Doktrinal nga Kahanas: 1 Pedro 4:6

“Ang Maayong Balita [Gi]wali Hangtod ngadto sa mga Patay”

Sa imong pagtuon sa 1 Pedro 4, imong nakat-onan nga ang Manluluwas nitukod og misyonaryong buhat didto sa kalibotan sa mga espiritu aron ang tanan nga mga anak sa Langitnong Amahan makabaton og kahigayonan sa pagdawat sa kaluwasan. Kini nga leksiyon makatabang kanimo sa pagsag-ulo sa pakisayran sa doktrinal nga kahanas ug sa mahinungdanong hugpong sa pulong sa kasulatan alang sa 1 Pedro 4:6. Mahimo usab kining makatabang kanimo nga mapasabot ang doktrina nga gitudlo niana nga tudling. Dayon makabaton ka og kahigayonan sa paggamit niana nga doktrina ug sa mga baroganan sa pag-angkon og espirituhanong kahibalo ngadto sa usa ka tinuod nga senaryo.

Pagtudlo sa mga estudyante sa mga baroganan sa pag-angkon og espirituhanong kahibalo. Ang doktrinal nga kahanas mamahimong mas epektibo kon ang mga estudyante nahibalo ug nakasabot sa mga baroganan sa pag-angkon og espirituhanong kahibalo. Tabangi ang mga estudyante nga makasabot ug sa makanunayon magrebyo niini nga mga baroganan.

Pagpangandam sa estudyante: Dapita ang mga estudyante sa pagpamalandong ug pag-andam sa pagpaambit unsa ang ilang nabati samtang sila nagbuhat sa mga pagbunyag ug mga pagkompirma diha sa templo o pagbuhat sa ubang mga buhat sa family history alang sa ilang namatay nga mga katigulangan.

Posible nga mga Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas aron itudlo pagkahuman sa leksiyon sa “1 Pedro 3:18–22; 4:1–6,” nga mao ang pangkontekstong leksiyon para sa tudling sa doktrinal nga kahanas sa 1 Pedro 4:6. Kon kinahanglang ibalhin kini nga leksiyon sa tudling sa doktrinal nga kahanas ngadto sa laing semana, siguroha nga itudlo usab ang tukma nga pangkontekstong leksiyon nianang semanaha.

Imemorya ug ipasabot

Pagdapit og usa ka estudyante sa pagdrowing sa pisara og usa ka yanong dayagram sa plano sa kaluwasan. Dayon ipangutana ang pipila sa mosunod nga mga pangutana aron matimbang-timbang ang pagsabot sa estudyante sa plano ug giunsa pagtudlo ang ebanghelyo. Aron maapil ang mga estudyante nga dili kaayo muboluntaryo sa pagsulti, ang mosunod nga mga pangutana mahimong ihatag isip usa ka pasulit ug dayon hisgotan isip usa ka klase.

• Ang tanang mga anak sa Dios gitudloan sa ebanghelyo sa premortal nga kinabuhi. Unsa ang nahitabo sa kadtong mga midawat sa ebanghelyo pinaagi sa pagpili sa plano sa Dios? Unsay nahitabo niadtong kinsa misalikway niiini?

• Sa unsang paagi nga ang ebanghelyo gitudlo dinhi sa kalibotan?

Gamita ang mosunod nga duha ka mga pangutana aron matabangan ang mga estudyante nga maila ang pakisayran sa tudling sa doktrinal nga kahanas ug ang mahinungdanong hugpong sa pulong kasulatan.

• Unsa ang mahitabo sa kadtong walay kahigayon sa pagkat-on bahin kang Jesukristo o sa wala nakadawat sa awtorisadong mga ordinansa sa pagkapari niini nga kinabuhi?

• Asa man kita mahimong makabasa mahitungod niini diha sa Bag-ong Tugon?

Ikonsiderar ang paggamit sa mosunod nga pagsag-ulo nga kalihokan:

Hatagi ang matag estudyante og usa ka piraso sa papel, ug dapita ang mga estudyante sa pagsulat sa tibuok nga pakisayran ug sa mahinungdanong hugpong sa pulong kasulatan pababagsa ibabaw sa papel: “ 1 Pedro 4:6 : ‘Ang maayong balita [gi]wali hangtod ngadto sa mga patay.’” Sultihi sila sa pagpilo sa ibabaw nga bahin sa papel aron matabonan ang ilang gisulat ug dayon sa pagsulat usab sa pakisayran ug hugpong sa pulong, nga tangtangon ang tulo hangtod sa upat ka mga pulong ug mga numero nga ilang napili. Sultihi ang mga estudyante sa pagbinayloay sa ilang mga papel sa ubang tawo nga duol kanila.

Hangyoa ang mga estudyante sa pag-ila sa gitangtang nga pulong ug mga numero sa ilang bag-ong papel. Dayon sultihi sila nga pil-on ang papel aron matabonan ang ilang gisulat og isulat og usab ang pakisayran ug hugpong sa pulong, niining higayona tangtangon ang unom hangtod sa walo ka mga pulong o mga numero. Sultihi sila sa pagpasa sa papel balik ngadto sa tinuod nga tag-iya ug dayon ilhon ang nawala nga mga pulong sa ilang orihinal nga papel, pil-a ang papel sa kataposang higayon, ug isulat ang kompletong pakisayaran ug hugpong sa pulong gikan sa memorya.

Bansaya ang paggamit

Sa miagi nga leksiyon, imong nakat-onan ang mosunod nga kamatuoran gikan 1 Pedro 4:6 : Ang ebanghelyo gisangyaw ngadto sa mga patay aron nga sila maadunay susamang kahigayonan ingon sa kadtong mga nakadungog sa ebanghelyo sa mortalidad.

Gamita ang mosunod nga senaryo aron sa pagbansay sa paggamit niini nga kamatuoran ug sa baroganan sa pag-angkon og espirituhanong kahibalo.

Senaryo: Bahin 1

Handurawa nga ikaw adunay higala nga ginganlag Jason kinsa nakigkita sa mga misyonaryo. Mihangyo si Jason nga mouban nimo sa seminary aron makat-on pa og dugang mahitungod sa ebanghelyo. Sa iyang unang adlaw sa seminary, ang imong magtutudlo nagsulti sa klase sa pagrebyo kauban sa usa ka pares sa mga baroganan sa pag-angkon og espirituhanong kahibalo. Milingi si Jason nimo ug nangutana, “Unsa ang mga baroganan sa pag-angkon og espirituhanong kahibalo?”

• Unsaon nimo pagpaila sa mga baroganan sa pag-angkon og espirituhanong kahibalo kang Jason? (Mahimong rebyohon ang mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022) kon nagkinahanglan ka og tabang sa pagtubag niini nga pangutana.)

Senaryo: Bahin 2

Sa ulahi nianang semanaha, si Jason ug ang mga misyonaryo nagkita diha sa inyong panimalay. Imong gitabangan ang mga misyonaryo sa pagtudlo mahitungod sa unang mga baroganan ug mga ordinansa sa ebanghelyo, lakip ang hugot nga pagtuo kang Jesukristo ug pagbunyag pinaagi sa pagpaunlod alang sa kapasayloan sa mga sala. Ang mga misyonaryo migamit sa Juan 3:5 aron sa pagtudlo nga ang pagbunyag pinaagi sa insaktong awtoridad sa pagkapari mao ang gikinahanglan aron maluwas sa gingharian sa langit. Naghunahuna si Jason mahitungod niana sa makadiyot, dayon murag naguol tan-awon. Usa sa mga misyonaryo nangutana nganong naguol siya, ug si Jason mitubag, “Ang akong lolo wala mabunyagi, apan siya maayo kaayo nga tawo kinsa kanunay nga nag-ingon nga gusto niyang magpuyo og maayong kinabuhi aron siya makaadto sa langit. Makaadto ba siya?” Nag-ampo ka sa hilom, nangayo sa Langitnong Amahan unsaon nimo pagtabang kang Jason. Ang ideya sa paggamit sa mga baroganan sa pag-angkon sa espirituhanong kahibalo ug ang doktrina nga gitudlo diha sa 1 Pedro 4:6 miabot sa imong hunahuna.

Depende sa gidak-on sa klase ug sa oras, ang mga estudyante mahimong mogamit sa ilang mga tubag sa pagdrama sa pagtudlo kang Jason. Isip alternatibo, ang mga estudyante mahimong hatagan og usa sa mga baroganan sa pag-angkon sa espirituhanong kahibalo ug dayon hisgotan kauban sa pares o diha sa usa ka gamay nga grupo kon sa unsang paagi nga ang maong baroganan mahimong makatabang ni Jason. Kon sila mahuman na sa paghisgot, mahimo silang moreport sa klase o ibutang sa mga grupo nga tigtulo aron mapaambit ang ilang mga hunahuna ngadto sa mga klasmeyt nga mituon sa lain pang duha ka mga baroganan.

I-outline unsaon nimo paggamit ang tulo ka mga baroganan sa pag-angkon og espirituhanong kahibalo ug ang doktrina nga gitudlo sa 1 Pedro 4:6 aron matabangan si Jason nga makakita og mga tubag sa iyang pangutana ug mobati og kalinaw mahitungod sa iyang lolo. Human sa pag-outline, pag-andam og usa ka tubag alang kang Jason. Paghunahuna kon unsang mga pangutana ang imong ipangutana aron matabangan siya nga madiskobre ug mabati ang kamatuoran sa doktrina. Seguroha nga malakip ang tanang tulo ka mga baroganan sa pag-angkon og espirituhanong kahibalo ug ang doktrina nga gitudlo sa 1 Pedro 4:6 diha sa imong tubag.

Kon gikinahanglan, mahimo kang mogamit og pipila o tanan sa mosunod nga mga pangutana aron sa paggiya kanimo.

• Sa unsang paagi ka makatabang kang Jason aron siya makaangkon og usa ka mahangtoron nga panglantaw? Unsa ang imong isulti kang Jason mahitungod sa Langitnong Amahan ug kang Jesukristo nga mahimong makahatag kaniya og kalinaw mahitungod sa iyang lolo?

• Dugang pa sa 1 Pedro 4:6 , unsa ang pipila sa lain pang balaanong gitudlo nga mga tinubdan ang lagmit imong mapaambit kang Jason aron matabangan siya nga mobati og paglaom pinaagi kang Jesukristo? Sa unsang paagi nimo gamiton kini nga mga tudling aron sa pagtabang kang Jason nga madiskobre ang kamatuoran?

• Unsa kaha ang hitsura sa paglihok sa hugot nga pagtuo sa sitwasyon ni Jason? Unsa ang imong idapit kaniya nga iyang buhaton?

• Unsa nga mga kasinatian nimo sa pagbuhat sa templo o family history alang sa imong mga katigulangan ang mahimo nimong mapaambit kang Jason?

• Unsa ang imong ipamatuod nga makatabang sa imong higala?

Rebyo sa doktrinal nga kahanas

Tabangi ang mga estudyante sa pagrebyo sa pakisayran ug sa mahinungdanong hugpong sa pulong sa kasulatan alang sa 1 Pedro 4:6 sa umaabot nga leksiyon. Ang mosunod mao ang usa ka paagi aron mabuhat kini:

Isulat ang mga karakter nga 1, P, 4:6, A, M, B, [G], U, N, K, N, M, P diha sa usa ka kolum sa pisara. Dapita ang mga estudyante sa pag-ila sa mga pulong sa pakisayran sa doktrinal nga kahanas ug sa mahinungdanong hugpong sa pulong sa kasulatan gikan niining unang mga letra. Kon ang tanang mga pulong nailhan na, litoka pagdungan ang pakisayran ug mahinungdanong hugpong sa pulong isip usa ka klase.