1 Korinito 1–4

Iesu Keriso: O lo Tatou Faavae Mautinoa

Malumalu o Apollo, Korinito, na fausia pe tusa o le 600 T.L.M. Semanu o se tasi lea o fausaga sili ona matagofie i Korinito i ona po o Paulo. O malumalu ma ata o fale o aulotu faapaupau sa taatele i le lalolagi o Eleni-Roma, ma o tagata o le Ekalesia i aai e pei o Korinito atonu e fetaiai ma i latou i aso taitasi. Sa matau e Paulo a o lei liua mai le au paia i Korinito, sa tosina i latou i tupua valea [le gagana], pei ona soona tosina ai i [latou] (1 Korinito 12:2).

Mafaufau i le aafiaga leaga o fefinauaiga, faamaualuga, aoaoga sese, ma amio leaga ua i ai i le lalolagi i nei aso. Sa tauivi tagata o le uluai Ekalesia na nonofo i Korinito ma nei foi luitau. A o talai i Efeso i lana malaga faafaifeautalai lona tolu, sa tusi atu le Aposetolo o Paulo i le Au Paia i Korinito e faamalosiau ia i latou ma faamanatu atu ia i latou e faalagolago ia Iesu Keriso. O le lesona lenei e mafai ona fesoasoani ia oe e te malamalama ai pe faapefea ona fausia o tatou olaga i luga o le faavae o Iesu Keriso ma fesoasoani ia tatou manumalo i luitau faalelalolagi. 

Molimau atu i aoaoga faavae moni. Saili mo ni avanoa e molimau atu ai i aoaoga faavae moni. A o e molimau atu i aoaoga faavae moni, o le a faamautu atu e le Agaga le moni o le aoaoga faavae i loto o i latou o loo e aoaoina.

Sauniuniga a le tagata aoga: Valaaulia tagata aoga e fesili i se tagata o le aiga po o se uo e faamatala pe faafefea e le atiina ae o o latou olaga i luga o le faavae o Iesu Keriso ona fesoasoani latou te taulima ai luitau eseese o le olaga.

Gaoioiga e ono Mafai Ona Aoao Ai

Tumau i le faamaoni i tulaga faigata

Vaai faalemafaufau e faapea ua lafo mai e sau uo lelei o loo nofo i se isi aai le savali lenei:

“E matua faigata lava le siomia ai i faatosinaga leaga i soo se mea. E toatele tagata iinei e le o tausia poloaiga, ma o nisi o i latou e faitio i le Ekalesia. Ou te iloa nisi ua fulitua i a latou molimau i ni tulaga lava faapea ma ou te le manao e tupu lena mea ia te a’u. E i ai se fautuaga?”

O le a lau tala o le a fai atu i lau uo?
O a ni faatosinaga leaga ma aafiaga toatuga ua e maitauina i le mea o loo e nofo ai?
E faapefea ona fai nei faatosinaga ma luitau i nisi o taimi ina ia tumau ai ma le faamaoni i lou faatuatuaga?

A o e suesue i lenei lesona, mafaufau pe faapei lou faamaoni pe a e feagai ma luitau faalelalolagi po o ni faatosinaga leaga. Saili le taitaiga e ala i le Agaga Paia e iloa ai pe faapefea ona faamalosia lou faavae ia Iesu Keriso, ma saili upu moni e mafai ona fesoasoani e te manumalo ai i ou luitau. I lana malaga faafaifeautalai lona lua, sa toeitiiti atoa le lua tausaga o talai e le Aposetolo o Paulo le talalelei i Korinito (tagai Galuega 18:1-18) ma faatulaga se paranesi a le Ekalesia iina. (Mo le sueina o le aai o Korinito, tagai i Faafanua o le Tusi Paia, nu. 13, “ O Malaga Faafaifeautalai a le Aposetolo o Paulo .”) O Korinito o se nofoaga autu mauoa o fefaatauaiga ma o le laumua o le itumalo o Roma o Akaia. E toatele tagatanuu a Korinito na ifo i tupua ma faitaaga. O isi foi sa fevaevaea’i ma femisaa’i. I lenei siosiomaga, sa oo ina faigata ai le tumau moni i le talalelei a le Faaola mo le toatele o tagata o le Ekalesia. Ina ua tusi Paulo i le Au Paia i Korinito e fesoasoani ia te i latou i o latou luitau, sa ia talanoa i le faavae sa ia faataatia mo i latou.

Faitau le 1 Korinito 2:1-5 ma le 1 Korinito 3:10-11, saili mo fasifuaitau o faamatala mai ai lenei faavae.

O le a lou manatu i le uiga o le fausia ai o lou faavae i luga o Iesu Keriso?

I le Tusi a Mamona, sa tauanau foi e Helamana ona atalii ia atiae i luga o le faavae o Iesu Keriso. Faitau le Helamana 5:12, saili faamanuiaga sa folafolaina e Helamana.

O a ni mea e mafai ona e faasoa ai i lau uo mai nei fuaiupu e ono aoga?

O se tasi o upumoni e mafai ona tatou aoaoina mai nei mau o le a o tatou fausia le faavae o o tatou olaga i luga o Iesu Keriso, e mafai ona tatou manumalo i faatosinaga a Satani ma luitau faalelalolagi.

O le a se mea e te iloa, lagona, pe talitonuina e uiga i le Faaola e fesoasoani ai ia te oe ia e manao ai e avea o Ia ma ou faavae?

Fesoasoani i tagata aoga ia faaloloto lo latou malamalama ma ia lagona le moni ma le taua o lenei mataupu faavae. O le gaoioiga o mulimuli mai o se tasi lea o auala e faatino ai. E mafai e tagata aoga ona faia lea gaoioiga faatasi ma le vasega atoa i luga o le laupapa, pe faaali foi faatonuga ma e mafai e tagata aoga ona fai le gaoioiga i totonu o a latou api faamaumau mo suesuega.

Tusi se ata faigofie o se fale po o se fausaga tulaga malosi po o se faavae. Tusi faataamilo i le ata o le fale ni luitau po o ni faatosinaga leaga o loo feagai ma oe.
I totonu po o le faataamilo i le faavae, tusi ni mea e mafai ona e faia e faavae ai lou olaga i luga o le Faaola.

Mafaufau e valaaulia tagata aoga e tusi i luga o le laupapa a latou tali i gaoioiga muamua e lua.

Tali le fesili lenei: Na faapefea ona fesoasoani nei gaoioiga ia oe pe o le a faapefea ona fesoasoani ia oe pe a e feagai ma luitau po o faatosinaga leaga?

E maua mai gaoioiga nei se avanoa mo tagata aoga e suesue atili ai aoaoga a Paulo e faatatau i fevaevaeaiga ma fefinauaiga e faapea foi ma le matautia o le taliaina o le poto o le lalolagi e sili ae nai le poto o le Atua. Mafaufau i manaoga o tagata aoga ma le tele o le taimi o loo avanoa e fuafua ai pe fai nei gaoioiga i totonu o le vasega. E mafai e tagata aoga ona filifili se gaoioiga e tasi latou te faia taitoatasi pe i se vaega toalaititi. O se isi faiga, e mafai e le vasega atoa ona faia faatasi se tasi o gaoioiga.

I le tusi a Paulo ia Korinito, sa ia tautalagia ai ni mataupu eseese ma aoao pe faapefea ona i ai i le Faaola ma Lana talalelei le mana e fesoasoani ai ia Korinito ia manumalo i o latou luitau (tagai 1 Korinito 1:23-24). O gaoioiga nei e taulai atu i le lua o nei mataupu. Faitau filifiliga nei ma filifili se tasi e aupito sili ona anoa mo oe e suesueina.

Filifiliga A: O fevaevaeaiga ma fefinauaiga

O se tasi o luitau sa tauivi ma le Au Paia i Korinito o fefinauaiga. O se vaega o le pogai o le tutupu o fevaevaeaiga ona sa latou talitonu o o latou tulaga i le Ekalesia e fuafua i le taua o le tagata sa papatisoina i latou (tagai 1 Korinito 1:12).

I tafatafa o lau ata o le fale, atonu e te manao e lisi ai soo se auala o e feagai ai ma fevaevaeaiga po o fefinauaiga i totonu o lau uarota, lou aiga, po o lou nuu.

Ia faaeteete ia mautinoa o faataitaiga e tuuina mai e tagata aoga e le aumaia ai se agaga o le ita po o fefinauaiga i totonu o le aafiaga faaleaoaoga. A tula’i mai ni fefinauaiga, uunaia tagata aoga ina ia malamalama ma alofa ina ia maua ai pea le Agaga.

O a nisi o taunuuga o fevaevaeaiga ma fefinauaiga?

Faitau le 1 Korinito 1:10-13 ma le 1 Korinito 3:3-9, saili auala na taumafai ai Paulo e fesoasoani i tagata ia atiina ae i luga o le faavae o Iesu Keriso.

O a ni mea na e vaaia i nei fuaiupu e mafai ona fesoasoani i tagata e manumalo mai fevaevaeaiga ma fefinauaiga?
Aisea ua e manatu ai e fesoasoani le fausia o lou olaga i luga o Iesu Keriso ina ia lotogatasi ma faaitiitia ai fefinauaiga ma tagata o lo o siomia oe?

Filifiliga E: O le poto o le lalolagi

O le toatele sa nonofo i Korinito sa faatauaina le poto faalelalolagi. O le savali a se Mesia faasatauroina e lei manino i le toatele o tagata Iutaia ma tagata Nuu ese. I le lalolagi faa-Roma, o le faasalaga o le faasatauroina o se faatusa o le faalumaina ma le faatoilaloina. O le manatu e uiga i se tagata ua loto e puapuagatia mo isi o se “mea valea” lea i tagata Eleni ( 1 Korinito 1:23). I tagata Iutaia, o se Mesia ua maliu i luga o se satauro o se “mea e tausuai” ( 1 Korinito 1:23) aua sa latou faamoemoeina e faatoilalo e le Mesia o latou fili.

Faitau le 1 Korinito 1:17-25, suesue pe na faapefea ona tali Paulo i nei uiga.

I tafatafa o lau ata o le fale, lisi auala e ono mafai ai e le poto o le lalolagi ona aafia pe luitauina lau molimau ia Iesu Keriso ma Lana talalelei.

Aisea e ono le malamalama ai pe le talisapaia ai e nisi tagata Iesu Keriso ma Lana Togiola i nei ona po?
O a suiga e ono faia pe a oo ina iloa pe lagona e se tagata e i ai i le Faaola le mana moni i o latou olaga? (tagai 1 Korinito 1:24).
E faapefea ona fesoasoani ia oe le fausia o lou olaga ia Iesu Keriso ma Lana talalelei pe a e feagai ai ma ni manatu luitau faalelalolagi?

O le fausia o o tatou olaga i luga o Iesu Keriso

Faaaoga ni nai minute e iloilo ai lou lava olaga. O a ni auala na e fausia ai lou faavae i luga o Iesu Keriso? O a ni auala e te ono manao e fia faaleleia ai oe lava? E faapefea e le fausiaina atili o lou olaga i luga o le Faaola o Iesu Keriso ma Lana talalelei ona fesoasoani i lou feagai ai lea ma ou lava luitau ma faatosinaga leaga? Mafaufau e tusifaamaumau ou manatu ma au sini i lau api talaaga mo suesuega.

Mafaufau e valaaulia tagata aoga e faasoa mai o latou manatu e faaiu ai le vasega. Faaopoopo foi i ai ma ni malamalamaaga patino ma ni molimau.

Manatu ma Talaaga o Faamatalaga

Aisea e tatau ai ona ou fausia lo’u faavae i luga o Iesu Keriso?

Na saunoa mai Elder Chi Hong (Sam) Wong o le Fitugafulu:

Afai tatou te atiaʼe lo tatou faavae i luga o Iesu Keriso, e le mafai ona tatou pauu! A tatou tumau ma le faamaoni e oo i le iuga, o le a fesoasoani le Atua ia i tatou e faavae o tatou olaga i luga o Lona papa, “ma o le a le mafai e faitotoa o seoli ona manumalo e faasaga ia te i [tatou]” ( Mataupu Faavae ma Feagaiga 10:69). Atonu e le mafai ona tatou suia mea uma e oo mai, ae e mafai ona tatou filifili i le ala pe faapefea ona tatou saunia mo mea o le a oo mai.

(Chi Hong [Sam] Wong, “E Le Mafai Ona Latou Manumalo; E Le Mafai Ona Tatou Pauu,” Liahona, Me 2021, 98)