Ko ha ongo talavou ʻokú na tuʻu ʻi ha sitepu ʻo ha matapā ʻo tānaki e foaki ʻaukaí mei ha fefine toulekeleka.
ʻOku tokanga lahi ʻa Sīsū Kalaisi ki he fānau kotoa ʻa e Tamai Hēvaní pea fakaafeʻi kitautolu ke tau kau fakataha mo Ia ʻi hono tokoniʻi ʻo e masivá mo e faingataʻaʻiá. Naʻe fakaafeʻi ʻe Paula e Kāingalotu Kolinitoó ke nau muimui ki he sīpinga ʻa e Fakamoʻuí ʻaki ʻenau feilaulauʻi ʻenau meʻa ʻoku maʻú ke tokangaʻi e masivá. ʻE lava ke tokoniʻi koe ʻe he lēsoni ko ʻení ke ke muimui ki he sīpinga ʻa Sīsū Kalaisí ʻaki haʻo vahevahe ʻa e meʻa ʻokú ke maʻú mo e niʻihi ʻoku faingataʻaʻiá.
Ko hono fakatupu ha ‘ātakai nonga ki he akó. Feinga ke taʻofi e ngaahi meʻa te ne ala fakahohaʻasi ʻa e ako mo e fakalaulauloto ki he folofolá. Naʻe akoʻi mai ʻe Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē, “ʻe faingofua e hoko mai ʻa e ueʻi fakalaumālié ʻi he ngaahi ʻātakai ʻoku nongá” pea “ʻoku fakaafea ʻe he ʻapasiá ʻa e fakahaá” (“Reverence Invites Revelation,” Ensign, Nov. 1991, 21–22).
Teuteu ʻa e tokotaha akó: Fakaafeʻi e kau akó ke nau vakai ki he ngaahi meʻa ʻoku lisi ʻi he foomu Vahehongofulú mo e Ngaahi Foaki Kehé pea teuteu ke vahevahe ʻa e ʻuhinga ʻo e ngaahi meʻa kehekehe aí. Te nau lava foki ʻo ʻeke ha faʻahinga fehuʻi pē ʻoku nau maʻu fekauʻaki mo e foomu ko ʻení.
Ngaahi ʻEkitivitī Ako ʻOku Ala Fakahokó
Ko ha faingataʻa lahi
Fakakaukau ke fakaʻaliʻali ʻa e fakamatala taʻekakato ko ʻení pea fakaafeʻi e kau akó ke vahevahe ha ngaahi faingataʻa ʻe lava ke hiki ʻi he feituʻu ʻoku ʻataá. Fakahīkihikiʻi e kau akó ʻi he ngaahi tali ʻoku nau ʻoatú, neongo kapau ʻoku ʻikai ko kinautolu pē naʻe fakaʻaongaʻi ʻe ʻEletā Hōlani ʻi he lea ko ʻení.
Naʻe lea ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo ha faingataʻa lahi. Fakakaukau ki ha ngaahi faingataʻa ʻe niʻihi ‘e tonu hano fakafonuʻaki e konga ʻoku ʻataá ʻi he kupuʻi lea ko ʻení.
ʻI he hisitōliá kotoa, kuo lau e______________ ko e pole lahi taha ʻoku mafola taha ʻi he faʻahinga ʻo e tangatá. ʻOku mahino ko hono ngaahi faingataʻaʻiá ʻoku fakaesino, ka ko e maumau fakalaumālie mo fakaeloto te ne lava ʻo fakahokó mahalo ʻe toe fakamamahi ange.
Ko e faingataʻa naʻe lau ki ai ʻa ʻEletā Hōlaní ko e “masivá,” ʻa ia ko e tuʻunga ʻo e siʻisiʻi pe ʻikai ha paʻanga, koloa, pe founga tokoní. ʻE lava foki ke ʻuhinga ʻa e foʻi lea masivesivá ki he ʻikai maʻu ʻetau ngaahi fiemaʻú ʻi ha ngaahi tafaʻaki lahi ʻo ʻetau moʻuí, kau ai e ngaahi tafaʻaki fakatuʻasinó, fakaelotó, fakasōsialé, pe fakalaumālié.
Ko e hā ha ngaahi faingataʻa ʻe niʻihi ʻoku fehangahangai mo kinautolu ʻoku siʻi ange ‘enau meʻa ‘oku maʻú ʻi he kakai kehé?
ʻE hoko fēfē nai ʻa e ngaahi faingataʻa ko ʻení ko ha meʻa ke ne uesia fakaeloto mo fakalaumālie kae pehēki he fakatuʻasino ha taha?
ʻI hoʻo ako he ʻaho ní, tokanga ki he ngaahi fakakaukau mo e ongo ʻe ala ʻoatu ʻe he Tamai Hēvaní ʻo fakafou ʻi he Laumālie Māʻoniʻoní fekauʻaki mo e founga te Ne lava ʻo fakaʻaongaʻi ai koe ke tokoniʻi e niʻihi kehe ʻoku faingataʻaʻiá.
Hangē ko hono lekooti ʻi he 2 Kolinitō 8:1–8, naʻe fakaafeʻi ʻe he ʻAposetolo ko Paulá ʻa e Kāingalotu Kolinitoó ke nau muimui ki he sīpinga ʻa e kāingalotu ʻo e Siasí ʻi Masitōniá ʻa ia naʻa nau foaki lahi ke tokangaʻi e masivá. Naʻá ne lekooti leva ha ngaahi akonaki mahuʻinga fekauʻaki mo hono tokangaʻi ʻo e masivá ʻi he founga ʻa e Fakamoʻuí
Ko e sīpinga ʻa Sīsū Kalaisí
Naʻe vahevahe ʻe Paula e sīpinga ʻa e Fakamoʻuí ke fakalotolahiʻi kitautolu ke tokonaki maʻá e ngaahi fiemaʻu ʻa e niʻihi kehé ʻi he ʻofa moʻoni.
Lau ʻa e 2 Kolinitō 8:9, ʻo kumi ki he sīpinga taʻe-siokita ʻa Sīsū Kalaisi ʻo ʻEne tokoniʻi kitautolú.
ʻOkú ke pehē naʻe ʻuhinga ki he hā ʻa Paula ʻi heʻene tohi naʻe hoko ʻa Sīsū ʻo masiva kae lava ke tau koloaʻiá?
Ko e tefitoʻi moʻoni ʻe taha ʻoku lava ke tau akó ko e te tau toe vēkeveke ange ke foaki maʻá e niʻihi kehé ʻi he taimi ʻe mahino ai kiate kitautolu ʻa e kotoa ʻo e meʻa kuo fakahoko ʻe he Fakamoʻuí maʻatautolú.
ʻOku akoʻi ʻi he folofolá ʻa e mahuʻinga hono tokangaʻi ʻo kinautolu ʻoku masivesivá, kau ai ʻa e Tohi ʻa Molomoná. Lau e ngaahi akonaki ko ʻeni ʻa Paulá, fakataha mo e ngaahi potufolofola fekauʻaki mo e Tohi ʻa Molomoná, ʻo kumi ki he meʻa ʻoku akoʻi mai ʻe he ngaahi potufolofola ko ʻení fekauʻaki mo hono tokangaʻi ʻo e niʻihi kehé. Fakakaukau ke fakafehokotaki e ngaahi potufolofolá.
Mahalo ko ha faingamālie lelei ʻeni ke fakamanatu ki he kau akó fekauʻaki mo e taukei ako folofola ʻo hono fakafehokotaki e ngaahi vēsí.
Fakakaukau ke fakaafeʻi e kau akó ke nau ako ʻa e ngaahi potufolofola ko ʻení ʻi ha fanga kiʻi kulupu iiki, pea ako ʻe he tokotaha ako takitaha ha konga kehekehe pea lipooti e meʻa ne nau akó ki he kulupú.
ʻOkú ke pehē ko e hā ʻoku finangalo e ʻEikí ke tau fai he ʻahó ni ke moʻui ʻaki e meʻa ʻoku akoʻi ʻi he ngaahi potufolofola takitaha ko ʻení?
Naʻe fakamatala ‘e ‘Eletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga ʻe lava ai ʻe he angaʻofa ʻa e Tamai Hēvaní mo Sīsū Kalaisí ʻo liliu kitautolú.
ʻĪmisi
Laʻitā fakaʻofisiale ʻo ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá, 2016.
Kuo tau takitaha maʻu ha ngaahi meʻafoaki ne ʻikai ke tau lava ʻo tokonaki maʻatautolu, ʻa e ngaahi meʻafoaki mei heʻetau Tamai Hēvaní pea mo Hono ʻAlo ʻOfaʻangá, ʻo kau ai e huhuʻi ʻo fakafou ʻi he feilaulau fakalelei ʻo Sīsū Kalaisí. Kuo tau maʻu ʻa e moʻui ʻi he māmani ko ʻení; te tau maʻu e moʻui fakaesino ʻi he maama ka hokó, pea mo e fakamoʻui taʻengatá mo e hakeakiʻí—ʻo kapau te tau fili ki ai—ʻoku hoko kotoa ʻeni koeʻuhi ko e Tamai Hēvaní mo Sīsū Kalaisi.
Ko e taimi kotoa pē ʻoku tau fakaʻaongaʻi, maʻu ha lelei, naʻa mo e fakakaukau ki he ngaahi meʻafoaki ko ʻení, ʻoku totonu ke tau fakakaukau ki he feilaulau, foaki lahi, mo e ʻofa mamahi ʻa e kau foakí. ʻOku hulu hake ʻa e fakaʻapaʻapa ki he kau foakí ʻi hono ʻai ke tau loto-houngaʻia peé. ʻOku lava pea ʻoku totonu ke liliu kitautolu ʻe heʻetau fakakaukau ki Heʻena ngaahi meʻafoakí.
ʻE liliu fēfē kitautolu ʻe he fakakaukauloto ki he Tamai Hēvaní mo e angaʻofa ʻa Sīsū Kalaisí?
Ko hono tokangaʻi ʻo e masivá ʻi hotau kuongá
Naʻe fakamatala ‘a Palesiteni Lāsolo M. Nalesoni ki he founga ʻe ua ʻo e ngaahi founga kehekehe ʻoku fakaʻaongaʻi ai ʻe he Fakamoʻuí Hono Siasi kuo fakafoki maí ke tokangaʻi ʻa e masivá ʻi he funga ʻo e māmaní ʻi hotau kuongá. Lau ʻa e fakamatala ko ʻení pe mahalo te ke fie mamata ʻi he “Ko e Fekau Lahi Hono Uá” (taimi 6:15 ki he 8:51), ʻoku maʻu ʻi he ChurchofJesusChrist.org.
ʻĪmisi
Laʻitā fakaʻofisiale ʻo Palesiteni Lāsolo M. Nalesoni naʻe fai ʻi Sānuali 2018
Kuo foaki ʻe he Latter-day Saint Charities ha paʻanga ʻe ua piliona tupu ke tokoniʻi ʻa kinautolu ʻoku faingataʻaʻia ʻi he funga ʻo e māmaní. ʻOku foaki ʻa e tokoni ko ʻení ki he kakai ʻoku nau fiemaʻú neongo pe ko e hā e siasi ʻoku nau kau ki aí, fonua, matakali, tuʻunga fakasekisuale, tuʻunga tangata pe fefine, pe tuʻunga fakapolitikalé.
ʻOku ʻikai ko ia pē. Ke tokoniʻi ʻa e kāingalotu ʻo e Siasi ʻo e ʻEikí ʻoku faingataʻaʻiá, ʻoku tau ʻofa mo moʻui ʻaki ai ʻa e fono fakakuongamuʻa ʻo e ʻaukaí [vakai ki he ʻĪsaia 58:3–12]. ʻOku tau fiekaia ke tokoniʻi ʻa e niʻihi kehe ʻoku fiekaiá. ʻOku ʻikai ke tau kai ʻi he ʻaho ʻe taha he māhina takitaha pea foaki ʻa e mahuʻinga ʻo e meʻakai ko iá (pea lahi ange) ke tokoniʻi ʻa kinautolu ʻoku faingataʻaʻiá.
Fakakaukau ke huluʻi e ngaahi sīpinga fakavitiō ʻi he konga “Fakamatala Fakamahinó mo e Puipuituʻá” ʻo e lēsoni ʻo e ngaahi ngāue kuo fakahoko ʻe Sīsū Kalaisi ʻo fakafou ʻi he ngaahi foaki ki Hono Siasí.
Fakakaukau foki ke fakafeʻiloaki e kau akó ki he uepisaiti latterdaysaintcharities.org pea ʻoange ha taimi ke nau vakaiʻi ai ia ʻi ha ngaahi miniti siʻi ʻi he kalasí.
Ko e hā ʻoku mahuʻinga kiate koe fekauʻaki mo e fakamatala ʻa Palesiteni Nalesoní?
Te ke fakamatalaʻi fēfē ʻa e ʻaukaí mo e foaki ʻaukaí ki ha taha ʻoku ʻikai maheni mo ia?
Fakakaukau ke fakaʻaliʻali ha foomu Vahehongofulu mo e Ngaahi Foaki Kehé pea fakaafeʻi e kau ako naʻa nau fakakakato e teuteu ʻa e tokotaha akó ke vahevahe e ngaahi founga kehekehe ʻoku foaki ai ʻe he Fakamoʻuí maʻá e masivá ʻo fakafou ʻi heʻetau ngaahi foaki paʻangá.
Kimuʻa pea vahevahe ʻe he kau akó ʻa e tali ki he ngaahi fehuʻi ko ʻení, fakamamafaʻi ange ʻoku ʻikai kau maʻu pē ʻi hono tokangaʻi ʻo e masivá ʻa hono foaki ha paʻangá.
Makehe mei hono foaki ha paʻanga ki he Siasí, ko e hā ha ngaahi founga kehe te tau lava ai ʻo tokoni ki he ʻEikí ke tokangaʻi ʻa kinautolu ʻoku faingataʻaʻiá? Ko hai kuó ne hoko ko ha faʻifaʻitakiʻanga lelei kiate koe ʻi he tefitoʻi moʻoni ko ení?
Ko e hā ha meʻa ʻe finangalo e ‘Otuá ke ke faí?
Naʻe fakamatalaʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa ʻetau fiemaʻu ke kole ki he ʻOtuá ha fakahinohino ʻi hono tokoniʻi ʻa kinautolu ʻoku tau feohí.
ʻOku ʻikai ke u ʻiloʻi pau pe ʻe anga fēfē haʻamou takitaha fakahoko homou fatongia kiate kinautolu ʻoku ʻikai pe ʻikai ke nau lava ʻo tokoniʻi kinautolú. Ka ʻoku ou ʻiloʻi ʻoku ʻafioʻi ia ʻe he ʻOtuá, pea te Ne tokoniʻi mo tataki koe ʻi he ngāue ʻofa ʻo e tuʻunga faka-ākongá kapau ʻokú ke holi mo lotua mo feinga maʻu pē ke tauhi ha fekau kuó Ne toutou ʻomai kiate kitautolu.
Fakakaukau ke vahevahe ha talanoa fakataautaha fekauʻaki mo e founga ʻoku fakaʻaongaʻi ai ʻe he ʻOtuá ʻEne fānaú ke tokoniʻi ʻaki ʻa kinautolu ʻoku faingataʻaʻiá.
Faʻu ha palani ke ngāueʻi ʻa e ngaahi fakakaukau mo e ngaahi ongo naʻá ke maʻu he ʻahó ni ke tokoniʻi ʻa kinautolu ʻoku mou feohí. Kapau ʻoku teʻeki ai ke ke fakapapauʻi pe ko hai ʻoku finangalo e Tamai Hēvaní ke ke tokoniʻí pe founga ke tokoniʻi ai kinautolú, lotua ha fakahinohino mo kumi ha ngaahi faingamālie ke tokoniʻi ai e niʻihi ʻoku mou feohí, kau ai e kau mēmipa ho fāmilí. ʻE tali ʻe he ʻOtuá hoʻo ngaahi lotú ʻi he founga mo e taimi pē ʻAʻana.
Fakamatala Fakamahinó mo e Puipuituʻá
ʻOku fakaʻaongaʻi fēfē e ngaahi foaki ʻoku fakahoko ki he Siasi ʻo e Fakamoʻuí ke tokoniʻi ʻaki e masivá he ʻaho ní?
Hū ki he uepisaití latterdaysaintcharities.org ke ako ha ngaahi tali ki he fehuʻi ko ʻení mo ha ngaahi meʻa lahi ange.
Te u tokoniʻi fēfē ʻa kinautolu ʻoku mau feohí ʻi ha ngaahi founga kehe kae ʻikai ko e foaki paʻangá?
Naʻe vahevahe ‘e Sisitā Poni L. ʻOsikasoni, ko e Palesiteni Lahi mālōlō ʻo e Kau Finemuí, ha taha ʻo ha ngaahi fakakaukau kehekehe:
ʻE hoku [ngaahi] kaungāmeʻa kei talavou, te u lava ʻo fakapapauʻi atu kuo pau maʻu pē ke ʻi ai ha tokotaha ʻi he fakataha kotoa pē ʻa e Siasí te ke ʻalu ki ai ʻoku tuenoa, ʻokú ne lolotonga foua ha ngaahi faingataʻa pea ʻokú ne fiemaʻu ha kaumeʻa, pe ongoʻi ʻoku ʻikai ke ne kau mai. ʻOkú ke maʻu ha meʻa mahuʻinga ke tokoni ai ki he fakataha pe ʻekitivitī kotoa pē, pea ʻoku finangalo ʻa e ʻEikí ke ke vakavakai holo ʻi ho toʻú peá ke tokoni leva ʻi he founga tatau naʻá Ne mei fakahoko ai iá.
Naʻe fakamatalaʻi ʻe he Palōfita ko Siosefa Sāmitá (1805–44) ʻo pehē:
ʻĪmisi
Laʻitā ʻo e Palōfita ko Siosefa Sāmita ko e Siʻí, naʻe fakahanga e ʻulu ʻo Siosefá ke hanga fakatafaʻaki, ko e nima toʻomataʻú ʻi he kongalotó pea nima toʻohemá ʻoku puke ha ʻū laʻipepa. ʻOku hā ai ʻokú ne tui ha suti lanu melomelo mo ha sote hina mo e hēkesi.
[Ko e mēmipa ‘o e Siasí] kuo pau ke ne fafanga ʻa e fiekaiá, fakavalaʻi ʻa e telefuá, foaki ki he fefine kuo mate hono ʻunohó, holoholoʻi ʻa e loʻimata ʻo e tamai maté, fakafiemālieʻi ʻa e mamahí, ʻo tatau ai pē pe ʻoku kau ʻi he siasí ni, pe ʻi ha siasi kehe, pe ʻikai kau ki ha siasi, ʻo tatau ai pē pe ʻe maʻu kinautolu ʻi fē.
Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 494)
Ngaahi ʻEkitivitī Fakalahi ki he Akó
Kau taki Fakalotofonua ʻo e Siasí
Fakakaukau ke fakaafeʻi ha pīsope fakalotofonua pe palesiteni Fineʻofa ke vahevahe mo e kau akó ʻa e founga ʻoku fakaʻaongaʻi ai ʻa e paʻanga ʻaukai ʻa e Fakamoʻuí ke tāpuekina ʻaki ʻa kinautolu ʻoku faingataʻaʻiá.
Fakatātaaʻi e founga ke foaki ʻaki e paʻangá
Fakakaukau ke fakaʻaliʻali ha foomu Vahehongofulu mo e Ngaahi Foaki Kehé mo ha sila pea fakaafeʻi ha tokotaha ako ke ne fakamatalaʻi ʻa e feituʻu ke kumi ai ʻa e ʻū laʻipepá, founga ke fakafonu ai iá, mo e tokotaha ke foaki ki ai ʻenau foakí. Fakakaukau foki ke tokoni ke mahino ki he kau akó ʻa e founga ke foaki ai ʻi he ‘initanetí donations.ChurchofJesusChrist.org.
ʻOku kau e tokanga kiate kinautolu ʻoku faingataʻaʻiá ʻi he ngāue ʻo e fakamoʻuí mo e hakeakiʻí
Vakai ki he konga 1.2.2 ʻi he Tohi Tuʻutuʻuni Fakakātoá, pea aleaʻi e ʻuhinga ʻoku hoko ai hono tokangaʻi ʻo kinautolu ʻoku faingataʻaʻiá ko ha konga ʻo e ngāue ʻo e fakamoʻuí mo e hakeakiʻí. Te ke lava ʻo ʻeke ha ngaahi fehuʻi hangē ko e “ʻOkú ke pehē ko e hā ʻoku fiemaʻu ai ke tau tokangaʻi ʻa kinautolu ʻoku faingataʻaʻiá kapau ʻoku fiemaʻu ke fakahaofi mo hakeakiʻi kitautolu? ʻOkú ke pehē ʻoku tokoni fēfē hono tokangaʻi ʻo kinautolu ʻoku faingataʻaʻiá ke toʻo ʻa e ngaahi fakangatangata ki heʻenau fakalakalaka fakalaumālié?”
