“ʻOku fakafiemālieʻi ʻaki ʻa kimautolu ʻe he ʻOtuá”
ʻĪmisi
Two young women sit together on a bench. One of the young women appears to be distraught, sad, or concerned about something. The other young woman is showing concern and appears to be trying to comfort the other.
ʻOku tau aʻusia kotoa pē ʻa e loto tēngihiá mo e lotomamahí, ngaahi tōnounoú, ngaahi faingataʻá, mo e ongoʻi taʻe-fiemālie mo e mahamahakí. ʻI he taimi naʻe aʻusia ai ʻe he kakai ʻo Kolinitoó ʻa e faingataʻá, naʻe tohi ʻa Paula ki he kāingalotu ʻo e Siasí ʻi aí ke hokohoko atu ʻene poupoú mo e faleʻí. Naʻá ne fakamoʻoni ki he fakafiemālie mo e melino ʻe lava ke nau maʻu ʻo fakafou ʻi he Tamai Hēvaní mo Sīsū Kalaisí (vakai, 2 Kolinitō 1:3–4). ʻE lava ke tokoniʻi koe ʻe he lēsoni ko ʻení ke mahino ha niʻihi ʻo e ngaahi founga ʻoku ʻomi ai ʻe he ʻOtuá ha fakafiemālie ki Heʻene fānaú pea ke ʻiloʻi e ngaahi founga te ke lava ai ʻo vahevahe ʻEne fakafiemālié mo e niʻihi kehé.
Fakaʻaongaʻi ʻo ha ngaahi meʻa mo ha ngaahi fakatātaá. ʻE ala faingataʻa ke mahino ha ngaahi fakakaukau ʻe niʻihi ʻo e ongoongoleleí. ʻE lava ke hoko hono fakaʻaongaʻi ʻo e ngaahi meʻá mo e ngaahi fakatātaá ko ha founga lelei ke tokoni ke mahino ki he kau akó ʻa e ngaahi tefito‘i moʻoni fakalaumālié.
Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi founga kehekehe te nau maʻu ai ha fakafiemālie ʻi he taimi ʻoku fehālaaki ai e ngaahi meʻá ʻi heʻenau moʻuí. Kapau ʻe lava, poupouʻi kinautolu ke nau ʻomi ha fakatātā pe ha meʻa ʻokú ne fakafofongaʻi ha fakafiemālie kiate kinautolu.
Ngaahi ʻEkitivitī Ako ʻOku Ala Fakahokó
Ko e hā ha meʻa ʻoku ne fakafiemālieʻi koe?
Kapau naʻe kole ki he kau akó ke nau fai ʻa e ʻekitivitī teuteu ʻa e tokotaha akó, fakaafeʻi kinautolu ke nau fakaʻaliʻali ki he kalasí ʻa e meʻa ne nau omi mo iá pea fakamatalaʻi e founga ʻokú ne ʻomi ai ha fakafiemālie kiate kinautolú.
Ko e hā pe ko hai ʻokú ke tafoki ki ai ke maʻu ha fakafiemālie lolotonga e ngaahi taimi faingataʻá?
Ko e hā pe ko hai ʻokú ne ʻoatu ʻa e fakafiemālie lahi tahá? Ko e hā hono ʻuhingá?
Hiki ha lisi ʻo e ngaahi tūkunga lolotonga hoʻo moʻuí pe ʻi he kahaʻú te ke ala fiemaʻu ai ha tokoni mo ha fakafiemālie ke ikunaʻí.
Fakalaulauloto ki he ngaahi fehuʻi ko ʻení:
Ko e hā te ke lava ai ʻo falala ʻe fakafiemālieʻi koe ʻe he Tamai Hēvaní mo Sīsū Kalaisi ʻi he meʻafoaki ʻo e Laumālie Māʻoniʻoní lolotonga e ngaahi taimi ko ʻení?
Ko e hā hono lahi hoʻo ongoʻi ʻokú ke ʻiloʻi mo maʻu e fakafiemālie ʻoku ʻomi ʻe he Tamai Hēvaní mo Sīsū Kalaisi ʻo fakafou ʻi he Laumālie Māʻoniʻoní?
Te ke lava fēfē nai ʻo vahevahe mo e niʻihi kehé ʻa e fakafiemālie ʻokú Na foakí?
Kumi e tali ki he ngaahi fehuʻi kimuʻá ʻi hoʻo ako e lēsoni ko ʻení.
Naʻe fiemaʻu ʻe Paula ke fakafiemālieʻi ʻa e Kāingalotu Kolinitoó ʻi honau ngaahi faingataʻaʻiá
Lolotonga e ʻi Masitōnia ʻa Paulá, naʻá ne maʻu ha lfakamatala mei ha ākonga ko Taitusi kuo tali lelei ʻe he Kāingalotu ʻi Kolinitoó ʻene tohi kimuʻá (vakai, 2 Kolinitō 2:13 ; 7:5). Naʻe ʻilo foki ʻe Paula e ngaahi faingataʻaʻia ʻa e Kāingalotu ko ʻení peá ne fai mo ha tohi ʻe taha (2 Kolinitō) ke ʻoange kiate kinautolu ha fakafiemālie mo vakai ki heʻenau ngaahi palopalemá.
Ko e hā ʻokú ke manatuʻi fekauʻaki mo Kolinitō mo e ngaahi faingataʻaʻia ʻa e Kāingalotu ʻi aí?
Ka faingataʻa ke tali ʻeni ʻe he kau akó, fakamanatu ange kiate kinautolu ko Kolinitoó ko ha kolo lahi mo koloaʻia pea naʻe ongoongoa ʻi he tauhi ʻotua tamapuá mo e angaʻulí. Naʻe fāinga e Kāingalotu ʻi aí ke nau uouangataha, tali e poto ʻo e ʻOtuá kae ʻikai ko e ngaahi akonaki halá, pea tauhi e fono ʻo e angamaʻá.
Lau ʻa e 2 Kolinitō 1:1–4 , ʻo tokanga ki he founga naʻe kamataʻaki ʻe Paula ʻene tohi hono ua ki he Kāingalotu Kolinitoó.
Fakakaukau ke kole ki he kau akó ke nau feinga ke ʻiloʻi e ngaahi hingoa naʻe fakaʻaongaʻi ʻe Paula ko e ʻuhinga ki he Tamai Hēvaní pea hiki leva e ngaahi hingoa ko ʻení ʻi he palakipoé.
Ko e hā naʻe makehe kiate koe ʻi he talateu ʻa Paula ki he Kāingalotú?
Ko e hā e ngaahi hingoa pe huafa naʻe fakaʻaongaʻi ʻe Paula ki he Tamai Hēvaní ʻa ia naʻá ne maʻu hoʻo tokangá?
Ko e hā ʻoku akoʻi atu ʻe he ngaahi hingoa pe huafa ko iá fekauʻaki mo e Tamai Hēvaní?
Ko e hā e moʻoni naʻe akoʻi ʻe Paula ʻi he veesi 4 ?
Ko hono maʻu ha fakafiemālie mei he Tamai Hēvaní mo hono tokoniʻi ʻo e niʻihi kehé ke nau maʻu ia
Mahalo kuó ke ʻiloʻi ha foʻi moʻoni mei he veesi 4 hangē ko ʻení: ʻI he taimi ʻoku tau maʻu ai e fakafiemālie ʻa e Tamai Hēvaní lolotonga hotau ngaahi ʻahiʻahí, te tau lava ʻo tokoni lelei ange ki he niʻihi kehé ke nau maʻu ia.
ʻI hono ʻilo ʻe he kau akó ʻa e moʻoni ʻi he 2 Kolinitō 1:4 , ʻe lava ke ke fakaafeʻi kinautolu ke fakafehoanaki e veesi ko ʻení mo e Mōsaia 18:8–10 mo kumi ʻa e ngaahi faitataú.
Fakakaukau ke vahevahe e lea ʻa ʻEletā Keuli E. Sitīvenisoni ʻi he konga “Ngaahi Fakamatala Fakamahino mo e Puipuituʻá” ʻi he fakaʻosinga ʻo e lēsoní pea fai ha ngaahi fehuʻi hangē ko ʻení.
ʻOkú ke pehē ʻoku ʻuhinga ki he hā ke “fakafiemālieʻi ʻa kinautolu ʻoku mamahiʻiá ”? ( veesi 4).
Ko e hā ʻokú ke fakakaukau ai ki he fiemaʻu ko ʻenímei he kau ākonga ʻa Sīsū Kalaisí?
Ko e fē ha taimi kuó ke maʻu ai pe ko ha taha ʻokú ke ʻiloʻi ha tokoni mo ha fakafiemālie mei he Tamai Hēvaní lolotonga ha faingataʻa?
Ko e hā naʻá ke ako pe te nau ako mei he aʻusia ko iá?
ʻOkú ke pehē ko e hā te ke lava ʻo fai ke maʻu lahi ange ai e fakafiemālie ʻa e ʻOtuá ʻi he taimi ʻokú ke fiemaʻu aí?
Kapau ʻoku ʻikai fuʻu fakatāutaha e tali ʻa e kau akó, fakaafeʻi ha niʻihi ʻo e kau akó ke vahevahe ʻenau ngaahi aʻusiá. ʻE ala tokoni ki he kau akó ke nau fanongo ki ha ngaahi founga lahi ʻoku fakafiemālieʻi ai kitautolu ʻe he Tamai Hēvaní. Fakakaukau ke tānaki atu foki ki ai mo ha fakamoʻoni mo ha ngaahi aʻusia fakatāutaha.
Lau ʻa e lea ko ʻeni naʻe fai ʻe Palesiteni Sipenisā W. Kimipolo (1895–1985).
ʻĪmisi
Portrait painting of President Spencer W. Kimball.
ʻOku ʻafioʻi kitautolu ʻe he ʻOtuá, pea ʻokú Ne tokanga mai. Ka ‘okú ne fa‘a feau ʻetau ngaahi fiemaʻú ʻo fakafou mai ʻi ha taha kehe. Ko ia, ʻoku mahuʻinga ai ke tau fetokoniʻaki ʻi he puleʻangá.
Ngaahi Akonaki ʻa e Kau Palesiteni ʻo e Siasí: Sipenisā W. Kimipolo [2006], 100)
ʻOkú ke pehē ko e hā ʻoku faʻa fakaʻaongaʻi ai kitautolu ʻe he Tamai Hēvaní ke tokoniʻi e niʻihi kehé lolotonga honau ngaahi faingataʻaʻiá ke ongoʻi ʻEne ʻofá mo e fakafiemālié?
Fakakaukau ki ha taha ʻokú ke ʻiloʻi ʻoku lolotonga fehangahangai mo ha faingataʻa. Fakakaukauʻi ʻi he faʻa lotu ʻa e founga te ke ala tokoniʻi ai kinautolu ke nau ongoʻi ʻa e fakafiemālie ʻoku ʻomi ʻe he Tamai Hēvaní ʻi hoʻo fai ʻení:
A. Fakakaukau ki he meʻa kuó ke ako mei he 2 Kolinitō 1:1–4 ʻe ala tokoni ki he tokotaha ko ʻení.
E. Lau ha veesi ʻe ua pe lahi ange mei he ngaahi veesi ko ʻení, ʻa ia ʻoku ʻi ai e ngaahi akonaki kehe ʻa Paula ki he kakai Kolinitoó fekauʻaki mo e ngaahi faingataʻá. Kumi ha kupuʻi lea pe veesi ʻokú ke ongoʻi ʻe mahuʻingamālie ki he tokotaha naʻá ke filí.
F. Fai ha meʻa he taimí ni ke tokoni ki he tokotahá ni ke ne ongoʻi e fakafiemālie ʻa e Tamai Hēvaní. Fakakaukau ke ke lotua kinautolu ʻo hangē ko e lotua ʻe he Kāingalotu Kolinitoó ʻa Paulá (vakai, 2 Kolinitō 1:11). Tānaki atu ki ai, te ke lava ʻo tohi ki he tokotahá ni ha pōpoaki fakalotolahi ʻo hangē ko ia naʻe fai ʻe Paula ki he kakai Kolinitoó, neongo ʻe lava ke hoko hoʻo pōpoakí ko ha text, ʻīmeili, pe ko ha kiʻi tohi kae ʻikai ko ha tohi kakato. (Fakakaukau ke fakakau ʻa e meʻa naʻá ke ako ʻi he lēsoni ko ʻení mei he 2 Kolinitō 1; 4 kae pehē ki ha faʻahinga aʻusia fakataautaha pē ʻe ala tokoni.)
H. Faʻu ha ngaahi palani lahi ange ke tokoniʻi ʻa e tokotahá ni. ʻE lava ke ueʻi koe ʻe he Tamai Hēvaní ke ke fai ha ngaahi ngāue lahi ange, hangē ko haʻo ʻaʻahi kiate kinautolu pe tokoniʻi kinautolu ʻi ha founga kehe. Fakapapauʻi ke hiki ha faʻahinga palani ʻokú ke fakakaukau ki ai ʻi ha feituʻu ʻe fakamanatu atu ai ke ke muimuiʻi, ʻo hangē ko hoʻo tohi māhiná, ʻi hoʻo telefoni toʻotoʻó, pe ʻi ha laʻipepa te ke toki sio ki ai ʻamui ange.
Hili hono ʻoange ha taimi feʻunga ki he kau akó, fakaafeʻi kinautolu ke vahevahe ha meʻa ʻe taha ʻoku nau palani ke fai ke tokoni ki he tokotaha ne nau fakakaukau ki aí. Neongo ʻe feʻunga ke vahevahe ʻe he kau akó ʻa e ʻahiʻahi fakalūkufua pe tūkunga ʻo e tokotahá, fakamanatu ange ke ʻoua naʻa nau vahevahe pe ko hai ʻa e tokotaha ko iá pe fakahoko ha ngaahi fakamatala pau ʻe lava ai ʻe he kau ako kehé ʻo ʻilo e tokotaha ko iá.
Fakamoʻoni ki he ngaahi tefitoʻi moʻoni naʻe akoʻi ʻi he lēsoni ko ʻení pea poupouʻi e kau akó ke nau muimuiʻi ʻenau ngaahi palaní ke fakafiemālieʻi ha taha kehe.
Fakamatala Fakamahinó mo e Puipuituʻá
2 Kolinitō 1:4 . Ko e hā ʻoku ʻamanaki mai ai e ʻEikí ke u tokoni ʻo fakafiemālieʻi e kakai faingataʻaʻiá?
Naʻe akoʻi ʻe ʻEletā Keuli E. Sitīvenisoni ‘o e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni:
ʻĪmisi
Official portrait of Elder Gary E. Stevenson of the Quorum of the Twelve Apostles, 2015.
ʻOku fekauʻi kitautolu ki he ngāue ko ʻení, mei he taimi pē ʻoku tau ʻalu hake ai mei he vai ʻo e papitaisó. ʻOku tau tokoni ʻi he ʻofa ki he niʻihi kehé he ko e meʻa ia kuo fekau ʻe hotau Fakamoʻuí ke tau faí. … Ko ha taimi pē ʻoku faingataʻaʻia fakatuʻasino pe fakalaumālie ai hotau kaungāʻapí, ʻoku tau lele ke tokoni. ʻOku tau fefuaʻaki ʻetau ngaahi kavengá koeʻuhí ke nau maʻamaʻa. ʻOku tau tangi fakataha mo kinautolu ʻoku tangí. ʻOku tau fai ha fakafiemālie kiate kinautolu ʻoku fiemaʻu ha fakafiemālié. ʻOku fiemaʻu ʻeni ʻe he ʻEikí meiate kitautolu, ʻi he ʻofa. Pea ʻe hokosia ʻa e ʻaho ʻe ʻekeʻi ai meiate kitautolu ʻa e meʻa ʻoku tau fai ʻi he ngāue fakaetauhi ki Heʻene tākangá.
2 Kolinitō 4:17 . Ko e hā e ʻuhinga ʻa Paula ʻi heʻene lau ki hotau ngaahi faingataʻa fakamatelié ko ha “mamahi maʻamaʻa”?
Naʻe akoʻi ʻe ʻEletā Paula V. Sionisoni ‘o e Kau Palesitenisī ‘o e Kau Fitungofulú:
ʻĪmisi
Elder Paul V. Johnson was sustained as a General Authority Seventy on April 2, 2005.
ʻI he uhouhonga ʻo e ngaahi faingataʻá, ʻoku ʻikai faʻa malava ke tau sio ki he ngaahi tāpuaki ʻoku mahulu hake ia he mamahí, ongoʻi ngalivalé pe lotomamahi ʻoku tau foua he taimi ko iá. … Naʻe akonaki e ʻAposetolo ko Paulá ʻo pehē, “He ko homau mamahi maʻamaʻá ni, ʻa ia ʻoku ʻosingofuá, ʻoku fakatupu maʻamautolu ʻa e lelei ʻoku lahi hake fakamanavahē ʻaupito ʻaupito pea mamafa mo taʻengata” [ 2 Kolinitō 4:17 ]. Mālie ko hono fakaʻaongaʻi ʻe Paula e foʻi lea “mamahi maʻamaʻá.” Ko e haʻu ia mei ha taha naʻe tā, tolomakaʻi, tukuvakā, ngāue pōpula mo ne aʻusia ha ngaahi faingataʻa kehe. ʻOku ʻikai ke u tui ʻoku lau ʻe ha tokolahi ʻoku maʻamaʻa honau ngaahi mamahí. Ka ʻi hono fakafehoanaki ia ki he ngaahi tāpuaki mo e tupulaki ʻoku tau maʻu, ʻi he moʻuí ni pea mo e taʻengatá, ʻoku maʻamaʻa ʻaupito pē hotau ngaahi mamahí. …
ʻOku tau faʻa fie tupulaki taʻe kau ai ha mamahi pea tau fie fakatupulaki hotau mālohí taʻe kau ai e faingataʻá. Ka he ʻikai lava ke maʻu e tupulakí ʻi ha founga faingofua. ʻOku mahino lelei kiate kitautolu he ʻikai teitei lava ke tuʻukimuʻa ʻi māmani ha taha sipoti ʻoku fehiʻa ki he fakamālohisino fakamātoató. Kuo pau ke tau matuʻaki tokanga ke ʻoua naʻa tau fehiʻa he ngaahi meʻa ʻe tokoni ke tau maʻu ʻa e anga faka-ʻOtuá.
Fakaafeʻi e kau akó ke kumi ha ngaahi fakamatala kehe ʻi he folofolá pe mei he hisitōlia ʻo e Siasí ʻoku hā ai ʻe lava ke ʻomi ʻe he Tamai Hēvaní ha fakafiemālie. Hangē ko ʻení, ʻe lava ke fakamatalaʻi fakanounou ʻe he kau akó ʻa e fakamatala ʻi he Tohi ʻa Molomoná ʻi he taimi naʻe fakamaʻamaʻa ai ʻe he ʻEikí e ngaahi kavenga fakamafasia ʻo e kakai ʻo ʻAlamaá lolotonga ʻenau nofo pōpula ki he kau Leimaná (vakai, Mōsaia 24), pe ko ʻenau aleaʻi e founga naʻe fakafiemālieʻi ai ʻe he ʻEikí ʻa Siosefa Sāmita ʻi he Fale Fakapōpula Lipetií (vakai, Tokāteline mo e Ngaahi Fuakava 121). ʻOange ha taimi ki he kau akó ke nau fekumi ʻi he ngaahi folofolá mo e ngaahi maʻuʻanga tokoni kehé kimuʻa pea nau vahevahé.
Fakanonga ʻo fakafou ʻia Sīsū Kalaisi
Hili hono fehuʻi ki he kau akó pe ko e hā ʻoku nau ongoʻi ai ʻoku faʻa fakaʻaongaʻi kitautolu ʻe he Tamai Hēvaní ke fakafiemālieʻi e niʻihi kehé, fakakaukau ke lau ʻa e 2 Kolinitō 1:5–7 mo e kau akó pea fakaafeʻi kinautolu ke nau fekumi ʻi he ngaahi veesi ko ʻení ki ha maʻuʻanga fakafiemālie ʻe taha naʻe ʻomi ʻe he Tamai Hēvaní: ko e Fakamoʻui ko Sīsū Kalaisí. Fehuʻi ki he kau akó pe ko e hā ʻoku nau ongoʻi ai ʻoku hoko ʻa Sīsū Kalaisi ko ha maʻuʻanga fakanonga mālohi ʻi he taimi ʻoku nau aʻusia ai e ngaahi ʻahiʻahí. Fakakaukau ke fakaafeʻi e kau akó ke nau fakafehoanaki e ngaahi veesi ko ʻení mo e ʻAlamā 7:11–13 .
