Fakataukei Fakatokāteliné: 1 Kolinitō 6:19–20

“Ko Ho Sinó ko e Temipale ʻo e Laumālie Māʻoniʻoní”

Two youth walk across a bridge. It is fall. The boys seem to be in conversation. The bridge goes over a lake. In the distance you can see fields and playground equipment.

ʻI hoʻo ako ʻa e 1 Kolinitō 6, naʻá ke ako ai fekauʻaki mo e tuʻunga moʻui ʻa e ʻEikí ki he maʻa fakasekisualé pea mo e mahuʻinga ho sino fakamatelié. ʻE tokoniʻi koe ʻe he lēsoni ko ʻení ke fakatupulaki hoʻo taukei ʻi he ngaahi akonaki ko ʻení ʻaki hono ʻoatu kiate koe ʻa e faingamālie ke ako maʻuloto ʻa e fakamoʻoni fakafolofolá mo e kupuʻi lea mahuʻinga ʻi he 1 Kolinitō 6:19–20, ke fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ki ha tūkunga moʻoni ʻo e moʻuí.

Akoʻi ʻa e moʻoní ʻi he ʻofa. Feinga ke akoʻi e ongoongoleleí ʻo hangē ko ia naʻe fai ʻe he Fakamoʻuí. Akoʻi ke mahino ʻa e moʻoní ka ʻi he laumālie maʻu pē ʻo e ʻofá. ʻE tokoni hono akoʻi ʻi he ʻofá ki he kau ako ʻoku nau fefaʻuhi mo ha niʻihi ʻo e ngaahi tefitoʻi moʻoni ʻo e ongoongoleleí, pe ʻoku ʻi ai honau ngaahi ʻofaʻanga ʻoku ʻikai ke nau moʻui ʻaki ʻa e ongoongoleleí, ke ako ʻa e moʻoní mo ongoʻi ha holi ke moʻui ʻaki ia.

Teuteu ʻa e tokotaha akó: Fakakaukau ke vahevahe mo e kau akó e tūkunga akoako ʻi he lēsoni ko ʻení pea fakaafeʻi kinautolu ke nau kamata fakakaukau ki he founga te nau ala tali ʻakí.

Ngaahi ʻEkitivitī Ako ʻOku Ala Fakahokó

ʻOku teuteuʻi ʻa e lēsoni fakataukei fakatokāteline ko ʻení ke akoʻi hili ʻa e lēsoni “1 Kolinitō 6,” ʻa ia ko e lēsoni fakaʻuhinga ia ki he potufolofola fakataukei fakatokāteline 1 Kolinitō 6:19-20 . Kapau ʻoku fiemaʻu ke hiki e lēsoni fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni fekauʻaki mo iá lolotonga e uike ko iá.

Fakamatalaʻi mo ako maʻuloto

Fakakaukauloto ʻokú ke ʻi ha fealēleaʻaki fakakalasi pe fakakōlomu ʻi he taimi ʻoku fehuʻi atu ai ʻe ha kaungāako kei siʻi ange ki he faiakó, “Ko e hā e fono ʻo e angamaʻá?” ʻOku kole ʻe he faiakó ki he kau ako kehé, kau ai mo koe, ke fai ha tali.

ʻI hono fakaʻaongaʻi e ngaahi moʻoni naʻe akoʻi ʻi he potufolofola fakataukei fakatokāteliné 1 Kolinitō 6:19–20 , palani e meʻa te ke lava ʻo vahevahe mo ho kaungāakó ke tokoni ke mahino kiate kinautolu e tuʻunga moʻui ʻa e ʻEikí ki he haohaoa fakasekisualé, pe angamaʻá, mo e ʻuhinga ʻoku mahuʻinga aí.

• ʻI hono fakaʻaongaʻi e ngaahi akonaki ʻoku lekooti ʻi he 1 Kolinitō 6:19–20 , te ke fakamatalaʻi fēfē nai ki ha taha ʻa e ʻuhinga ʻo e fono ʻa e ʻEikí ki he angamaʻá pea mo e ʻuhinga ʻoku mahuʻinga aí?

Fakafanongo fakalelei ki he ngaahi tali ʻa e kau akó ke ‘ilo mei ai ‘a e tūkunga mahino ʻoku nau maʻú. Kapau ʻe fiemaʻu, toe vakaiʻi e ngaahi potufolofola mo e ngaahi tefitoʻi moʻoni mei he lēsoni ʻi he 1 Kolinitō 6.

ʻOange ha faingamālie ki he kau akó ke nau ako maʻuloto ʻa e fakamoʻoni fakafolofola ki he potufolofola fakataukei fakatokāteline 1 Kolinitō 6:19–20 mo e kupuʻi folofola mahuʻinga ʻoku ʻoatu fakataha mo iá. Ko ha sīpinga ʻeni ʻe taha ʻo e founga hono fakahoko ʻení.

Ke tokoni atu ke ke ako maʻuloto ʻa e fakamoʻoni fakafolofola ki he potufolofola fakataukei fakatokāteline 1 Kolinitō 6:19–20 mo hono kupuʻi folofola mahuʻingá, “Ko ho sinó ko e temipale ia ʻo e Laumālie Māʻoniʻoní,” fakakaukau ke faʻu ha fakatātā, kupuʻi lea, pe ko ha ʻū tā ke fakafofongaʻi ʻa e potufolofola ko ʻení mo e tokāteline naʻe akoʻí. ʻOku totonu ke makehe ʻa e fakatātā ʻokú ke faʻú ka ke ʻapasia mo fakaʻapaʻapaʻi ʻa e potufolofola mo e tokāteline ʻokú ne akoʻí. Te ke lava ʻo fakaʻaongaʻi ʻa e fakatātā naʻá ke tā ʻo ha tokotaha ʻoku tuʻu ʻi he tafaʻaki ʻo e temipalé ʻi he ʻekitivitī ki he lēsoni ʻi he 1 Kolinitō 6. Fakapapauʻi ke hiki e 1 Kolinitō 6:19–20 pea mo e kupuʻi lea mahuʻingá ʻi ha feituʻu ofi ki hoʻo fakatātaá.

Lolotonga hoʻo sio ki he fakatātā kuó ke faʻu pe filí, toe lau ʻa e fakamoʻoni fakafolofolá mo e kupuʻi lea fakafolofola mahuʻingá ʻi ho ʻatamaí kae ʻoua kuó ke ongoʻi kuó ke maʻuloto ia.

Akoako hono fakaʻaongaʻí

Tokoni ki he kau akó ke toe vakaiʻi e ngaahi tefitoʻi moʻoni ki hono maʻu ʻo e ʻilo fakalaumālié. Ko ha sīpinga ʻeni ʻe taha ʻo e founga hono fakahoko ʻení. Ko ha founga ʻe taha, fakakaukau ke fakaafeʻi ha kau ako ʻe toko tolu ke nau teuteu kimuʻa ke fakamatalaʻi fakanounou mo akoʻi e ngaahi tefitoʻi moʻoni ko ʻení ki honau kaungāakó.

Lekooti nounou ʻi hoʻo tohinoa akó ʻa e meʻa ʻokú ke ʻilo mo manatuʻi fekauʻaki mo e ngaahi tefitoʻi moʻoni ʻo hono maʻu ha ʻilo fakalaumālié kae ʻikai toe vakai ki he ngaahi maʻuʻanga tokoni kehé. ʻI hoʻo ʻosí, vakai ki he Fakamatala ki he ʻElito ʻo e Fakataukei Fakatokāteliné ( 2022) ke vakaiʻi hoʻo ʻiló pea tānaki atu ha faʻahinga fakamatala mahuʻinga naʻe ʻikai ke ke maʻú.

Fakalaulauloto ki he meʻa ko ʻení. Tali leva e ngaahi fehuʻi ʻoku muimui maí ʻo fakaʻaongaʻi e ngaahi tefitoʻi moʻoni ʻo hono maʻu ʻo e ʻilo fakalaumālié mo e tokāteline ʻoku akoʻi ʻi he 1 Kolinitō 6:19–20 ko hotau sinó ko e temipale ia ʻo e ʻOtuá ʻe lava ke nofoʻia ʻe he Laumālié. Pe, te ke lava foki ʻo faʻu ha tūkunga kehe ʻe mahuʻingamālie ange kiate koe pe ko e toʻu tupu ʻi homou feituʻú.

Ko e tefitoʻi moʻoni taʻengata ʻo e hoko hotau sinó ko e temipale ʻo e ʻOtuá ʻa ia ʻe lava ke nofoʻia ʻe he Laumālié ʻi ha ngaahi tūkunga kehe mei he angamaʻá. Fakakaukau ke liliu e tūkunga ko ʻení ki heʻene fenāpasi taha mo e kau akó.

Kuo tupu hake ha tokotaha taʻu hongofulu tupu ʻo ʻiloʻi e ngaahi tuʻunga moʻui ʻa e ʻEikí ki he angamaʻá, ka ʻi he hili haʻane ʻi ha vā fetuʻutaki feohi fakamātoato ʻi ha taimi lahi, ʻokú ne maʻu ha holi ke fakahaaʻi ʻene ngaahi ongó ʻi ha feohi fakasekisuale mo hono kaumeʻa fefiné. ʻOku ʻi ai hono fāmili mo ha ngaahi kaungāmeʻa kuo nau feohi fakasekisuale kimuʻa he malí, pea ʻoku nau ngali fiefia kotoa.

Vakaiʻi mo sivisiviʻi e ngaahi fakakaukaú mo e ngaahi fehuʻí, ʻaki ha fakakaukau ʻoku taʻengatá

Naʻe fakamamafaʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá “ʻe toki lava pē ke mahino ʻa e mahuʻinga taʻengata ʻo e angamaʻá ʻi loto he uho e palani ʻa ʻetau Tamai Hēvaní ki he fiefia ʻEne fānaú” (“ʻOku Mau Tui ki he Angamaʻá,” Ensign pe Liahona, Mē 2013, 41).

• Ko e hā ha ngaahi tafaʻaki pau ʻo e palani ʻo e fakamoʻui ʻa e Tamai Hēvaní te ke fiemaʻu ke mahino mo fakakaukau ki ai ha taha ʻi he tūkunga ko ʻení?

• ʻOku uesia fēfē nai ʻe he ngaahi moʻoni ʻi he 1 Kolinitō 6:19–20 ʻa e anga hoʻo vakai ki he fono ʻo e angamaʻá pea mo ho vā fetuʻutaki mo e Toluʻi ʻOtuá?

Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

Fakakaukau ke fili ha taha ʻo e ngaahi maʻuʻanga tokoni fakalangi ko ʻení pe lahi ange ke fekumi ki he ngaahi moʻoni ʻe kaunga mo tokoni ʻi he tūkunga naʻá ke filí.

• 1 Kolinitō 6:19–20

• ʻEkesōtosi 20:14 ; ʻAlamā 38:12 ; ʻAlamā 39 ; 3 Nīfai 12:27–30 ; Tokāteline mo e Ngaahi Fuakava 42:22–23

• Fakahinohino ki he Ngaahi Folofolá, “ Angamaʻa ,” scriptures.ChurchofJesusChrist.org

• Tēvita A. Petinā, “ʻOku Mau Tui ki he Angamaʻá, ,” Ensign pe Liahona, Mē 2013, 41–44

Tali ‘a e fehuʻi ko ‘ení:

• Ko e hā e meʻa naʻá ke maʻu ʻe ala tokoni ʻi he tūkunga ko ʻení?

Ngāue ʻi he tuí

• Ko e hā ha ngaahi founga kehekehe ʻe lava ke fili ai ha taha ke ngāue ʻi he tui ʻi he tūkunga ko ʻení?

• Ko e hā ha ngaahi aʻusia kuó ke maʻu mo e Tamai Hēvaní mo Sīsū Kalaisi ʻa ia te ne tokoniʻi koe ke ke falala kiate Kinaua mo muimui ki Heʻena ngaahi akonakí?

Fakamatalaʻi fakanounou e founga ʻe lava ke fakaʻaongaʻi ai ʻa e ngaahi tefitoʻi moʻoni takitaha ʻo hono maʻu ʻo e ʻilo fakalaumālié ki he tūkungá. Kapau naʻá ke faʻu haʻo tūkunga pē ʻaʻau, fakapapauʻi ke fakakau atu mo ha fakamatala nounou ʻo e tūkunga ko iá.

Hili hono maʻu ʻe he kau akó ha taimi ke fakalaulauloto mo tali ai e ngaahi fehuʻi kimuʻá, fakakaukau ke fakaafeʻi kinautolu ke vahevahe ʻa e tūkunga naʻa nau fakaʻaongaʻí pea mo aleaʻi ʻenau ngaahi talí. Ko e founga ʻe taha ke fai ai ʻení ko hano tuku ha sea ʻataʻatā ʻi muʻa ʻi he lokí pea fakaafeʻi e kau akó ke nau fakakaukauloto ʻoku tangutu ʻa e tokotaha ʻi he tūkungá ʻi he sea ko iá. Kole ki ha tokotaha ako ke fakakaukau ki ha meʻa ʻe taha te nau ala vahevahe mo e tokotaha ko iá. Hili iá pea fehuʻi ange pe ʻoku ʻi ai ha tokotaha ako kehe te ne fie tānaki atu ki he meʻa naʻe lea ʻaki ʻe he tokotaha ako ʻuluakí. Fakaafeʻi ha niʻihi ʻo e kau akó ke nau vahevahe ha ngaahi fakakaukau ʻe ala tokoni ki he tokotaha ʻi he tūkunga ko ʻení. Poupouʻi e kau akó ke nau fakaʻaongaʻi e ngaahi tefitoʻi moʻoni ʻe tolu ʻo hono maʻu ʻo e ʻilo fakalaumālié.

Toe vakaiʻi ʻo e fakataukei fakatokāteliné

ʻE lava ke fakaʻaongaʻi ʻa e ʻekitivitī fakamanatu ko ʻení ki ha lēsoni ʻe akoʻi ʻi he kahaʻú:

Fakaafeʻi e kau akó ke nau fakamanatuʻi pe fakaʻaliʻali ʻa e ʻīmisi naʻa nau faʻú ke fakafofongaʻiʻaki ʻa e 1 Kolinitō 6:19–20 . Fakaafeʻi kinautolu ke nau vakai pe te nau lava ʻo manatuʻi ʻa e kupuʻi lea fakafolofola mahuʻinga ʻoku fekauʻaki mo e potufolofola ko ʻení. ‘I hano fiemaʻu, akoako lau maʻuloto ʻa e fakamoʻoni fakafolofolá mo e kupuʻi lea mahuʻinga ʻo e potufolofola fakataukei fakatokāteline ko ʻení.