1 Korinito 2

O Le Malamalama Ai i Mea Faaleagaga

O a ni manatu faalelalolagi o siomia ai oe ma faafaigata ai i nisi taimi ona iloatino le mea moni? Sa le mautonu le Au Paia i Korinito ona o manatu faalelalolagi, ma sa taumafai le Aposetolo o Paulo ina ia fesoasoani ia i latou e vaai pe faapefea ona latou aoaoina upumoni faaleagaga e faavavau. E mafai e lenei lesona ona fesoasoani e te valaaulia ai le Agaga Paia e fesoasoani ia te oe ia aoao mea faaleagaga. 

O le faamatalaina o upumoni o le talalelei i au lava upu. O le uunaia o tagata aoga e faamatala upumoni o le talalelei i a latou lava upu e mafai ona fesoasoani ia i latou e malamalama ma fesootai ai i mataupu faavae o loo maua i tusitusiga paia. Atonu e aoga foi le fai atu ia i latou e mafaufau loloto ina ia maua ai le faamaoniga mai le Agaga e moni a latou faamatalaga.

Sauniuniga a le tagata aoga: Valaaulia tagata aoga e sauni ni tali mo fesili nei: O a ni upumoni ua e iloaina e ala i le Agaga Paia? Na faapefea ona faamaonia nei upumoni e le Agaga Paia ia te oe?

Gaoioiga e ono Mafai Ona Aoao Ai

“Tau mai ia te au pe faapefea ona e iloa”

Faitau pe valaaulia se tagata aoga e faitau le tala lenei.

O le faaiuga o le tala o le a faasoaina atu i se taimi mulimuli ane o le lesona.

Sa faasoa mai e Peresitene Boyd K.Packer (1924–2015) o le Korama a Aposetolo e Toasefululua le tala lenei:

Sa ou nofo i totonu o se vaalele i tafatafa o se tagata na fai mai e le iloa le Atua o le sa ia uunaia faanatinati mai lona le talitonu i le Atua ma o lea sa ou tuuina atu ai lau molimau ia te ia. “E sese oe,” sa ou fai atu ai, “o loo i ai se Atua. Ou te iloa o loo soifua o Ia!”

Sa ia tetee mai, “E te le iloa. E leai se tasi na te iloa lena mea! E le mafai ona e iloa !” Ina ua ou le gauai atu ia te ia, na fesili mai le ua le talitonu i le Atua, o ia o se loia, atonu o le fesili tupito i le mataupu o le molimau. “Ua lelei,” sa ia fai mai ai i se ala faaulaula, ma faaamuamu, “ua e fai mai e te iloa. Tau mai ia te au pe faapefea ona e iloa.”

(Boyd K. Packer, “The Candle of the Lord,” Ensign, Ian. 1983, 51)

• Ua faapefea ona e vaaia lenei ituaiga fesili i le lalolagi i aso nei?

• Faamata e faapefea ona e tali atu i le fesili a le tagata lea?

A o e suesue, manatunatu pe o le a le lelei o lou malamalama i le ala e aoao ai i upumoni faaleagaga ma saili mo malamalamaga e mafai ona fesoasoani ia te oe e te iloa atili ai.

O le aoaoina o upumoni faaleagaga

Na fememeai le Au Paia i Korinito i manatu ma faatinoga faalelalolagi ma le ola ai i le talalelei. Ona o lea, sa latou mafuli atu ai i le tele o manatu sese. Sa tusi atu Paulo ia i latou ina ia fesoasoani ia latou malamalama i ala e aoaoina ai mea faaleagaga.

Faitau le 1 Korinito 2:9–14, ma vaavaai mo malamalamaga e mafai ona fesoasoani ia i tatou e aoao ai upumoni faaleagaga.

Ia matau o le “tagata faaletino” i le fuaiupu 14 o “se tagata ua filifili e tosinaina o ia i losivalega, manaonaoga, tuʼinanauga, ma lagona uma faaletino nai lo musumusuga a le Agaga Paia” (O le Taiala i Tusitusiga Paia, “ Tagata Natura,” scriptures.ChurchofJesusChrist.org).

• O a ni fuaiupu po o ni fasifuaitau sa tumatila mai ia te oe? O a ni mea na e fiafia i ai e uiga i ia fuaiupu ma fasifuaitau?

• O a ni mea na e aoaoina e uiga i le Tama Faalelagi ma Lona alofa mo oe i le fuaiupu 9 ?

• O a ni upumoni na e mauaina e uiga i le ala e faaalia ai e le Tama Faalelagi le malamalama i Lana fanau?

Tagai i le motugaafa faafaiaoga i le amataga o lenei lesona e fesoasoani ai i tagata aoga ia iloa upumoni.

O se tasi o upumoni o loo aoaoina i nei fuaiupu e faapea e mafai ona tatou iloa ma malamalama i mea tau le Atua e ala i le na o Lona Agaga.

Ina ia avea ma faataitaiga talafeagai o le le malamalama i le ala e aoaoina ai upumoni faaleagaga, faitau pe o le a le mea na tupu a o taumafai Peresitene Packer e faamatala pe faapefea ona ia iloa e moni le Atua i le tagata le talitonu i luga o le vaalele:

Ina ua ou faaaogaina ia upu o le Agaga ma le molimau, sa tali mai le tagata le talitonu i le Atua, “Ou te le iloa le mea na e te talanoa mai ai.” O upu tatalo, iloatino, ma le faatuatua, e matuai leai lava se uiga ia te ia.

(Boyd K. Packer, “The Candle of the Lord,” Ensign, Ian. 1983, 51)

Aoao e ala i le Agaga

I totonu o lau api talaaga mo suesuega, lisi nisi upumoni faaleagaga ua e aoaoina e ala i le Agaga Paia. Lisi foi ni upumoni ua e manao e te molimauina. O nisi faataitaiga e mafai ona aofia ai mea nei: E moni le Tama Faalelagi ma e alofa ia te au, o Iesu Keriso lo’u Faaola, ma o Iosefa Samita o se perofeta a le Atua.

Filifili se tasi o upumoni ua e mauaina ma tali i mea nei:

• Mata e faapefea ona fai atu le lalolagi ia te oe e saili le mea moni e uiga i lenei mataupu?

• O a ni au mea na fai, pe e mafai ona e fai, ina ia iloa ai lenei upumoni e ala i le Agaga Paia?

Mafaufau e valaaulia ni volenitia e faasoa mai a latou tali pe afai e le maaleale tele. Afai e faasoa mai e se tagata aoga se upumoni ua latou manao e iloa, mafaufau e fesili pe o fia faasoa nisi tagata aoga i o latou aafiaga i le iloaina ai o lena upumoni. Mafaufau e faasoa foi ni aafiaga patino a oe lava ia.

Mulimuli i uunaiga a le Agaga ina ia iloa ai pe o le a aoga mo tagata aoga le suesue atili pe faapefea ona aoaoina e ala i le Agaga. Mafaufau e faaaoga nisi o punaoa nei po o punaoa uma foi.

Afai ua e fia aoao atili e uiga i le aoaoina o upumoni e ala i le Agaga Paia, mafaufau e suesue nisi o nei punaoa:

• Kalatia 5:22–23 ; Mataupu Faavae ma Feagaiga 8:2–3 ; 9:7–8 ; 11:12–14, 21–22 ; ma le 138:1–4, 11

• o tusiga o ulutala e pei o le “ Agaga Paia ” i itulau o O le Taiala i Tusitusiga Paia, o le Taiala o Autu, po o Autu o le Talalelei o loo maua i le topics.ChurchofJesusChrist.org

• o lauga ma tala tusia e uiga i le aoaoina e le Agaga, e pei o le David A. Bednar, “Aoaoina i le Ala a le Alii,” New Era, Oke. 2018, 50–53; po o le Richard G. Scott, “E Faapefea ona Aoao e Ala i le Agaga,” New Era, Sete. 2014, 48

• o le vitio “How Does the Holy Spirit Guide?” (3:25), o loo maua i le ChurchofJesusChrist.org.

How Does the Holy Spirit Guide?

What is it like to be guided by the Holy Ghost? Ordinary people share their experiences.

Valaaulia tagata aoga e faasoa mai mea na latou maua.

Fesoasoani i isi e aoao e ala i le Agaga

Faitau le mea lenei e faamaea ai le tala a Peresitene Packer. Ina ua teena e le alii i luga o le vaalele faamatalaga a Peresitene Packer, na musuia Peresitene Packer e fesili i lea alii e faamatala le tofo o le masima:

Ina ua mavae ni nai taumafaiga, ioe, sa le mafai ona ia faamatalaina. Sa le mafai ona ia tauina mai, i na o ni upu, se mea faatauvaa e pei o le tofoina o le masima. Sa ou toe tuu atu le molimau ia te ia ma toe fai atu, “Ou te iloa o loo i ai se Atua. Sa e tauemu i lena molimau ma fai mai afai e moni ou te iloa, o le a mafai ona ou tau atu tonu ia te oe pe na faapefea ona ou iloa. Lau uo e, i le faatatauga faaleagaga, ua ou tofo i le masima. Ua le sili atu le mafai ona ou tauina atu ia te oe i upu pe na faapefea ona oo mai lenei malamalama nai lo lou ta’u maia ia te au pe faape’i le tofo o le masima. Ae ou te toe fai atu ia te oe, o loo i ai se Atua! O loo soifua pea o Ia! Ma talu ai e te le iloa, aua e te taumafai e tau mai ia te au faapea ou te le iloa, aua ua ou iloa!” …

Talu mai lena aafiaga ma le faagasolo ai i luma, ou te le i toe matamuli e faapea e le mafai ona ou faamatalaina i upu lava ia mea uma ou te iloaina faaleagaga.

(Boyd K. Packer, “The Candle of the Lord,” Ensign, Ian. 1983, 52)

• Aisea e avea ai le Agaga Paia o se punavai sili o le malamalama nai lo o le poto ma manatu o le lalolagi?

• O le a se mea e mafai ona e faia e saili ai le malamalama mai le Tama Faalelagi?

Mafaufau e tusi i totonu o lau api talaaga mo suesuega mea ua e manao e faaauau ona fai e aoao ai i upumoni e ala i le mana o le Agaga Paia.

Faasoa se molimau patino i le taua o le aoaoina o mea faaleagaga e ala i le Agaga. Faailoa atu le mautinoa e faapea a o taumafai tagata aoga e aoao e uiga i le Tama Faalelagi ma Iesu Keriso, o le a fesoasoani le Agaga ia i latou.

Manatu ma Talaaga o Faamatalaga

O le a se mea e mafai ona ou faia e aoao ai i mea faaleagaga?

Na saunoa Elder Paul V. Johnson o le Fitugafulu:

E tuuina atu tali i fesili faaleagaga i tagata taitoatasi o e le faamaaaina o latou loto; o e ole atu i le faatuatua, ma talitonu o le a latou mauaina; ma e e tausia ma le filiga poloaiga.

(Paul V. Johnson, “O Se Mamanu mo le Aoaoina o Mea Faaleagaga” [faasalalauga satelite a le Seminare ma le Inisitituti o Ekalesia, Aok. 7, 2012], broadcasts.ChurchofJesusChrist.org)

E mafai ona faaaoga na o mea e pei o metotia faasaienisi ma manatu fetalaai e malamalama ai i upumoni o le talalelei?

Na saunoa mai Peresitene Dallin H. Oaks o le Au Peresitene Sili:

Upumoni ma le Fuafuaga

Ua aoao mai Peresitene Oaks faapea e tatau ona tatou sili le upumoni mai punavai faamaoni ma faasoa atu nisi o upumoni faavae lea e faamatalaina le mafuaaga ua ola ai le Au Paia o Aso e Gata Ai faapei ona latou ola ai.

A tatou saili i upumoni e uiga i tapuaiga, e tatau ona tatou faaaogaina auala faaleagaga talafeagai mo lena sailiga: tatalo, o le molimau a le Agaga Paia, ma le suesueina o tusitusiga paia ma upu a perofeta o aso nei. Ou te faanoanoa pea pe a ou faalogo i se tasi ua lafoaia lona faatuatua faaletapuaiga ona o aoaoga faalelalolagi. O i latou o e na maua muamua se vaaiga faaleagaga e mafai ona mafatia mai le faaoo ia te ia lava o le tauaso faaleagaga. E pei ona saunoa ai Peresitene Henry B. Eyring, “O le latou faafitauli e le o i mea ua latou manatu ua latou vaaia; ae o loo i mea e le o mafai ona latou vaaia i le taimi nei” [Henry B. Eyring, To Draw Closer to God: A Collection of Discourses (1997), 143].

O metotia faasaienisi e taitai atu ai tatou i mea ua tatou ta’ua o talitonuga moni faasaienisi. Ae o le “talitonuga moni faasaienisi” e le o le olaga atoa lea. O i latou e le aoao “e ala i le suesue ma le faatuatua foi” ( Mataupu Faavae ma Feagaiga 88:118) e tapulaa lo latou malamalamaaga e uiga i mea moni i mea e mafai ona latou faamaonia i auala faasaienitisi. E tuu e lena mea ni tapulaa pepelo i la latou sailiga o le upumoni.

(Dallin H. Oaks, “Upumoni ma le Fuafuaga,” Ensign po o le Liahona, Nov. 2018, 25)

A tatou saili i upumoni e uiga i tapuaiga, e tatau ona tatou faaaogaina auala faaleagaga talafeagai mo lena sailiga: tatalo, o le molimau a le Agaga Paia, ma le suesueina o tusitusiga paia ma upu a perofeta o aso nei. Ou te faanoanoa pea pe a ou faalogo i se tasi ua lafoaia lona faatuatua faaletapuaiga ona o aoaoga faalelalolagi. O i latou o e na maua muamua se vaaiga faaleagaga e mafai ona mafatia mai le faaoo ia te ia lava o le tauaso faaleagaga. E pei ona saunoa ai Peresitene Henry B. Eyring, “O le latou faafitauli e le o i mea ua latou manatu ua latou vaaia; ae o loo i mea e le o mafai ona latou vaaia i le taimi nei” [Henry B. Eyring, To Draw Closer to God: A Collection of Discourses (1997), 143].

O metotia faasaienisi e taitai atu ai tatou i mea ua tatou ta’ua o talitonuga moni faasaienisi. Ae o le “upumoni faasaienisi” e le o le olaga atoa lea. O i latou e le aoao “e ala i le suesue ma le faatuatua foi” (Mataupu Faavae ma Feagaiga 88:118) e tapulaa lo latou malamalamaga e uiga i upumoni i mea e mafai ona latou faamaonia i auala faasaienisi. E tuu e lena mea ni tapulaa sese i la latou sailiga o le upumoni.

(Dallin H. Oaks, “Upumoni ma le Fuafuaga,” Ensign po o le Liahona, Nov. 2018, 25)

E mafai faapefea ona faailoa mai e le Agaga Paia le upumoni ia te au?

Na aoao mai Elder Richard G. Scott (1928–2015) o le Korama a Aposetolo e Toasefululua:

E mafai ona e aoaoina mea ua matua taua loloto mai mea e te faalogo ma vaai iai ma, e sili atu foi, mea e te lagona, e pei ona musuia le Agaga Paia. O le tele o tagata e faatapulaa lo latou aoaoina i na o mea e latou te faalogo pe faitau i ai. Ia e atamai. Atiinae foi le tomai o le aoaoina mai mea e te vaai i ai aemaise lava i mea ua uunaia ai oe e le Agaga Paia e lagona. Saili malamalama ma faaauau pea ona aoao mai mea o e lagonaina. O lou gafatia e faia o lea o le a faatupulaia i faataitaiga faifaipea. E manaomia le faatuatua ma le taumafaiga sili e aoao ai mai mea ua e lagonaina mai le Agaga. Ole atu i le faatuatua mo se na fesoasoani. Ola ai ina ia e agavaa mo se na taitaiga.

(Richard G. Scott, “E Faapefea ona Aoao e Ala i le Agaga,” New Era, Sete. 2014, 48)

Gaoioiga Faaopoopo e Aoao Ai

O le faaalia o le alofa mo le Tama Faalelagi ma Iesu Keriso

Mafaufau e valaaulia tagata aoga e faitau le 1 Korinito 2:9, ma vaavaai po o a fuafuaga a le Tama Faalelagi mo i latou o alolofa ia te Ia. E mafai ona latou mafaufau e uiga i faamanuiaga ua latou mauaina ma sue ni mau o tusitusiga paia o faailoa mai ai faamanuiaga e oo mai ona o le mulimuli i le Tama Faalelagi ma Iesu Keriso (tagai i le Mataupu Faavae ma Feagaiga 76:50, 58–70 ma le Mosaea 2:41). Ona mafai lea ona valaaulia tagata aoga e faitau le Ioane 14:15 ma mafaufau i poloaiga e mafai ona latou tausia atoatoa atili i se auala e mafai ai ona faaali lo latou alofa mo i Laua.

O le agavaa ai mo le Agaga

E mafai ona valaaulia tagata aoga e suesue i mea e mafai ona latou faia e agavaa ai ina ia aoaoina e le Agaga Paia. E mafai ona latou faitau i le Alema 32:27–28 ; Mataupu Faavae ma Feagaiga 42:14 ; ma le Ioane 7:17 ma faasoa mai mea ua latou mauaina. Mafaufau e valaaulia i latou e toe tomanatu i mea ua latou faia i le taimi nei ma mea e mafai ona latou faia i le lumanai ina ia agavaa ai mo le mafutaga a le Agaga Paia.