ចំណេះចំណានខាងគោលលទ្ធិ ៖ ថែស្សាឡូនីច ទី២ ២:១–៣
« ថ្ងៃនៃព្រះគ្រីស្ទ … មិនមកឡើយ ទាល់តែមានសេចក្តីក្បត់សាសនាមកជាមុនសិន »
នៅក្នុងមេរៀនមុន អ្នកបានរៀន អំពីការព្យាករណ៍ពីបុរាណថា មុនពេលនៃការយាងមកជាលើកទីពីររបស់ព្រះយេស៊ូវគ្រីស្ទ នឹងកើតមាន ការក្បត់សាសនាពីសាសនាចក្ររបស់ទ្រង់ ( សូមមើល « ថែស្សាឡូនីច ទី២ ២ » ) ។ មេរៀននេះអាចជួយអ្នកឲ្យទន្ទេញសេចក្ដីយោងចំណេះចំណានខាងគោលលទ្ធិនេះ និងឃ្លាបទគម្ពីរគន្លឹះសម្រាប់ ថែស្សាឡូនីច ទី២ ២:១–៣ ពន្យល់ពីគោលលទ្ធិ នៃការក្បត់សាសនានិងអនុវត្តគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតជាក់ស្ដែង ។
ការជួយសិស្សឲ្យស្វែងរកចម្លើយចំពោះសំណួរនានាតាមរបៀបស្មោះត្រង់ ។ « សិស្សរបស់យើងជាច្រើនទទួលបានពរជ័យដោយអំណោយទាននៃការមានដួងចិត្តដែលជឿ ។ សិស្សរបស់យើងភាគច្រើនមានសំណួរ មិនមែនការសង្ស័យនោះទេ ។ របៀបដែលយើងបង្រៀនចំណេះចំណានខាងគោលលទ្ធិគួរតែបញ្ជាក់ពីសេចក្ដីជំនឿ និងជួយសិស្សឲ្យឆ្លើយនឹងសំំណួរដោយខ្លួនពួកគេ ហើយរៀបចំពួកគេដើម្បីជួយដល់មនុស្សដទៃ ។ ប៉ុន្ដែ វាមិនត្រូវធ្វើតាមរបៀបមួយដែលបង្កើតឲ្យមានការសង្ស័យ ឬបន្ថយសេចក្ដីជំនឿឡើយ » ( ឆាដ អេច វិប « ចំណេះចំណានខាងគោលលទ្ធិ [ សុន្ទរកថាផ្ដល់នៅឯការចាក់ផ្សាយការបំពាក់បំប៉នប្រចាំឆ្នាំរបស់ថ្នាក់សិក្ខាសាលា និងថ្នាក់វិទ្យាស្ថាននៃសាសនា ថ្ងៃទី ១៤ ខែ មិថុនា ឆ្នាំ ២០១៦ ] ) ។
ការរៀបចំរបស់សិស្ស ៖ សូមអញ្ជើញសិស្សឲ្យសញ្ជឹងគិតអំពីសំណួរខាងក្រោម ហើយមករៀនដោយបានត្រៀមខ្លួនដើម្បីពន្យល់ពីរបៀបដែលពួកគេនឹងឆ្លើយតប ៖ « ហេតុអ្វីបានជាព្រះចាំបាច់ត្រូវលេចមកឯយ៉ូសែប ស្ម៊ីធ ដើម្បី ទ្រង់ស្ដារសាសនាចក្ររបស់ទ្រង់ឡើងវិញ ប្រសិនបើ នៅពេលដែលគ្រីស្ទសាសនាត្រូវបានបង្កើតឡើងរួចហើយហើយមនុស្សជាច្រើនបានជឿលើព្រះគម្ពីរប៊ីបរួចហើយនោះ ? »
សកម្មភាពរៀនសូត្រដែលអាចមាន
មេរៀននេះត្រូវបានរៀបចំឡើងដើម្បីបង្រៀនបន្ទាប់ពី « ថែស្សាឡូនីច ទី២ ២ » ដែលជាមេរៀនដែលទាក់ទងបរិបទសម្រាប់វគ្គបទគម្ពីរចំណេះចំណានខាងគោលលទ្ធិ ថែស្សាឡូនីច ទី២ ២:១–៣ ។ ប្រសិនបើមេរៀននេះត្រូវប្តូរទៅសប្តាហ៍ផ្សេង ដើម្បីរៀបចំតាមកាលវិភាគសាលារៀន សូមធានាឲ្យបានថា អ្នកបានប្តូរមេរៀនដែលទាក់ទងនឹងបរិបទផងដែរ ។
ទន្ទេញ និងពន្យល់
សូមបង្ហាញតែសេចក្តីយោងបទគម្ពីរ ថែស្សាឡូនីច ទី ២ ២:១–៣ ហើយអញ្ជើញសិស្សឲ្យឆ្លើយសំណួរខាងក្រោម ។
-
តើអ្នកចងចាំអ្វីខ្លះអំពីអ្វីដែលបានបង្រៀននៅក្នុង ថែស្សាឡូនីច ទី២ ២:១–៣ ?
សូមទន្ទេញសេចក្ដីយោងបទគម្ពីរនិងឃ្លាបទគម្ពីរគន្លឹះសម្រាប់ ថែស្សាឡូនីច ទី២ ២:១–៣ ។ របៀបមួយដើម្បីធ្វើវាគឺត្រូវបញ្ចប់សកម្មភាពដូចខាងក្រោម ( ឬសកម្មភាពស្រដៀងគ្នានេះដោយប្រើកម្មវិធីទូរសព្ទចំណេះចំណានខាងគោលលទ្ធិ ) ៖
សិស្សអាចបំពេញសកម្មភាពខាងក្រោមខ្លួនឯង ឬអាចធ្វើនៅលើក្តារខៀនជាមួយសិស្សក្នុងថ្នាក់ ។
សូមសរសេរ ថែស្សាឡូនីចទី ២ ២:១–៣ ៖ « ថ្ងៃនៃព្រះគ្រីស្ទ …មិនមកឡើយ ទាល់តែមានសេចក្តីក្បត់សាសនាមកជាមុនសិន » នៅក្នុងសៀវភៅកំណត់ហេតុការសិក្សារបស់អ្នក ឬនៅលើឧបករណ៍ឌីជីថលរបស់អ្នក ។
សូមថាឃ្លាសេចក្តីយោងនិងឃ្លាបទគម្ពីរគន្លឹះនេះឡើងវិញឲ្យឮៗ ឬថាក្នុងចិត្តពីរបីដង ។
ចូរលុបឃ្លាមួយ ដូចជា « សេចក្តីក្បត់សាសនាមកជាមុនសិន » ហើយព្យាយាមថាឡើងវិញនូវសេចក្ដីយោង និងឃ្លាបទគម្ពីរគន្លឹះទាំងមូលម្តងទៀត ។
លុបឃ្លាបន្ថែមរហូតដល់អ្នកអាចថាសេចក្ដីយោង និងឃ្លាបទគម្ពីរគន្លឹះទាំងមូលពីការចងចាំឡើងវិញ ។
អ្នកអាចនឹងចងចាំថា ពេលអ្នកសិក្សា ថែស្សាឡូនីច ទី២ ២ អ្នកបានរៀនថា មានការព្យាករពីបុរាណថា មុនការយាងមកជាលើកទីពីររបស់ព្រះយេស៊ូវគ្រីស្ទ នឹងកើតមានការក្បត់សាសនាពីសាសនាចក្ររបស់ទ្រង់ ។
ជាជាងឲ្យសិស្សសរសេរការពន្យល់អំពីការក្បត់សាសនាដ៏ធំដែលជាផ្នែកនៃសកម្មភាពខាងក្រោម សូមពិចារណាដាក់វាជាគូហើយអញ្ជើញពួកគេឲ្យប្ដូរវេនគ្នាពន្យល់អំពីការក្បត់សាសនាដ៏ធំដល់គ្នាទៅវិញទៅមក ។ ប្រសិនបើសិស្សត្រូវការយល់កាន់តែច្បាស់អំពីគោលលទ្ធិនៃការក្បត់សាសនា និងការស្ដារឡើងវិញ មុនពេលបញ្ចប់សកម្មភាពនេះ សូមពិចារណាចំណាយពេលពីរបីនាទីពិនិត្យមើលឡើងវិញនូវសម្ភារពីមេរៀនមុន ។
សូមសរសេរការពន្យល់អំពីអ្វីដែលជាការក្បត់សាសនាដ៏ធំ និងមូលហេតុដែលវាបានកើតឡើង ។ សូមសរសេរប្រៀបដូចជាអ្នកកំពុងពន្យល់ពីការក្បត់សាសនានោះទៅកាន់កូនក្មេង ។ សូមប្រើសេចក្តីពិតចេញពី ថែស្សាឡូនីច ទី២ ២:១–៣ ជាផ្នែកនៃការពន្យល់របស់អ្នក ហើយរួមបញ្ចូលការយល់ដឹងអំពីមូលហេតុដែលការស្ដារឡើងវិញដ៏ពេញលេញនៃសាសនាចក្ររបស់ព្រះគ្រីស្ទគឺចាំបាច់ ។
រៀនអនុវត្ត
បើចាំបាច់ សូមផ្តល់ឱកាសឲ្យសិស្សពិនិត្យមើលឡើងវិញនូវគោលការណ៍នៃការទទួលបានចំណេះដឹងខាងវិញ្ញាណ ។ របៀបមួយដើម្បីធ្វើវាគឺបង្ហាញលំហាត់ផ្គូផ្គងខាងក្រោមសម្រាប់ពួកគេដើម្បីបញ្ចប់ដោយខ្លួនឯង ឬជាគូ ឬក្រុមតូចៗ ។ ម៉្យាងទៀត លំហាត់អាចត្រូវបានផ្តល់ជាអេឡិចត្រូនិកតាមរយៈការលេងល្បែងតាមអនឡាញ ប្រសិនបើសិស្សមានលទ្ធភាពប្រើប្រាស់ឧបករណ៍ដែលមានប្រសិទ្ធភាព ។ ចម្លើយត្រឹមត្រូវ គឺ ( ១ ) គ ( 2 ) ក ( ៣ ) ខ ។
នៅពេលអ្នកបន្តមេរៀននេះ អ្នកនឹងមានឱកាសជួយនរណាម្នាក់ឲ្យអនុវត្តគោលការណ៍នៃការទទួលបានចំណេះដឹងខាងវិញ្ញាណ ។ ដើម្បីដឹងថាអ្នកចងចាំគោលការណ៍ទាំងនេះបានល្អប៉ុណ្ណា សូមព្យាយាមផ្គូផ្គងសេចក្ដីថ្លែងការណ៍ខាងក្រោមជាមួយនឹងគោលការណ៍នៃការទទួលបានចំណេះដឹងខាងវិញ្ញាណ ដែលសេចក្តីថ្លែងការណ៍នីមួយៗពិពណ៌នា ។
-
« អ្នកស្វែងរកសេចក្ដីពិតដ៏ស្មោះត្រង់ គួរតែប្រុងប្រយត្ន័ចំពោះប្រភពព័ត៌មានដែលមិនគួរឲ្យទុកចិត្តផងដែរ » ។
-
« ទុកចិត្តលើព្រះ ហើយងាកទៅរកទ្រង់មុនគេតាមរយៈការអធិស្ឋានដោយស្មោះត្រង់ សិក្សាការបង្រៀនរបស់ទ្រង់ ហើយគោរពប្រតិបត្តិតាមបទបញ្ញត្តិទាំងឡាយរបស់ទ្រង់ » ។
-
« គួរពិចារណា[ សំណួរ ] ក្នុងបរិបទនៃផែនការនៃសេចក្ដីសង្គ្រោះ និង ការបង្រៀនទាំងឡាយរបស់ព្រះអង្គសង្គ្រោះ » ។
ក. ធ្វើសកម្មភាពដោយសេចក្ដីជំនឿ ។ខ. ពិនិត្យមើលគំនិត និងសំណួរទាំងឡាយដោយទស្សនវិស័យដ៏អស់កល្បមួយ ។ គ. ព្យាយាមស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព ។
ប្រសិនបើអ្នកត្រូវការពិនិត្យមើលគោលការណ៍ទាំងនេះបន្ថែមទៀត សូមអានកថាខណ្ឌទី ៥–១២ ក្នុងផ្នែក « ការទទួលបានចំណេះដឹងខាងវិញ្ញាណ » នៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ។
សូមអញ្ជើញសិស្សឲ្យសញ្ជឹងគិតអំពីការរៀបចំរបស់ពួកគេសម្រាប់ថ្នាក់ នៅពេលពួកគេបញ្ចប់សកម្មភាពរៀនអនុវត្តខាងក្រោម ។
សូមស្រមៃថាអ្នកកំពុងផ្ញើសារទៅកាន់មិត្តរបស់អ្នកឈ្មោះឃីសនដែលជាសមាជិកនៃព្រះវិហារគ្រីស្ទាន ផ្សេង ។ គាត់បានលះបង់យ៉ាងខ្លាំងចំពោះព្រះយេស៊ូវគ្រីស្ទ ហើយសិក្សាព្រះគម្ពីរប៊ីបជាញឹកញាប់ ។ នៅក្នុងសារជាអក្សរទៅកាន់អ្នកឃីសនបាននិយាយថា « ថ្ងៃនេះ គ្រូគង្វាលរបស់ខ្ញុំបានបង្រៀនថាសមាជិកនៃព្រះវិហាររបស់អ្នកជឿថា អ្នកគឺជាព្រះវិហារពិតតែមួយគត់ ហើយព្រះវិហារផ្សេងទៀតសុទ្ធតែមិនពិត ។ តើត្រឹមត្រូវទេ ? ខ្ញុំមានអារម្មណ៍ស្និទ្ធស្នាលជាមួយព្រះ ដោយសារព្រះវិហាររបស់ខ្ញុំ ។ ហេតុអ្វីបានជាវាមិនមកពីព្រះ ? »
-
ហេតុអ្វីបានជាវាជារឿងធម្មតាសម្រាប់សមាជិកនៃព្រះវិហារផ្សេងទៀតមានសំណួរបែបនេះ ?
-
តើអ្នកអាចឆ្លើយតបនឹងឃីសនក្នុងរបៀបដូចព្រះគ្រីស្ទយ៉ាងដូចម្ដេច ?
អ្នកផ្ញើសារត្រឡប់ទៅកាន់ឃីសនវិញដោយអរគុណគាត់សម្រាប់សំណួរដែលពោរពេញដោយការគិតគូររបស់គាត់ ។ អ្នកសួរថាតើអ្នកអាចចែកចាយចម្លើយរបស់អ្នកជាមួយគាត់នៅថ្ងៃបន្ទាប់បានទេ ហើយគាត់យល់ព្រម ។
សូមប្រើគោលការណ៍នៃការទទួលបានចំណេះដឹងខាងវិញ្ញាណ ដើម្បីរៀបចំ ដើម្បីការឆ្លើយតបសម្រាប់ឃីសន ។ ត្រូវប្រាកដថាប្រើគោលការណ៍ទាំងបី ។ សូមប្រើសំណួរ និងសកម្មភាពខាងក្រោម ដើម្បីជួយអ្នករៀបចំដើម្បីការឆ្លើយតបរបស់អ្នក ។
សិស្សអាចពិភាក្សាសំណួរខាងក្រោមជាគូ ឬក្រុមតូចៗ មុនពេលសរសេរចម្លើយរបស់ពួកគេដោយខ្លួនឯង ។
វាអាចមានប្រយោជន៍សម្រាប់សិស្សក្នុងការប្រគល់ច្បាប់ចម្លងនៃការឆ្លើយតបរបស់ពួកគេសម្រាប់ការពិនិត្យមើលឡើងវិញ ។ សូមប្រាកដថា សិស្សមានការយល់ដឹងគ្រប់គ្រាន់អំពីគោលលទ្ធិនៃការក្បត់សាសនា និងការស្ដារឡើងវិញ និងគោលការណ៍នៃការទទួលបានចំណេះដឹងខាងវិញ្ញាណ ។
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព
តើអ្នកអាចប្រើសេចក្ដីពិតដែលបានបង្រៀននៅក្នុង ថែស្សាឡូនីច ទី២ ២:១–៣ ដើម្បីជួយឃីសនយ៉ាងដូចម្ដេច ?
សូមស្វែងរកយ៉ាងហោចណាស់បទគម្ពីរសុន្ទរកថា ឬអត្ថបទចំនួនបីដែលអ្នកគិតថាមានប្រយោជន៍ក្នុងស្ថានភាពនេះ ។ សូមពិចារណាប្រើធនធានខាងក្រោម ៖
-
សូមចូលអាន « ការក្បត់សាសនា » និង « ការស្ដារឡើងវិញនៃដំណឹងល្អ » នៅក្នុងសេចក្ដីណែនាំដល់បទគម្ពីរទាំងឡាយ ។ ឃ្លាទាំងនេះអាចរកបាននៅលើគេហទំព័រ scriptures.ChurchofJesusChrist.org ។
-
សូមចូលមើល ឃ្លា « ការក្បត់សាសនា » នៅក្នុងGospel Topics នៅលើគេហទំព័រ ( topics.ChurchofJesusChrist.org ) ។
-
សូមយោងទៅបទគម្ពីរ និងសេចក្ដីថ្លែងការណ៍ពីមេរៀន « ថែស្សាឡូនីច ទី២ ២ » ឬពី « មេរៀនទី ១ ៖ សារដំណឹងនៃការស្ដារឡើងវិញនៃដំណឹងល្អរបស់ព្រះយេស៊ូវគ្រីស្ទ » នៅក្នុង ប្រកាសដំណឹងល្អរបស់យើង ( ឆ្នាំ ២០១៨ ) ទំព័រ៣១–៤៦ ។
-
តើវគ្គបទគម្ពីរអ្វីខ្លះ ឬប្រភពផ្សេងទៀតណាទៀតដែលអ្នកបានរកឃើញដែលអាចជួយអ្នកឆ្លើយនឹងឃីសន ?
ពិនិត្យមើលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច
-
តើសេចក្ដីពិតអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទដែលអ្នកចង់ចែកចាយជាមួយនឹងឃីសនដែលអាចជួយគាត់ឲ្យយល់ពីតម្រូវការសម្រាប់ការស្ដារឡើងវិញ ?
ធ្វើសកម្មភាពដោយសេចក្ដីជំនឿ
-
តើសកម្មភាពជាក់លាក់អ្វីខ្លះដែលអ្នកអាចអញ្ជើញឃីសនឲ្យធ្វើ ដើម្បីគាត់អាចរៀនដោយខ្លួនគាត់ថា ហេតុអ្វីបានជាការស្ដារឡើងវិញនៃសាសនាចក្ររបស់ព្រះគ្រីស្ទគឺជាការចាំបាច់ ?
-
តើបទពិសោធន៍បែបណាដែលឃីសនអាចរំពឹងថានឹងមាន ប្រសិនបើគាត់ធ្វើសកម្មភាពទាំងនេះ ?
-
តើការអញ្ជើញគាត់ឲ្យធ្វើសកម្មភាព គឺជាការធ្វើសកម្មភាពដោយសេចក្ដីជំនឿចំពោះអ្នកយ៉ាងដូចម្ដេច ?
សូមអញ្ជើញសិស្សដែលស្ម័គ្រចិត្តឲ្យចែកចាយជាមួយសិស្សទាំងអស់ក្នុងថ្នាក់នូវការឆ្លើយតបរបស់ពួកគេ រួមទាំងវគ្គបទគម្ពីរ សុន្ទរកថា ឬអត្ថបទដែលមានប្រយោជន៍ដែលពួកគេបានរកឃើញ ។ ប្រសិនបើមានពេល សូមពិចារណាអញ្ជើញអ្នកស្ម័គ្រចិត្តឲ្យចែកចាយពីរបៀបដែលពួកគេទទួលបានទីបន្ទាល់របស់ពួកគេអំពីការស្ដារឡើងវិញ ។
ការរំឭកចំណេះចំណានខាងគោលលទ្ធិ
នៅដើម ឬចុងបញ្ចប់នៃមេរៀននាពេលខាងមុខ សូមចំណាយពេលមិនលើសពី បី ទៅ ប្រាំ នាទីដើម្បីរំឭកសេចក្ដីយោងបទគម្ពីរ និងឃ្លាបទគម្ពីរគន្លឹះសម្រាប់វគ្គបទគម្ពីរចំណេះចំណានខាងគោលលទ្ធិនេះ ។ សូមប្រើសកម្មភាពទន្ទេញដូចគ្នាដែលសិស្សបានបញ្ចប់មុននេះក្នុងមេរៀននេះ ។