Gipangutana ka na ba sukad kon nganong ikaw nagtuo sa usa ka piho nga mga kamatuoran sa ebanghelyo? Si Apostol Pedro midasig sa mga Santos nga kanunayng mahimong andam sa pagpamatuod sa kamatuoran ug mipahinumdom kanila sa ilang balaan nga kaliwatan (tan-awa ang 1 Pedro 2:9 ; 3:15). Kini nga leksiyon mahimong makatabang sa mga estudyante nga makasabot sa importansiya sa pagkamatinud-anong ehemplo ni Jesukristo ug maghatag og mga kahigayonan sa pagbansay sa pagtubag sa uban mahitungod sa ilang hugot nga pagtuo.
Pagtabang sa mga estudyante sa pagpasabot sa mga kamatuoran sa ebanghelyo. Ang mga Santos sa ulahing mga adlaw gihangyo sa pagpasabot sa ilang mga tinuohan sa tibuok nilang kinabuhi. Pagplano og mga kahigayonan alang sa mga estudyante sa pagbansay sa pagpasabot sa mga kamatuoran sa ebanghelyo ngadto sa usag usa sa klase. Kini makahatag og luwas nga kahimtang alang sa mga estudyante sa pagbansay sa pagpakighinabi mahitungod sa ebanghelyo.
Pagpangandam sa estudyante: Dapita ang mga estudyante sa paghisgot kauban sa ilang pamilya sa mga higayon diin sila o ilang kaila gihangyo sa pagpasabot sa ilang mga gituohan ug sa hugot nga pagtuo kang Jesukristo. Dapita sila sa pagkonsiderar kon ila ba kaha untang tubagon sa lahi nga paagi ug motambong nga andam sa pagpaambit sa ilang mga hunahuna.
Posible nga mga Kalihokan sa Pagkat-on
Mga pulong nga naghulagway sa mga sumusunod ni Jesukristo
Mahimong magsugod pinaagi sa paghisgot sa pipila ka mosunod nga mga pangutana sa mga estudyante. Dapita sila sa pagkonsiderar nganong ang Ginoo naglaom sa Iyang mga Santos nga malahi kaysa sa ubang mga tawo.
Aduna bay sukad nga nakamatikod nga nagbuhat ka sa mga butang sa lahi nga paagi tungod kay ikaw usa ka miyembro sa Ang Simbahan ni Jesukristo sa mga Santos sa Ulahing mga Adlaw?
Unsa man ang imong mga kasinatian niini?
Unsa ang imong nabati mahitungod sa pagkalahi ngadto sa daghang ubang nga mga tawo sa kalibotan?
Diha sa imong pagtuon karon, pamalandong ngano ug sa unsang paagi nga ang Ginoo gusto nga ang Iyang mga sumosunod mobarog nga lahi ug mahimong lahi.
Usa ka talagsaon nga katawhan
Basaha ang 1 Pedro 2:9 , nga mangita kon giunsa sa paghulagway ni Pedro ang mga Santos sa iyang panahon.
Unsay mipatigbabaw alang kanimo?
Unsa ang gisugyot niini nga mga pulong mahitungod sa paagi nga ang Langitnong Amahan mibati mahitungod kanimo?
Karon, ang pulong nga talagsaon sagad nagpasabot nga “lain” o “lahi.” Bisan tuod og ang Ginoo nagtinguha nga ang Iyang mga sumosunod mahimong lahi sa kalibotan, sa adlaw ni Pedro and talagsaon tingali adunay lahi nga kahulugan.
Si Presidente Russell M. Nelson mitudlo:
Imahe
Official portrait of President Russell M. Nelson taken January 2018
Sa Daang Tugon, ang termino nga Hebreohanon diin ang talagsaon gihubad og segullah, nga nagpasabot og “gipabilihan nga kabtangan,” o “bahandi.” Sa Bag-ong Tugon, ang termino nga Griyego gikan diin ang talagsaon gihubad og peripoises, nga nagpasabot og “pagpanag-iya,” o “pag-angkon”
Sa ingon, atong makita nga ang termino sa kasulatan nga talagsaon nagpasabot og “gipabilihan nga bahandi,” “nga gihimo” o “gipili sa Dios.” Aron kita mailhan sa mga sulugoon sa Ginoo isip iyang talagsaon nga mga katawhan mao ang usa ka labing taas nga pagdayeg.
(Russell M. Nelson, “Children of the Covenant,” Ensign, Mayo 1995, 34)
Unsa ang imong gibati sa pagkasayod nga ang Dios nagtan-aw kanimo isip usa ka lahi ug bililhong bahandi?
Basaha ang 1 Pedro 2:9–12 , nga mangita alang sa mga panabot kon unsaon nimo pagkahimong lahi gikan sa kalibotan.
Unsa man ang inyong nakit-an?
Sumala sa bersikulo12 , sa unsang paagi kita makaimpluwensiya sa uban?
Usa ka kamatuoran nga atong maila gikan niini nga mga bersikulo mao nga ang Dios nagtawag sa Iyang mga Santos nga lahi gikan sa kalibotan aron ang uban makakita sa ilang ehemplo ug mohimaya sa Dios.
Pamalandongi sa hilom ang mosunod nga mga pamahayag ug gradohi ang imong kaugalingon gikan sa 1 hangtod sa 5, diin ang 5 nagkahulugan nga ikaw miuyon kaayo.
1. Ang uban dali ra makaila nako isip usa ka sumusunod ni Jesukristo.
2. Isip usa ka sumusunod sa Manluluwas, okay ra ko nga lahi sa ubang mga tawo sa kalibotan.
Ang mosunod nga mga pangutana mahimong hisgotan isip usa ka klase o sa ginagmay nga mga grupo.
Nganong usahay lisod man nga mahimong lahi niadtong mga anaa sa imong palibot?
Unsa ang pipila ka mga butang nga atong mahimo aron makatabang kanato nga mobati og mas komportable sa pagkatalagsaon ug pagkalahi gikan sa ubang tawo sa kalibotan?
Unsa ang pipila sa mga ehemplo gikan sa imong kinabuhi o sa mga kasulatan nga nagpakita kon sa unsang paagi nga ang pagkalahi gikan sa ubang tawo sa kalibotan nakatabang sa uban nga mas mahiduol sa Dios?
Kanunay nga mangandam
Si Pedro misulat sa iyang epistola panahon sa grabeng panglutos ug apostasiya. Lisod kaniadto ang mahimong usa sa Kristiyano, sama nga kini mahimong lisod nga mahimong sumusunod ni Jesukristo karon. Hinoon, kita makatabang sa uban nga mobati sa kalipay sa pagsunod sa ebanghelyo kon kita andam nga mopakigbahin sa unsay atong nahibaloan ug gibati. Gamit ang mosunod nga duha ka mga pamahayag, susiha ang imong pagpangandam aron mapaambit ang imong hugot nga pagtuo ngadto sa uban. Gamita ang parehas nga sukdanan nga 1 hangtod 5.
1. Gusto nakong mopaambit sa akong hugot nga pagtuo kang Jesukristo ug pagpamatuod sa uban.
2. Masaligon ako sa akong abilidad sa pagpasabot sa akong hugot nga pagtuo ug pagtubag sa mga pangutana mahitungod sa ebanghelyo sa Manluluwas.
Basaha ang 1 Pedro 3:14–15 , nga mangita sa tambag ni Pedro sa pagpaambit sa atong hugot nga pagtuo ngadto sa uban.
Inay nga ipangutana ang sunod nga pangutana, ikonsiderar ang pagdapit sa mga estudyante sa paghanduraw kon unsang mubo nga mensahe ang ilang gamiton kon sila magmugna og usa ka meme o t-shirt base sa mensahe sa 1 Pedro 3:14–15 .
Unsaon nimo sa pagsuma ang mga pagtulun-an ni Pedro sa imong kaugalingong mga pulong?
Sa unsang paagi si Jesukristo ug ang Iyang ebanghelyo naghatag kanimo og paglaom?
Mahimong dapiton ang mga estudyante sa pagpaambit og mga kasinatian gikan sa pagpangandam sa estudyante nga kalihokan.
Sa unsang paagi nga ang pagkaandam ug buot nga makigsulti mahitungod sa Manluluwas ug sa Iyang ebanghelyo makapanalangin sa uban?
Usa ka epektibong paagi aron “mahimong andam kanunay” ( 1 Pedro 3:15) mao ang yanong pagbansay unsaon nimo pagtubag sa mga pangutana ug mga obserbasyon mahitungod sa imong batasan, mga tinuohan, o ang Simbahan mismo.
Alang sa mosunod nga kalihokan, mahimong maglista og pipila sa mosunod nga mga pangutana sa pisara o dasigon ang mga estudyante sa paghunahuna sa ubang mga pangutana nga lagmit nilang ipangutana. Mahimong bahinon ang mga estudyante nga magkapares ug dapiton sa pagpuli-puli sa pagtubag sa usag usa.
Mahimong ipaambit ang tambag ni Presidente Russel M. Nelson mahitungod sa epektibong pagtubag niini nga klase sa mga pangutana, nga anaa sa “Komentaryo ug Background nga Impormasyon” nga bahin sa dili pa sultihan ang mga estudyante sa pagdrama-drama.
Lakang 1: Pagpili og labing menos sa duha sa mosunod nga mga pangutana nga nakapaikag nimo o pagsulat og mga pangutana nga bag-ohay lang gipangutana sa imoha mahitungod sa imong pagtuo.
Ako nakadungog sa mga tawo nga miingon nga “si Jesus nagluwas.” Unsa ang kahulugan niana?
Ngano nga ang imong Simbahan supak sa pag-inom og kape ug tsa?
Nganong mobangon man ka og sayo aron moadto sa klase sa seminary?
Ngano nga si Jesukristo nagpakabana unsa nga matang sa pinulongan ang atong gigamit? Unsay kalainan ang mahimo niini?
Nganong kinahanglan man natong ibalaan ang Adlaw nga Igpapahulay? Dili ba ang Domingo sama ra sa lain nga adlaw?
Lakang 2: Ikonsiderar kon unsaon kaha nimo pagtubag sa imong napili nga mga pangutana, dayon pagmugna og usa ka tubag alang sa matag usa. Ilakip ang mga hunahuna kon sa unsang paagi nga ang imong hugot nga pagtuo ug paglaom kang Jesukristo nakaimpluwensiya sa imong tubag.
Lakang 3: Isulat nganong imong gibati nga importante ang pagkalahi gikan sa uban ug ang pag-istorya ngadto sa uban mahitungod sa imong hugot nga pagtuo kang Jesukristo. Kon ikaw mobati og walay kasegurohan, maampoong maghunahuna unsaon nimo pagpangandam sa imong kaugalingon sa pagbuhat sa ingon.
Kon ang mga estudyante mahuman na, pagdapit og pipila ka boluntaryo sa pagpakigbahin sa ilang mga hunahuna panahon sa kalihokan. Posibleng makaayo usab ang pagdapit og pipila ka andam nga mga estudyante aron mopaambit sa ilang pagpamatuod sa “paglaom nga anaa [kanila]” ( 1 Pedro 3:15) kabahin kang Jesukristo ug sa Iyang ebanghelyo. Taposa ang leksiyon pinaagi sa pagpamatuod sa mga kamatuoran nga inyong gihisgotan.
Komentaryo ug Background nga Impormasyon
1 Pedro 2:9 . Sa unsang paagi nga ang mga pagtulun-an ni Pedro mahimong may kalabotan sa mga miyembro sa Simbahan sa atong dispensasyon?
Si Sister Becky Craven sa kinatibuk-ang Kapangulohan sa Young Women mitudlo:
Imahe
Sister Rebecca L. Craven, second counselor, Young Women general presidency. Official Portrait as of October 2018.
Dili nato ipaubos ang atong mga sumbanan aron mahaom o aron maghimo sa uban nga komportable. Kita mga disipulo ni Jesukristo, ug tungod niana kita nalambigit sa pagpataas sa uban, ipasaka sila ngadto sa mas taas, mas balaan nga lugar diin sila usab makaani og mas dako nga mga panalangin. …
Sayon bang makita sa uban ang Iyang hitsura diha sa atong panagway ug mahibalo kinsa ang atong girepresentahan pinaagi sa atong mabinantayon nga panglihoklihok sa atong kinabuhi?
Isip mga katawhan sa pakigsaad, dili kita kinahanglan nga moduyog sa uban diha sa kalibotan. Gitawag kita og “usa ka katawhan nga iyang kaugalingon sa Dios” ( 1 Pedro 2:9)—usa ka dako nga pagdayeg! Samtang ang mga impluwensya sa kalibotan nag-anam og dawat sa dautang mga butang, kinahanglan kitang maningkamot sa tanan natong kakugi nga magpabiling lig-on diha sa dalan nga magdala nato nga luwas ngadto sa atong Manluluwas, padak-an ang gilay-on tali sa atong pagsunod sa pakigsaad ug sa kalibotanon nga mga impluwensiya.
(Becky Craven, “Mabinantayon batok Dili Kaayo Magtagad,” Liahona, Mayo 2019, 10)
Unsaon nako pagpangandam ug pagtubag sa epektibong paagi kon pangutan-on mahitungod sa akong mga tinuohan?
Si Presidente Russell M. Nelson mitudlo:
Imahe
Official portrait of President Russell M. Nelson taken January 2018
Isip mga sumusunod ni Jesukristo, matag usa kaninyo makapuyo pinasubay sa Iyang mga pagtulun-an. Makabaton kamo og “usa ka putli nga kasingkasing ug limpyo nga mga kamot;” makabaton kamo sa “hitsura sa Dios nga gikulit sa inyong [panagway].” Ang inyong maayong binuhatan makita sa uban. Ang kahayag sa Ginoo mahimong modan-ag gikan sa inyong mga mata. Uban niana nga kahayag, makapangandam kamo sa pagtubag sa mga pangutana. Si Apostol Pedro mitambag, “Kinahanglan nga andam kamo kanunay sa pagtubag kang bisan kinsa nga mangutana sa hinungdan sa paglaom nga anaa kaninyo.” ( 1 Pedro 3:15).
Himoa nga ang inyong tubag mainiton ug puno sa kalipay. Ug himoa nga ang inyong tubag may kapuslanan ngadto niana nga indibidwal. Hinumdomi, siya anak usab sa Dios, niana gayod nga Dios kinsa sa dakong pagmahal gusto gayod niana nga tawo nga makasarang alang sa kinabuhing dayon ug makabalik ngadto Kaniya usa ka adlaw niana. Basin kamo gayod ang moabli sa pultahan sa kaluwasan nianang tawhana ug sa ilang panabot sa doktrina ni Kristo.
(Russell M. Nelson, “Pagpakabuhi ingon nga Panig-ingnan sa mga Magtutuo,,” Liahona, Nob. 2010, 48)
Mahimong magpakita sa mga estudyante og pipila ka gagmayng mga bato. Pangutan-a ang mga estudyante kon sa unsang paagi nga ang mga bato adunay kalabotan sa kon unsa ang gitudlo ni Pedro sa 1 Pedro 2:5–8 . Dapita sila sa pag-ila kinsa ang ilang gihunahuna nga “ulohang bato sa pamag-ang” (tan-awa ang Mga Taga-Efeso 2:19–20) ug sa lainlaing mga paagi nga ilang marepresentar Siya ngadto sa kalibotan isip “mga buhi nga bato” ( 1 Pedro 2:5). Timan-i nga ang pulong nga buhi nagkahulugan nga madasigon o lagsik. Ang mga estudyante mahimong pangutan-on usab nganong imporante man ang pagtukod sa ilang kinabuhi ngadto sa Manluluwas sa ilang pagtinguha nga “[mahimong] andam kanunay” ( 1 Pedro 3:15) sa pagpaambit sa ebanghelyo ngadto sa uban.