ថែស្សាឡូនីចទី១ ៤–៥

ពេលវេលាដែលព្រះគ្រីស្ទនឹងយាងមកផែនដីវិញ ។

តើមានសំណួរ ឬគំនិតអ្វីខ្លះចូលមកក្នុងចិត្តរបស់អ្នក ពេលអ្នកគិតអំពីការយាងមកជាលើកទីពីររបស់ព្រះយេស៊ូវគ្រីស្ទ ? នៅក្នុងសំបុត្រទីមួយរបស់លោកទៅកាន់ក្រុងថែស្សាឡូនីច ជំពូកទី ៤–៥ សាវកប៉ុលបានបង្រៀនព័ត៌មានលម្អិតសំខាន់ៗអំពីការយាងមកជាលើកទីពីររបស់ព្រះអង្គសង្គ្រោះ និងរបៀបដែលយើងអាចរៀបចំសម្រាប់ការយាងមកជាលើកទីពីរនេះ ។ មេរៀននេះមានគោលបំណងជួយអ្នកឲ្យយល់អំពីអ្វីដែលនឹងកើតឡើង និងរបៀបដែលអ្នកអាចរៀបចំសម្រាប់ពេលវេលាដែលព្រះយេស៊ូវគ្រីស្ទយាងត្រលប់មកផែនដីវិញ ។

ការរៀបចំសិស្ស ៖សូមឲ្យសិស្សស្រមៃមើលថា តើវានឹងទៅជាយ៉ាងណា នៅពេលព្រះអង្គសង្គ្រោះយាងមកម្ដងទៀត ។ សូមអញ្ជើញពួកគេឲ្យឆ្លើយសំណួរខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ឬនៅលើក្រដាសមួយសន្លឹក ៖ តើការយាងមកជាលើកទីពីរធ្វើឲ្យអ្នករំភើបចិត្តដោយរបៀបណា ? តើអ្វីធ្វើឲ្យអ្នកភ័យខ្លាច ?

សកម្មភាពរៀនសូត្រដែលអាចមាន

សំណួរនានាអំពីការយាងមកជាលើកទីពីររបស់ព្រះយេស៊ូវគ្រីស្ទ

សូមបង្ហាញរូបភាពដែលពណ៌នាអំពីការយាងមកជាលើកទីពីររបស់ព្រះយេស៊ូវគ្រីស្ទ ដូចជារូបភាពនៅខាងដើមនៃមេរៀននេះ ។ សិស្សអាចត្រូវបានរំឭកអំពីសកម្មភាពរៀបចំសិស្សរបស់ពួកគេអំឡុងពេលដែលសំណួរខាងក្រោមត្រូវបានពិភាក្សា ។

• តើមានរឿងអ្វីខ្លះ ដែលអ្នកដឹងថានឹងកើតឡើង អំពីការយាងមកជាលើកទីពីររបស់ព្រះយេស៊ូវគ្រីស្ទ ?

• តើមានរឿងអ្វីខ្លះ ដែលអ្នកមិនដឹង ?

ផ្នែកនៃមេរៀននេះមិនមានបំណងគ្របដណ្តប់អ្វីគ្រប់យ៉ាងដែលសិស្សដឹង ឬឆ្លើយសំណួរទាំងអស់ដែលពួកគេមានអំពីការយាងមកជាលើកទីពីរនោះទេ ។ ផ្ទុយទៅវិញ វាគឺជាការជួយពួកគេឲ្យទំនាក់ទំនងទៅនឹងពួកបរិសុទ្ធក្រុងថែស្សាឡូនីច ដែលបានយល់អំពីរឿងមួយចំនួន ប៉ុន្តែមានសំណួរអំពីអ្នកដទៃ ។

ពួកបរិសុទ្ធក្រុងថែស្សាឡូនីចក៏មានសំណួរអំពីការយាងមកជាលើកទីពីររបស់ព្រះអង្គសង្គ្រោះដែរ ។ ដោយផ្អែកលើការបង្រៀនរបស់ប៉ុលនៅក្នុងជំពូកទាំងនេះ ពួកគេអាចនឹងសួរសំណួរដូចជា « តើនៅពេលណាដែលមនុស្សជាទីស្រឡាញ់របស់យើងដែលបានស្លាប់នឹងរស់ឡើងវិញ ? » ឬ « តើការយាងមកជាលើកទីពីររបស់ព្រះយេស៊ូវគ្រីស្ទនឹងកើតឡើងនៅពេលណា ?ឬ « តើយើងអាចរៀបចំខ្លួនសម្រាប់ការយាងមកជាលើកទីពីររបស់ព្រះយេស៊ូវគ្រីស្ទដោយរបៀបណា ? អ្នកប្រហែលជាធ្លាប់មានសំណួរស្រដៀងគ្នានេះដែរ ។ សកម្មភាពសិក្សាខាងក្រោមដោះស្រាយសំណួរទាំងនេះ ។

សកម្មភាពសិក្សាខាងក្រោមមានគោលបំណងជួយសិស្សឲ្យសិក្សា និងពន្យល់ពីការបង្រៀនរបស់ប៉ុលទៅកាន់ពួកថែស្សាឡូនីច អំពីការយាងមកជាលើកទីពីរ ។

របៀបមួយដើម្បីសម្រេចបំណងនេះគឺការបែងចែកថ្នាក់ជាគូ ឬក្រុមតូចៗ ហើយផ្តល់ឲ្យក្រុមនីមួយៗនូវសំណៅចែកមួយក្នុងចំណោមសំណៅចែកខាងក្រោមដើម្បីសិក្សា និងពិភាក្សាជាមួយគ្នា ។ បន្ទាប់មក បុគ្គលម្នាក់មកពីក្រុមនីមួយៗត្រូវបានស្នើសុំឲ្យចែកចាយជាមួយថ្នាក់នូវការសង្ខេបខ្លីៗអំពីអ្វីដែលក្រុមបានរៀនពីការសិក្សារបស់ពួកគេ ។

ម៉្យាងទៀត អាចចាត់តាំងសិស្សជាក្រុមដែលមានគ្នាបីនាក់ដោយបានចាត់តាំងឲ្យសិស្សម្នាក់ៗនូវសំណៅចែកផ្សេងៗគ្នា ដើម្បីបំពេញជាលក្ខណៈបុគ្គល ។ បន្ទាប់មក សិស្សម្នាក់ៗក្នុងក្រុមអាចសង្ខេបអំពីអ្វីដែលពួកគេបានរៀនសម្រាប់សមាជិកផ្សេងទៀតនៃក្រុមរបស់ពួកគេ ។

សិស្សអាចប្រើផ្នែកខាងក្រោយនៃក្រដាសដើម្បីកត់ត្រាការឆ្លើយតបរបស់ពួកគេ ។

សកម្មភាពសិក្សាទី ១ ៖ តើនឹងមានអ្វីកើតឡើងចំពោះមនុស្សរស់ និងមនុស្សស្លាប់នៅឯការយាងមកជាលើកទីពីររបស់ព្រះយេស៊ូវគ្រីស្ទ ?

សូមអាន ថែស្សាឡូនីចទី១ ៤:១៣–១៨ ដោយស្វែងរកការយល់ដឹងអំពីអ្វីដែលនឹងកើតឡើងចំពោះមនុស្សសុចរិត នៅពេលព្រះយេស៊ូវយាងមកម្តងទៀត ។ ចូរកំណត់ចំណាំពីភាពខុសគ្នារវាងអ្វីដែលនឹងកើតឡើងចំពោះអស់អ្នកដែលបានស្លាប់ និងអ្នកដែលនៅរស់ នៅឯការយាងមកជាលើកទីពីរ ។ ( ពាក្យ « ដេកលក់ » និង « ដេក » នៅក្នុងខគម្ពីរទាំងនេះសំដៅទៅលើអ្នកដែលបានស្លាប់ ) ។ វាអាចនឹងមានប្រយោជន៍ក្នុងការអានការបកប្រែរបស់យ៉ូសែប ស្ម៊ីធ នៃ ថែស្សាឡូនីចទី១ ៤:១៥, ១៧ ។ ( នៅក្នុងខ១៥, លេខយោង ក, និង ខ ១៧, លេខយោង ក ) ។

• តើនៅក្នុងខគម្ពីរទាំងនេះមានអ្វីដែលសំខាន់ចំពោះអ្នក ?

បន្ទាប់មក សូមអាន គោលលទ្ធិ និង សេចក្តីសញ្ញា ៨៨:៩៦–៩៨ ដោយស្វែងរកការយល់ដឹងបន្ថែមអំពីព្រឹត្តិការណ៍ទាំងនេះ ។ ( អ្នកក៏ប្រហែលជាចង់អាន ខទី ៩៩–១០១ ដើម្បីរៀនអំពីអ្វីដែលនឹងកើតឡើងចំពោះអស់អ្នកដែលមិនទទួលយកព្រះយេស៊ូវគ្រីស្ទនៅក្នុងជីវិតនេះទេ ) ។

• តើបងប្អូនបានទទួលការយល់ដឹងបន្ថែមទៀតអ្វីខ្លះ ?

សេចក្តីពិតមួយដែលអ្នកអាចរកឃើញនោះគឺ ពួកបរិសុទ្ធដ៏ស្មោះត្រង់ដែលបានស្លាប់មុនការយាងមកជាលើកទីពីរនឹងបានរស់ឡើងវិញនៅពេលដែលព្រះគ្រីស្ទយាងមកម្តងទៀត ។

ពាក្យ « បានជួបជុំ » ( ថែស្សាឡូនីច ទី១ ៤:១៧ ) សំដៅលើមនុស្សសុចរិតដែលរួមគ្នាដើម្បីទៅជួបព្រះអង្គសង្គ្រោះនៅពេលទ្រង់យាងមក ។ ពួកគ្រីស្ទានជាច្រើនប្រើពាក្យ អណ្ដែតឡើង ( មកពីពាក្យឡាតាំងមានន័យថា « បានជួបជុំ » ) នៅពេលសំដៅទៅលើពេលវេលានេះ ។

អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានចែកចាយដូចខាងក្រោមអំពីព្រឹត្តិការណ៍ដ៏ពិសិដ្ឋនេះ ៖

គ្មានអ្វីដែលជំរុញបំណងខ្ញុំក្នុងការនិយាយអំពីព្រះគ្រីស្ទ ច្រើនជាងការស្រមៃគិតអំពីការយាងត្រឡប់មកវិញរបស់ទ្រង់នោះឡើយ ។ ខណៈដែលយើងមិនដឹងថាទ្រង់នឹងយាងមកនៅពេលណា តែព្រឹត្តិការណ៍នៃការយាងត្រឡប់របស់ទ្រង់នឹងមានភាពអស្ចារ្យ ! ទ្រង់នឹងយាងមកលើពពកនៅលើមេឃដ៏មហស្ចារ្យ និងសិរីរុងរឿងជាមួយពួកទេវតាបរិសុទ្ធរបស់ទ្រង់ទាំងអស់ ។ មិនត្រឹមតែទេវតាពីរបីអង្គប៉ុណ្ណោះទេ ប៉ុន្តែជាទេវតាបរិសុទ្ធរបស់ទ្រង់ ទាំងអស់ ។ គ្មានរូបចេរូប៊ីនពណ៌ក្រហមដែលគូរដោយវិចិត្រកររ៉ាហ្វ៊ែល ដែលយើងទាំងអស់គ្នាបានឃើញនៅលើកាតនៃក្តីស្រឡាញ់របស់យើងនោះទេ ។ ទាំងនេះគឺជាពួកទេវតានៃសតវត្សរ៍ជាពួកទេវតាដែលបានបញ្ជូនឲ្យមកបិទមាត់សិង្ហទាំងអស់ បើកទ្វារគុក ដើម្បីប្រកាសកំណើតដែលរង់ចាំជាយូរមក ដើម្បីលួងលោមទ្រង់នៅសួនច្បារគែតសេម៉ានីដើម្បីធានាដល់ពួកសិស្សនៅការយាងឡើងរបស់ទ្រង់ និងដើម្បីបើកការស្តារឡើងវិញនៃដំណឹងល្អ ។

តើបងប្អូនអាចស្រម៉ៃថាត្រូវបានទៅជួបទ្រង់ មិនថានៅខាងនេះឬខាងនោះទៀតនៃវាំងននដែរឬទេ ? នេះជាការសន្យារបស់ទ្រង់ចំពោះពួកសុចរិត ។ បទពិសោធន៍ដ៏អស្ចារ្យនេះគូសសម្គាល់ដល់ព្រលឹងយើងជារៀងរហូត ។

( នែល អិល អាន់ឌើរសិន « We Talk of Christ » Ensign ឬ Liahona ខែ វិច្ឆិកា ឆ្នាំ ២០២០ ទំព័រ ៩១ ) ។

សូមចំណាយពេលខ្លះដើម្បី ស្រមៃមើលថា តើវាមានសភាពបែបណាក្នុងការរាប់ចូលក្នុងចំណោមមនុស្សសុចរិតនៅពេល ព្រះអង្គ សង្គ្រោះយាងមក ។

• តើអ្នកអាចមានគំនិត ឬអារម្មណ៍បែបណានៅថ្ងៃនោះ ? តើអ្នកមានអារម្មណ៍យ៉ាងណាដែលដឹងថា ព្រះអង្គសង្គ្រោះចង់ឲ្យអ្នកចូលរួមជាមួយទ្រង់ នៅពេលទ្រង់យាងមក ? តើការស្រមៃឃើញពីថ្ងៃអនាគតនោះវាមានឥទ្ធិពលយ៉ាងណាចំពោះអ្នកនៅថ្ងៃនេះ ?

នៅក្នុង ថែស្សាឡូនីច ទី១ ៤:១៨ ប៉ុលបានលើកទឹកចិត្តពួកបរិសុទ្ធឲ្យ « ចូរកំសាន្តចិត្តគ្នាទៅវិញទៅមក ដោយដំណើរនេះចុះ » ។

• តើការបង្រៀនរបស់ប៉ុលផ្ដល់ការកំសាន្តចិត្តដល់អ្នកយ៉ាងដូចម្ដេច ? តើពួកគេអាចផ្ដល់ការកំសាន្តចិត្តក្នុងកាលៈទេសៈដែលអ្នកអាចប្រឈមមុខនាពេលអនាគតដោយរបៀបណា ?

សកម្មភាពសិក្សាទី ២ ៖ តើការយាងមកជាលើកទីពីររបស់ព្រះយេស៊ូវគ្រីស្ទនឹងកើតឡើងនៅពេលណា ?

តើអ្នកធ្លាប់ឆ្ងល់ទេថា តើពេលណាដែលការយាងមកជាលើកទីពីររបស់ព្រះយេស៊ូវគ្រីស្ទនឹងកើតឡើង ឬតើអ្នកនឹងត្រូវរៀបចំខ្លួនរួចរាល់ដែរឬទេ ? ពួកបរិសុទ្ធនៅថែស្សាឡូនីច ទំនងជាមានសំណួរដូចគ្នានេះដែរ ។

សូមអាន ថែស្សាឡូនីច ទី១ ៥:១–៣ ហើយរកមើលពាក្យប្រៀបធៀបដែលប៉ុលបានប្រើដើម្បីពិពណ៌នាអំពីពេលវេលាដែលព្រះយេស៊ូវនឹងយាងមកផែនដីវិញ ។

• តើអ្នកបានរកឃើញអ្វីខ្លះ ?

• តើពាក្យប្រៀបធៀបរបស់ប៉ុលអំពីចោរនៅពេលយប់ និងស្ត្រីដែលមានផ្ទៃពោះបង្រៀនអ្នកអ្វីខ្លះអំពីការយាងមកជាលើកទីពីររបស់ព្រះអង្គសង្គ្រោះ ?

សូមអាន ថែស្សាឡូនីច ទី១ ៥:៤–៦ ហើយរកមើល សេចក្ដីពិតដែលប៉ុលបានបង្រៀនអំពីការត្រៀមខ្លួនសម្រាប់ការយាងមកជាលើកទីពីរ ។ សូមប្រៀបធៀបការបង្រៀនទាំងនេះជាមួយ គោលលទ្ធិ និង សេចក្តីសញ្ញា ១០៦:៤–៥ ។

• តើបងប្អូនបានកើនចំណេះដឹងអ្វីខ្លះ ?

សេចក្ដីពិតមួយដែលយើងអាចរៀនចេញពីការបង្រៀនរបស់ប៉ុលគឺថាប្រសិនបើយើងខិតខំធ្វើជា « កូនចៅនៃពន្លឺ » ដោយការធ្វើតាមព្រះយេស៊ូវគ្រីស្ទ នោះយើងនឹងត្រូវបានត្រៀមខ្លួនរួចនៅពេលទ្រង់យាងមកម្ដងទៀត ។

ដើម្បីរៀនបន្ថែមទៀតអំពីវិធីផ្សេងៗដែលព្រះអម្ចាស់អញ្ជើញយើងឲ្យក្លាយជាកូនចៅនៃពន្លឺ សូមអាន នីហ្វៃទី៣ ១៨:២៤ ; គោលលទ្ធិ និង សេចក្តីសញ្ញា ៥០:២៣–២៥ ; ៨៨:៦៧–៦៨ ។ សូមសរសេរនៅក្នុងសៀវភៅសិក្សារបស់អ្នកនូវអ្វីដែលអ្នករកឃើញ ដែលជួយអ្នកឲ្យយល់ពីរបៀបក្លាយជាកូនចៅនៃពន្លឺ ។

• តើបងប្អូនអញ្ជើញពន្លឺរបស់ព្រះអម្ចាស់ឲ្យចូលក្នុងជីវិតរបស់បងប្អូនដោយរបៀបណា ? តើអ្នកអាចអញ្ជើញពន្លឺរបស់ទ្រង់បន្ថែមទៀតមកក្នុងជីវិតអ្នកដោយរបៀបណា ?

សកម្មភាពសិក្សាទី ៣ ៖ តើយើងអាចរៀបចំខ្លួនយើងសម្រាប់ការយាងមកជាលើកទីពីររបស់ព្រះយេស៊ូវគ្រីស្ទដោយរបៀបណា ?

ប៉ុលបានបញ្ចប់សំបុត្រទីមួយរបស់លោកដល់ពួកថែស្សាឡូនីចដោយការចែកចាយការទូន្មានអំពីរបៀបដែលពួកបរិសុទ្ធអាចរៀបចំខ្លួនឲ្យបានកាន់តែប្រសើរដើម្បីទៅជួបព្រះអង្គសង្គ្រោះនៅឯការយាងមកជាលើកទីពីររបស់ទ្រង់ ។

សូមអាន ថែស្សាឡូនីច ទី១ ៥:១៤–២២ ហើយស្វែងយល់ថាតើអ្នកទទួលបានការយល់ដឹងអ្វីខ្លះអំពីការត្រៀមខ្លួននេះ ។ សូមបើកចិត្តឲ្យទូលាយចំពោះគំនិតអំពីការបង្រៀនណាមួយដែលអាចមានប្រយោជន៍ជាពិសេសសម្រាប់អ្នក ។

• តើការបង្រៀនទាំងនេះមួយណាដែលមានអត្ថន័យបំផុតចំពោះអ្នក ? ហេតុអ្វី ?

សូមស្វែងរកខគម្ពីរមួយ ឬពីរដែលជួយបង្កើនការយល់ដឹងរបស់អ្នកអំពីការបង្រៀនដែលអ្នកបានជ្រើសរើស ។ ( អ្នកអាចនឹងប្រើលេខយោង ឬរកមើលប្រធានបទនៅក្នុងសេចក្ដីណែនាំដល់បទគម្ពីរទាំងឡាយ ឬ Topical Guide ដើម្បីជួយអ្នកឲ្យស្វែងរកបទគម្ពីរដែលទាក់ទងគ្នា ) ។

• តើព្រះយេស៊ូវគ្រីស្ទបានជួយអ្នកដោយរបៀបណា ឬតើទ្រង់នឹងជួយអ្នកដោយរបៀបណា ដើម្បីត្រៀមខ្លួនសម្រាប់ការយាងមកជាលើកទីពីររបស់ទ្រង់ ? តើអ្នកអាចរៀនអ្វីខ្លះអំពីទ្រង់មកពីការណ៍នេះ ?

ពិចារណាលើសេចក្តីពិតដែលអ្នកបានរៀននៅថ្ងៃនេះ ហើយទង្វើដែលអ្នកមានអារម្មណ៍ថាត្រូវបានបំផុសគំនិតឲ្យធ្វើ ដែលនឹងជួយអ្នកឲ្យត្រៀមខ្លួន និងរំភើបចិត្តក្នុងការជួបព្រះអង្គសង្គ្រោះម្តងទៀត ។ សូមកត់ត្រាគំនិតរបស់អ្នកនៅក្នុងសៀវភៅកំណត់ហេតុការសិក្សារបស់អ្នក ។

សូមថ្លែងទីបន្ទាល់អំពីពរជ័យដែលកើតឡើងនៅពេលយើងចាត់វិធានការសាមញ្ញ ប៉ុន្តែមានអត្ថន័យឆ្ពោះទៅរកការរៀបចំសម្រាប់ពេលដែលព្រះគ្រីស្ទយាងមកផែនដីម្តងទៀត ។

វិចារណកថា និង ព័ត៌មានសាច់រឿង

ថែស្សាឡូនីច ទី១ ៥:២ ។ តើពេលវេលានៃការយាងមកជាលើកទីពីររបស់ព្រះអង្គសង្គ្រោះអាចប្រៀបធៀបនឹងចោរនៅពេលយប់យ៉ាងដូចម្ដេច ?

អែលឌើរ ប្រ៊ូស អ័រ ម៉ាក់ខន់ឃី ( ឆ្នាំ ១៩១៥–៨៥ ) ក្នុងកូរ៉ុមនៃពួកសាវកដប់ពីរនាក់បានពន្យល់ថា ធម្មតាចោរតែងមកនៅពេលយប់ « ដោយមិននឹកស្មានដល់ ហើយដោយគ្មានការព្រមានទុកជាមុន » ( Doctrinal New Testament Commentary [ ឆ្នាំ ១៩៧៣ ] ៣:៥៤ ) ។ ការប្រៀបធៀបនេះបង្ហាញថា ការយាងមកជាលើកទីពីររបស់ព្រះអង្គសង្គ្រោះនឹងមានការភ្ញាក់ផ្អើលដល់មនុស្សមួយចំនួន ។

ថែស្សាឡូនីច ទី១ ៥:២១ ។ តើប៉ុលចង់មានន័យយ៉ាងណាដោយថា « ចូរលមើលគ្រប់ទាំងអស់ ហើយកាន់ខ្ជាប់តាមសេចក្តីដែលត្រឹមត្រូវ » ?

ប៉ុលបានអញ្ជើញពួកបរិសុទ្ធក្រុងថែស្សាឡូនីចឲ្យ « ចូរលមើលគ្រប់ទាំងអស់ »—មានន័យថាដើម្បីពិនិត្យ ឬសាកល្បងពួកគេឲ្យយល់ថាតើពួកគេល្អ ឬអាក្រក់—ហើយដើម្បី « កាន់ខ្ជាប់តាមសេចក្តីដែលត្រឹមត្រូវ » ។ ក្នុងនាមជាសមាជិកនៃសាសនាចក្រ យើងត្រូវបានបង្រៀនមិនត្រឹមតែរៀនពីដំណឹងល្អប៉ុណ្ណោះទេ ប៉ុន្តែដើម្បីសញ្ជឹងគិត អធិស្ឋាន ហើយទីបំផុតយល់ពីវា ( សូមមើល នីហ្វៃទី៣ ១៧:១–៣ ; គោលលទ្ធិ និង សេចក្តីសញ្ញា ៦៨:២៥–២៦ ) ។ បន្ទាប់មក យើងត្រូវប្រកាន់ខ្ជាប់យ៉ាងរឹងមាំ និងស្មោះត្រង់ចំពោះសេចក្តីល្អដែលយើងយល់ ។

សកម្មភាពរៀនសូត្របន្ថែម

ថែស្សាឡូនីច ទី១ ៤:១១–១២ ; ថែស្សាឡូនីច ទី២ ៣:១០–១១ ។ សារៈសំខាន់នៃកិច្ចការ

ប្រសិនបើសិស្សនឹងទទួលបានអត្ថប្រយោជន៍ពីការពិភាក្សាអំពីសារៈសំខាន់នៃកិច្ចការសូមពិចារណាប្រើសំណួរដូចខាងក្រោម ៖

សូមឲ្យសិស្សពណ៌នាអំពីកិច្ចការដ៏លំបាកបំផុតដែលពួកគេបានធ្វើ ។ ហេតុអ្វីបានជាវាពិបាក ? តើតម្លៃអ្វីដែលបានមកពីការធ្វើវា ?

សូមអញ្ជើញសិស្សឲ្យអាន ថែស្សាឡូនីច ទី១ ៤:១១–១២ និង ថែស្សាឡូនីច ទី២ ៣:១០–១១ ដោយរកមើលអ្វីដែលប៉ុលបានបង្រៀនអំពីកិច្ចការ ។ សូមអនុញ្ញាតឲ្យសិស្សចែកចាយគំនិតរបស់ពួកគេ ។ សូមពិចារណាឲ្យសិស្សចែកចាយពីរបៀបដែលពួកគេដឹងគុណចំពោះតម្លៃនៃកិច្ចការ ។

សិស្សក៏អាចត្រូវបានអញ្ជើញឲ្យអាន និងពិភាក្សាអំពីផ្នែក « Work and Self-Reliance » នៃកូនសៀវភៅ ដើម្បីកម្លាំងនៃយុវជន ( [ ឆ្នាំ២០១១ ] ទំព័រ ៤០–៤១ ) ។

សូមសួរសិស្សអំពីរបៀបដែលការធ្វើជាមនុស្សឧស្សាហ៍ព្យាយាមអាចជួយពួកគេឲ្យក្លាយដូចជាព្រះអង្គសង្គ្រោះ ។

ថែស្សាឡូនីច ទី១ ៥:១១–២២ ។ យោបល់ជាច្រើនសម្រាប់ការបង្រៀន

សូមអញ្ជើញសិស្សឲ្យជ្រើសរើសឃ្លាមួយពីខគម្ពីរទាំងនេះ ( ឧទាហរណ៍ « ចូរអរសប្បាយជានិច្ច » [ ខទី ១៦ ] ) ហើយសរសេរសារចុះផ្សាយតាមប្រព័ន្ធផ្សព្វផ្សាយសង្គម ឬបង្កើតរឿងល្បងប្រាជ្ញាខ្លីៗ ។ សិស្សអាចបញ្ចូលគំនិតរបស់ពួកគេអំពីមូលហេតុដែលឃ្លានេះមានសារៈសំខាន់ចំពោះពួកគេ និងពីរបៀបដែលវាអាចជួយនរណាម្នាក់ឲ្យខិតទៅជិតព្រះយេស៊ូវគ្រីស្ទ ហើយបានត្រៀមខ្លួនកាន់តែប្រសើរសម្រាប់ការយាងមករបស់ទ្រង់ ។