1 Kolinitō 6

“Ko Homou Sinó ko e Fale Tapu ia ʻo e Laumālie Māʻoniʻoní”

ʻE malava ke ongo ʻi ha ngaahi taimi ʻe niʻihi ʻo hangē ko e mafola ʻa e angaʻulí mo e angahala fakalieliá ko ha ngaahi palopalema ʻoku makehe ki hotau kuongá. Ka neongo ia, ʻi he tohi naʻe fai ʻe Paula ʻi he meimei taʻu ʻe 2,000 kuohilí, naʻá ne akonaki mo fakatokanga ai fekauʻaki mo e ngaahi angahala tatau ko ʻení. Naʻe fakamālohia mo fakatonutonu ʻe he ngaahi akonaki mālohi ʻa Paulá e Kāingalotu ʻi Kolinitoó, ʻo tataki kinautolu ke nau foki ki he hala ʻo e fuakavá. ʻOku fakataumuʻa e lēsoni ko ʻení ke tokoni ke mahino lelei ange kiate koe ʻa e mahuʻinga ho sino fakamatelié mo e mahuʻinga ʻo e maʻa fakasekisualé.

Fokotuʻu ha ʻātakai ʻoku malu. Fokotuʻu ha ʻātakai ʻoku ʻi ai ʻa e Laumālie Māʻoniʻoní pea lava ke fakahaaʻi tauʻatāina ai ʻe he kau akó ʻenau ngaahi fehuʻí mo e ongó. Ko e founga ʻe taha ke fai ai ʻení ko hoʻo tali maʻu pē ki he kau akó ʻi he angaʻofa, manavaʻofa, mo e fakaʻapaʻapa. Poupouʻi e kau akó ke nau fai e meʻa tatau ʻiate kinautolu pē.

Teuteu ʻa e tokotaha akó: Fakaafeʻi e kau akó ke fakalaulauloto ki he meʻa ʻoku nau ʻilo fekauʻaki mo e tuʻunga moʻui ʻa e ʻEikí ki he maʻa fakasekisualé pea teuteu ke ʻeke ha faʻahinga fehuʻi pē ʻoku nau maʻu fekauʻaki mo e maʻa fakasekisualé.

Ngaahi ʻEkitivitī Ako ʻOku Ala Fakahokó

Fakaafeʻi e kau akó ke nau fakalaulauloto ki he ngaahi fehuʻi ko ʻení:

Haohaoa fakasekisualé

Lau e ngaahi fakamatala ko ʻeni fekauʻaki mo e haohaoa fakasekisualé. Fakamaaka e fakamatala takitaha ʻi ha meʻafua mei he 1 ki he 5 (1=ʻikai ʻaupito ha poupou, 2=ʻikai poupou, 3=tuʻumaʻu, 4=poupou, 5=poupou lahi).

• ʻOku tau moʻui ʻi ha māmani ʻoku kehekehe ai e ngaahi fakakaukau ʻa e kakaí ki he ngaahi tōʻonga mo e ʻulungaanga fakasekisuale ʻoku poupouʻi.

• ʻOku mahino kiate au ʻa e tuʻunga moʻui ʻa e ʻEikí ki he haohaoa fakasekisualé (ʻoku toe ʻiloa foki ko e fono ʻo e angamaʻá).

• ʻOku ou maʻu ha holi ke moʻui ʻaki e tuʻunga moʻui ʻa e ʻEikí ki he maʻa fakasekisualé.

• ʻOku ou ʻiloʻi ʻa e founga ʻoku faitāpuekina ai ʻeku moʻuí ʻe he tuʻunga moʻui ʻa e ʻEikí ki he maʻa fakasekisualé.

• ʻOku ʻi ai ‘eku ngaahi fehuʻi fekauʻaki mo e tuʻunga moʻui ʻa e ʻEikí ki he maʻa fakasekisualé.

Fakakaukau ke hiki ʻi hoʻo tohinoa akó ʻa e meʻa ʻokú ke ʻilo mo tui ki ai fekauʻaki mo e tuʻunga moʻui ʻa e ʻEikí ki he maʻa fakasekisualé pea pehē ki haʻo ngaahi fehuʻi fekauʻaki mo ia.

ʻI hoʻo ako ʻa e lēsoni ko ʻení, fekumi ki he Tamai Hēvaní ke Ne tataki koe ʻo fakafou ʻi he Laumālie Māʻoniʻoní. Feinga ke ʻiloʻi mo ako e ngaahi moʻoni ʻe lava ʻo tokoni ke mahino lelei ange kiate koe mo ke maʻu ha holi ke moʻui ʻaki e tuʻunga moʻui ʻa e ʻEikí ki he haohaoa fakasekisualé pea ʻe tokoni ia ke tali hoʻo ngaahi fehuʻí mo e ngaahi meʻa ʻokú ke hohaʻa ki aí.

ʻOku akoʻi ʻe Paula ʻa e fono ʻa e ʻEikí ki he angamaʻá

Ko e kolo Kolinitoó ko ha kolo lahi, tuʻumālie, mo matakalai kehekehe ʻa ia naʻe lahi ai e angahala fakasekisualé. Naʻe hiki ʻe Paula ʻa e feʻauakí (ngaahi vā fetuʻutaki fakasekisuale ʻi tuʻa ʻi he nofo-malí), tono malí, mo e nonofo fakahomosekisualé ko ha ngaahi angahala angamaheni ʻi he lotolotonga ʻo e kau Kolinitoó (vakai ki he 1 Kolinitō 6:9–10).

Lau e ngaahi akonaki ʻa Paula ʻi he 1 Kolinitō 6:18–20 , pea fakakaukau ke fakaʻilongaʻi e ngaahi foʻi lea pe kupuʻi lea ʻoku ʻi ai e ngaahi akonaki ʻa e ʻOtuá fekauʻaki mo e haohaoa fakasekisualé pea mo e natula toputapu ʻo e sino ʻo e tangatá.

Ko e 1 Kolinitō 6:19–20, ko ha potufolofola fakataukei fakatokāteline. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke ako lahi ange fekauʻaki mo e potufolofola fakataukei fakatokāteline ko ʻení ʻi he lēsoni hokó.

• Ko e hā ha ngaahi moʻoni ʻokú ke ongoʻi ʻe fiemaʻu ʻe he ʻEikí ke mahino kiate koe mei he ngaahi veesi ko ʻení? Ko e hā e ʻuhinga ʻoku finangalo ai e ʻEikí ke mahino kiate koe e ngaahi moʻoni ko iá?

• ‘E lava fēfē ʻe hengaahi moʻoni ko ʻení ʻo tākiekina e anga hoʻo vakai ki he fono ‘a e ʻEikí ki he angamaʻá?

Ko e moʻoni ʻe taha ʻoku tau ako mei he ngaahi veesi ko ʻení ko hotau sinó ko e temipale ia ʻa e ʻOtuá ʻa ia ʻe lava ke nofoʻia ʻe he Laumālié.

Tā ʻi lotomālie ʻi ha peesi ʻi hoʻo tohinoa akó, ha kiʻi fakatātā faingofua ʻo ha taha ʻoku tuʻu ʻi he tafaʻaki ʻo ha temipale. Lisi takatakai ʻi hoʻo fakatātaá ha ngaahi meʻa ʻoku faitatau ai ha sino fakamatelie mo ha temipale. Feinga ke ʻiloʻi e ngaahi ʻuhinga ʻe lava ke tokoniʻi ai koe ʻe he fakafehoanaki ko ʻení ke ke mahino kiate koe e fono ʻo e angamaʻá. ʻE lava ke tokoni atu e ngaahi fehuʻi ko ʻení ke ke fakahoko ‘a e fakafehoanakí:

• ʻOku tākiekina fēfē ʻe he fakakaukau ko ia ko hotau sinó ko e temipalé ʻa e founga ʻoku tau tokangaʻi ʻaki hotau sinó?

• ʻOku tākiekina fēfē ʻe he talanoa fakatātā ko ʻeni ko hotau sinó ko ha temipalé, ʻa ʻetau ngaahi fakakaukau mo e tōʻonga fekauʻaki mo e haohaoa fakasekisualé?

• Ko e hā ha ngaahi moʻoni fekauʻaki mo e Laumālie Māʻoniʻoní ʻoku mahuʻinga ke mahino ʻi he potufolofola ko ʻení? Ko e hā hono ʻuhingá?

• Ko e hā ha ngaahi ʻuhinga ʻokú ke pehē ʻoku taau mo hoʻo ngaahi feingá ke nofoʻia koe ʻe he Laumālie Māʻoniʻoní?

Fēfē kapau ʻe talangataʻa ha taha ki he fono ʻo e angamaʻá? Lolotonga hono akoʻi ʻe Paula e kakai Kolinitoó, naʻá ne pehē naʻe fakahoko ʻe ha niʻihi ʻo e kāingalotu Kolinitoó ha ngaahi angahala fakasekisuale ʻi he kuohilí (vakai ki he 1 Kolinitō 6:9–11). Ka ʻi he taimi ne nau fakatomala ai pea papitaisó, naʻe fakamaʻa ʻa kinautolu ʻo fakafou ʻi he Fakalelei ʻa Sīsū Kalaisí.

Lau ʻa e 1 Kolinitō 6:11 , pea fakakaukau ke fakaʻilongaʻi e ngaahi foʻi lea pe kupuʻi lea naʻe fakaʻaongaʻi ʻe Paula ke tokoni ke mahino ki he kakai Kolinitoó ʻa e mālohi faifakamaʻa ʻo e Fakalelei ʻa Sīsū Kalaisí, ʻa ia ʻoku ʻatā ki he tokotaha kotoa pē.

• Ko e hā ʻoku mahuʻinga ai ke ʻiloʻi ʻe lava ʻe Sīsū Kalaisi ʻo fakamaʻa kitautolu mei he angahala fakasekisualé?

Manatuʻi “ʻoku ʻikai halaia ʻi ha angahala, ʻa e niʻihi ko ia ʻoku ngaohikovia fakasekisualé pea ʻoku ʻikai fiemaʻu ia ke nau fakatomala. Kapau ko ha taha koe ne ngaohikovia, ʻiloʻi ʻokú ke taʻehalaia pea ʻoku ʻofa ʻa e ʻOtuá ʻiate koe. Talanoa ki hoʻo mātuʻá pe ha taha lahi kehe ʻokú ke falala ki ai, pea feinga ke maʻu e faleʻi hoʻo pīsopé he vave tahá. Te nau lava ʻo poupouʻi fakalaumālie mo tokoniʻi koe ke ke maʻu ʻa e maluʻi mo e tokoni ʻokú ke fiemaʻú” (“Ko e Haohaoa Fakasekisualé,” Ki Hono Fakamālohia ʻo e Toʻu Tupú [kiʻi tohi, 2011], 36–37).

Toe lau ʻa e 1 Kolinitō 6:19–20 , ʻo kumi ha toe meʻa naʻe akoʻi ʻe Paula fekauʻaki mo Sīsū Kalaisi mo ʻEne Fakaleleí.

• ʻOkú ke pehē naʻe ʻuhinga ki he hā ʻa e pehē ʻe Paula “ʻoku ʻikai ʻa kimoutolu ʻa kimoutolu” pea “kuo fakatau ʻa kimoutolu ʻaki ʻa e totongi”?

Mahalo ʻe ʻaonga ke fakakau ʻi he fealēleaʻaki ko ʻení hano fakahinohino ki he kau akó ʻa e Tokāteline mo e Ngaahi Fuakava 18:10–12 koeʻuhí ke nau lava ʻo sio fakatouʻosi ki he meʻa naʻe fai ʻe Sīsū Kalaisi ko ha konga ʻo ʻEne Fakaleleí mo e ʻuhinga naʻá Ne fakahoko ai iá. Fakaafeʻi e kau akó ke nau fakakaukau ke hiki e potufolofola fakataukei fakatokāteline ko ʻení ʻo ofi ki he 1 Kolinitō 6:19–20 .

• ʻOku tokoniʻi fēfē ʻe he feilaulau ʻa e Fakamoʻuí ʻa e anga hoʻo fakakaukau mo tauhi ho sino fakamatelié?

Naʻe fakamamafaʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fekauʻaki ʻa e angamaʻá mo e feilaulau ʻa Sīsū Kalaisí.

Ko e sinó ko ha konga mahuʻinga ia ʻo e laumālié. ʻOku fakamamafaʻi ʻe he tokāteline mahino mo fuʻu mahuʻinga ko ʻeni ʻo e Kau Māʻoniʻoni ʻi he Ngaahi ʻAho Kimui Ní ʻa e ʻuhinga ʻoku fuʻu mamafa ai ʻa e angahala fakasekisualé. … ʻI hono kumi faingamālie ʻaki ko ia ha sino ʻo ha tahá—ʻa ia ko hono ʻuhingá ko e ngaohikovia hono laumālié—ʻoku hanga ai ʻe ha taha ʻo fakaʻuliʻi ʻa e Fakalelei ʻa Kalaisí, ʻa ia naʻá ne fakahaofi ʻa e laumālie ko iá mo foaki kiate ia ʻa e faingamālie ke ne maʻu ʻa e meʻaʻofa ʻo e moʻui taʻengatá. …

Kātaki ʻoua muʻa naʻá ke teitei pehē: “Ko hai ʻoku mamahi aí? Ko e hā hono kovi haʻate kiʻi tauʻatāina? ʻE lava pē ke u maumau lao he taimí ni pea fakatomala ʻamui.” Kātaki muʻa kae ʻoua naʻá ke vale mo angakovi. He ʻikai te ke lava ʻo “toe tutuki … ʻa [Kalaisi[” taʻe ʻi ai ha tautea [vakai ki he Hepelū 6:6 ]. Naʻe kalanga ʻa Paula, “Puna mei he feʻauakí” [ 1 Kolinitō 6:18 ], pea ʻoku tānaki atu ʻe he Tokāteline mo e Ngaahi Fuakava ke hola mei ha “faʻahinga meʻa pehē” [ Tokāteline mo e Ngaahi Fuakava 59:6 ; tānaki atu hono fakamamafaʻí]. Ko e hā hono ʻuhingá? Sai, ko hono ʻuhinga ʻe tahá koeʻuhí ko e mamahi taʻefaʻalaua naʻe kātekina ʻe he Fakamoʻui ʻo e māmaní ʻi he sinó mo e laumālié fakatouʻosi koeʻuhí ka tau lava ʻo hola [vakai tonu ki he Tokāteline mo e Ngaahi Fuakava 19:15–20 ]. ʻOku ʻi ai hotau moʻua kiate Ia. ʻIo, ʻoku tau moʻua ‘a e meʻa kotoa kiate Ia koeʻuhi ko e meʻá ni.”

(Jeffrey R. Holland, “Personal Purity,” Ensign, Nov. 1998, 76)

• Ko e hā ʻoku tokoni atu hono ʻiloʻi naʻe mamahi ʻa e Fakamoʻuí maʻau ʻi hono lilingi Hono taʻataʻá, ke mahino kiate koe fekauʻaki mo Iá? ʻE anga fēfē hono fakatupulaki hoʻo holi mo e malava ke talangofua kiate Iá ʻi hoʻo fakatokangaʻi ʻení?

Hangē ko e lea ʻa Paula ki he Kāingalotu Kolinitoó, kuo ʻomi ʻe he kau tamaioʻeiki ʻa e ʻEikí ʻi hotau kuongá ha faleʻi mahuʻinga fekauʻaki mo e tuʻunga moʻui ʻa e ʻEikí ki he haohaoa fakasekisualé, pea mo e mālohi ʻoku maʻu ʻe he Fakamoʻuí ke fakamolemoleʻi mo fakamaʻa kitautolú. Lau ʻa e “Ko e Haohaoa Fakasekisualé,” Ki Hono Fakamālohia ʻo e Toʻu Tupú (kiʻi tohi, 2011), 35–37, ʻoku maʻu ʻi he ChurchofJesusChrist.org pe ʻi he polokalama Gospel Library, ʻo kumi e ngaahi moʻoni te ne lava ʻo fakamālohia koe mo tali hoʻo ngaahi fehuʻí.

Ke maʻu ha fakamatala lahi ange fekauʻaki mo e fono ʻo e angamaʻá pea mo e ngaahi sīpinga fakaonopooni hono moʻui ʻaki ia ʻe he toʻu tupú, fakakaukau ke mamataʻi e vitiō “ʻOku ou Fili Ke u Maʻá” (4:19) pe “Chastity: What Are the Limits” (3:59) ʻoku maʻu ʻi he ChurchofJesusChrist.org.

I Choose to be Pure

Ko e lea loto tauʻatāina ha toʻu tupu tui fakalotu kehekehe ‘e toko ono ʻi he ʻuhinga kuo nau fili ai ke maʻa fakasekisualé.

Chastity: What Are the Limits?

‘Oku faleʻi e toʻu tupu ‘o e Siasí ke nau maʻa fakasekisuale, ka ko e hā e ngaahi fakangatangata ʻoku totonú? ʻI hono fakaʻaongaʻi e ngaahi akonaki ʻa e kau palōfita ʻo onopōní, ʻoku ʻoatu ʻe he fakamatala ko ʻení e founga te tau lava ai ʻo maʻu ʻa

• Ko e hā ha ngaahi tefitoʻi moʻoni naʻá ke ako mei he 1 Kolinitō 6 mo e ngaahi lea ʻa e kau palōfita ʻo onopōní naʻe tokoni ke mahino lelei ange kiate koe ʻa e tuʻunga moʻui ʻa e ʻEikí ki he haohaoa fakasekisualé?

• Kapau ʻoku ʻi ai haʻo ngaahi fehuʻi pe hohaʻa fekauʻaki mo e haohaoa fakasekisualé ʻa ia naʻe ʻikai tali atu ʻi he lēsoni ko ʻení, ko e fē te ke tafoki ki aí?

ʻI he fakalaulauloto ʻa e kau akó ki heʻenau tali ki he ngaahi fehuʻi ko ʻení, mahalo naʻa taau ke fakaafeʻi kinautolu ke nau aleaʻi ha toe ngaahi fehuʻi kehe ʻoku nau maʻu fekauʻaki mo e haohaoa fakasekisualé mo ʻenau mātuʻá pe pīsopé.

Fakamoʻoni ki he Fakalelei ʻa e Fakamoʻuí mo e mahuʻinga ʻo e moʻui ʻo fakatatau ki he tuʻunga moʻui ʻa e ʻEikí ki he haohaoa fakasekisualé. Fakakaukau ke fehuʻi ange pe ʻoku ʻi ai ha tokotaha ako pe toko ua te na fie fakamoʻoni.

Fakaʻaongaʻi ha kiʻi taimi ke ke fakalaulauloto ai ki ha ngaahi ueʻi mei he Laumālie Māʻoniʻoní fekauʻaki mo e ngaahi ngāue ʻe ala ʻai ʻe he ʻEikí ke ke fai koeʻuhí ko hoʻo ngaahi aʻusia he ʻaho ní.

Fakamatala Fakamahinó mo e Puipuituʻá

1 Kolinitō 6:19 . Ko e hā ʻoku mahuʻinga ai kapau te u vakai ki hoku sinó ko e “fale tapu ʻo e Laumālie Māʻoniʻoní”?

Naʻe akoʻi ‘e Palesiteni Lāsolo M. Nalesoni ʻa e founga ʻe lava ke liliu ai ʻetau moʻuí ʻi heʻetau vakai ki hotau sinó ko ha temipale ʻo e ʻOtuá.

ʻOku ʻikai ke fai ha ofo ʻi hono fakamatalaʻi ʻe he ʻAposetolo ko Paulá ko ho sinó ko ha “fale tapu [ia] ʻo e ʻOtuá”, koeʻuhí he ko e konga mahuʻinga ia ʻi he palani taʻengata ʻa e ʻOtuá [ 1 Kolinitō 3:16 ; vakai foki ki he 6:19 ]. Ko e taimi kotoa pē te ke sio ai he sioʻatá, fakakaukau [ki ho sinó ko ha fale tapu]. ʻE lava heʻetau houngaʻia—ʻi he moʻoni ko iá he ʻaho kotoa pē—ʻo tākiekina lelei hoʻo ngaahi fili kau ki he anga hoʻo tokangaʻi ho sinó mo hoʻo fakaʻaongaʻi iá.

(Russell M. Nelson, “Ngaahi Fili ki ʻItānití,” Ensign pe Liahona, Nōvema 2013, 107)

ʻOku ʻahiʻahiʻi fēfē kitautolu ʻe Sētane ke tau ngāue hala ʻaki hotau sinó?

Naʻe akonaki ʻa ‘Eletā Tēvita A. Petinā ‘o e Kōlomu ‘o e Kau ‘Aposetolo ‘e Toko Hongofulu Mā Uá ‘o kau ki he fakafeʻātungia ‘a Sētané mo e mahuʻinga ‘o e sinó.

ʻOku Mau Tui ki he Angamaʻá

Ko ʻetau talangofua ko ia ki he fono ʻo e angamaʻá, ʻe fakalahi ai ʻetau fiefia ʻi he moʻui fakamatelié pea lava ke tau fakalakalaka ai ki he moʻui taʻengatá.

Koeʻuhí ʻoku fuʻu mahuʻinga ‘a e sino fakamatelié ki he palani ʻo e fiefia ʻa e Tamaí mo ʻetau fakalakalaka fakalaumālié, ʻoku feinga ai ʻa Lusifā ke veuki ʻetau fakalakalaká ʻaki hano fakataueleʻi kitautolu ke tau fakaʻaongaʻi hala hotau sinó. …

Ko hono maumauʻi ko ia e fono ʻo e angamaʻá ko ha angahala fakamamahi pea mo hano fakaʻaongaʻi hala ia hotau sino fakamatelié. Ko ha angatuʻu fakahāhā kiate kinautolu ʻoku nau ʻiloʻi mo mahino ki ai e palani ʻo e fakamoʻuí, ʻa hono fakaʻuliʻi ʻo e sinó (vakai ki he Mōsaia 2:36–37 ; [Tokāteline mo e Ngaahi Fuakava] 64:34–35) mo hano fakaʻikaiʻi hotau tuʻunga totonu ko e ngaahi foha mo e ʻōfefine ʻo e ʻOtuá. ʻI he taimi ʻoku tau sio ai ʻo fakalaka atu mei he moʻui fakamatelié ki ʻitānití, ʻoku faingofua ke tau ʻiloʻi ko e kākā ʻoku taukapoʻi ʻe he filí ʻoku fakataimi pē mo ʻikai hano ʻaonga.

(David A. Bednar, “ʻOku Mau Tui ki he Angamaʻá,” Ensign pe Liahona, Mē 2013, 43)

Naʻe lea ʻa Sūsana W. Tena, ko e Palesiteni Lahi mālōlō ʻo e Kau Finemuí, ki ha niʻihi ʻo e ngaahi founga ʻoku ʻahiʻahiʻi ai kitautolu ʻe he filí ke tau ngāuehala ʻaki hotau sino fakamatelié.

ʻOku fakataueleʻi ʻe [Sētane] ha tokolahi ke nau fakaʻuliʻi ʻa e meʻafoaki maʻongoʻonga ko ʻeni ʻo e sinó ʻaki ʻa e angaʻulí, teunga taʻetāú, fakahōhōʻia pē ʻiate kitá, mo e maʻunimaá. ʻOkú ne fakatauveleʻi ha niʻihi ke fehiʻa ki honau sinó; ʻokú ne ʻahiʻahiʻi e niʻihi kehe ke nau polepole ‘i honau sinó. Neongo pe ko e hā, ka ʻokú ne fakataueleʻi ʻa e māmaní ke lau ʻa e sinó ko ha meʻanoa pē. ʻOku ou fie hiki hake hoku leʻó he ʻahó ni ke poupou ki he toputapu ʻo e sinó, ʻi heʻeku fehangahangai mo e ngaahi loi fakasētane lahi fekauʻaki mo e sinó. ʻOku ou fakamoʻoni ko e sinó ko ha meʻaʻofa ia, ke fakamolumaluʻi mo fakaʻapaʻapaʻi.

(Susan W. Tanner, “The Sanctity of the Body,” Ensign or Liahona, Nov. 2005, 13)

Ngaahi ʻEkitivitī Fakalahi ki he Akó

Moʻui maʻa ʻi he taimi ʻoku ʻikai fai pehē ai e niʻihi kehé

Ke akoʻi ʻa e tefitoʻi moʻoni kapau te tau fili ke feohi vāofi mo kinautolu ʻoku nau tali ʻa e angahalá, ʻe lava ke tākiekina kitautolu ʻe heʻenau faiangahalá, fakakaukau ke fakaafeʻi e kau akó ke nau ako ʻa e 1 Kolinitō 5:1–2, 6–7, 9–11 . Ko e hā e talanoa fakatātā ʻoku fakaʻaongaʻi ʻe Paula ke akoʻi ʻaki e moʻoni ko ʻení? Ko e hā e faleʻi ʻoku fai ʻe Paula ki he Kāingalotu Kolinitoó ʻi honau tūkungá? Ko e hā te tau lava ʻo fai kae ʻikai tukuhifo ai ʻetau tuʻunga moʻuí ke tokonia kinautolu kuo nau tali ʻa e angahalá?