ថែស្សាឡូនីច ទី២ ២

ការក្បត់សាសនាដ៏ធំ

តើជីវិតរបស់អ្នកនឹងទៅជាយ៉ាងណា ប្រសិនបើអ្នកមិនមានភាពពេញលេញនៃដំណឹងល្អនៃព្រះយេស៊ូវគ្រីស្ទ ? ប៉ុលបានបង្រៀនពួកបរិសុទ្ធនៅក្រុងថែស្សាឡូនីចថា នៅទីបំផុតអំពើទុច្ចរិតរបស់ប្រជាជននឹងនាំឲ្យមានការបែកចេញពីដំណឹងល្អ ( សូមមើល ថែស្សាឡូនីច ទី២ ២:១–៧ ) ។ មេរៀននេះអាចជួយអ្នកឲ្យយល់ពីរបៀបដែលការក្បត់សាសនានៃព្រះគម្ពីរសញ្ញាថ្មីនៃសាសនាចក្របានកើតឡើង និងមូលហេតុដែលសាសនាចក្ររបស់ព្រះអង្គសង្គ្រោះចាំបាច់ត្រូវស្ដារឡើងវិញនៅថ្ងៃចុងក្រោយ ។

កាប្រើសេចក្តីយោងឆ្លង ។ សេចក្តីយោងបទគម្ពីរគឺជាបទគម្ពីរមួយ ដែលអាចផ្ដល់ព័ត៌មានបន្ថែម និងផ្ដល់ការយល់ដឹងអំពីអ្វីដែលកំពុងសិក្សា ។ វាអាចមានប្រយោជន៍ក្នុងការអញ្ជើញសិស្សឲ្យយោងទៅលើអ្វីដែលពួកគេកំពុងអានជាមួយនឹងខគម្ពីរផ្សេងទៀត ដើម្បីពង្រឹងការយល់ដឹងរបស់ពួកគេអំពីដំណឹងល្អកាន់តែស៊ីជម្រៅ ។

ការរៀបចំរបស់សិស្ស ៖ សូមអញ្ជើញសិស្សឲ្យរកមើល « Apostasy » នៅក្នុងប្រធានបទដំណឹងល្អដែលមាន នៅលើគេហទំព័រChurchofJesusChrist.org ។ សូមឲ្យពួកគេមករៀនដោយបានត្រៀមខ្លួនដើម្បីចែកចាយពីអ្វីដែលពួកគេបានរៀន ឬសួរសំណួរណាមួយដែលពួកគេមាន ។

សកម្មភាពរៀនសូត្រដែលអាចមាន

ការក្បត់សាសនាដ៏ធំ

សូមរំព្ញកសិស្សឲ្យសញ្ជឹងគិតលើការរៀបចំរបស់ពួកគេសម្រាប់ថ្នាក់ នៅពេលពួកគេឆ្លើយតបសាច់រឿងខាងក្រោមនេះ ។

សូមបង្ហាញ ឬពន្យល់សាច់រឿងនិងសំណួរនានា ហើយអញ្ជើញសិស្សឲ្យឆ្លើយនៅក្នុងសៀវភៅកំណត់ហេតុការសិក្សារបស់ពួកគេ មុនពេលពួកគេចែកចាយចម្លើយរបស់ពួកគេជាមួយសិស្សក្នុងថ្នាក់ ។

ម៉្យាងទៀត អាចចាត់តាំងសិស្សជាក្រុមដែលមានគ្នាពីរ ឬ បីនាក់ដែលសិស្សម្នាក់កំពុងបង្រៀន និងម្នាក់ ឬពីរនាក់ទៀតដើរតួសម្ដែងជាអ្នកផ្សព្វផ្សាយសាសនា ។ អ្នកដែលដើរតួជាអ្នកផ្សព្វផ្សាយសាសនាអាចព្យាយាមពន្យល់អំពីការក្បត់សាសនាដ៏ធំ ។

សូមស្រមៃថាអ្នកគឺជាអ្នកផ្សព្វផ្សាយសាសនានៅថ្ងៃដំបូងនៃបេសកកម្មរបស់អ្នក ។ អ្នកត្រូវបង្រៀននរណាម្នាក់អំពីការក្បត់សាសនាដ៏ធំ ។

• តើអ្នកនឹងពន្យល់រឿងនេះទៅពួកគេដោយរបៀបណា ?

• ហេតុអ្វីបានជាការណ៍នេះជា កិច្ចការដ៏លំបាក ?

• តើអ្នកគិតថា ហេតុអ្វីបានជាវាសំខាន់ដើម្បីយល់ដឹងអំពី ការក្បត់សាសនាដ៏ធំនេះ ?

នៅក្នុងសៀវភៅកំណត់ហេតុការសិក្សារបស់អ្នក សូមសរសេរសំណួរដែលអ្នកមានអំពីការក្បត់សាសនាដ៏ធំ ឬសំណួរដែលអ្នកសាសនាគន់ការី អាចសួរ ។ នៅពេលអ្នកសិក្សា សូមស្វែងរកជំនួយពីព្រះវរបិតាសួគ៌ ដើម្បីស្វែងរកចម្លើយចំពោះសំណួរទាំងនេះ ។

សូមអញ្ជើញអ្នកស្ម័គ្រចិត្តឲ្យសរសេរសំណួរនៅលើក្ដារខៀនដែលពួកគេ ឬអ្នកផ្សេងទៀតអាចមានអំពីការក្បត់សាសនាដ៏ធំ ។ សូមអញ្ជើញសិស្សឲ្យយោងទៅសំណួរទាំងនេះពេញមួយមេរៀន ។

ប៉ុលព្យាករអំពីការបែកចេញពីសាសនាចក្រ

ពួកបរិសុទ្ធក្រុងថែស្សាឡូនីចមានកង្វល់ជាច្រើនអំពីការយាងមកជាលើកទីពីររបស់ព្រះយេស៊ូវគ្រីស្ទ ហើយបានគិតថាវាអាចនឹងកើតឡើងក្នុងពេលឆាប់ៗនេះ ។ ប៉ុលបានបកស្រាយអំពីកង្វល់របស់ពួកគេក្នុងសំបុត្ររបស់លោក ហើយបានពន្យល់ថាមានអ្វីផ្សេងទៀតនឹងកើតឡើងមុនព្រះគ្រីស្ទនឹងយាងមកម្ដងទៀត ។

ថែស្សាឡូនីច ទី២ ២:១-៣ គឺជាវគ្គបទគម្ពីរចំណេះចំណានខាងគោលលទ្ធិ ។ សូមពិចារណាគូសសម្គាល់វគ្គបទគម្ពីរចំណេះចំណានខាងគោលលទ្ធិតាមវិធីដែលងាយសម្គាល់ ដើម្បីអ្នកអាចងាយរកវាឃើញ ។

សូមអាន ថែស្សាឡូនីច ទី២ ២:១–៣ ដោយស្វែងរកអ្វីដែលប៉ុលបានបង្រៀនថានឹងកើតឡើងមុនការយាងមកជាលើកទីពីររបស់ព្រះគ្រីស្ទ ។ សូមប្រើលេខយោងដើម្បីជួយអ្នកឲ្យយល់កាន់តែច្បាស់ពីប្រសាសន៍របស់ប៉ុល ។

• តើអ្វីដែលប៉ុលបានបង្រៀនថានឹងកើតឡើងពីមុនការយាងមកជាលើកទីពីររបស់ព្រះគ្រីស្ទ ?

« ការធ្លាក់ » នេះដែលបានពិពណ៌នាដោយប៉ុលគឺជាសេចក្ដីក្បត់សាសនាដ៏ធំដែលបានកើតឡើងបន្ទាប់ពីការសុគតរបស់ពួកសាវករបស់ព្រះយេស៊ូវគ្រីស្ទ ។ ការក្បត់សាសនាដ៏ធំនេះខុសពីការក្បត់សាសនាផ្ទាល់ខ្លួន ដែលជាពេលដែលបុគ្គលបះបោរ ឬធ្លាក់ទៅឆ្ងាយពីសេចក្តីពិត ( សូមមើល សេចក្ដីណែនាំដល់បទគម្ពីរទាំងឡាយ « Apostasy » ដែលមាននៅលើគេហទំព័រ scriptures.ChurchofJesusChrist.org ) ។

• តើពាក្យរបស់ប៉ុលបង្ហាញពីការយកចិត្តទុកដាក់ និងការបារម្មណ៍របស់ព្រះចំពោះពួកបរិសុទ្ធថែស្សាឡូនីចយ៉ាងដូចម្ដេច ?

សេចក្តីពិតមួយដែលយើងអាចរៀនពីខគម្ពីរទាំងនេះគឺថា វាត្រូវបានព្យាករតំាងពីបុរាណថា មុនការយាងមកជាលើកទីពីររបស់ព្រះយេស៊ូវគ្រីស្ទ នឹងកើតមានសេចក្ដីក្បត់សាសនាពីសាសនាចក្ររបស់ទ្រង់ ។

• ហេតុអ្វីក៏អ្នកគិតថា សេចក្ដីពិតនេះសំខាន់ដើម្បីយល់ដឹង ?

ប្រធាន អិម រ័សុល បាឡាដ ក្នុងកូរ៉ុមនៃពួកសាវកដប់ពីរនាក់បានពន្យល់ពីមូលហេតុដែលអំឡុងពេលនៃការក្បត់សាសនាកើតឡើង ។

ព្រះវរបិតាសួគ៌យើងស្រឡាញ់កូនចៅរបស់ទ្រង់ទាំងអស់ ហើយទ្រង់ចង់ឲ្យពួកគេទាំងអស់ទទួលបានពរជ័យនៃដំណឹងល្អក្នុងជីវិតរបស់ពួកគេ ។ ពន្លឺខាងវិញ្ញាណពុំបាត់បង់ ដោយសារព្រះបែរខ្នងដាក់បុត្រាបុត្រីទ្រង់នោះឡើយ ។ តែភាពល្ងិតល្ងង់ខាងវិញ្ញាណកើតមកពីគ្រាដែលបុត្រាបុត្រីរបស់ទ្រង់បែរខ្នងពួកគេដាក់ទ្រង់ទៅវិញទេ ។ វាជាលទ្ធផលតាមធម្មជាតិមួយនៃការជ្រើសរើសមិនល្អ ដែលបុគ្គលម្នាក់ៗសហគមន៍ ប្រទេស និងអារ្យធម៌ទាំងមូលបានធ្វើ ។

( អិម រ័សុល បាឡឺដ « Learning the Lessons of the Past » Ensign ឬ Liahona ខែ ឧសភា ឆ្នាំ ២០០៩ ទំព័រ ៣២ )

• តើបងប្អូនចាប់អារម្មណ៍អ្វីខ្លះក្នុងសេចក្ដីថ្លែងការណ៍នេះ ? ហេតុអ្វី ?

ដោយសារព្រះវរបិតាសួគ៌ជ្រាបគ្រប់ការណ៍ទាំងអស់ ( សូមមើល នីហ្វៃទី ២ ៩:២០ ) សេចក្ដីក្បត់សាសនាដ៏ធំមិនបានកើតឡើងជាការភ្ញាក់ផ្អើលដល់ទ្រង់ទេ ។ ទ្រង់ស្រឡាញ់កូនចៅទាំងអស់របស់ទ្រង់ ( សូមមើល យ៉ូហាន ៣:១៦ ) ដូច្នេះទ្រង់បានប្រទានវិធីមួយដើម្បីយកឈ្នះលើការក្បត់សាសនាដ៏ធំនេះ តាមរយៈការស្ដារឡើងវិញនៃសាសនាចក្រ និងដំណឹងល្អរបស់ព្រះយេស៊ូវគ្រីស្ទ ( សូមមើល កិច្ចការ ៣:១៩–២១ ; អេភេសូរ ១:១០ ) ។

ពង្រឹងការយល់ដឹងរបស់អ្នកអំពីការក្បត់សាសនាដ៏ធំ

សកម្មភាពខាងក្រោមអាចជួយអ្នកឲ្យយល់កាន់តែច្បាស់អំពីរបៀបដែលការក្បត់សាសនាដ៏ធំបានកើតឡើង និងមូលហេតុដែលសាសនាចក្ររបស់ព្រះអង្គសង្គ្រោះចាំបាច់ត្រូវស្ដារឡើងវិញនៅថ្ងៃចុងក្រោយ ។

ប្រសិនបើសិស្សមានសិទ្ធិចូលទៅ ប្រកាសដំណឹងល្អរបស់យើង មគ្គុទ្ទេសក៍សម្រាប់ការបម្រើជាអ្នកផ្សព្វផ្សាយសាសនា ( ឆ្នាំ ២០១៩ ) សូមពិចារណាឲ្យពួកគេសិក្សាផ្នែក « ការក្បត់សាសនាដ៏ធំ » នៅក្នុង « មេរៀនទី ១ ៖ សារដំណឹងនៃការស្តារឡើងវិញនៃដំណឹងល្អរបស់ព្រះយេស៊ូវគ្រីស្ទ » ( ទំព័រ ៣១–៣២ ) ។ វាអាចត្រូវបានធ្វើឡើងជំនួសឲ្យការសិក្សាសំណៅចែក ។

សូមបង្ហាញសំណៅចែកខាងក្រោម ឬបោះពុម្ពវា ហើយចែកវាទៅសិស្ស ។

សូមសិក្សាវគ្គបទគម្ពីរខាងក្រោម និងសេចក្ដីថ្លែងការណ៍ដោយប្រធាន រ័សុល អិម ណិលសុន ហើយបន្ទាប់មកឆ្លើយសំណួរខាងក្រោម ។

1. នីហ្វៃទី ១ ១៣:២៤–២៨ ៖ នីហ្វៃបានឃើញក្នុងការនិមិត្តអំពីអ្វីដែលនឹងកើតឡើងចំពោះសេចក្ដីពិតសំខាន់ៗនៅក្នុងព្រះគម្ពីរប៊ីប ។

2. អេម៉ុស ៨:១១–១២ ៖ អេម៉ុសព្យាករណ៍អំពីអំណត់អត់ខាងវិញ្ញាណ ។

3. កិច្ចការ ២០:២៩–៣០ ៖ ប៉ុលព្រមានថា សមាជិកនៃសាសនាចក្ររបស់ព្រះអង្គសង្គ្រោះនឹងត្រូវបានដឹកនាំឲ្យវង្វេងចេញពីដំណឹងល្អ ។

4. ប្រធាន រ័សុល អិម ណិលសុន បានបង្រៀន ៖

   

   « ដោយសារព្រះដ៏មានព្រះជន្មរស់របស់យើង ជាព្រះជាទីស្រឡាញ់ ! ទ្រង់ចង់ឲ្យកូនចៅរបស់ទ្រង់ស្គាល់ទ្រង់ និងព្រះយេស៊ូវគ្រីស្ទ ដែលទ្រង់បានបញ្ជូនមក ! ហើយទ្រង់ចង់ឲ្យកូនចៅរបស់ទ្រង់ទទួលបានជីវិតអមតៈ និង ជីវិតអស់កល្បជានិច្ច !

   « ដោយសារគោលបំណងដ៏រុងរឿងរបស់ទ្រង់ អ្នកផ្សព្វផ្សាយសាសនារបស់យើង បង្រៀនអំពីការស្ដារឡើងវិញ ។ ពួកគេដឹងថា ប្រហែលជា២០០០ ឆ្នាំកន្លងទៅ ព្រះអម្ចាស់បានស្ថាបនាសាសនាចក្ររបស់ទ្រង់ ។ បន្ទាប់ពីការឆ្កាងរបស់ទ្រង់ និងការស្លាប់របស់ពួកសាវកទ្រង់ មនុស្សបានផ្លាស់ប្ដូរសាសនាចក្រ និងគោលលទ្ធិសាសនាចក្រ ។ ហើយបន្ទាប់ពីអស់រយៈពេលជាច្រើនជំនាន់នៃភាពងងឹតខាងវិញ្ញាណ ហើយដូចបានព្យាករដោយព្យាការីកាលពីមុនៗ ព្រះវរបិតាសួគ៌ និង ព្រះយេស៊ូវគ្រីស្ទ បានស្ដារសាសនាចក្រ គោលលទ្ធិ ហើយនឹងសិទ្ធិអំណាចបព្វជិតភាពឡើងវិញ ។ ដោយសារតែការស្ដារឡើងវិញនោះ ចំណេះដឹង និង ពិធីបរិសុទ្ធសំខាន់ៗសម្រាប់សេចក្ដីសង្គ្រោះ និងការលើកតម្កើង គឺមានជាថ្មីម្ដងទៀតសម្រាប់មនុស្សទាំងអស់ ។ ទីបំផុតការលើកតម្កើងនោះ អនុញ្ញាតឲ្យយើងម្នាក់ៗរស់នៅជាមួយក្រុមគ្រួសាររបស់យើងនៅក្នុងវត្តមានរបស់ព្រះ និងព្រះយេស៊ូវគ្រីស្ទជារៀងរហូត ! »

   រ័សុល អិម ណិលសុន « Catch the Wave » Ensign ឬ Liahona ខែ ឧសភា ឆ្នាំ ២០១៣ ទំព័រ ៤៦

• តើអ្នកបានរៀនអ្វីខ្លះអំពីការក្បត់សាសនាដ៏ធំ ?

• តើយើងបានរៀនអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទតាមរយៈការបង្រៀនទាំងនេះ ?

• ផ្អែកលើអ្វីដែលអ្នកបានរៀន ហេតុអ្វីបានជាការស្ដារឡើងវិញចាំបាច់ ?

ធនធានផ្សេងទៀតដែលសិស្សអាចសិក្សារួមមានផ្នែក « ការក្បត់សាសនាដ៏ធំ » នៅក្នុង « មេរៀនទី ១ ៖ សារដំណឹងនៃការស្តារឡើងវិញនៃដំណឹងល្អរបស់ព្រះយេស៊ូវគ្រីស្ទ » នៅក្នុង ប្រកាសដំណឹងល្អរបស់យើង ៖ មគ្គុទ្ទេសក៍សម្រាប់ការបម្រើជាអ្នកផ្សព្វផ្សាយសាសនា ( ឆ្នាំ ២០១៩ ) ឬវីដេអូ « What Is the Restoration? ( ៥:១៣ ) ឬ « Jesus Christ’s Church » ( ១:២៧ ) ដែលអាចស្វែងរកនៅលើគេហទំព័រ ChurchofJesusChrist.org ។ ទាំងនេះអាចត្រូវបានប្រើប្រាស់ដើម្បីជួយបង្កើនការយល់ដឹងរបស់សិស្សប្រសិនបើចង់ ។

បន្ទាប់ពីផ្តល់ពេលគ្រប់គ្រាន់ដល់សិស្សក្នុងការសិក្សា សូមអញ្ជើញពួកគេឲ្យចែកចាយចម្លើយរបស់ពួកគេចំពោះសំណួរនៅលើសំណៅចែក ។ សុំឲ្យពួកគេចែកចាយសំណួររបស់ពួកគេមួយណាដែលត្រូវបានឆ្លើយ និងអ្វីដែលពួកគេនៅតែមាន ។ សូមអញ្ជើញសិស្សផ្សេងទៀតឲ្យចែកចាយការយល់ដឹងដែលអាចជួយឆ្លើយសំណួរទាំងនោះ ។

សូមបញ្ចប់ថ្នាក់ជាមួយនឹងសកម្មភាព និងសំណួរខាងក្រោម ។

អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានចែកចាយសំណួរដែលលោក និងភរិយារបស់លោកអាចមាន ប្រសិនបើពួកលោករស់នៅក្នុងអំឡុងពេលនៃការក្បត់សាសនាដ៏ធំ ៖ « តើមានអ្វីកំពុងបាត់នៅទីនេះ ? តើយើងប្រាថ្នាថា យើងនឹងមានអ្វី ? តើយើងសង្ឃឹម ថាព្រះនឹងប្រទានអ្វីជាចម្លើយចំពោះការចង់បានខាងវិញ្ញាណរបស់យើង ? » ( «A Perfect Brightness of Hope » Ensign ឬ Liahona ខែ ឧសភា ឆ្នាំ ២០២០ ទំព័រ ៨១ ) សូមពិចារណាពីគំនិត និងអារម្មណ៍ស្រដៀងគ្នាដែលអ្នកអាចមាន ប្រសិនបើអ្នកបានរស់នៅពេលនោះ ។

• តើជីវិតរបស់អ្នកនឹងទៅជាយ៉ាងណា ប្រសិនបើអ្នកមិនមានភាពពេញលេញនៃដំណឹងល្អនៃព្រះយេស៊ូវគ្រីស្ទ ?

• តើអ្វីដែលធ្វើឲ្យអ្នកមានអំណរគុណបំផុតចំពោះសាសនាចក្រដែលបានស្ដារឡើងវិញរបស់ព្រះអង្គសង្គ្រោះ ? ហេតុអ្វី ?

• តើអ្នកមានអារម្មណ៍ថាព្រះវរបិតាសួគ៌សព្វព្រះទ័យចង់ឲ្យអ្នកដឹង ទទួលអារម្មណ៍ ឬធ្វើអ្វីដោយសារមេរៀននេះ ?

វិចារណកថា និង ព័ត៌មានសាច់រឿង

តើពួកគ្រីស្ទានដែលរស់នៅមុនការស្ដារឡើងវិញបានកត់សម្គាល់អំពីការក្បត់សាសនានេះឬទេ ?

អ្នកកែទម្រង់ ម៉ាទីន លូទើ ( ឆ្នាំ ១៤៨៣–១៥៤៦ ) បានបង្រៀន ៖

ខ្ញុំពុំបានព្យាយាមធ្វើអ្វីក្រៅពីកែទម្រង់សាសនាចក្រឲ្យស្របតាមព្រះគម្ពីរបរិសុទ្ធនោះទេ ។… ខ្ញុំនិយាយយ៉ាងសាមញ្ញថាមិនមានសាសនាគ្រឹស្តនៅ ក្នុងចំណោមអ្នកដែលអភិរក្សវានោះទេ ។

( នៅក្នុង អ៊ី ជី ឈ្វីប៊ឹត Luther and His Times: The Reformation from a New Perspective [ ឆ្នាំ ១៩៥០ ] ទំព័រ ៥០៩ )

អ្នកដឹកនាំគ្រីស្ទានអាមេរិកាំងដើមដំបូង លោក រ៉ូជើរ វិល្លាម ( ឆ្នាំ ១៦០៣–៨៣ ) បានពន្យល់ ៖

ការក្បត់សាសនា…រហូតមកដល់ពេលនេះបានបង្ខូចអ្វីៗទាំងអស់ ដែលមិនអាចមានលទ្ធភាពស្តារឡើងវិញពីការក្បត់សាសនានោះ រហូតដល់ព្រះគ្រីស្ទបញ្ជូនសាវកថ្មីមក បណ្តុះបណ្តាលព្រះវិហារជាថ្មី ។

( នៅក្នុង ហ្វីលីព ស្ហាហ្វ The Creeds of Christendom វ៉ុល ៣ [ ឆ្នាំ ១៨៧៧ ] ១:៨៥១ )

ទស្សនវិទូជនជាតិហូឡង់ អេរ៉ាស់ស្មឹះ ( ឆ្នាំ ១៤៦៦–១៥៣៦ ) បានបង្រៀន ៖

ឥឡូវនេះ អ្វីគ្រប់យ៉ាងគឺជាប់ពាក់ព័ន្ធជាមួយនឹងសំណួរទាំងនេះ [ នៃគោលលទ្ធិ ] និងរាជក្រឹត្យនានា ដែលយើងមិនហ៊ានសូម្បីតែសង្ឃឹមថានឹងហៅពិភពលោកឲ្យត្រឡប់ទៅរកសាសនាគ្រឹស្តពិត ឡើងវិញ ។

( The Praise of Folly, បកប្រែដោយ ឃ្លែរិន អេច មីលឺ កំំណែទី ២ [ ឆ្នាំ ២០០៣ ] ទំព័រ ១៥៥–៥៦ )

តើធ្លាប់មានការក្បត់សាសនាតែម្តងមែនទេ ?

ពេញមួយសម័យកាល មានគ្រាកាន់កាប់ត្រួតត្រាជាច្រើន ដែលបានបញ្ចប់ដោយការក្បត់សាសនានោះ ។ ដោយសេចក្ដីមេត្តាករុណារបស់ទ្រង់ ព្រះអម្ចាស់បានស្តារដំណឹងល្អ របស់ទ្រង់នៅលើផែនដីតាមរយៈការហៅព្យាការី ។ ដើម្បីរៀនសូត្របន្ថែមអំពីគំរូនេះ សូមមើល « Dispensations: The Pattern of Apostasy and Restoration » ( ៦:៥២ ) ដែលមាននៅគេហទំព័រ ChurchofJesusChrist.org ។

តើយើងគួរមានទស្សនៈយ៉ាងណាចំពោះមនុស្សល្អៗដែលមានជំនឿផ្សេង ?

ប្រធាន ដាល្លិន អេក អូក នៃគណៈប្រធានទីមួយបានពន្យល់ ៖

យើងជឿថាថ្នាក់ដឹកនាំ និងអ្នកកាន់តាមសាសនាភាគច្រើនគឺជាអ្នកជឿដោយស្មោះដែលស្រឡាញ់ព្រះ ហើយមានការយល់ដឹង និងបម្រើទ្រង់អស់ពីសមត្ថភាពរបស់ពួកគេ ។ យើងជំពាក់គុណបុរស និងស្ត្រី ដែលបានរក្សាពន្លឺនៃសេចក្តីជំនឿ និងការរៀនសូត្រដែលបន្តរស់នៅអស់ជាច្រើនសតវត្សរហូតមកដល់សព្វថ្ងៃនេះ ។ យើងផ្ទុយពីមនុស្សដែលមិនបានដឹងពីពន្លឺនៃដំណឹងល្អ នៅក្នុងចំណោមពួកយើង ដែលមិនធ្លាប់ស្គាល់ព្រះនាមរបស់ព្រះ និងព្រះយេស៊ូវគ្រីស្ទដើម្បីដឹងពីការរួមចំណែកដ៏អស្ចារ្យដែលធ្វើឡើងដោយគ្រូគង្វាលគ្រីស្ទានគ្រប់សម័យកាល ។ យើងគោរពពួកគេក្នុងនាមជាអ្នកបម្រើរបស់ព្រះ ។

( ដាល្លិន អេក អូក « Apostasy and Restoration » Ensign ខែ ឧសភា ឆ្នាំ ១៩៩៥ ទំព័រ ៨៥ )

សកម្មភាពរៀនសូត្របន្ថែម

ជម្រើសចាប់ផ្តើមមេរៀន

សូមបង្ហាញរុក្ខជាតិមានជីវិតមួយ និងរុក្ខជាតិងាប់ ឬជិតងាប់មួយ ( ឬ មែកឈើងាប់មួយដែលប្រឡាក់ដីបន្ដិច ) ។ សូមសញ្ជឹងគិតនិងឆ្លើយសំណួរខាងក្រោមនេះ ៖

• ហេតុអ្វីបងប្អូនគិតថា រុក្ខជាតិទាំងនេះមើលទៅខុសគ្នា ?

• តើរុក្ខជាតិទាំងនេះអាចតំណាងឲ្យលក្ខខណ្ឌខាងវិញ្ញាណខុសគ្នាយ៉ាងដូចម្ដេច ?

បន្ទាប់មក សូមអញ្ជើញសិស្សឲ្យពិចារណាអំពីរបៀបដែលការប្រៀបប្រដូចនេះទាក់ទងនឹងការក្បត់សាសនាដ៏ធំ ។ បើចាំបាច់ សូមអញ្ជើញពួកគេឲ្យសិក្សា អេម៉ុស ៨:១១–១២ ដើម្បីភ្ជាប់ទំនាក់ទំនងមុនពេលសិក្សា ថែស្សាឡូនីចទី ២ ២:១–៤ ។