1 Петр 1–5

“Алтнаас ч илүү үнэ цэнтэй”

Та Шинэ Гэрээний эхний хагасыг судлахдаа төлөөлөгч Петрийн итгэл, шаргуу байдлын талаар сурч байснаа санаж байгаа байх. Петр анхны захидлаа Аврагчийн мөнх бус амьдралын тохинууллын үеэр Есүс Христтэй хамт алхаж, ярилцаж байснаас хойш олон жилийн дараа буюу амьдралынхаа сүүл үед бичсэн. Тэргүүн төлөөлөгч байсан Петр анхны захидалдаа ромчуудын доор амсаж байгаа хүнд хэцүү сорилт бэрхшээлээр дамжуулан гэгээнтнүүд хэрхэн хүчирхэгжиж болох арга замууд дээр төвлөрсөн байдаг. Энэ хичээл таны туулж буй сорилт бэрхшээл дэх Бурханы зорилгыг илүү сайн ойлгоход туслах бөгөөд энэ нь сорилт бэрхшээлийг итгэлээр даван гарах хүчийг өгч болох юм.

Суралцагчдын өөр өөрийн суралцах онцгой хэрэгцээ шаардлагыг авч үзэх. Суралцагчдын суралцах өөр өөр хэрэгцээ шаардлагыг бодож үз. Энэ хичээлд санал болгосон боломжит суралцах үйл ажиллагаануудыг заавал дагах заавар биш, чиглүүлэг болгон ашиглаж, уг үйл ажиллагаануудыг суралцагчдад туслахын тулд тохируулан өөрчил. Үүнд судрын шүлгүүдийг өөр өөр арга замаар унших, зарчим эсвэл сургаалыг ойлгохын тулд өөр өөр үйл ажиллагааг хийж гүйцэтгэх зэрэг нь багтаж болно. Бүтээлч байж, шинэ арга барил туршихаас бүү эмээ.

Суралцагчийн бэлтгэл: Суралцагчдыг дараах асуултад хэрхэн хариулахаа бодож үзэхэд урь. Бидний амьдралд яагаад сорилт бэрхшээл, зовлон зүдгүүр, шударга бус явдал тохиолддог вэ?

Боломжит суралцах үйл ажиллагаа

Яагаад бид амьдралдаа хүнд зовлон бэрхшээлтэй тулгардаг вэ?

Арван хоёр төлөөлөгчийн чуулгын ахлагч Дэйл Г.Рэнланд бидний хүн нэг бүр шударга бус санагдах зүйлстэй хэрхэн тулгарах талаар тайлбарласан. https://www.churchofjesuschrist.org/study/general-conference/2021/04/25renlund?lang=mon дээрх “Уур хүрмээр шударга бус байдал” видеоны 3:19-ээс 4:12 хүртэл үз эсвэл дараах мэдэгдлийг унш.

Зарим нэг шударга бус байдлыг тайлбарлах боломжгүй ч тайлбарлах аргагүй шударга бус байдал уур хүргэдэг. Төгс бус, гэмтэж бэртсэн, өвчин зовлонд нэрвэгдсэн биетэй амьдрах нь шударга бус мэт санагддаг. Мөнх бус амьдрал угаасаа л шударга бус юм. Зарим нь баян чинээлэг орчинд төрсөн байхад зарим нь тийм биш байдаг. Зарим нь хайраар дүүрэн эцэг эхтэй байхад, заримд нь тийм эцэг эх байдаггүй. Зарим нь урт удаан амьдардаг байхад, зарим нь богино насалдаг. Иймэрхүү жишээ олон бий. Зарим нь сайн үйл хийхийг хичээж байхдаа ноцтой алдаа гаргадаг. Зарим нь чадах байсан ч шударга бус явдалтай тэмцдэггүй. Зарим нь болохгүй гэдгийг мэдсээр байж Бурханы өгсөн сонгох эрхийг бусдыг зовоож шаналгахын тулд ашигладаг.

(Дэйл Г.Рэнланд, “Уур хүрмээр шударга бус байдал,” 2021 оны 4-р сарын Ерөнхий чуулган, 40)

• Яагаад ахлагч Рэнланд бидний амьдралд тохиолддог зарим шударга бус зүйлийг “уур хүрмээр” гэдэг үгийг ашиглан дүрсэлсэн гэж та бодож байна вэ?

• Уур хүрмээр шударга бус сорилт бэрхшээлийг туулж буй эсвэл туулж байсан хэнийг та мэдэх вэ? Их Эзэн яагаад аливаа зүйл тохиолдохыг зөвшөөрдөг гэж та бодож байна вэ?

МЭ 64 онд Ром хотын ихэнх хэсэг түймэрт автсан байна. Нэр хүндтэй ромчууд Сүмийн гишүүдийг гал тавьсан гэж гүтгэсэн бөгөөд үүнээс болж Ромын Эзэнт гүрэн даяар Христийн шашинтнуудыг ихээхэн дарамтлан хавчих болжээ. Петр гэгээнтнүүдийн итгэлийг бэхжүүлж, сорилт бэрхшээлийг итгэлээр даван гарахын мөнхийн шагналын талаар сануулахын тулд энэ үйл явдлын дараахан өөрийн анхны захидлыг бичсэн байх магадлалтай. Суралцахдаа өөртөө тулгарсан сорилт бэрхшээлийн шалтгааныг мөн тэдгээрийг итгэлээр даван гарахад Есүс Христ тусална гэдэгт хэрхэн итгэн найдаж болох талаар ойлгоход танд туслах Ариун Сүнсний өдөөлтөд анхаарлаа хандуул.

Цэвэршүүлэгчийн гал

1 Петр 1:3–9 -ийг уншаад, тулгарсан сорилт бэрхшээлээ итгэлээр даван гардаг хүмүүсийг хүлээж буй адислалуудын талаар төлөөлөгч Паул юу гэж заасныг олж мэд. 6-р шүлэг дээрх сорилт гэх үг нь сорилт, зовлон бэрхшээлийг хэлж байгаа юм ( 1 Петр 1:6 , зүүлт тайлбар b-г үзнэ үү).

• Эдгээр шүлгийн ямар үг, хэллэгийг сорилт бэрхшээл тулгарах үед та болон бусад хүн санаж явбал тустай гэж бодож байна вэ? Яагаад?

• Яагаад Петр гэгээнтнүүдийн итгэлийн сорилтыг галаар цэвэршүүлэгдсэн алттай зүйрлэсэн гэж та бодож байна вэ?

Дараахтай адил хайлуулах зуухны дүрс эсвэл зурсан зургийг суралцагчдад үзүүлж болох юм.

Дараах зураг бол хайлуулах зуухны зураг. Хайлуулах зуух бол алт зэрэг металлыг цэвэршүүлдэг сав юм. Металлыг цэвэршүүлэхдээ бохирдлоос нь салгаж, эцсийн бүтээгдэхүүнийг сайжруулахын тулд халааж, хайлуулдаг.

• Итгэлийг “алтнаас ч илүү үнэтэй” болгохын тулд ямар ямар арга замаар шалгаж, сорьж болох вэ? ( 1 Петр 1:7).

Таны дөнгөж сая судалсан шүлгүүдээс биднийг сорилт бэрхшээлийг итгэлээр даван гарах үед Есүс Христэд итгэх итгэл маань цэвэршиж, хүчирхэгждэг гэх үнэнийг тодорхойлж болох юм. Энэ үнэнийг судар эсвэл судлах тэмдэглэлдээ бичиж болно.

• Хүнд хэцүү сорилт бэрхшээлийг туулахын юу нь Есүс Христэд итгэх бидний итгэлийг хүчирхэгжүүлдэг вэ?

Дараах тайлбар болон асуултыг хуваалцахын өмнө Алма 62:41 -ийг ангиараа хамт уншиж болно.

Зовлон бэрхшээл туулах нь олон хүнийг сүнслэг байдлын хувьд цэвэршүүлж болох ч хүнд хэцүү сорилт бэрхшээлийн дараа зүрх сэтгэлээ хатууруулсан эсвэл уурлаж хорссон хүмүүс ч байдаг ( Алма 62:41 -ийг үзнэ үү).

• Юу бидэнд сорилт бэрхшээлээ итгэлийг маань сарниулдаг биш харин адислал болгох туршлага болгож хувиргахад тусална гэж бодож байна вэ?

• Хүнд хэцүү сорилт бэрхшээлийг итгэлээр давж гарснаар таны эсвэл өөр хэн нэгний итгэл хүчирхэгжиж байсан ямар туршлага танд байгаа вэ эсвэл ямар туршлагыг та мэдэх вэ?

• Эдгээр туршлага нь Их Эзэний талаар танд юу заасан бэ?

 

Петр гэгээнтнүүдэд зөвлөв

Петрийн анхны захидал тэр чигээрээ Есүс Христийн шавь нар хэрхэн зовлон шаналал, хавчлагыг итгэлээр даван гарч болох талаарх сэдвийг хөндсөн байдаг. Петрийн зөвлөгөө нь мөнх бус амьдралын сорилт бэрхшээлтэй тулгарч буй хүн бүрд итгэл найдвар, урам зориг болон хүчийг өгдөг.

Уг хичээлийн эхэнд харсантай адил хайлуулах зуухны энгийн зургийг зур. Тулгарч байсан эсвэл одоо тулгарч байгаа зарим сорилт, зовлон бэрхшээлээ хайлуулах зуухан дотор жагсаан бич.

Петрийн үгийг илүү сайн судлахдаа, зурган дотроо жагсаан бичсэн сорилт бэрхшээлд тань туслах сургаалуудыг олж мэд. Эдгээр сургаалыг өөрийн хайлуулах зуухны гадна талд бич.

Дараах судрын эшлэл болон тэдгээрийн товч хураангуйг самбарт жагсааж бичиж болно. Суралцагчдын хувьд эдгээр шүлгийг судлах хамгийн тохиромжтой арга замыг тодорхойл. Нэг сонголт бол ангийг бүлгүүдэд хуваагаад, бүлэг бүрд нэг бүлэг шүлгийг оноож өгөх явдал байж болно. Хангалттай хугацаа өгсний дараа, суралцахдаа сурч мэдсэн зүйлээ ангийнхаа бусад суралцагчид тайлагнаж болно. Дараа нь ангийнхныхаа танилцуулсан зүйлс дээр тулгуурлан, ойлгосон зүйлсээ зурган дээрээ нэмэхэд суралцагчдыг урьж болно.

Өөр нэг сонголт бол суралцагчдыг хамтрагчтайгаа бүлэг шүлэг бүрийг судлахад урих явдал юм. Суралцагчдыг хамтрагчтайгаа шүлгүүдийг судалж, ярилцаж дууссаных нь дараа өөр өөр хамтрагчтай ээлжлэн хуваарилах замаар шинэ хамтрагчийг тэдэнд оноож болно. Суралцагч бүр өөр өөр хамтрагчтай гурван бүлэг шүлгийг судлах хүртэл энэ үйл явцыг давтаж болно.

1 Петр 2:20–25 —Сорилт бэрхшээлийг даван туулж буй Есүс Христийн жишээ

1 Петр 4:12–19 —Сорилт бэрхшээлдээ баясах шалтгаан

1 Петр 5:6–11 —Сорилт бэрхшээлийг даван туулахад Их Эзэний хүчийг хүлээн авах

Суралцагчдад суралцах хангалттай цаг гаргаж өгсний дараа сайн дураараа ойлголтоо хуваалцахад суралцагчдыг урь. Суралцагчдыг хамгийн утга учиртай санагдсан шүлгүүдээ хуваалцаж, яагаад гэдгийг тайлбарлахад урьж болно. Өнөөдөр сурч мэдсэн зүйл нь тэдний одоогийн нөхцөл байдалд хэрхэн тус болох талаар бодоод, өөрсдийн ойлгосон зүйл болон сэтгэгдлээ судлах тэмдэглэлдээ бичихэд урамшуул.

Тайлбар ба нөхцөл байдлын талаарх мэдээлэл

1 Петр 2:20 . Петр бид өөрсдийн сорилт бэрхшээлийг яагаад тэвчээртэй туулах ёстой гэж заасан бэ?

Арван хоёр төлөөлөгчийн чуулгын ахлагч Нийл А.Максвэлл (1926–2004) ийн заасан.

Тэвчээр нь Тэнгэрлэг Эцэгт итгэх бидний итгэлтэй маш нарийн холбоотой. Үнэндээ бид хэт тэвчээргүй байснаар юу сайн гэдгийг Бурханаас ч илүү мэднэ гэж хэлж байгаа хэрэг. Үгүй юм гэхэд, бидний цагийн хуваарь Түүнийхээс дээр гэж үзэж байгаа хэрэг. … Тиймээс аль хэдийн хэлсэнчлэн, тэвчээр бол бидний итгэл, сонгох эрх, амьдралд хандах хандлага, даруу байдал болон зовлон шаналалтай холбоотой мөнх бус оршихуйн амин чухал зан чанар юм. Энгийнээр хэлбэл, жинхэнэ өсөлт хөгжилд хүрье гэвэл тэвчээртэй байхаас өөр арга зам байхгүй.

(Neal A. Maxwell, “Patience” [Brigham Young University devotional, Nov. 27, 1979], 1, 4, speeches.byu.edu)

Би өөрт тулгарч буй сорилт бэрхшээлийг хэрхэн даван гарах вэ?

Арван хоёр төлөөлөгчийн чуулгын ахлагч Нийл Л.Андэрсэн ийн заасан.

Дэлхийн саад бэрхшээлийн шуурганд тэвчээртэй урагш тэмүүл. Мөн Аврагчийн эдгээгч хүч танд гэрэл, ойлголт, амар амгалан, найдвар авчирна. Бүх зүрх сэтгэлээрээ залбир. Есүс Христэд болон Түүний бодит гэдэгт мөн Түүний ач ивээлд итгэх итгэлээ хүчирхэгжүүл. … Урагшаа хар. Танд учирсан бэрхшээл, уй гашуу үнэхээр бодитой боловч мөнхөд үргэлжлэхгүй. Таны харанхуй шөнө өнгөрнө. Учир нь Хүү жигүүртээ анагаах чадлыг эзэмдэн бос[сон].

(Нийл Л.Андэрсэн, “Шархадсан тэд,” Ensign, Nov. 2018, 85 эсвэл 2018 оны 10-р сарын Ерөнхий чуулган, 81)

Би зовлон бэрхшээл туулахдаа аз жаргалыг хэрхэн олж болох вэ?

Арван хоёр төлөөлөгчийн чуулгын ахлагч Жозэф Б.Вөртлин (1917–2008) зовлон бэрхшээлтэй байх үед аз жаргалыг хэрхэн олж авах талаар мөн “Юу ч тохиолдсон талархалтай бай” гэх ээжийнх нь зөвлөгөө санаанаас нь огт гардаггүйг дурссан.

Уй гашуугаар дүүрэн өдөр хоногууд хэрхэн бидэнд таалагдах билээ? Яг тэр агшинд таалагдахгүй байх нь гарцаагүй. Ээж бидэнд санаагаар унаснаа нуу эсвэл тохиолдсон зовлон зүдгүүрийг үгүйсгэ гэж зөвлөөгүй гэж би боддог. Мөн амьсгал давчдам таагүй үнэнээ далдалж, аз жаргалтай байгаа юм шиг дүр эсгэхийг зөвлөөгүй гэж би боддог. Харин саад бэрхшээлд хэрхэн хандах нь амьдралд аз жаргалтай, амжилт бүтээлтэй байх гол хүчин зүйл гэдэгт би итгэдэг. Хэрэв бид саад бэрхшээлд ухаалгаар хандвал, бидэнд тулгарсан хамгийн хүнд хэцүү үе ч хамгийн их өсөж хөгжсөн үе болж, агуу аз жаргал руу хөтлөх болно. …

Бид шог наргианыг эрж хайхдаа мөнхийн боломжуудыг эрэлхийлж, нөхөн сэргээх зарчмыг ойлгон, Тэнгэрлэг Эцэгтээ ойртсоноор зовлон бэрхшээл, хүнд сорилтуудыг тэвчиж, даван туулдаг. Бид ээжийн минь хэлсэн шиг “Юу ч тохиолдсон талархалтай бай” хэмээн хэлж чадна.

(Жозэф Б.Вөртлин, “Юу ч тохиолдсон талархалтай бай,” Ensign, Nov. 2008, 26–28 эсвэл 2008 оны 10-р сарын Ерөнхий чуулган, 31–32, 34)

Нэмэлт суралцах үйл ажиллагаа

1 Петр 5:1–5 . “Бурханы хонин сүргийг хариул”

Суралцагчидтай хамт 1 Петр 5:1–5 -ыг уншаад, эдгээр шүлэгт Петр Сүмийн ахлагчдад Бурханы хаант улсын удирдагчдын хувиар хүлээдэг үүрэг хариуцлагынх нь талаар заасан болохыг онцлох талаар бодож үз. Сүмийн удирдагчид Бурханы сүргийг хайрлах, үлгэрлэх замаар харж хандах үүрэгтэй гэх үнэнийг тодорхойлоход нь суралцагчдад тусал. Удирдагчид хэрхэн тэдэнд болон тэдний гэр бүлд хайраар тохинуулсан тухай жишээнүүдийг ярилцахад суралцагчдыг урьж болно. Мөн “Тэргүүн Хоньчин[ы]” ( 1 Петр 5:4) жишээг дагаснаар тэд хэрхэн чуулга, ангийн гишүүддээ үлгэр дуурайл болж болохыг ойлгоход нь суралцагчдад тусалж болно.