Fakataukei Fakatokāteliné: 1 Kolinitō 11:11

Taumuʻa ʻo e lēsoní: ʻE tokoni e lēsoni ko ʻení ke fakatupulaki hoʻo taukei ʻi he 1 Kolinitō 11:11 ʻaki hono ako maʻuloto ʻa e , fakamoʻoni fakafolofolá mo e kupuʻi lea fakafolofola mahuʻingá, fakamatalaʻi ʻo e tokāteliné, mo hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

  • Fokotuʻu ki he akoʻí ʻi he konifelenisi vitioó: Fakakaukau ke liliu ʻa e founga akoakó ʻo fakatatau ki he ngaahi meʻa ʻoku ʻikai mahinó pe ngaahi tūkunga ʻoku ʻi ai e kau akó fekauʻaki mo e ngaahi fatongia ʻo e kakai fefiné mo e kakai tangatá ʻi he palani ʻa e Tamai Hēvaní. Kapau ʻoku ʻohake ʻe he kau akó ha ngaahi meʻa ʻoku ʻikai mahino pe tūkunga kehekehe, ʻe lava ke fokotuʻutuʻu ʻa e kau akó ki ha ngaahi loki fakatahaʻanga ke aleaʻi kinautolu.

1 Kolinitō 12

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau fakatokangaʻi ʻa e ngaahi meʻafoaki fakalaumālie kuo foaki ange ʻe he ʻEikí kiate kinautolu ke tāpuekina e niʻihi kehé mo fakamālohia Hono Siasí.

  • Teuteu ʻa e tokotaha akó: Fakaafeʻi e kau akó ke nau feinga ke ʻiloʻi ha meʻafoaki fakalaumālie ʻe taha pe ua kuo foaki kiate kinautolu. Mahalo te nau fie kole ki he kau mēmipa ʻo e fāmilí pe niʻihi kehe falalaʻanga ʻoku nau ʻofa aí ke tokoni ange ke nau fai ʻeni. Kole ki he kau akó ke nau fakalaulauloto ki heʻenau ngaahi meʻafoakí mo e founga ʻoku nau fakaʻaongaʻi ai kinautolu ke tāpuekina e niʻihi kehé. 

  • Lēsoni fakataumuʻá: Ko ha meʻaʻofa ‘oku kofukofu

  • Meʻa ke fakaʻaliʻali atú: Ko e lea naʻe fai ʻe ʻEletā Māvini J. ʻEsitoni ʻo kau ki he ngaahi meʻafoaki fakalaumālie ʻoku ʻikai fuʻu ʻiloá

  • Fokotuʻu ki he akoʻí ʻi he konifelenisi vitioó: Fakakaukau ke fakaafeʻi e kau akó ke nau fai ha ngaahi fehuʻi fekauʻaki mo e ngaahi meʻafoaki fakalaumālié ʻi he fetalanoaʻakí. Liliu e lēsoní ʻo fakatatau mo e fiemaʻú ke tali e ngaahi fehuʻi ʻoku nau ʻeké.

1 Kolinitō 13

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ongoʻi ʻa e ʻofa haohaoa ʻa Sīsū Kalaisi kiate kinautolú pea ke tokoniʻi kinautolu ke nau fekumi ki he meʻafoaki ʻo e manavaʻofá ke nau ongoʻi ʻa e ʻofa ko iá ki he niʻihi kehé.

  • Teuteu ʻa e tokotaha akó:Fakaafeʻi e kau akó ke nau fakakaukau ki ha mēmipa ʻo e fāmilí, kaungāmeʻa, pe ko ha tokotaha fakafoʻituitui kehe te nau fiemaʻu ha vā fetuʻutaki lelei ange mo ia. Kole ki he kau akó ke nau fakakaukau ki he ola ʻo hono fakahaaʻi ha ʻofa lahi ange ki he tokotaha ko ʻení ʻi he vā fetuʻutakí.

  • Fokotuʻu ki he akoʻí ʻi he konifelenisi vitioó: Fakakaukau ke fakaʻaongaʻi e fanga kiʻi loki fakatahaʻangá ke fakaʻatā e kau akó ke nau aleaʻi e ngaahi tafaʻaki ʻo e manavaʻofá mo e founga naʻe fakahaaʻi ai ia ʻe he Fakamoʻuí kiate kinautolú.