Fakataukei Fakatokāteliné: 1 Kolinitō 15:40–42

ʻI he Toetuʻú, ʻOku ʻi ai Ha Ngaahi Nāunau ʻe Tolu

Naʻá ke ako ʻi ha lēsoni kimuʻa, “1 Kolinitō 15:32–54,” fekauʻaki mo e ngaahi nāunau ʻe tolu ʻi he Toetuʻú. Naʻá ke ako foki ʻe foaki ʻe heʻetau Tamai ‘i Hēvaní ʻa e nāunau fakasilesitialé ki he kau faivelengá ʻo fakafou ʻia Sīsū Kalaisi. ʻE lava ke tokoni atu ʻa e lēsoni ko ʻení ke ke ako maʻuloto ʻa e fakamoʻoni fakafolofola ʻo e fakataukei fakatokāteliné mo e kupuʻi lea fakafolofola mahuʻinga ki he 1 Kolinitō 15:40-42, fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Ko hono tokoniʻi e kau akó ke maʻu e tali ki heʻenau ngaahi fehuʻí. ʻOku ʻikai ko ha fatongia ia ʻo e faiakó ke ne tali e fehuʻi kotoa pē ʻoku ʻeke ʻe ha tokotaha ako. Tokoniʻi e kau akó ʻi hono fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ke nau lava ʻo ʻilo e ngaahi talí ʻiate kinautolu pē. Poupouʻi e kau akó ke nau tafoki mo falala ʻi he faivelenga ki he ʻEikí. ʻE ala tokoni ke ke hoko ko ha faifakahinohino ʻaki hono ʻiloʻi e ngaahi maʻuʻanga tokoni kuo fokotuʻu fakalangi ʻa ia te nau lava ʻo fakaʻaongaʻi ke fekumi ki ha ngaahi talí.

Teuteu ʻa e tokotaha akó: Fakaafeʻi e kau akó ke nau lau ʻa e 1 Kolinitō 15:40–42 pea haʻu mateuteu ki he kalasí ke vahevahe ha tūkunga moʻoni ʻo e moʻuí ʻe tokoni ai ʻa e tokāteline ʻoku akoʻi ʻi he potufolofola ko ʻení.

Ngaahi ʻEkitivitī Ako ʻOku Ala Fakahokó

ʻOku fokotuʻutuʻu ʻa e lēsoni ʻo e potufolofola fakataukei fakatokāteline ko ʻení ke akoʻi hili ʻa e lēsoni “1 Kolinitō 15:32-54,” ʻa ia ko e lēsoni fakaʻuhinga ia ki he potufolofola fakataukei fakatokāteliné 1 Kolinitō 15:40-42 . Kapau ʻoku fie maʻu ke ʻunuakiʻi e lēsoni ʻo e potufolofola fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni fakaʻuhinga fekauʻaki mo iá lolotonga e uike ko iá.

Ako maʻuloto pea fakamatalaʻi

Tokoni ki he kau akó ke nau ako maʻuloto mo fakamatalaʻi e fakamoʻoni fakafolofolá mo e kupuʻilea fakafolofola mahuʻingá ʻi he 1 Kolinitō 15:40–42 . Ko e ʻekitivitī ko ʻení ko ha founga ia ʻe taha ke fakahoko ai ʻení.

ʻI he ʻekitivitī ko ʻení, fakakaukau ke tuku ke fakakakato ʻe he kau akó ʻa e sitepu takitaha kimuʻa pea toki ʻoange ʻa e sitepu hokó.

1. Tohiʻi ʻa e “1 Kolinitō 15:40–42: ʻI he Toetuʻú, ʻOku ʻi ai ʻa e Ngaahi Nāunau ʻe Tolu” ʻi ʻolunga ʻi ha laʻipepa.

2. Tā ha foʻi laʻā ʻi lalo he kupuʻi leá, ko ha māhina ʻi lalo he laʻaá, pea mo ha foʻi fetuʻu ʻi lalo he māhiná.

3. Lau ʻa e 1 Kolinitō 15:40–42 , pea fakahingoa hoʻo ngaahi fakatātaá takitaha ʻaki ʻa e hingoa ʻo e nāunau ʻokú ne fakafofongaʻí. (Fakatokangaʻi ange ʻoku tānaki mai ʻe he Liliu ʻa Siosefa Sāmita ʻo e 1 Kolinitō 15:40 ha fakamatala ki he nāunau fakatilesitialé [ʻi he 1 Kolinitō 15:40 ].)

4. Sio ki hoʻo fakatātaá lolotonga hoʻo toutou lau ʻa e fakamoʻoni fakafolofolá mo e kupuʻilea fakafolofola mahuʻingá ʻi ho ʻatamaí kae ʻoua kuó ke maʻu ha loto falala ʻokú ke ʻiloʻi lelei kinautolu.

5. Te ke fakamatalaʻi fēfē nai ʻa e ngaahi moʻoni ʻoku akoʻi ʻi he potufolofola ko ʻení ki ha taha ʻoku ʻikai mahino ki ai ʻa e meʻa ʻoku hoko hili ʻa e maté ʻi he palani ʻa e Tamai Hēvaní? Hiki hoʻo fakamatalá ʻi he lea pē ʻaʻau.

Fakakaukau ke fakaafeʻi e kau akó ke nau ʻunu takai holo ʻi he lokí pea vahevahe ʻenau ngaahi fakamatalá mo ha kau ako ʻe toko tolu kehe. Kapau ʻe fie maʻu, fakatātaaʻi e founga ʻe lava ke fakahaaʻi ai e ngaahi moʻoni ko ʻení kimuʻa pea kamata e fevahevaheʻaki ʻa e kau akó.

Poupouʻi e kau akó ke tauhi ʻenau ngaahi fakatātaá pe tānaki kinautolu ke nau lava ʻo fakaʻaongaʻi ke toe vakaiʻi ʻa e potufolofola ko ʻení ʻi ha lēsoni ʻi he kahaʻu vave maí.

Akoako hono fakaʻaongaʻí

ʻE lava ke tokoni hono fakaʻaongaʻi e ngaahi tefitoʻi moʻoni ʻo hono maʻu ʻo e ʻilo fakalaumālié ki he ngaahi tūkunga moʻoni ʻo e moʻuí mo e ngaahi fehuʻi mahuʻinga ʻoku tau maʻú.

Lau e ongo tūkunga ko ʻení, pea fili pe ko e fē meʻa te ke fie fakatefito ai ʻi he ʻekitivitī hokó.

Fakaafeʻi e kau ako nnaʻa nau fakakakato e ʻekitivitī teuteu ʻa e tokotaha akó ke vahevahe ʻenau ngaahi tūkungá. ʻE lava pē ke ke fetongi e ngaahi tūkunga ko ʻení ʻakiʻa e ngaahi tūkunga ʻa e kau akó.

1. ʻOku feinga fakamātoato ʻa Sūlia ke fai e meʻa ʻoku totonú, ka ʻokú ne faʻa ongoʻi ʻoku fakahalaiaʻi ia koeʻuhí ko hono ngaahi vaivaí. ʻOkú ne tui ʻe ō ʻa e kakai kehé ki he puleʻanga fakasilesitialé ka ʻokúne veiveiua pe te ne aʻu ki ai.

2. Naʻe toki fanongo pē ʻa Malia ki ha lea maʻongoʻonga fekauʻaki mo e meʻaʻofa ʻo e toetuʻú ʻa ia ʻe foaki ʻe he Tamai Hēvaní mo Sīsū Kalaisi ki he tokotaha kotoa pē. ʻOkú ne fifili ʻo pehē, “Ko e hā ka u ka fakatomala pe tauhi ai e ngaahi fekaú kapau ʻe toetuʻu ʻa e tokotaha kotoa pē ʻi ha sino taʻe-faʻa-mate haohaoa?”

ʻE lava ke ke kole ki he kau akó ke nau faʻu ha ngaahi kulupu tautau toko tolu mo e niʻihi kehe naʻa nau fili ʻa e tūkunga tataú. ʻI he ʻekitivitī ko ʻení, ʻe lava ke kole ki he tokotaha ako kotoa pē ʻi he kulupú ke nau ako mo fakaʻaongaʻi ha tefitoʻi moʻoni kehe ʻo hono maʻu ʻo e ʻilo fakalaumālié. Hili ha taimi feʻunga, fakaafeʻi kinautolu ke nau lipooti e meʻa ne nau akó ki heʻenau kulupú.

Mahalo ʻe tokoni ke fakaʻaliʻali pe paaki ha tatau ʻo e ngaahi konga ko ʻení ke vakai ki ai e kau akó lolotonga ʻenau akó.

ʻI he lēsoni kimuʻá, naʻá ke ako ai fekauʻaki mo e moʻoni ko ʻeni naʻe akoʻi ʻi he 1 Kolinitō 15:40–42 : ʻi he palani ʻa e Tamai Hēvaní, ʻoku kehekehe e ngaahi nāunau ki he ngaahi sino toetuʻú. Fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié mo e moʻoni ʻoku akoʻi ʻi he 1 Kolinitō 15:40–42 ke tokoni kia Sūlia pe Malia ʻi heʻene ngaahi hohaʻá pe ngaahi fehuʻí.

Vakaiʻi mo sivisiviʻi e ngaahi fakakaukaú mo e ngaahi fehuʻí, ʻaki ha fakakaukau ʻoku taʻengatá

Lau ʻa e palakalafi 8 ʻi he konga “Ko Hono Maʻu ʻo e ʻIlo Fakalaumālié” ‘i he Fakamatala ki he ʻElito ʻo e Fakataukei Fakatokāteliné (2022). Fakakaukau ke fakaʻilongaʻi ʻa e ongo fehuʻi ʻi he fakaʻosinga ʻo e palakalafi ko iá.

• ʻE kaunga fēfē ʻa e tali ki he ongo fehuʻi ko iá ki he tūkunga ʻo Sūlia pe ko Maliá.

ʻOku pehē foki ʻi he palakalafi 8 “ʻOku tau fekumi ki he tokoni ʻa e Laumālie Māʻoniʻoní kae lava ke tau vakai ki ha ngaahi meʻa ʻo hangē ‘oku ʻafio ki ai ʻa e ʻEikí.”

• Ko e hā ʻe ala ʻafioʻi ʻe he ʻEikí ʻi he tūkunga ko ʻení ʻe ʻaonga kia Sūlia pe Maliá? Ko e hā hono ʻuhingá?

Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

Lau ʻa e palakalafi 11–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné .

• Ko e fē te ke faleʻi ai ʻa Sūlia pe Malia ke na fekumi ai ki he ngaahi moʻoni ʻokú na fie maʻu ʻi heʻena moʻuí?

• Ko e hā ha ngaahi aʻusia kuó ke maʻu ʻoku nau fakahaaʻi ʻa e mahuʻinga ʻo e fili fakaleleí ʻi he feituʻu ʻokú ke fekumi ai ki he moʻoni fakalaumālié?

Fakaʻaongaʻi ha ngaahi miniti siʻi ke fekumi ai ki ha ngaahi potufolofola pau pe ngaahi fakamatala fakaepalōfita ʻokú ke ongoʻi ʻoku ʻaonga ki he tūkunga ʻo Sūlia pe ko Maliá. (ʻOku kau ʻi he ngaahi potufolofola ʻe niʻihi mei he ngaahi lēsoni kimuí ni maí ʻa e 1 Kolinitō 15:40–42 ; Tokāteline mo e Ngaahi Fuakava 76:50–52, 62–64, 69–70, 71–76, 81–85 ; 88:21–24 .)

• Ko e hā e meʻa naʻá ke maʻu te ke lava ʻo vahevahé? Kuo fakahoko fēfē nai ʻe he ngaahi moʻoni naʻá ke maʻú ha liliu ʻi hoʻo moʻuí?

Lue takai ʻi he lokí, pea tokoniʻi e kau ako ʻoku ʻikai ke nau fakapapauʻi e founga ke maʻu ai ha ngaahi potufolofola pe fakamatala ʻa e kau taki ʻo e Siasí. Fakakaukau ke fakaʻaliʻali ange e founga ke kumi ʻaki e meʻa ʻoku nau fekumi ki aí kae ʻikai ko hono ʻoange pē kiate kinautolu ha fakamoʻoni fakafolofola pe ha fakamatala ʻe lava ke fakaʻaongaʻi.

Ngāue ʻi he tuí

Toe vakaiʻi ʻa e palakalafi 5–6 ʻi he “Ko Hono Maʻu ʻo e ʻIlo Fakalaumālié” ‘i he konga Fakamatala ki he ʻElito ʻo e Fakataukei Fakatokāteliné . Fakakaukau ke fakaʻilongaʻi ha ngaahi kupuʻi lea pe fakakaukau kehekehe ʻe tolu pe lahi ange ʻokú ke pehē ʻe lava ʻo tokoni kia Sūlia pe ko Malia.

• Ko e hā e ngaahi kupuʻi lea naʻá ke filí? ʻE tokoni fēfē nai e ngaahi kupuʻi lea takitaha ko ʻení kia Sūlia pe ko Malia?

• Kapau naʻá ke maʻu ha ngaahi fakakaukau tatau mo e fakakaukau ʻa Sūlia pe ko Maliá, ko e hā naʻá ke fai ke tali faivelenga ki he ngaahi fakakaukau ko iá?

• Ko e hā ʻe fie maʻu ai ke tukutaha e tui ʻa e kau finemuí ni takitaha kia Sīsū Kalaisi ʻi heʻenau ngāueʻi honau tūkungá? Ko e hā ʻoku ʻikai ke fai ai pē ʻa e lelei taha te nau lavá kae ʻoua te nau tokanga taha kiate Iá?

Fakakaukau ke kole ki he kau akó ke nau fakakaukau loto ki heʻenau moʻuí, tōʻongá, mo e ngaahi fehuʻí. Poupouʻi kinautolu ke nau fakaʻaongaʻi e ngaahi tefitoʻi moʻoni ʻo hono maʻu ʻo e ʻilo fakalaumālié ʻi haʻanau ngaahi tūkunga mavahe mei he kalasí. Fai hoʻo fakamoʻoní ʻe lava ke tokoniʻi kinautolu ʻe he ngaahi tefitoʻi moʻoni ko ʻení ke nau haʻu kia Kalaisi ke maʻu ʻa e moʻoní mo ha nonga ʻoku lahi angé.

Toe vakaiʻi ʻo e Fakataukei Fakatokāteliné

ʻI he kamataʻanga pe fakaʻosinga ʻo e lēsoni ka hoko maí, ʻoua naʻa toe laka hake ʻi he miniti ʻe tolu ki he nimá hono toe vakaiʻi ‘o e potufolofola fakataukei fakatokāteliné. Hangē ko ʻení, ʻe lava ke toe vakaiʻi ʻe he kau akó ʻenau fakatātā ʻo e ngaahi nāunau ʻe tolú lolotonga ʻenau toutou lea ʻaki e fakamoʻoni fakafolofolá mo e kupuʻilea fakafolofola mahuʻingá ʻi heʻenau fakakaukaú. Fakaafeʻi leva kinautolu ke fakaʻaliʻali ʻenau fakatātaá ki ha hoa lolotonga hono toutou lau maʻuloto leʻolahi ʻa e fakamoʻoni fakafolofolá mo kupuʻi lea fakafolofolá. e