1 Korinito 6
“O Lo Outou Tino O le Malumalu lea o le Agaga Paia”
Atonu o isi taimi ua faapei ai le salalau o amio le mama ma le agasala faalefeusuaiga o ni faafitauli e patino i o tatou aso. Ae peitai, i lana tusi i le toeitiiti 2,000 tausaga ua tuanai, na aoao ma lapatai mai ai Paulo e uiga i nei lava agasala. O aoaoga mamana a Paulo na faamalosia ma faatonu ai le Au Paia i Korinito, ma taitaiina ai i latou e toe foi i le ala o feagaiga. O lenei lesona ua faamoemoe e fesoasoani ia e malamalama atili ai i le taua o lou tino faaletino ma le taua o le tausisia o le mama i tulaga o feusuaiga.
O le fausia o se siosiomaga saogalemu. Fausia se siosiomaga o loo afio ai le Agaga Paia ma mafai ai e tagata aoga ona saoloto e faasoa atu a latou fesili ma lagona. O se tasi auala e fai ai lenei mea o le tali atu lea i taimi uma i tagata aoga ma le agalelei, agaalofa, ma le faaaloalo. Uunaia tagata aoga e faia lenei lava mea i le tasi ma le isi.
Sauniuniga a le tagata aoga: Valaaulia tagata aoga e manatunatu i mea ua latou iloa e uiga i tulaga faatonuina a le Alii i le mama atoatoa i tulaga feusuai ma sauni e fai atu soo se fesili o ia te i latou e uiga i le mama i tulaga feusuai.
Gaoioiga e ono Mafai Ona Aoao Ai
Valaaulia tagata aoga e mafaufau loloto i faamatalaga nei:
Mama i tulaga feusuai
Faitau faamatalaga nei e uiga i le mama i tulaga feusuai. Fuafaatatau ia faamatalaga taitasi mai le 1 i le 5 (1=matuai le ioeina, 2=le ioeina, 3=leai se itu, 4=ioeina, 5=matuai ioeina).
-
O loo tatou i ai i se lalolagi o loo eseese ai manatu o tagata po o a uiga ma faiga i tulaga feusuai e ao ona talia.
-
Ou te malamalama i tulaga faatonuina a le Alii e faatatau i le mama i tulaga feusuai (ua taua foi o le tulafono o le legavia).
-
O loo i ai lo’u naunautaiga e ola e tusa ma le tulaga faatonuina a le Alii e faatatau i le mama atoatoa i tulaga feusuai.
-
Ou te iloa le ala e faamanuiaina ai lo’u olaga e le tulaga faatonuina a le Alii o le mama i tulaga feusuai.
-
E i ai au fesili e uiga i le tulaga faatonuina a le Alii o le mama i tulaga feusuai.
Mafaufau e tusi i lau api talaaga mo suesuega mea ua e iloa ma talitonu i ai e uiga i le tulaga faatonuina a le Alii o le mama mai feusuaiga faapea foi ma soo se fesili o ia te oe e uiga i ai. A o e suesue i lenei lesona, saili mo le Tama Faalelagi e taiala oe e ala i le Agaga Paia. Taumafai ina ia e iloa ma aoaoina upumoni e mafai ona fesoasoani ia e malamalama atili ai ma naunau e ola i le tulaga faatonuina a le Alii o le mama i tulaga feusuai ma o le a fesoasoani lena e tali ai au fesili ma popolega.
Ua aoao atu e Paulo le tulafono a le Alii o le legavia
O Korinito sa o se nuu telē, tamaoaiga, ma [ni tagata] eseese lea sa taatele ai le agasala tau i feusuaiga. Na lisiina e Paulo le faitaaga (mafutaga feusuai faapouliuli), mulilua, ma le faasotoma o nisi o agasala taatele i tagata Korinito (tagai i le 1 Korinito 6:9–10).
Faitau i aoaoga a Paulo i le 1 Korinito 6:18–20, ma mafaufau e faailoga upu po o fasifuaitau o aofia ai aoaoga a le Atua e uiga i le mama i tulaga feusuai ma le natura paia o le tino o le tagata soifua.
-
O a upumoni ua e lagona o loo finagalo le Alii e te malamalama i ai mai nei fuaiupu? Aisea e te manatu ai e finagalo le Alii ia e malamalama i na upumoni?
-
E mafai faapefea e nei upumoni ona aafia ai le ala e te vaai ai i le tulafono a le Alii o le legavia?
O se tasi upumoni tatou te aoaoina mai nei fuaiupu e faapea o o tatou tino o malumalu o le Atua e mafai ona afio ai le Agaga Paia.
I le ogatotonu o se itulau i lau api talaaga mo suesuega, tusi vave se ata faigofie o se tagata o loo tu i tafatafa o se malumalu. E faataamilo i le ata, lisi mea e tutusa i le va o se tino faaletino ma se malumalu. Faailoa mai mafuaaga e mafai ona fesoasoani ai lenei faatusa e te malamalama ai i le tulafono o le ola mama. O fesili nei e mafai ona fesoasoani ia te oe i le faia o lenei faatusatusaga:
-
E mafai faapefea e le mafaufau o o tatou tino o ni malumalu ona faatosina ai le ala tatou te taulima ai o tatou tino?
-
E mafai faapefea e lenei faatusatusaga o o tatou tino ua faapei o malumalu ona faatosina ai o tatou mafaufauga ma amioga e faatatau i le mama i tulaga feusuai?
-
O a upumoni e uiga i le Agaga Paia e taua ona malamalama i ai i lenei fuaitau? Aisea?
-
O a ni mafuaaga ua e manatu e aoga ai le taumafai ina ia afio le Agaga Paia i totonu ia te oe?
E faapefea pe afai e le usitaia e se tasi le tulafono o le legavia? A o aoao atu Paulo i tagata Korinito, na ia maitauina o nisi o tagata o le ekalesia i Korinito sa faia agasala tau i feusuaiga i ni taimi ua alu (tagai i le 1 Korinito 6:9–11). Ae ina ua latou salamo ma papatisoina, sa faamamaina i latou e ala i le Togiola a Iesu Keriso.
Faitau le 1 Korinito 6:11, ma mafaufau e faailoga upu po o fasifuaitau na faaaoga e Paulo e fesoasoani ai i tagata i Korinito ia malamalama i le mana faamama o le Togiola a Iesu Keriso, o loo ua avanoa mo tagata taitoatasi uma.
-
Aisea e taua ai le iloa e mafai e Iesu Keriso ona faamama i tatou mai agasala tau i feusuaiga?
Manatua o “tagata e aafia fua i feusuaiga faatautala e le ta’usalaina i le agasala ma e le manaomia ona salamo. Afai na e aafia fua i se faiga faatautala, ia e iloa e ta’umamaina oe ma e alofa le Atua ia te oe. Talanoa i ou matua po o se isi tagata matua faatuatuaina ma saili vave se fautuaga mai lou epikopo. E mafai ona latou fesoasoani faaleagaga ia te oe ma taumafai ia e maua le puipuiga ma le fesoasoani o e manaomia” (“Mama Atoatoa i Tulaga Feusuai,” Mo Le Malosi o le Autalavou [tamaitusi, 2011], 36–37).
Toe faitau le 1 Korinito 6:19–20 ma vaavaai mo isi mea na aoao mai e Paulo e uiga ia Iesu Keriso ma Lana Togiola.
-
O le a sou manatu i le uiga o faamatalaga a Paulo lea na faapea mai ai “e le aiā foi outou ia te outou” ma “ua faatauina outou i le tau”?
Atonu e lelei i le avea ai ma vaega o lenei talanoaga ona faasino tagata aoga i le Mataupu Faavae ma Feagaiga 18:10–12 ina ia latou vaai ai i mea na fai e Iesu Keriso o se vaega o Lana Togiola ma le mafuaaga na Ia faia ai. Valaaulia tagata aoga e mafaufau e tusi lenei mau fefaasinoa’i o fuaitau o le atamai i aoaoga faavae i tafatafa o le 1 Korinito 6:19–20 .
-
E faapefea e le taulaga a le Faaola ona aafia ai le ala e te mafaufau ma tausia ai lou tino faaletino?
Na faamamafa mai e Elder Jeffrey R. Holland o le Korama a Aposetolo e Toasefululua le sootaga o le legavia ma le taulaga a Iesu Keriso.
O le tino o se vaega taua o le agaga. O lea aoaoga faavae taua ma tulaga ese a le Au Paia o Aso e Gata Ai e faamamafaina ai le mafuaaga e matuai ogaoga ai le agasala faalefeusuai. … I le tafilisaunoaina o le tino o le isi tagata—o lona uiga o le tafilisaunoaina foi lea o lona agaga— ua faaleagaina e ia le Togiola a Keriso, lea na laveaiina lena agaga ma maua ai le meaalofa o le ola e faavavau. …
Faamolemole, aua nei faapea ane: “O ai e afaina ai? Aisea ua le [faaaoga ai] sina saolotoga itiiti? E mafai ona ou solitulafono nei ae salamo mulimuli ai.” Faamolemole aua le faavalevalea, pe soona saua. E le mafai e aunoa ma se faasalaga ona “toe faasatauroina Keriso” [tagai i le Eperu 6:6 ]. “Sosola ese ia outou i le faitaaga” [ 1 Korinito 6:18 ], o le augani mai lea a Paulo, ma sosola ese “mai soo se mea faapena” [ Mataupu Faavae ma Feagaiga 59:6 ; ua faaopoopo le faamamafa], o le faaopoopo mai lea a le Mataupu Faavae ma Feagaiga. Aisea? Ia, o le tasi o mafuaaga ona o puapuaga e le mafuatia i le tino ma le agaga na onosaia e le Faaola o le lalolagi ina ia mafai ai ona tatou sosola ese [tagai faapitoa i le Mataupu Faavae ma Feagaiga 19:15–20 ]. Ua tatou nofo aitalafu ia te Ia mo lena mea. E moni lava, o loo tatou nofo aitalafu ia te Ia i mea uma mo lena mea.”
(Jeffrey R. Holland, “Mama Patino,” Ensign, Nov. 1998, 76)
-
E faapefea e le iloaina na puapuagatia le Faaola mo oe e ala i le maligi o Lona toto ona fesoasoani e te malamalama ai e uiga ia te Ia? E mafai faapefea e le iloaina o lenei mea ona faatupulaia lou naunau ma lou gafatia e usitai ai ia te Ia?
E pei ona aoao atu Paulo i le Au Paia i Korinito, ua faapena foi o auauna a le Alii i o tatou aso ua tuuina mai fautuaga talafeagai e uiga i le tulaga faatonuina a le Alii e faatatau i le mama i tulaga feusuai ma le mana o i le Faaola e faamagalo ma faamama ai i tatou. Faitau i le “E Paia Lou Tino,” Mo Le Malosi o le Autalavou: O Se Taiala mo le Faia o Filifiliga (tamaitusi, 2022), 22–29, o loo maua i le ChurchofJesusChrist.org po o le polokalama o le Potutusi o le Talalelei, ma vaavaai mo upumoni e mafai ona faamalosi ia te oe ma tali i au fesili.
Mo nisi faamatalaga e uiga i le tulafono o le legavia ma mo faataitaiga o ona po nei o autalavou o loo ola ai, mafaufau e matamata le vitio “I Choose to Be Pure” (4:19) po o le “Chastity: What Are the Limits” (3:59) o loo maua i le ChurchofJesusChrist.org.
I Choose to be Pure
E toano ni tagata talavou o ekalesia soofaatasi na talanoa faalauaitele atu i le pogai ua latou filifili ai ia mama i feusuaiga.
Chastity: What Are the Limits?
Ua fautuaina le tupulaga o le Au Paia o Aso e Gata Ai ina ia tumau le mama mai feusuaiga, ae o a tonu lava tuaoi? O le faaaogaina o aoaoga a perofeta o ona po nei, o lenei aoaoga o loo faaali atu ai le ala e mafai ona tatou maua ai le fiafia ma le f
-
O a mataupu faavae na e aoaoina mai le 1 Korinito 6 ma upu a perofeta o ona po nei na fesoasoani ia e malamalama atili ai i le tulaga faatonuina a le Alii e faatatau i le mama atoatoa i tulaga feusuai?
-
Afai o i ai ni au fesili po o popolega e uiga i le mama atoatoa i tulaga feusuai e lei taliaina i lenei lesona, o fea e mafai ona e liliu atu i ai?
A o mafaufau loloto tagata aoga i a latou tali i nei fesili, e ono talafeagai le valaaulia o i latou e faatalanoa ni a latou fesili faaopoopo e uiga i le mama atoatoa i tulaga feusuai ma o latou matua po o le epikopo.
Faasoa atu se molimau i le Togiola a le Faaola ma le taua o le ola e tusa ai ma le tulaga faatonuina a le Alii e faatatau i le mama atoatoa i tulaga feusuai. Mafaufau e fesili po o fia molimau se toatasi pe toalua o tagata aoga.
Faaaoga sina taimi e mafaufau loloto ai i soo se uunaiga mai le Agaga Paia e uiga i ni gaoioiga e ono finagalo le Alii e te faia ona o ou aafiaga i lenei aso.
Manatu ma Talaaga o Faamatalaga
1 Korinito 6:19 . Aisea e taua ai pe a ou vaai i lo’u tino o se “malumalu o le Agaga Paia”?
Na aoao mai Peresitene Russell M. Nelson i le aafiaga i o tatou olaga pe a tatou vaai i o tatou tino o se malumalu o le Atua.
O le avea ai o lou tino ma se vaega sili ona taua o le fuafuaga e faavavau a le Atua, e le o se mea taumate faatauvaa le faamatalaina e le Aposetolo o Paulo o lou tino o se “malumalu o le Atua” [ 1 Korinito 3:16 ; tagai foi i le 6:19 ]. O taimi taitasi e te vaai ai i le faaata, ia e vaai i lou tino o lou malumalu. O lena upumoni—e faafouina ma le agaga faafetai i aso taitasi—e mafai ona aafia lelei ai au filifiliga e uiga i le auala o le a e tausia ai lou tino ma le auala o le a e faaaogaina ai.
(Russell M. Nelson, “O Filifiliga mo le Faavavau,” Ensign po o le Liahona, Nov. 2013, 107)
E faapefea ona faaosooso i tatou e Satani ina ia faaaoga sese o tatou tino?
Na aoao mai Elder David A. Bednar o le Korama a Aposetolo e Toasefululua e uiga i taufaasese a Satani ma le taua o le tino.
Matou te Talitonu i le Nofomama
O le usiusitai i le tulafono o le ola mama o le a faateleina ai lo tatou fiafia i le olaga nei, ma mafai ai ona tatou agai i luma i le faavavau.
Talu ai o se tino faaletino e avea ma totonugalemu i le fuafuaga o le fiafia a le Tama ma lo tatou alualu i luma faaleagaga, ua saili ai Lusifelo e lepetia lo tatou alualu i luma e ala lea i le faaosoosoina o i tatou e faaaoga ma le faaletatau o tatou tino. …
O le solia o le tulafono o le legavia o se agasala inosia ma o se faaaogaina sese lea o o tatou malumalu faaletino. Ia i latou ua iloa ma malamalama i le ata o le faaolataga, o le faaleagaina o le tino o se aga o le fouvale (tagai i le Mosaea 2:36–37 ; [Mataupu Faavae ma Feagaiga] 64:34–35) ma se faafitia o lo tatou faasinomaga moni o ni atalii ma afafine o le Atua. A tatou vaavaai i talaatu o le olaga nei ma i le faavavau, e faigofie ona tatou iloatino ai le mafutaga taufaasese o loo uunaia e le fili, e mo na o sina taimi ma e leai se uiga.
(David A. Bednar, “Matou Te Talitonu i le Ola Mama,” Ensign po o le Liahona, Me 2013, 43)
Na saunoa mai Susan W. Tanner, sa avea ma Peresitene Aoao o Tamaitai Talavou, i nisi o auala e faaosooso ai i tatou e le fili ina ia faaaoga sese o tatou tino faaletino.
Ua faaosoosoina e [Satani] le toatele ina ia faaleaga i lenei meaalofa maoae o le tino, e ala i le ola le mama, amioga e le tausaafia, faaloloto, ma mea e faananau i ai. Na te faaosoosoina nisi ina ia inoino i o latou lava tino; o nisi ina ia ifo i o latou lava tino. I tulaga uma e lua, e na te faatosinaina le lalolagi ina ia manatu i le tino ua na o se meafaitino. I le feagai ai ma le tele o pepelo faasatani e uiga i le tino, ua ou manao e siia’e lo’u leo i le aso nei e lagolagosua i le paia o le tino. Ou te tautino atu o le tino o se meaalofa e ao ona taulimaina i le loto faafetai ma le faaaloalo.
(Susan W. Tanner, “O Le Paia o le Tino,” Ensign po o le Liahona, Nov. 2005, 13)
Gaoioiga Faaopoopo e Aoao Ai
Tumau i le mama pe le faia e isi
Ina ia aoao atu le mataupu faavae e faapea afai tatou te filifili e mafuta vavalalata ma i latou o e talia le agasala, e mafai ona aafia i tatou ona o lo latou amioleaga, mafaufau e valaaulia tagata aoga e suesue le 1 Korinito 5:1–2, 6–7, 9–11 . O le a le tala faatusa o faaaoga e Paulo e aoao ai lenei upumoni? O le a se fautuaga a Paulo na tuuina atu i Au Paia i Korinito i le tulaga sa latou i ai? O le a se mea e mafai ona tatou faia e aunoa ma le fetuunaia o o tatou tulaga faatonuina e fesoasoani ai i tagata o e ua latou opogi le agasala?