Fakataukei Fakatokāteliné: 1 Kolinitō 11:11

ʻOku Fakatou Mahuʻinga ʻa e Kakai Tangatá mo e Kakai Fefiné ʻi he Palani ʻa e Tamai Hēvaní

ʻĪmisi

Young couple stands outside the Ogden Utah Temple. They are looking out at the temple in the background with the Angel Moroni being almost top center of the image. He is wearing a dark blue suit with white collared shirt. She is in a white dress. It is late afternoon/early evening.

ʻI hoʻo ako ʻa e 1 Kolinitō 11, naʻá ke ako ai fekauʻaki mo e vakai ʻa e ʻOtuá ki he ngaahi fatongia makehe mo fakalangi ʻo e kakai fefiné mo e kakai tangatá. Ko e taumuʻa ʻo e lēsoni ko ʻení ke tokoniʻi koe ke fakatupulaki hoʻo taukei ʻi he ngaahi akonaki ko ʻení, ʻi hoʻo ako maʻuloto ʻa e veesi fakamoʻoni fakafolofolá mo e kupuʻi lea fakafolofola mahuʻinga ʻi he 1 Kolinitō 11:11, fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ʻo hono maʻu ʻo e ʻilo fakalaumālié ki ha tūkunga moʻoni ʻo e moʻuí.

Teuteu ʻa e tokotaha akó: Fakaafeʻi e kau akó ke nau lau ʻa e konga 3 ʻi he fakamatala “Kakai Tangata mo Fafine ʻi he Ngāue ʻa e ʻEikí” naʻe fai ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá (New Era, April 2014, 2–5), ʻo kumi e ngaahi moʻoni ʻoku fiemaʻu ke mahino kiate kitautolu fekauʻaki mo e tokāteline ʻa e ʻOtuá ki he kakai tangata mo fafiné.

Ngaahi ʻEkitivitī Ako ʻOku Ala Fakahokó

ʻOku fokotuʻutuʻu ʻa e lēsoni fakataukei fakatokāteline ko ʻení ke toki akoʻi ʻi he hili ʻa e lēsoni “1 Kolinitō 11,” ʻa ia ko e lēsoni fakaʻuhinga ia ki he potufolofola fakataukei fakatokāteline ʻo e 1 Kolinitō 11:11 . Kapau ʻoku fiemaʻu ke ʻunuakiʻi e lēsoni fakataukei fakatokāteline ko ʻení ki ha uike kehe, fakapapauʻi ke akoʻi foki mo hono lēsoni fakaʻuhingá lolotonga e uike ko iá.

Fakamatalaʻi mo ako maʻuloto

Ko e vakai ko ʻeni fekauʻaki mo e nimá ʻoku toʻo ia mei he lea ʻa Linitā K. Peatoni “Te Ta Kaka Fakataha” (Ensign pe Liahona, Mē 2015, 29–32).

Vakai ki ho nimá. Fakatokangaʻi ʻa e founga ʻokú na faitatau aí mo e founga ʻokú na faikehekehe aí.

Kapau ʻe lava ke ngāue fakafoʻituitui ʻa e nima takitaha, ʻokú ke pehē ko e hā naʻe ngaohi ai ʻe he Tamai Hēvaní ʻEne fānaú mo e nima ʻe uá?
ʻOku tokoniʻi fēfē nai koe ʻe he ngaahi faikehekehe ʻi ho ongo nimá ke ke fakahoko e ngaahi ngāué pe fakaʻaongaʻi ho ngaahi talēnití?
ʻE fekauʻaki fēfē nai e ngaahi vakai ko ʻeni fekauʻaki mo ho ongo nimá mo e 1 Kolinitō 11:11 ?

ʻOange ha faingamālie ki he kau akó ke nau ako maʻuloto e fakamoʻoni fakafolofolá mo e kupuʻi lea fakafolofola mahuʻinga ʻi he 1 Kolinitō 11:11 . Ko ha ʻekitivitī ako maʻuloto ʻeni ʻe taha. ʻO ka feʻunga pē, poupouʻi e kau akó ke nau fakaʻaongaʻi ʻa e app Fakataukei Fakatokāteliné ke toe vakaiʻi mo ako maʻuloto ʻa e potufolofola ko ʻení.

ʻE lava ke tokoni atu ʻa e ʻekitivitī ko ʻení ke ke ako maʻuloto e potufolofola fakataukei fakatokāteline 1 Kolinitō 11:11 mo hono kupuʻi lea fakafolofola mahuʻingá, “ʻOku ʻikai ai ʻa e tangatá kae ʻi he fefiné, pea ʻoku ʻikai ai ʻa e fefiné kae ʻi he tangatá, ʻi he ʻEikí.”

Hiki ʻa e kupuʻi lea fakafolofola mahuʻingá mo e fakamoʻoni fakafolofolá. Lau pe toutou lau e kupuʻi leá mo e veesi fakamoʻoni fakafolofolá, ʻo tamateʻi pe toʻo ha ngaahi foʻi lea ʻi he taimi kotoa pē. Hokohoko atu pē kae ʻoua kuó ke fiemālie ki hono toutou lau e kupuʻi lea fakafolofola mahuʻingá mo e veesi fakamoʻoni fakafolofolá kae ‘oua ʻe toe sio ki he ngaahi leá.

Akoako hono fakaʻaongaʻí

ʻI hono toe vakaiʻi ʻe he kau akó e ngaahi tefitoʻi moʻoni ki hono maʻu ʻo e ʻilo fakalaumālié, tokanga ki he niʻihi te nau ala fiemaʻu ha tokoni pe fakahinohino lahi angé. Ko ha sīpinga ʻeni ʻe taha ʻe lava ke fakaʻaongaʻi. Hili hono lekooti ʻe he kau akó ʻenau ngaahi fakakaukaú, ʻe lava ke vahevahe kinautolu ki ha ngaahi kulupu iiki ke nau fealeaʻiʻaki e ngaahi tefitoʻi moʻoní.

Hiki ʻi hoʻo tohinoa akó ʻa e ngaahi tefitoʻi moʻoni ko ʻeni ki hono maʻu ʻo e ʻilo fakalaumālié:

Ngāue ʻi he tuí
Siviʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá
Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

Fakamatalaʻi ʻa e tefitoʻi moʻoni takitaha ʻi ha sētesi ʻe ua pe tolu. Mahalo te ke fie vakai ki he palakalafi 5–12 ʻi he Fakamatala ki he ʻElito ʻo e Fakataukei Fakatokāteliné (2022) ke vakaiʻi hoʻo ʻiló pea tānaki atu ha faʻahinga fakamatala mahuʻinga naʻe ʻikai ke ke maʻu.

Poupouʻi e kau akó ke nau fakamanatu e meʻa naʻa nau ako ʻi heʻenau teuteu ʻa e tokotaha ako. ʻI hono aleaʻi ʻe he kau akó ʻa e fehuʻi ko ʻení, fakakaukau ke hiki (pe tuku ki he kau akó ke nau hiki) ʻenau ngaahi talí ʻi he palakipoé. ʻE tokoni hono lekooti ʻenau ngaahi fakakaukaú ke fakafehokotaki e kau akó mo e meʻa ʻoku nau akó.

‘I he 1 Kolinitō 11:11 , naʻa ke ako ai ʻoku mahuʻinga ʻi he palani ‘a e Tamai Hēvaní, ʻa e kakai fefiné mo e kakai tangatá fakatouʻosi.

Kuo maʻu hala pe fakataʻeʻaongaʻi fēfē nai ʻa e foʻi moʻoni ko ʻení ʻi he sosaietí?
Ko e hā ha ngaahi tūkunga ʻi hoʻo moʻuí ʻe lava ke ke maʻu ai ʻa e faingamālie ke akoʻi pe taukaveʻi ʻa e moʻoni ko ʻení?

Ke fakatupulaki e mahuʻinga fakatāutahá, fakakaukau ke fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ki he ngaahi tali ʻa e kau akó ki he ngaahi fehuʻi kimuʻá. ʻO ka fiemaʻu, fakaʻaongaʻi e ngaahi tūkunga ʻoku ʻoatu ʻi he lēsoní.

Fakakaukau ki he founga ʻe lava ke ako lelei taha ai e kau akó mei he ʻekitivitī ko ʻení. Te nau lava ʻo takitaha ngāue pē, fakahoko ʻeni ʻi ha ngaahi kulupu iiki, pe kalasi. ʻE ala tokoni ke tuku ha taimi ʻi he ‘osi ʻa e kalasí ke aleaʻi ai e ngaahi meʻa ne nau maʻú.

Mahalo ʻe tokoni ke fakaʻaliʻali ʻa e ngaahi fehuʻi ko ʻení ke aleaʻi pe ʻoange ki he kau akó fakataha mo e laʻipepa tufá.

ʻĪmisi

New Testament Seminary Teacher Manaul - 2023

Fili ha taha ʻo e ngaahi tūkunga ko ʻení, pea fakakaukau ki he founga ʻe lava ke tokoni ai hono fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ke mahino ki ha taha ʻa e moʻoni mei he 1 Kolinitō 11:11 fekauʻaki mo e ngaahi fatongia ʻo e kakai tangatá mo fafiné ʻi he palani ʻa e Tamai Hēvaní.

Naʻe fanongo e tuofefine siʻisiʻi ʻo Keili ko ʻElé ki ha fānau tangata ʻe niʻihi ʻi he akó ʻoku nau pehē ʻoku mahuʻinga ange ʻa e kakai tangatá ʻi he kakai fefiné. ʻOku fehuʻi ange ʻe ʻEle kia Keili, “ʻOku ʻikai nai ke u mahuʻinga tatau mo e fānau tangatá?”
ʻOku hohaʻa ʻa Liiti koeʻuhí he ʻokú ne fanongo ki ha niʻihi ʻo e kau mēmipa ʻo hono kōlomú ʻoku nau talanoa taʻe-fakaʻapaʻapa fekauʻaki mo e kakai fefiné.
Hili ha mamata ʻi ha faiva manakoa, ʻoku fakakata ʻaki ʻe ha kulupu ʻo ha ngaahi kaungāmeʻa ʻa e ngaahi tōʻonga fakavalevale ʻa e tamai ‘i he faivá. ʻOku tui ha niʻihi naʻe ʻikai fiemaʻu e tamaí, pea pehē ʻe ha kaungāmeʻa ʻe taha, “Ko e ʻuhinga ʻeni ʻoku ʻikai fiemaʻu ai ha tangata ki hono ohi hake ha fāmili fiefiá.”
ʻOku teuteu ʻa ʻEsitapani mo Kelela ke mali ʻi he temipalé. ʻOku fokotuʻu ange ʻe heʻena mātuʻá ke na talanoa ki he founga te na takitaha fakahoko ai e ngaahi ngafa mo e fatongia kehekehe ʻi hona fāmili he kahaʻú.

Ngāue ʻi he tuí

Ko e hā ha ngaahi founga te ke lava ai pe ko e tokotaha fakafoʻituitui ʻi he tūkungá ʻo ngāue ʻi he tui ko e tali ki he palopalema ʻoku ‘ohaké?
ʻE tokoni fēfē nai kiate koe hono fakamahuʻingaʻi e ngaahi fatongia makehe mo mahuʻinga ʻo e kakai fefiné mo e kakai tangatá ke ke muimui ai kia Sīsū Kalaisí?

Siviʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá.

Ko e hā ʻokú ke ʻilo fekauʻaki mo e Tamai Hēvaní mo ʻEne palaní ʻe ala ʻaonga kapau te ke fehangahangai mo ha tūkunga peheni?
Ko e hā ha niʻihi ʻo e ngaahi fatongia ʻo e kakai tangatá mo fafiné ʻi he palani ʻa e Tamai Hēvaní?

Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

ʻE tokoni fēfē nai kiate koe ʻa hoʻo mahino mo e fakamoʻoni ki he ngaahi moʻoni naʻe akoʻi ʻi he 1 Kolinitō 11:11 ke ke tali ki he tūkunga ko ʻení?

ʻE lava ke hoko ʻeni ko ha faingamālie ki he kau akó ke nau vahevahe ʻa e meʻa ne nau ako ʻi heʻenau teuteu ki he kalasí.

Ko e hā ha ngaahi akonaki fakalaumālie kehe mei he folofolá pe kau taki ʻo e Siasí ʻe lava ʻo tokoni atu ke ke tali ʻi he faivelenga?

Toe vakaiʻi ʻo e Fakataukei Fakatokāteliné

‘Oku totonu ke ngāue ʻaki e ʻekitivitī toe vakaiʻi ko ʻení ʻi ha lēsoni ʻe akoʻi ʻi he kahaʻu vave maí.

Hiki ʻa e kupuʻi lea fakafolofola mahuʻinga ʻi he 1 Kolinitō 11:11 ʻi he palakipoé, fetongi ʻa e ngaahi foʻi lea mahuʻingá ʻaki ha ngaahi foʻi laine ʻatā ke fakafonu. Fakaafeʻi e kau akó ke nau tohi pe lau maʻuloto ʻa e potufolofola mahuʻingá mo e veesi fakamoʻoni fakafolofolá, ʻo fakafonu e ngaahi laine ʻataá ke tonu. Kole ki he kau akó ke nau toutou lea ʻaki tuʻolahi e veesi fakamoʻoni fakafolofolá mo e kupuʻi lea fakafolofola mahuʻingá.

Ngaahi ʻEkitivitī Fakalahi ki he Akó

Ngaahi maʻuʻanga tokoni kuo fokotuʻu fakalangí

Fakakaukau ke fokotuʻu ange e ngaahi maʻuʻanga tokoni ko ʻení pe ngaahi maʻuʻanga tokoni kehe kuo fokotuʻu fakalangí ʻi he tali ʻa e kau akó ki he ngaahi tūkungá:

M. Russell Ballard, “Men and Women in the Work of the Lord,” New Era, April 2014, 2–5

Linda K. Burton, “Te Ta Kaka Fakataha,” Ensignpe Liahona, Mē 2015, 29 – 32

Jean B. Bingham, “Faaitaha ʻi hono Fakahoko e Ngāue ʻa e ʻOtuá,” Ensign pe Liahona, Mē 2020, 60-63

Talanoa ʻo Mōniká

ʻI ha fakamafola ako maʻá e Seminelí mo e ʻInisititiuti Fakalotú, naʻe fakamatala ai ʻa Brother Seti H Uepi ki he founga ʻe lava ke fakaʻaongaʻi ai e ngaahi tefitoʻi moʻoni ʻo hono maʻu ʻo e ʻilo fakalaumālié ki ha tūkunga ʻo ha finemui ko Mōnika. Hili haʻane fehangahangai mo ha tukuakiʻi ʻoku ʻikai fakamahuʻingaʻi ʻe he Siasí ʻa e kakai fafiné, ʻoku ʻikai fakapapauʻi ʻe Mōnika ʻa e founga ke ne tali ʻakí.

ʻE ala tokoni ki he kau akó ke nau fakaʻaongaʻi ʻa e talanoa ʻo Mōniká ke aleaʻi e ngaahi moʻoni naʻe akoʻi ʻi he 1 Kolinitō 11:11–12 pea akoako fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié. Fakakaukau ke ʻai ha ngaahi konga ʻo e lea ʻa Brother Uepí ke maʻu ʻe he kau akó ko ha maʻuʻanga tokoni.

Vakai, Chad H Webb, “Fakataukei Fakatokāteliné”” (lea ne fai ʻi he fakamafola ʻa e ako fakataʻu ʻo e Seminelí mo e ʻInisititiuti Fakalotú, 14 Sune, 2016), broadcasts.ChurchofJesusChrist.org.

Lea ki he mali ʻa e tangata mo e tangatá pe fefine mo e fefiné

ʻI hono aleaʻi ʻe he kau akó e ngaahi tūkunga ʻe fiemaʻu ai ke akoʻi pe taukapoʻi e ngaahi moʻoni ʻo e 1 Kolinitō 11:11 , mahalo te nau fie talanoa ki he kaveinga ʻo e mali ʻa e tangata mo e tangatá pe fefine mo e fefiné. Fakapapauʻi ke aleaʻi e kaveingá ni ʻi he ongoʻingofua, manavaʻofa, mo e ʻofa. ʻE lava ke mou vakai ki he “Mali ʻa e Tangata mo e Tangatá pe Fefine mo e Fefiné” topics.ChurchofJesusChrist.org. ʻO kau ki ai ‘a e 1 Kolinitō 11:8–9, 12 mo e palakalafi 2 mo e 7 ʻo e “ Ko e Fāmilí:Ko ha Fanongonongo ki Māmani ” (ChurchofJesusChrist.org) ‘e ala tokoni mo ia.

Manatuʻi ko e taumuʻa ʻo e ngaahi ʻekitivitī ko ʻení ke ‘oua ʻe ‘oatu ʻe he faiakó e ngaahi talí kotoa ka ke ʻahiʻahi fakahoko ʻe he kau akó hono fakaʻaongaʻi ʻo e ngaahi tefitoʻi moʻoni ki hono maʻu ʻo e ʻilo fakalaumālié. Fekumi ki he fakahinohino ʻa e Laumālié ʻi hoʻo fakafanongo ki he kau akó pea ʻoku ueʻi koe ke ke fai ha ngaahi fehuʻi ke tokoniʻi kinautolu ke fakaleleiʻi e ngaahi meʻa ʻoku nau hohaʻa ki aí.

ʻE lava ke fakaʻaongaʻi ʻa e fakatātā ko ʻení ke fetongi ʻaki ʻa e fakatātā ʻi he lēsoní:

ʻOku ʻi ai ha ngaahi kaungāmeʻa ʻo ʻOlivia ʻoku nau ongoʻi ʻa e femanakoʻaki ʻa e tangata mo e tangatá pe fefine mo e fefiné. ʻOkú ne pehē, “ʻOku faingataʻa ke mahino kiate au e ʻuhinga ʻoku kei hokohoko atu ai hono akoʻi ‘e he Siasí ʻoku hala ʻa e mali ʻa e tangata mo e tangatá pe fefine mo e fefiné. Ko e hā ʻoku fakaʻikaiʻi ai ki he kakaí ʻa e fiefia ʻe lava ke nau maʻu mei he ngaahi vā fetuʻutaki ʻo e tangata mo e tangatá pe fefine mo e fefine?”