2 Kolinitō 1–7

Vakai Fakalūkufuá

ʻI he taimi naʻe aʻusia ai ʻe he kakai ʻo Kolinitoó ʻa e faingataʻá, naʻe tohi ʻa Paula ki he kāingalotu ʻo e Siasí ʻi aí ke hokohoko atu ʻene poupoú mo e faleʻí. Naʻá ne fakaafeʻi kinautolu ke nau fefakamolemoleʻaki, koeʻuhí ko e lelei ʻa e tokotaha ʻoku fakamolemoleʻí pea pehē foki ki heʻenau lelei ʻanautolú. Naʻá ne akoʻi ʻe lava ke huhuʻi kinautolu mei he angahalá ʻo fakafou ʻi he Fakalelei ʻa Kalaisí pea fakafoki mai kinautolu ki ha vā fetuʻutaki lelei mo e ʻOtuá. Naʻe fiefia mo fiemālie ʻa Paula kimui ange ʻi ha tala naʻá ne maʻu naʻe aʻusia ʻe he Kāingalotu Kolinitoó ʻa e fakatomala moʻoní.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ki he lēsoni takitaha.

2 Kolinitō 1; 4

Taumuʻa ʻo e lēsoní: ʻE lava ke tokoniʻi koe ʻe he lēsoni ko ʻení ke mahino ha niʻihi ʻo e ngaahi founga ʻoku ʻomi ai ʻe he ʻOtuá ha fakafiemālie ki Heʻene fānaú pea mo ʻiloʻi e ngaahi founga te ke lava ai ʻo vahevahe ʻEne fakafiemālié mo e niʻihi kehé.  

Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi founga kehekehe te nau maʻu ai ha fakafiemālie ʻi he taimi ʻoku fehālaaki ai ha ngaahi meʻa ʻi heʻenau moʻuí. Kapau ʻe lava, poupouʻi kinautolu ke nau ʻomi ha fakatātā pe ha meʻa ʻokú ne fakafofongaʻi ha maʻuʻanga ʻo e fakafiemālié kiate kinautolu.

Fokotuʻu ki he ako konifelenisi fakavitioó: ʻI he taimi ʻoku kole ai ki he kau akó ke nau fakakaukau ki he ngaahi meʻa ʻokú ne fakafiemālieʻi kinautolú, fakakaukau ke fakaʻaliʻali ha ngaahi meʻa pe fakatātā fakataautaha mei ʻapi. ʻE lava ke tokoni hono fakaʻaliʻali e ngaahi meʻa ko ʻení ʻi he screen pea fakamatalaʻi honau mahuʻingá ke fakafehokotaki ʻa e vāmamaʻó pea faʻu ha ʻātakai ʻoku fakafiemālie ki he akó.

2 Kolinitō 2

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke fakatupulaki ʻenau mahino ki he mahuʻinga ʻo e fakamolemolé mo ʻenau holi ke fakamolemoleʻi e niʻihi kehé.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ha sīpinga ʻo ha taha ʻoku nau ʻilo naʻá ne fakahoko e fakamolemole faka-Kalaisí ki ha taha kehe.

Fokotuʻu ki he ako konifelenisi vitioó: Ki he 2 Kolinitō 2:5–11 , fakaʻaongaʻi e polokalama palakipoé ke faʻu ʻaki ha kōlomu ʻe ua. Fakahingoa e kōlomu ʻe taha “Ko e hā e founga ʻoku totonu ke tau fakafōtunga ai ki ha taha kuó ne fakatupu loto-mamahi kiate kitautolu?” pea ko e kōlomu ʻe tahá “Ko e hā ʻoku totonu ai ke tau fai pehē ki he kakaí?” ʻE lava leva ke fakaafeʻi e kau akó ke vahevahe ʻenau ngaahi fakakaukaú ke ke taipeʻi, pe te nau taipeʻi ʻenau talí ʻiate kinautolu pē ʻo fakaʻaongaʻi ha meʻangāue ki he kiʻi fakamatalá (annotation tool).

2 Kolinitō 5

Taumuʻa ‘o e lēsoní: ʻE lava ke tokoniʻi koe ʻe he lēsoni ko ʻení ke ke ofi ange ki he ʻOtuá pea hoko ko e tokotaha ʻokú Ne finangalo ke ke aʻusiá.

Teuteu ʻa e tokotaha akó: Fakaafeʻi e kau akó ke nau fakalaulauloto ki ha ngaahi taimi ne nau ongoʻi ofi ai ki he ʻOtuá mo e ngaahi taimi ne nau ongoʻi mamaʻo ai meiate Iá, pea haʻu mateuteu ki he kalasí ke fakaʻaongaʻi e ngaahi aʻusia ko ʻení.

Meʻa ke fakaʻaliʻalí: Ko e ngaahi fehuʻi ʻe tolu ʻe fakakaukauʻi ʻe he kau akó ʻi heʻenau ako ʻa e 2 Kolinitō 5:17–21 , pea pehē ki he ngaahi fakakaukau ʻe fā te nau fakalaulauloto ki ai ʻamui ange ʻi he lēsoní (kamata ʻaki ʻa e “ʻE ngali fēfē nai mo ongo fēfē ʻa e fakalelei ki he ʻOtuá ʻo taʻengata?”)

Fokotuʻu ki he ako konifelenisi fakavitioó: ʻI he kamataʻanga ʻo e lēsoní, fakaafeʻi e kau akó ke nau vahevahe ʻi he polokalama fetalanoaʻakí ha ngaahi tūkunga moʻoni ʻo e moʻuí ʻe ala faitatau mo e ngaahi tūkunga ʻi he lēsoní. ʻE lava ke fakaafeʻi kinautolu ke nau fakakaukau ki he founga ʻe lava ke tokoni ai e ngaahi moʻoni ʻi he lēsoni ko ʻení ʻi he ngaahi tūkunga ko iá.

2 Kolinitō 7

Taumuʻa ‘o e lēsoní: ʻE lava ke tokoni atu ʻa e lēsoni ko ʻení ke mahino kiate koe ha konga mahuʻinga ʻo e fakatomala moʻoní mo tokoniʻi koe ke ke ofi ange kia Sīsū Kalaisi.

Teuteu ʻa e tokotaha akó: Fakaafeʻi e kau akó ke nau fakakaukau ki he founga te nau lava ai ʻo ʻiloʻi pe kuo nau aʻusia ʻa e fakatomala moʻoní. ʻE lava foki ke fakaafeʻi kinautolu ke nau ako ʻa e konga “[ʻOku takiekina ʻa e mamahi fakaʻotuá ki he fakatomalá]” mei he ngaahi lēsoni ʻo e Haʻu,ʻo Muimui ʻIate Aú (“11–17 Sepitema. 2 Kolinitō 1–7: ‘Mou Fakalelei mo e ʻOtuá,’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻou 2023).

Fokotuʻu ki he ako konifelenisi fakavitioó: Fakakaukau ke faʻu ha saati ʻoku ʻi ai ha kōlomu ʻoku fakahingoa ko e “Mamahi Faka-ʻOtuá” mo ha kōlomu ʻoku fakahingoa ko e “Mamahi Fakamāmaní.” Hili iá pea vahevahe hoʻo screen pea fakafonu e ongo kōlomú ʻaki e ngaahi fakakaukau ʻa e kau akó fekauʻaki mo e ongo faʻahinga mamahi ko iá. Ko e founga ʻe tahá, ʻe lava ke fekumi e kau akó ʻi he ChurchofJesusChrist.org ki ha ʻū fakatātā ʻokú ne fakahaaʻi ʻa e mamahi faka-ʻOtuá pe mamahi fakamāmaní. ʻE lava leva ke tānaki atu ʻeni ʻe he kau akó ki ha saati kuo vahevahe ʻa ia te nau lava kotoa ʻo sio ki ai. Fakaafeʻi e kau akó ke nau fakamatalaʻi e founga ʻoku fakatātaaʻi ai ʻe he ngaahi ʻīmisi ne nau vahevahé e mamahi faka-ʻOtuá pe fakamāmaní.

Fakamanatu Hono 19 ʻo e Fakataukei Fakatokāteliné

Taumuʻa ʻo e lēsoní: ʻOku fakataumuʻa e lēsoni ko ʻení ke tokoni ki he kau akó ke nau ako maʻuloto ha niʻihi ʻo e ngaahi fakamoʻoni fakafolofola fakataukei fakatokāteline ʻo e Fuakava Foʻoú mo e ngaahi kupuʻi lea mahuʻingá.

Teuteu ʻa e tokotaha akó: ʻOange ki he kau akó ha tatau ʻo e fakamoʻoni fakafolofolá mo e saati ʻo e kupuʻi lea mahuʻingá, pea fakaafeʻi kinautolu ke nau ako maʻuloto ki he lahi taha ʻo e ngaahi potufolofola fakataukei fakatokāteline ʻe nimá mo e ngaahi kupuʻi lea tefito ʻe ala lavá. ʻE lava foki ke fakaʻaongaʻi ʻe he kau akó ʻa e app Fakataukei Fakatokāteliné. Ko e founga ‘e taha, ʻe lava pē ke feinga e kau akó ke ako maʻuloto ha potufolofola fakataukei fakatokāteline kakato.

Fokotuʻu ki he ako konifelenisi fakavitioó: ʻI hono fakaʻaongaʻi e ngaahi potufolofola fakataukei fakatokāteline ʻe nima mei he lēsoní pe ko ha potufolofola pē ʻe nima ʻoku fiemaʻu ke toe vakaiʻi ʻe he kau akó, fakakaukau ke fakaafeʻi e kau akó ke hiki e ngaahi kupuʻi lea tefito ʻo e folofolá ʻi ha laʻipepa kehekehe ʻe nima. Fakaʻasi hake ha taha ʻo e ngaahi potufolofolá ʻi he screen, pea fakaafeʻi leva e kau akó ke fakaʻasi hake ʻi he taimi tatau ʻa e kupuʻi lea tefito totonú ʻi he lau ki he tolu. Hokohoko atu ʻa e ʻekitivitī ko ʻení kae ʻoua kuo toe vakaiʻi kotoa e ngaahi potufolofolá pea mo ongoʻi ʻe he kau akó te nau lava ʻo fakatauhoa totonu ʻa e ngaahi potufolofolá.