ʻE lava ke faingataʻa ke ʻiloʻi pe kuo tau fakatomala kakato. Kuó ke fāifeinga nai ke ʻiloʻi pe kuó ke fakatomalaʻi kakato ha meʻa pe ʻikai? ʻI he fuofua tohi ʻa e ʻAposetolo ko Paulá ki he kakai Kolinitoó, naʻá ne valokiʻi ha niʻihi ʻo e Kāingalotu Kolinitoó ʻi heʻenau faiangahalá. Naʻe fiefia mo fiemālie ʻa Paula ʻi heʻene maʻu kimui ange ha tala naʻe aʻusia ʻe he Kāingalotu Kolinitoó ʻa e fakatomala moʻoní. ʻE lava ke tokoni atu ʻa e lēsoni ko ʻení ke mahino kiate koe ha konga mahuʻinga ʻo e fakatomala moʻoní mo tokoniʻi koe ke ke ofi ange kia Sīsū Kalaisi.
Teuteu ʻa e tokotaha akó: Fakaafeʻi e kau akó ke nau fakakaukau ki he founga te nau lava ai ʻo ʻiloʻi pe kuo nau aʻusia ʻa e fakatomala moʻoní. ʻE lava foki ke fakaafeʻi kinautolu ke ako ʻa e konga “Godly sorrow leads to repentance” (“ʻOku fakaiku e mamahi ʻoku taau mo e ʻOtuá ki he fakatomalá”)mei he ʻū lēsoni Haʻu, ʻo Muimui ʻIate Aú (“Sepitema 11–17. 2 Kolinitō 1–7: ‘Be Ye Reconciled to God,Mou Fakalelei mo e ʻOtuá,’” Haʻu ʻo, Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻoú 2023).
Ngaahi ʻEkitivitī Ako ʻOku Ala Fakahokó
Mamahi ʻOku Taau mo e ʻOtuá
ʻE lava ke lau leʻolahi mo aleaʻi fakakalasi ʻa e tūkunga ko ʻení. ʻE lava foki ke paaki pea ʻoange ki he kau akó ke nau lau mo aleaʻi tautau toko ua pe fakakulupu iiki.
Lau e tūkunga ko ʻení.
ʻI ha ʻinitaviu ke maʻu ha lekomeni temipale ke mali temipalé, naʻe vete ʻe ha finemui ha ngaahi angahala ʻi he kuohilí ki heʻene pīsopé. Hili haʻana pōtalanoa fuoloa ange, naʻe mahino ki he pīsopé naʻe teʻeki fakatomalaʻi moʻoni ʻe he finemuí ʻene ngaahi angahalá pea ʻoku mamafa feʻunga ʻene ngaahi angahalá ke ne taʻetaau ke maʻu ha lekomeni temipale. Naʻe fakamatalaʻi ange ʻe he pīsopé kuo pau ke tatali hono maʻu ʻe he finemuí ha lekomeni temipale kae ʻoua kuó ne fakatomala kakato. Naʻá ne (finemui) hohaʻa ʻo pehē kuó ne fakatomala koeʻuhí kuo fuoloa ʻa e teʻeki ke ne toe fakahoko ʻa e ngaahi angahala ko iá. Naʻe fakamatalaʻi ange ʻe he pīsopé ʻoku ʻikai ko ha fakatomala kakato hono taʻofi pē ʻo e angahalá, peá ne fakaafeʻi ia ke ne kamata fakamātoato e founga ʻo e fakatomala moʻoní.
ʻOku fakamatala ʻe he finemuí ki heʻene pīsopé ʻokú ne fuʻu loto mamahi he kuó ne ʻosi talaange ki he kakai kehé fekauʻaki mo e malí mo faʻu ha palani ke fakafiefiaʻi ia. Naʻá ne hohaʻa fekauʻaki mo e ongoʻi mā ʻi hono fakatoloi ʻene ngaahi palani malí pea mo e founga te ne talaange ai ki he tokotaha ʻokú na teu malí mo ʻene ongomātuʻá. Naʻá ne ʻeke ange pe ʻoku ʻi ai nai ha founga ʻe lava ke sila ai ʻi he temipalé ʻo hangē ko e palaní kae toki ngāueʻi e fakatomalá ʻamui ange.
Makatuʻunga ʻi he tali ʻa e finemuí ki he pīsopé, ko e hā naʻe hohaʻa taha ki ai ʻa e finemuí?
Ko e hā ka faingataʻa ai ke ne fakatomala kakato tuʻunga ʻi he meʻa ʻoku nofotaha ai ʻene tokangá?
Fakalaulauloto ki he meʻa ʻoku ʻikai mahino kakato ki he finemui ko ʻení fekauʻaki mo e fakatomalá. ʻI hoʻo hoko atu e lēsoni ko ʻení, kumi ha tefitoʻi moʻoni ʻe tokoni ki he finemui ko ʻení. Fakalaulauloto foki pe ʻokú ke fie maʻu ʻa e tefitoʻi moʻoni ko ʻení ʻi hoʻo fakatomalá.
Mamahi ʻoku taau mo e ʻOtuá
Ko e taha ʻo e ngaahi taumuʻa ʻa Paula ʻi heʻene fai ʻene tohi kimuʻa ki he kakai Kolinitoó ko hono poupouʻi ha niʻihi fakafoʻituitui pau ke fakatomala. ʻI heʻene tohi vakaiʻí, naʻe fakaongoongoleleiʻi ai ʻe Paula ʻa kinautolu naʻá ne fakatonutonu koeʻuhí ko ʻenau fakatomala fakamātoató pea akoʻi fekauʻaki mo ha konga mahuʻinga ʻo e fakatomalá.
Lau ʻa e 2 Kolinitō 7:8–11 , ʻo kumi ki he ngaahi fakakaukau naʻe ʻoange ʻe Paula fekauʻaki mo e fakatomalá ʻe ala tokoni ki he fefine ʻi he tūkungá.
Ke maʻu ha ngaahi fakakaukau mei he Tohi ʻa Molomoná fekauʻaki mo e mamahi ʻoku taau mo eʻOtuá, lau ʻa e ʻAlamā 36:12–13 ; 42:29 .
Ko e hā ha ngaahi fakakaukau naʻá ke maʻu ʻe tokoni ki he fefine ʻi he tūkungá?
ʻE ala tokoni fēfē nai ʻa e ngaahi akonaki ko iá kiate koe?
Ko e moʻoni ʻe taha mahalo kuó ke ʻiloʻi ʻoku fakaiku ʻa e mamahi ʻoku taau mo eʻOtuá ki he fakatomala fakamātoató.
Ko e hā ha faʻahinga ʻo e mamahí naʻe lave ki ai ʻa Paula ʻi he veesi 10 ?
Ko e hā naʻá ke mamata ki ai ʻi he tūkunga ko ʻení ʻokú ne fokotuʻu mai ʻa e faʻahinga mamahi naʻe ongoʻi ʻe he finemuí?
Faʻu ha kōlomu ʻe ua ʻi hoʻo tohinoa akó ʻaki haʻo tā ha laine mei ʻolunga ki lalo ʻi lotomālie ʻi ha peesi. Tohiʻi ʻa e Mamahi ʻOku Taau mo eʻOtuá ʻi ʻolunga he kōlomu ʻe taha pea Mamahi Fakaemāmaníʻi ʻolunga he kōlomu ʻe tahá.
Tānaki atu hoʻo ngaahi fakakaukaú ki he ngaahi fehuʻi ko ʻení ʻi lalo ʻi he ʻuluʻi tohi takitaha.
Ko e hā ʻoku akoʻi ʻe Paula ʻi he veesi 8–10 fekauʻaki mo e faikehekehe ʻi he mamahi ʻoku taau mo eʻOtuá mo e mamahi fakamāmaní?
ʻOkú ke pehē ko e hā mo ha toe ngaahi faikehekehe ʻoku ʻi he vahaʻa ʻo e ongo founga ʻo e mamahí?
Lau e ngaahi fakamatala ko ʻení, pea kumi ki ha toe ngaahi fakakaukau fekauʻaki mo e mamahi ʻoku taau mo eʻOtuá mo e mamahi fakamāmaní. Tānaki atu e ngaahi fakakaukau ko ʻení ki hoʻo sātí.
Fakakaukau ke fakaʻaliʻali e ngaahi lea (quotes) ko ʻení ke lau ʻe he kau akó pe vahevahe e kalasí ke nau tauhoa pea ʻoange ki he hoa takitaha ha seti ʻe taha ʻo e ngaahi leá. ʻE lava ke nau takitaha lau mo fakaʻilongaʻi ha lea, pea fakafetongi mo honau hoá, lau ʻa e lea hono uá, pea sio ki he meʻa naʻe fakaʻilongaʻi ʻe honau hoá.
Naʻe ʻomi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fakaʻuhinga ko ʻeni ʻo e mamahi ʻoku taau mo e ʻOtuá:
ʻĪmisi
[ʻOku ʻuhinga ʻa e mamahi ʻoku taau mo e ʻOtuá] ki hono ongoʻi ha loto mamahi moʻoni mo ha ongoʻi halaia ʻi ha tōʻonga naʻá ne tānaki atu ha mamahi mo ha faingataʻaʻia ki he Fakamoʻuí, ʻi he taimi ʻoku toʻo ai ʻe hotau laumālié ha faʻahinga fakaʻikaiʻi pe kumi ʻuhinga. …
Mahalo ko e fakaakeake maʻongoʻonga taha ʻo e moʻui ko ʻení ki ha foha pe ʻofefine pelepelengesi fakalaumālie ʻo e ʻOtuá ko hono ʻiloʻi fakataautaha ko ia ʻoku moʻoni ʻaupito hono totongi ʻe Sīsū Kalaisi e angahalá pea naʻe ʻikai fakangatangata pē ʻEne mamahí maʻá e tokotaha kehe kotoa pē—ka kiate koe foki mo au! … ʻI he mahino fakalaumālie kiate kitautolu kuó Ne mamahi koeʻuhí ko ʻetau ngaahi angahalá, ʻoku tau ongoʻi lotomamahi koeʻuhí ko ʻEne mamahí. ʻOku tau ʻiloʻi ko e konga ia ʻo e palani ʻa ʻetau Tamaí, ka ʻoku tau ongoʻi lōmekina ʻi he meʻaʻofa ʻokú Ne foaki mai maʻatautolú. ʻOku ʻave kitautolu ʻe he meʻa fakaofó ni, ʻa e loto houngaʻia ko ʻení, mo e ʻofa ʻaufuatō ko ʻeni ʻo ha Fakamoʻui kuó Ne fakahoko ʻeni maʻatautolú, ke tau tūʻulutui ʻi he taimi ʻoku fonu ai hotau laumālié ʻi he mamahi ʻoku taau mo eʻOtuá.
(Neil L. Andersen, The Divine Gift of Forgiveness[2019], 149, 150)
Naʻe akoʻi ʻe Palesiteni Tietā F. ʻUkitofa, ʻo e Kau Palesitenisī ʻUluakí he taimi ko iá, ʻa e meʻá ni fekauʻaki mo e mamahi ʻoku taau mo e ʻOtuá:
ʻĪmisi
ʻOku ueʻi hake ʻe he mamahi ʻoku taau mo e ʻOtuá ʻa e liliú mo e ʻamanaki leleí tuʻunga ʻi he Fakalelei ʻa Sīsū Kalaisí. ‘Oku fusi hifo kitautolu ʻe he mamahi fakamāmaní, pea toʻo atu e ‘amanaki leleí, pea fakalotoʻi kitautolu ke tau fakavaivai ki ha ngaahi ‘ahiʻahi kehe.
ʻOku fakatupu ʻe he mamahi ʻoku taau mo e ʻOtuá ʻa e uluí mo ha liliu ʻo e lotó. ‘Okú ne ngaohi kitautolu ke tau fehiʻa ʻi he angahalá kae ʻofa ʻi he meʻa ʻoku leleí. ʻOkú ne poupouʻi kitautolu ke tau tuʻu hake ʻo ʻaʻeva ʻi he maama ʻo e ʻofa ʻa Kalaisí. Ko e fakatomala moʻoní ko hano liliu ka ‘oku ‘ikai ko hano fakamamahiʻi. ‘Io,ʻoku faʻa fakamamahi e fakaʻiseʻisá mo e mamahi moʻoni ko e talangataʻá pea ko e ongo sitepu mahuʻinga iaʻi he founga toputapu ʻo e fakatomalá. Ka ko e taimi ko ia ‘oku langaki ai ‘e he loto-halaiá haʻate fakaliliʻa ‘iate kita peé, pe taʻofi kitautolu mei haʻatau toe tuʻu haké, ‘okú ne taʻofi leva ‘e ia pea ‘ikai ke ne poupouʻi ‘a ‘etau fakatomalá.
Ko e hā e ngaahi pōpoaki naʻe ʻaonga lahi taha kiate koé? Ko e hā hono ʻuhingá?
ʻE tokoniʻi fēfē nai koe ʻi he founga ʻo e fakatomalá ʻi hoʻo ongoʻi naʻe mamahi fakatāutaha ʻa e Fakamoʻuí koeʻuhí ko hoʻo ngaahi angahalá?
Fakakaukau ki he tūkunga ʻi he vahaʻa ʻo e finemuí mo ʻene pīsopé.
Ko e hā te ke lava ʻo vahevahe mo e finemuí fekauʻaki mo Sīsū Kalaisi mo e mamahi ʻoku taau mo e ʻOtuá ʻa ia ʻe lava ʻo tokoniʻi ia ke ne fakaafeʻi e ngaahi tāpuaki ʻo e fakatomalá?
Fakakaukau ʻi ha kiʻi taimi ki hoʻo feinga ke fakatomalá. Fakakaukau ki he meʻa naʻe ongoʻi mo aʻusia ʻe he Fakamoʻuí ʻi heʻene mamahi koeʻuhí ko hoʻo ngaahi angahalá. Ko e hā te ke lava ʻo fai ke fakaava kakato ange ai ho lotó ke ke ongoʻi ʻa e mamahi ʻoku taau mo e ʻOtuá pea fakaafeʻi ʻa e mālohi faifakamoʻui ʻo e Fakamoʻuí ki hoʻo moʻuí? Fakakaukau ke hiki hoʻo tali ki he fehuʻi ko ʻení ʻi ha tohinoa pe tohi fakamatala fakatāutaha.
Kapau ʻoku ʻikai fuʻu fakataautaha, fakaafeʻi e kau akó ke nau vahevahe e meʻa ne nau ako fekauʻaki mo e mamahi ʻoku taau mo e ʻOtuá ʻi he lēsoni ko ʻení pea mo e founga ʻe ala tokoni ai kiate kinautolú. Tānaki atu ha fakamoʻoni fakatāutaha ki he mahuʻinga ʻo e mamahi ʻoku taau mo eʻOtuá ʻi he founga ʻo e fakatomalá. Fakaafeʻi kinautolu ke nau fakalaulauloto pe ʻoku ʻi ai ha fiemaʻu lahi ange ki ha mamahi ʻoku taau mo eʻOtuá ʻi heʻenau moʻuí.
Fakamatala Fakamahinó mo e Puipuituʻá
ʻE lava fēfē nai ke mahino lelei ange kiate au ʻa e faikehekehe ʻi he vahaʻa ʻo e mamahi ʻoku taau mo eʻOtuá mo e mamahi fakamāmaní?
Lolotonga e ngāue ʻa ʻEletā D. Seti Lisiatesoni ko ha Fitungofulu Faka-ʻĒliá, naʻá ne pehē:
ʻĪmisi
Ko ha faikehekehe lahi ʻi he [mamahi ʻoku taau mo e ʻOtuá pea mo e mamahi fakamāmaní] ko hona tupuʻangá. ʻOku poupouʻi ʻe Sētane ʻa e mamahi fakamāmaní. Ko e loto-mamahi ko iá ʻi hono maʻú, ʻi he ʻikai ke kei lava ʻo hokohoko atu ʻa e faiangahalá, pe fakafepakiʻi pē kita ʻaki ʻa e fehiʻá pe fakaliliʻa pē ʻiate kitá.
ʻI he tafaʻaki ʻe tahá, ko e mamahi ʻoku taau mo e ʻOtuá ko ha mamahi ia ʻoku foaki mai ko ha meʻaʻofa mei he ʻOtuá kiate kinautolu ʻoku nau fie tali iá. ʻOku tataki kitautolu ʻe he mamahi ʻoku taau mo eʻOtuá ki ha tuʻunga kakato ʻo hono ongoʻi e mafatukituki ʻo ʻetau ngaahi angahalá ka ʻi he ʻilo te tau lava ʻo tauʻatāina meiate kinautolu.
(D. Chad Richardson, “Forgiving Oneself,”Ensign, Mar. 2007, 32)
ʻI Sepitema 2019, naʻe paaki ai ʻe he makasini New Era ha tohi fakamoʻoni (infographic) ʻo fakatefito ʻi he ngaahi akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa ia ʻe ala tokoni atu ke ke fakafaikehekeheʻi lahi ange ai e mamahi ʻoku taau mo eʻOtuá pea mo e mamahi fakamāmaní.
ʻE lava ke fakaʻaongaʻi ʻa e fokotuʻu ko ʻení ko ha fakakaukau ʻe taha ki he lēsoní. Fakaafeʻi e kau akó ke nau lau ʻa e 2 Kolinitō 6:14–7:1 pea kumi ʻa e faleʻi ʻa Paula ki he Kāingalotú mo e ngaahi talaʻofa mei he ʻEikí. (Fakatokangaʻi ange ko e ongo foʻi lea “Pileali” mo e “taʻetui” ʻi he [ 2 Kolinitō [6:15 ] ko ha ongo foʻi lea ia ʻoku ʻuhinga ki he kau faiangahalá.) Mahalo ʻe ʻaonga atu e ngaahi fehuʻi ke aleaʻi ko ʻení:
Ko e hā ha ngaahi sīpinga ʻo ha ngaahi meʻa taʻetaau ʻi hotau kuongá ni?
ʻOkú ke pehē ʻoku ʻuhinga ki he hā [ʻa e pehē], ʻe tali koe ʻe he ʻOtuá pea hoko ko ha Tamai kiate koe?
Te tau lava fēfē nai ʻo moʻui ʻi he māmaní lolotonga ʻetau fakamavaheʻi kitautolu mei he ngaahi meʻa taʻemaʻá?
Ko ha sīpinga ʻo hono ikunaʻi ʻo e mamahi fakamāmaní pea mo hono maʻu ʻa e melinó ʻo fakafou ʻia Kalaisí
