1–2 Pedro

Kinatibuk-ang Pagpasabot

Sa iyang unang epistola, si Pedro, kinsa mao ang pangulong Apostol, nagpokus sa mga paagi nga makapalig-on sa mga Santos diha sa grabe nga mga pagsulay nga ilang nasinati sa mga kamot sa mga Romano. Iyang gidasig ang mga Santos nga kanunayng mag-andam sa pagpamatuod sa kamatuoran ug mipahinumdom kanila sa ilang balaan nga kagikan (tan-awa ang 1 Pedro 2:9; 3:15). Iyang gitudlo nga si Jesukristo misangyaw sa ebanghelyo didto sa kalibotan sa mga espiritu human sa Iyang kamatayon, nga naghimosa mga panalangin sa ebanghelyo nga magamit sa tanang mga anak sa Langitnong Amahan.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.

1 Pedro 1–5

Katuyoan sa leksiyon: Kini nga leksiyon makatabang sa mga estudyante nga mas makasabot sa mga katuyoan sa Dios sa pagtugot kanila nga makasinati og mga pagsulay ug makapalig-on sa ilang determinasyon aron makalahutay sa mga pagsulay nga matinud-anon.

Pagpangandam sa estudyante: Dapita ang mga estudyante sa pagkonsiderar unsaon nila pagtubag ang mosunod nga pangutana: Nganong makasinati man kita og mga pagsulay, mga kalisod, ug pagkadili makiangayon sa kinabuhi?

Hulagway: Usa ka hulagway sa usa ka tunawan

Sugyot sa pagtudlo pinaagi sa videoconference: Human mapakita ang usa ka litrato sa usa ka tunawan, dapita ang kada estudyante sa pagdrowing og usa ka tunawan ug pagsulat og usa ka personal nga pagsulay sulod niini. Ang mga estudyante mahimo dayon magsulat sa likod sa papel kon sa unsang paagi nga ang ilang personal nga pagsulay nagsulay ug naglig-on sa ilang hugot nga pagtuo kang Jesukristo. Pagdapit og mga estudyante nga buot nga mogunit sa ilang litrato ngadto sa kamera ug mopaambit sa ilang mga hunahuna diha sa klase. Seguroha nga pasidan-an ang mga estudyante nga dili mopaambit og bisan unsa nga personal na kaayo.

1 Pedro 2–3

Katuyoan sa leksiyon: Kini nga leksiyon makatabang sa mga estudyante nga makasabot sa importansiya sa pagkamatinud-anong ehemplo ni Jesukristo ug maghatag og mga kahigayonan sa pagbansay sa pagtubag ngadto sa uban mahitungod sa ilang hugot nga pagtuo.

Pagpangandam sa estudyante: Dapita ang mga estudyante sa paghisgot kauban sa ilang pamilya sa mga higayon diin sila o ilang kaila gisultihan sa pagpasabot sa ilang mga tinuohan ug hugot nga pagtuo kang Jesukristo. Dapita sila sa pagkonsiderar kon ila ba kaha untang tubagon sa lahi nga paagi ug motambong nga andam sa pagpaambit sa ilang mga hunahuna.

Sugyot sa pagtudlo pinaagi sa videoconference: Bahina ang mga pangutana sa kataposan sa leksiyon ngadto sa mga estudyante, o dapita sila sa paghunahuna og usa ka pangutana nga gipangutana ngadto kanila mahitungod sa Simbahan o sa ilang hugot nga pagtuo. Hatagi sila og panahon sa paghunahuna kon unsaon nila pagtubag, ug dayon tugotan sila sa pagpuli-puli sa pagpaambit og mga tubag. Kon ang mga estudyante gikulbaan mahitungod sa pagsulti sa atubangan sa kamera, mahimo silang magsumiter sa ilang mga tubag gamit ang chat nga feature.

1 Pedro 3:18–22; 4:1–6

Katuyoan sa leksiyon: Kini nga leksiyon makatabang sa mga estudyante sa pagsuhid og mga paagi sa pagtabang sa Manluluwas sa Iyang buhat sa pagtubos sa mga patay.

Pagpangandam sa estudyante: Aron magamit ang pihong mga feature sa FamilySearch.org o sa FamilySearch Family Tree app, ang mga estudyante gikinahanglang molog in sa ilang Account sa Simbahan gamit ang username ug password nga konektado sa ilang numero nga rekord sa pagkamiyembro [membership record number]. Kon ang mga estudyante wala o wala nasayod sa ilang username ug password, dapita sila sa pagmugna o pagrekober niini diha sa account.ChurchofJesusChrist.org o sa paghimo og account diha sa FamilySearch.org. Pangayo og tabang sa usa ka ward o branch nga espesyalista sa family history o sa koordinitor sa Seminaries and Institutes of Religion kon gikinahanglan.

Mga Kapanguhaan: Usa ka kompyuter o mobile device nga adunay internet access aron ang mga estudyante nga walay elektroniko nga mga himan [device] mahimong makagahin sa ubang panahon sa klase sa pagsiksik diha sa FamilySearch.org o sa FamilySearch Tree app, kon mahimo

Sugyot sa pagtudlo pinaagi sa videoconference: Kon ang mga estudyante mahimong mogamit sa Mga Ordinansa nga Andam na nga feature sa FamilySearch.org, dapita sila sa paggamit niini aron makakita og usa ka paryente nga mahimo nilang buhatan og buhat sa templo. Ikonsiderar ang posibilidad sa pagtakda og petsa kon kanus-a ang klase magkita sa dili pormal nga paagi ngadto sa templo aron makabuhat sa proxy nga mga pagbunyag ug mga pagkompirma alang sa mga tawo kinsang mga ngalan napalgan.

Doktrinal nga Kahanas: 1 Pedro 4:6

Katuyoan sa leksiyon: Kini nga leksiyon makatabang sa mga estudyante sa pagsag-ulo sa pakisayran sa doktrinal nga kahanas ug sa mahinungdanong hugpong sa pulong sa kasulatan alang sa 1 Pedro 4:6. Kini makahatag usab nila og kahigayonan sa paggamit sa doktrina nga gitudlo niana nga tudling ug sa mga baroganan sa pag-angkon og espirituhanong kahibalo ngadto sa usa ka tinud-anay nga senaryo.

Pagpangandam sa estudyante: Dapita ang mga estudyante sa pagpamalandong ug pag-andam sa pagpaambit unsa ang ilang nabati samtang sila nagbuhat sa mga pagbunyag ug mga pagkompirma diha sa templo o pagbuhat sa ubang mga buhat sa family history alang sa ilang namatay nga mga katigulangan.

Mga Materyal: Usa ka piraso sa papel ug usa ka panulat nga himan alang sa matag estudyante

Sugyot sa pagtudlo pinaagi sa videoconference: Ang mga estudyante mahimong hatagan og usa sa mga baroganan sa pag-angkon og espirituhanong kahibalo ug maghimo nga magkapares o sa gagmayng mga grupo diha sa mga breakout room aron hisgotan unsaon nila paggamit ang maong baroganan sa pagtabang kang Jason. Kon mahuman na sila sa paghisgot sa ilang baroganan, mahimo silang moreport sa klase.

2 Pedro 1

Katuyoan sa leksiyon: Kini nga leksiyon gituyo aron matabangan ang mga estudyante sa pagbuhat og mga lakang aron mahimong mas sama kang Jesukristo.

Pagpangandam sa estudyante: Dapita ang mga estudyante sa pagkonsiderar kon hain nga hiyas ang ilang labing gidayeg mahitungod kang Jesukristo ug ngano.

Bidyo: “Pagkahimong sama Kaniya” (10:21; tan-awa gikan sa time code 2:34 to 3:09)

Drowing nga linya: Usa ka dayagram sa usa ka bukid nga masulatan og mga pulong o sa tibuok panahon sa leksiyon

Sugyot sa pagtudlo pinaagi sa videoconference: Ikonsiderar ang paggamit og whiteboard nga feature sa pagmugna og bukid nga dayagram ug sa paglista og Kristohanong mga hiyas isip usa ka klase. Ang mga estudyante mahimong dapiton sa pagmugna og ilang kaugalingong dayagram ug lista diha sa ilang journal sa pagtuon, ug pipila ka mga estudyante ang mahimong dapiton sa pagpakita sa ilang gibuhat. Ang labing makatabang nga panahon sa pagdapit og pagpaambit tingali diha sa higayon nga hangyoon ang mga estudyante sa pagpasabot giunsa nila pagrepresentar ang konsepto sa kakugi sa ilang dayagram.