Seminelí
1 Kolinitō 14–16

1 Kolinitō 14–16

Vakai Fakalūkufuá

Naʻe akoʻi ʻe Paula ha ngaahi moʻoni lahi fekauʻaki mo e Toetuʻú, ko ha konga ʻo ʻene pōpoaki ke fakaʻosi ʻaki ʻene ʻuluaki tohi ki he kakai Kolinitoó. Naʻá ne fakamoʻoni ki hono ikunaʻi ʻe he Fakamoʻuí ʻa e maté, ʻa e moʻoni ʻo e Toetuʻú maʻá e fānau kotoa ʻa e Tamai Hēvaní, pea mo e ngaahi nāunau ʻe maʻu ʻe he sino toetuʻú. Naʻá ne akoʻi foki fekauʻaki mo e ouau ʻo e papitaiso maʻá e pekiá.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ki he lēsoni takitaha.

1 Kolinitō 15:13–28

Taumuʻa ‘o e lēsoní: ʻE lava ke tokoni ‘a e lēsoni ko ʻení ki he kau akó ke nau ongoʻi ha ʻofa mo ha houngaʻia lahi ange kia Sīsū Kalaisi koeʻuhí ko ʻEne ikunaʻi ʻa e maté.

  • Teuteu ʻa e tokotaha akó: Fakaafeʻi e kau akó ke nau aleaʻi e fehuʻi ko ʻení mo e kau mēmipa ʻo e fāmilí pe ngaahi kaungāmeʻá pea haʻu mateuteu ke vahevahe ha ngaahi tali te nau ala maʻú: “Ko fē ʻa e ‘aho naʻá ne liliu lahi taha e hisitōliá? Ko e hā hono ʻuhingá?”

  • Fokotuʻu ki he ako konifelenisi fakavitioó: Fakaafeʻi e kau akó ke ʻomi ha laʻitā ʻo ha taha ʻoku nau ʻamanaki atu ke mamata ki ai ʻi he Toetuʻú. Kapau ʻoku fakaʻilekitulōnika ʻa e ʻū taá, ʻe lava ke taufetongi e kau akó ʻi hono vahevahe ʻenau monitoá mo fakamatalaʻi ʻa e kakai ʻi heʻenau taá ki he kalasí.

Fakataukei Fakatokāteliné: 1 Kolinitō 15:20–22

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e fakamoʻoni fakafolofola ʻo e fakataukei fakatokāteliné mo e kupuʻi folofola mahuʻinga ki he 1 Kolinitō 15:20–22 , fakamatalaʻi ʻa e tokāteline ʻo e Toetuʻú, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

  • Teuteu ʻa e tokotaha akó: Fakaafeʻi e kau akó ke nau fakalaulauloto ki he ngaahi aʻusia ʻoku nau ʻiloʻi ʻi he taimi ne pekia ai ha taha ne ʻofa ai. Kole ange ke nau haʻu mateuteu ke aleaʻi e ngaahi faingataʻa ʻi he ngaahi aʻusia ko ʻení pea mo e founga ʻe lava ke tokoni ai e tui kia Sīsū Kalaisí kiate kinautolu ʻoku fehangahangai mo e ngaahi faingataʻa ko ʻení.

1 Kolinitō 15:29

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau holi mo palani ke toe mahuʻingamālie ange ʻenau kau atu ki he hisitōlia fakafāmilí mo e ngāue fakatemipalé.

  • Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ʻenau fuʻu ʻakau fakafāmilí pe fai ha talanoa fekauʻaki mo ha kui naʻe ʻikai ke ne maʻu e ongoongoleleí pe maʻu e ngaahi ouau ʻo e fakamoʻuí mo e hākeakiʻí.

  • Ngaahi ʻAta: Fakakaukau ke teuteuʻi ha ngaahi fakatātā kehekehe ke fakaʻaongaʻi ʻi he kamataʻanga ʻo e lēsoní.

  • Fokotuʻu ki he akoʻí ʻi he konifelenisi fakavitioó: Hili e ako ʻa e kau akó fekauʻaki mo e papitaiso maʻá e pekiá, fakakaukau ke vahevahe kinautolu ke tautau toko ua pe fakakulupu iiki ʻi he ngaahi loki fakatahʻangá (ʻi he ʻinitanetí) ke fakaʻatā kinautolu ke nau akoako vahevahe (pe fakatātaaʻi) ʻa e founga te nau fakamatalaʻi ai ʻa e tokāteline ko ʻení ki ha taha ʻoku ʻikai ke maheni mo ia.

1 Kolinitō 15:32–54

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau feinga ke taau mo ha toetuʻu fakasilesitiale ʻo fakafou ʻia Sīsū Kalaisi.

  • Teuteu ʻa e tokotaha akó: Fakaafeʻi e kau akó ke nau lau ʻa e ʻAlamā 40:23 ke ʻiloʻi ʻa e meʻa ʻoku faitatau ai ʻa e sino toetuʻu kotoa pē, pea lau leva ʻa e 1 Kolinitō 15:40–42 ke ʻiloʻi ʻa e ngaahi faikehekehe ʻe hoko ʻi he kakai kuo toetuʻú.

  • Fakapale: ʻOmi ha kiʻi fakapale maʻá e tokotaha ako takitaha ʻokú ne tui ha lanu pau ʻo e valá ki he kalasí.

  • Vitiō: “ʻOku ʻIate Kitautolu ʻa e ʻOtuá” (15:45; mamata mei he taimi 5:01 to 6:58)

  • Fokotuʻu ki he akoʻí ʻi he konifelenisi fakavitioó: Fakakaukau ke fakaafeʻi ha niʻihi ʻo e kau akó ke puke e fakatātā ʻo ʻenau tā fakatātā ʻo e palani ʻo e fakamoʻuí ʻi muʻa ʻi heʻenau meʻafaitaá ʻi heʻenau fakamatalaʻi ʻa e palaní ki he kalasí.

Fakataukei Fakatokāteliné: 1 Kolinitō 15:40–42

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e fakamoʻoni fakafolofola ʻo e fakataukei fakatokāteliné mo e kupuʻi folofola mahuʻinga ki he 1 Kolinitō 15:40–42 , fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi he ngaahi tūkunga moʻoni ʻo e moʻuí.

  • Teuteu ʻa e tokotaha akó: Fakaafeʻi e kau akó ke nau lau ʻa e 1 Kolinitō 15:40–42 pea haʻu mateuteu ki he kalasí ke vahevahe ha tūkunga moʻoni ʻo e moʻuí ʻa ia ʻe tokoni ai ʻa e tokāteline ʻoku akoʻi ʻi he potufolofola ko ʻení.