1 Kolinitō 1–7

Vakai Fakalūkufuá

ʻOku aleaʻi ʻi he uiké ni ʻa e ‘uluaki vahe ʻe fitu ʻo e tohi ʻa Paula ki he kakai Kolinitoó. Naʻe puputuʻu ʻa e Kāingalotu ʻi Kolinitoó ʻi he ngaahi fakakaukau fakamāmaní, pea naʻe feinga ʻa Paula ke tokoniʻi kinautolu ke nau ʻiloʻi ʻa e founga te nau lava ai ʻo ako e ngaahi moʻoni fakalaumālie ʻoku tuʻuloá. Naʻe fakamālohia mo fakatonutonu ʻe heʻene ngaahi akonaki mālohí ʻa e Kāingalotu ʻi Kolinitoó, ʻo tataki kinautolu ke nau foki ki he hala ʻo e fuakavá. ʻOku kau foki ʻi he uiké ni ha lēsoni ke tokoni atu ke ke vakaiʻi e meʻa ʻokú ke akó.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

1 Kolinitō 1–4

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻe lava ke tokoniʻi ai kitautolu ʻi hono langa ʻetau moʻuí ʻi he makatuʻunga ʻo Sīsū Kalaisí ke tau ikunaʻi e ngaahi pole fakamāmaní. 

• Teuteu ʻa e tokotaha akó: Fakaafeʻi e kau akó ke kole ki ha mēmipa ʻo e fāmilí pe kaungāmeʻa ke fakamatalaʻi e founga kuo tokoniʻi ai kinautolu ʻi hono langa ʻenau moʻuí ʻi he makatuʻunga ʻo Sīsū Kalaisí ke nau lava ‘o matuʻuaki e ngaahi pole kehekehe ʻi he moʻuí.

• Naunau maʻá e kau akó: Ko ha laʻipepa pe tohinoa ako

• Fokotuʻu ki he akoʻí ʻi he konifelenisi vitioó: ʻI hono fakaʻaongaʻi ʻo e whiteboard, fakaafeʻi ha tokotaha ako ke ne tā ha fakatātā ʻo ha fale ʻoku ʻi ai hano fakavaʻe. Fakaafeʻi leva e kalasí ke nau tohi takai ʻi he falé ha ngaahi pole pe ko ha ngaahi uesia kovi ʻoku nau fehangahangai mo ia. Fakaafeʻi foki kinautolu ke tohi pe takai ʻi he fakavaʻé ʻa e meʻa te nau lava ʻo fai ke fakatefito ai ʻenau moʻuí ʻi he Fakamoʻuí.

1 Kolinitō 2

Taumuʻa ʻo e lēsoní: ʻE lava ke tokoni e lēsoni ko ʻení ke fakaafeʻi ʻe he kau akó e Laumālie Māʻoniʻoní ke tokoniʻi kinautolu ke ako e ngaahi meʻa fakalaumālié.

• Teuteu ʻa e tokotaha akó: Fakaafeʻi e kau akó ke nau teuteu ha ngaahi tali ki he ngaahi fehuʻi ko ʻení: Ko e hā ha ngaahi moʻoni kuó ke ʻilo ʻoku fakafou mai ʻi he Laumālie Māʻoniʻoní? Naʻe fakamoʻoniʻi fēfē atu nai ʻe he Laumālie Māʻoniʻoní ‘a e ngaahi moʻoni ko ʻení kiate koe?

• Fokotuʻu ki he akoʻí ʻi he konifelenisi vitioó: Fakakaukau ke fakaʻaliʻali ʻa e fakamatala ʻi he 1 Kolinitō 2:9–14 . ʻI hono fakaʻaongaʻi ha naunau ke tānaki ha fakamatalá, fakaafeʻi e kau akó ke laineʻi pe siakaleʻi e ngaahi foʻi lea pe kupuʻi lea ʻoku nau fakahaaʻi e ngaahi moʻoni fakalaumālié. Fakaafeʻi kinautolu ke nau fakamatalaʻi e ʻuhinga ne nau fakaʻilongaʻi ai e meʻa ne nau fakahokó.

1 Kolinitō 6

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino lelei ange ki he kau akó ʻa e mahuʻinga ʻo honau sino fakamatelié pea mo e mahuʻinga ʻo e maʻa fakasekisualé.

• Teuteu ʻa e tokotaha akó: Fakaafeʻi e kau akó ke fakalaulauloto ki he meʻa ʻoku nau ʻilo fekauʻaki mo e tuʻunga moʻui ʻa e ʻEikí ki he maʻa fakasekisualé pea teuteu ke fai ha faʻahinga fehuʻi pē ʻoku nau maʻu fekauʻaki mo e maʻa fakasekisualé.

• Naunau maʻá e kau akó:ʻAi ha tatau ʻo e kiʻi tohi Ki Hono Fakamālohia ʻo e Toʻu Tupú maʻá e tokotaha ako takitaha, kapau ʻe lava

• Vitiō: “I Choose to Be Pure”,ʻOku ou Fili Ke u Maʻa” (4:20) Chastity: What Are the Limits?”

• Fokotuʻu ki he akoʻí ʻi he konifelenisi vitioó: Hili hono ʻilo ʻe he kau akó e ngaahi tefitoʻi moʻoni mei he 1 Kolinitō 6:18–20 , fakakaukau ke fakaʻaliʻali ha fakatātā ʻo ha toʻu tupu mo ha temipale. ʻI hono fakaʻaongaʻi ʻo e chat feature (fepōtalanoaʻakí), fakaafeʻi e kau akó ke lisi e ngaahi meʻa ʻoku faitatau ai ha sino fakamatelie mo ha temipale. Fakaafeʻi foki kinautolu ke nau aleaʻi e founga ʻe ala uesia ai ʻe he fakafehoanaki ko ʻení ʻa e anga ʻo ʻetau vakai mo tauhi hotau sinó.

Fakataukei Fakatokāteliné: 1 Kolinitō 6:19–20

Taumuʻa ʻo e lēsoní: ʻE tokoni e lēsoni ko ʻení ke ako maʻuloto ʻe he kau akó ʻa e fakamoʻoni fakafolofolá mo e kupuʻi lea fakafolofola mahuʻingá ʻi he 1 Kolinitō 6:19-20 , ke fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

• Teuteu ʻa e tokotaha akó: Fakakaukau ke vahevahe mo e kau akó ʻa e tūkunga akoako ʻi he lēsoni ko ʻení pea fakaafeʻi kinautolu ke nau kamata fakakaukau ki he founga te nau ala tali ʻakí.

• Naunau maʻá e kau akó: Mahalo ‘e ʻaonga ke fakaʻaliʻali ʻa e tūkungá koeʻuhí ke lava e kau akó ʻo vakai ki ai ʻi heʻenau fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié.

• Fokotuʻu ki he akoʻí ʻi he konifelenisi vitioó: Vahevahe e kau akó ki ha ngaahi loki fakatahaʻanga ke nau fakatātaaʻi ʻo fakamatalaʻi e fono ʻo e angamaʻá mo e ʻuhinga ʻoku mahuʻinga ai ke fakaʻaongaʻi e ngaahi akonaki ʻi he 1 Kolinitō 6:19–20 . Kapau ʻe lava, fakafanongo ʻi ha ngaahi loki fakatahaʻanga kehekehe ke fakafuofuaʻi ʻa e mahino ʻoku maʻu ʻe he kau akó ki he moʻoni ko ʻení. ʻIkai ngata aí, fakakaukau ke fakaʻaongaʻi ʻa e chat feature ke fakaʻatā ʻa e kau akó ke nau upload ha fakatātā ʻo honau ʻīmisí, kupuʻi lea, pe ngaahi laʻitāngaahi tā ke fakafofongaʻi ʻa e 1 Kolinitō 6:19–20 .

Siviʻi Hoʻo Akó 8

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau vakaiʻi ʻa e ngaahi taumuʻa kuo nau fokotuʻú pea mo e tupulaki fakataautaha kuo nau aʻusia ʻi heʻenau ako e Fuakava Foʻoú.

• Teuteu ʻa e tokotaha akó: Fakaafeʻi e kau akó ke fakalaulauloto ki heʻenau fakalakalaka ʻi heʻenau ngaahi taumuʻa fakalaumālie fakatāutahá. ʻIkai ngata aí, , kae fakaafeʻi kinautolu ke nau fakakaukau ki he meʻa kuo nau akó pe ngaahi taumuʻa kuo nau fokotuʻú ʻi heʻenau ako ʻa e Loma mo e 1 Kolinitō 1–7.

• Fokotuʻu ki he akoʻí ʻi he konifelenisi vitioó: Ke tokoniʻi e kau akó ke nau fakalaulauloto mo fakahoko ʻa e uouangatahá, fakaafeʻi kinautolu ke nau fili ʻa e gallery view koeʻuhí ke nau lava ʻo sio ki he tokotaha kotoa pē ʻi heʻenau kalasí. ʻE malava pē ke ʻasi mai e kalasí ʻi ha fakahokohoko kehekehe maʻá e tokotaha ako takitaha. ʻI ha ngaahi meʻangāue ʻe niʻihi, ʻe lava ke liliu ʻeni ʻaki hano drag mo drop e windeows ki he hokohoko ʻoku fiemaʻú. Kapau ʻe lava, fakaafeʻi e tokotaha ako takitaha ke fokotuʻutuʻu honau kaungāakó ʻi he hokohoko tatau ʻi heʻenau monitoá. Pea feinga leva ke lau maʻuloto ʻe he kau akó ʻa e Loma 14:19 pe Loma 15:1 , ke lea ʻaki ʻe he tokotaha ako takitaha ʻa e foʻi lea ʻe taha ʻi he taimi , ʻo ʻalu ki he hokohoko ʻoku ʻasi ʻi he monitoá.