2 Kolinitō 8–13

Vakai Fakalūkufuá

Naʻe fakaafeʻi ʻe Paula e Kāingalotu Kolinitoó ke nau muimui ki he sīpinga ʻa e Fakamoʻuí ʻaki ʻenau feilaulauʻi ʻenau meʻa naʻe maʻú ke tokangaʻi e masivá. Naʻá ne vahevahe ha niʻihi ʻo e ngaahi faingataʻa naʻá ne kātekiná pea mo e founga naʻá ne lava ai ʻo maʻu ha fiefia ʻi he ngaahi aʻusia ko iá ʻo fakafou ʻi he tokoni ʻa e Fakamoʻuí. ʻI he taimi naʻe fakaangaʻi ai ia ʻe ha niʻihi ʻo e kāingalotu ʻo e Siasí ʻi Kolinitoó, naʻá ne tali ʻaki ʻene fakaafeʻi kinautolu ke nau vakaiʻi ʻenau fehokotaki mo Kalaisí.

Teuteu ke Akoʻi

ʻOku ʻoatu ʻe he fakamatala ko ʻení ha ngaahi fakakaukau ki he kau faiakó fekauʻaki mo e meʻa ʻe ala fiemaʻu ke teuteuʻi kimuʻa he lēsoni takitaha.

2 Kolinitō 8–9

Taumuʻa ʻo e lēsoní: ʻE lava ke tokoni ʻa e lēsoni ko ʻení ke muimui ʻa e kau akó ki he sīpinga ʻa Sīsū Kalaisí ʻaki hono vahevahe ʻa e meʻa ʻoku nau maʻú mo kinautolu ʻoku faingataʻaʻiá.

Teuteu ʻa e tokotaha akó: Fakaafeʻi e kau akó ke nau vakai ki he ngaahi meʻa ʻoku lisi ʻi he foomu Vahehongofulú mo e Ngaahi Foaki Kehé pea teuteu ke vahevahe ʻa e ʻuhinga ʻo e ngaahi meʻa kehekehe ʻi he lainé. Te nau lava foki ʻo ʻeke ha faʻahinga fehuʻi pē ʻoku nau maʻu fekauʻaki mo e foomu ko ʻení.

Meʻa ke fakaʻaliʻali atú: Ko e lea ʻa ʻEletā Sefilī R. Hōlaní mo ha foʻi lea ʻoku pulia pea mo ha foomu Vahehongofulú mo e Ngaahi Foaki Kehé

Fokotuʻu ki he ako konifelenisi fakavitioó: Fakakaukau ke fakaafeʻi ha pīsope fakalotofonua pe palesiteni Fineʻofa ke vahevahe mo e kau akó ʻa e founga ʻoku fakaʻaongaʻi ai e paʻanga ʻaukaí ke tāpuakiʻi ʻaki ʻa kinautolu ʻoku faingataʻaʻiá.

2 Kolinitō 11–12

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke nau falala ki he ʻEikí ʻi heʻenau feinga ke kātekina faivelenga honau ngaahi faingataʻaʻiá.

Teuteu ʻa e tokotaha akó: Fakaafeʻi e kau akó ke nau mateuteu ke vahevahe ʻa e ʻuhinga ʻoku nau ongoʻi ai ʻoku ʻikai moʻoni ʻa e fakamatala ko ʻení: “Kapau te tau lotu ʻi he tui feʻunga kia Sīsū Kalaisi, ʻe toʻo ʻe he Tamai Hēvaní ha faʻahinga faingataʻa pē ʻoku tau foua.”

Meʻa pe ʻīmisi ke fakaʻaliʻali: Ko ha talatala pe ko ha fakatātā ʻo ha talatala

Fokotuʻu ki he ako konifelenisi fakavitioó: Hili hono ako ʻe he kau akó ʻa e 2 Kolinitō 12:8–10 , fakakaukau ke fakaʻaongaʻi ʻa e foʻi fakakaukau ʻoku ui ko e “Tui ke ʻoua naʻa fakamoʻui” ʻi he konga ki he “Ngaahi ʻEkitivitī Tokoni Ki he Akó.” Fakakaukau ke kumi ʻa e fakamatala “Ko Hono Tali e Finangalo mo e Taimi ʻa e ʻEikí” (Liahona, ʻAokosi 2016, 29–35) ʻi he ChurchofJesusChrist.org pea vahevahe ʻa e screen koeʻuhí ke taufetongi e kau akó ʻi hono lau ʻo e talanoá.

2 Kolinitō 13

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau vakavakaiʻi ʻenau tui faivelenga ki he ʻEikí pea ikunaʻi ʻa e ʻahiʻahi ke fakaangaʻi ʻEne kau tamaioʻeikí.

Teuteu ʻa e tokotaha akó: Fakaafeʻi e kau akó ke nau fakakaukau ki he ongo ʻoku nau maʻu ʻi he taimi ʻoku nau fanongo ai ki he lea kovi ʻa e kakaí fekauʻaki mo e Siasi ʻo e Fakamoʻuí pe ko ʻEne kau tamaioʻeikí.

Meʻa ke fakaʻaliʻali atú: ʻOku ʻomi ʻe he lea ʻa palesiteni Henelī B. ʻAealingí mo ha ngaahi fehuʻi ke fakalaulauloto ki ai ʻa e kau akó

Fokotuʻu ki he ako konifelenisi fakavitioó: Ke fakaʻatā ʻa e kau akó ke nau ako ha ngaahi fakamatala lahi ange mei he folofolá, fakakaukau ke vahevahe ʻa e kau akó ki ha fanga kiʻi kulupu iiki pea tuku kinautolu ki he ngaahi loki fepōtalanoaʻakí (breakout rooms). Fakaafeʻi ke nau ako ha fakamatala ʻe taha pe lahi ange ʻokú ne fakamatalaʻi e ngaahi nunuʻa ʻo hono fakaangaʻi e kau tamaioʻeiki ʻa e ʻEikí. ʻE lava leva ke fili ʻe he kulupu takitaha ha tokotaha lea ke ne vahevahe mo e toenga ʻo e kalasí ha meʻa ne nau ako.

Siviʻi Hono 9 Hoʻo Akó

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau vakaiʻi e ngaahi taumuʻa kuo nau fokotuʻú pea mo e tupulaki fakaako mo fakataautaha kuo nau aʻusia lolotonga ʻenau ako e Fuakava Foʻoú.

Teuteu ʻa e tokotaha akó: Fakaafeʻi e kau akó ke nau toe vakaiʻi e ngaahi founga kuo nau feinga ai ke fakaʻaongaʻi e ngaahi tefitoʻi moʻoni ne nau ako mei he 1 Kolinitō 8–16 mo e 2 Kolinitoó.

Meʻa ke fakaʻaliʻalí: Ngaahi fehuʻi fekauʻaki mo e palani hisitōlia fakafāmili ʻa e kau akó (ki he ʻEkitivitī A)
Vitiō:“Ko e Ngaahi Tāpuaki ʻo e Folofolá” (3:03)

Fokotuʻu ki he ako konifelenisi fakavitioó: Kapau ʻoku hangē ʻoku ʻikai ʻilo ʻe he kau akó e founga hono fakaʻaongaʻi ʻo e FamilySearch.org pe polokalama FamilySearch, fakakaukau ke ʻoange ha taimi ʻi he kalasí ke nau vakaiʻi ai. Mahalo naʻa ʻaonga ke fakaafeʻi ha tokotaha ako ʻokú ne ʻilo e founga ke fakaʻaongaʻi ai e polokalamá ke haʻu mateuteu ke vahevahe ha ngaahi tokoni kuó ne ako. Te nau lava ʻo vahevahe ʻenau screen mei heʻenau telefoní pe komipiutá koeʻuhí ke lava e toenga ʻo e kalasí ʻo sio ki he meʻa ʻoku nau faí.

Fakamanatu Hono 20 ʻo e Fakataukei Fakatokāteliné

Taumuʻa ʻo e lēsoní: ʻE ʻoange ʻe he lēsoni ko ʻení ha faingamālie ki he kau akó ke fakaloloto ʻenau mahinó mo akoako fakamatalaʻi e ngaahi moʻoni mei he ngaahi potufolofola fakataukei fakatokāteline kehekehe ʻo e Fuakava Foʻoú.

Teuteu ʻa e tokotaha akó: Fakaafeʻi e kau akó ke toe vakaiʻi e ngaahi potufolofola fakataukei fakatokāteline ʻo e Fuakava Foʻoú pea fili ha potufolofola te nau fiemaʻu ke mahino lelei ange kiate kinautolu.

Meʻa ke fakaʻaliʻali atú: ʻĪmisi kehekehe ʻe fā ʻo Sīsū Kalaisí

Fokotuʻu ki he ako konifelenisi fakavitioó: ʻI he ofi ki he fakaʻosinga ʻo e lēsoní, ʻe lava ke fakaafeʻi e kau akó ke nau fekumi ki ha ngaahi potufolofola fakataukei fakatokāteline kehe ʻokú ne fakatupulaki ʻenau mahino ki ha potufolofola ʻi he Fuakava Foʻoú kuo filifili. Fakakaukau ke fakakulupu ʻa e kau akó ki ha loki fetalanoaʻaki ʻe fā, pea fekumi e kulupu takitaha ʻi he ngaahi potufolofola fakataukei fakatokāteliné mei ha kalasi ako folofola kehe. ʻI he taimi ʻoku toe fakataha ai e kalasí, fakaafeʻi e kulupu takitaha ke vahevahe e ngaahi potufolofola ne nau maʻu ʻi heʻenau tohi folofola ne vahe angé. ʻE lava ke fakaafeʻi e kau akó ke vahevahe ʻenau screen koeʻuhí ke lava honau kaungāakó ʻo sio ki he founga ne nau fakaʻaongaʻi ai e ʻū meʻangāue ʻi he Gospel Library app.