2 Mga Taga-Tesalonica 2

Ang Dakong Apostasiya

A group of New Testament era people gathered around a man. The people are listening to the man speak. The image illustrates the development of false beliefs and apostasy occuring in the early Christian church following the deaths of the original apostles of Jesus Christ.

Unsa kaha ang imong kinabuhi kon wala sa imoha ang kahingpitan sa ebanghelyo ni Jesukristo? Gitudloan ni Pablo ang mga Santos sa Tesalonica nga sa kataposan ang pagkadaotan sa mga tawo moresulta sa pagsupil gikan sa ebanghelyo (tan-awa ang 2 Mga Taga-Tesalonica 2:1–7). Kini nga leksiyon makatabang kanimo nga makasabot giunsa pagkahitabo sa Apostasiya sa Simbahan sa Bag-ong Tugon ug nganong ang Simbahan sa Manluluwas kinahanglan nga ipahiuli sa ulahing mga adlaw.

Paggamit sa mga cross-reference. Ang cross-reference mao ang usa ka kasulatan nga naghatag og dugang nga impormasyon o panabot mahitungod sa kasamtangang gitun-an. Makatabang ang pagdapit sa mga estudyante sa pagcross-reference sa unsa ang ilang gibasa ngadto sa ubang mga bersikulo sa kasulatan aron mapalawom ang ilang pagsabot sa ebanghelyo.

Patambonga sila nga andam mopaambit unsa ang ilang nakat-onan o sa pagpangutana sa bisan unsa nga mga pangutana nga aduna sila.

Posible nga mga Kalihokan sa Pagkat-on

Ang Dakong Apostasiya

Dapita ang mga estudyante sa pagpamalandong sa ilang pagpangandam alang sa klase samtang tubagon nila ang mosunod nga senaryo.

Ipakita o ipasabot ang mosunod nga senaryo ug mga pangutana, ug dapita ang mga estudyante sa pagtubag diha sa ilang mga journal sa pagtuon sa dili pa sila mopaambit sa ilang mga tubag ngadto sa klase.

Isip alternatibo, ang mga estudyante mahimong grupohan sa tinagurha o tinagutlo diin ang usa ka estudyante modrama-drama nga gitudloan ug ang laing usa o duha modrama-drama isip mga misyonaryo. Kadtong mga nag-arte isip mga misyonaryo mahimong mosulay sa pagpasabot sa Dakong Apostasiya.

Handurawa nga ikaw usa ka misyonaryo nga anaa sa imong unang adlaw sa misyon. Kinahanglan kang magtudlo sa usa ka tawo mahitungod sa Dakong Apostasiya.

Unsaon man nimo pagpasabot niini ngadto kanila?
Ngano kaha nga kini mahagiton?
Ngano kaha nga importante man nga makasabot sa Dakong Apostasiya?

Sa imong journal sa pagtuon, isulat ang mga pangutana nga aduna ka mahitungod sa Dakong Apostasiya o ang mga pangutana nga lagmit ipangutana sa usa ka investigator. Diha sa imong pagtuon, pagtinguha sa panabang sa Langitnong Amahan aron makakaplag og mga tubag alang niining mga pangutana.

Pagdapit og mga boluntaryo aron mosulat sa pisara sa mga pangutana nila o sa uban mahitungod sa Dakong Apostasiya. Dapita ang mga estudyante sa pagdangop niini nga mga pangutana sa tibuok nga leksiyon.

Gitagna ni Pablo ang pagsupil sa Simbahan

Ang mga Santos nga Taga-Tesalonica adunay daghang mga kabalaka mahitungod sa Ikaduhang Pag-anhi ni Jesukristo ug naghunahuna nga kini mahitabo sa labing dali gayod. Gitubag ni Pablo ang ilang mga kabalaka sa iyang sulat ug gipasabot nga adunay laing mahitabo una pa si Kristo mobalik pag-usab.

Basaha ang 2 Mga Taga-Tesalonica 2:1–3 ug pangita unsa ang gitudlo ni Pablo nga mahitabo una pa ang Ikaduhang Pag-anhi ni Kristo.

Unsa ang gitudlo ni Pablo nga mahitabo una pa ang Ikaduhang Pag-anhi ni Kristo?

Kining “pagsupil” nga gihulagway ni Pablo mao ang Dakong Apostasiya, diin nahitabo human sa pagkamatay sa Apostoles ni Jesukristo. Kini nga Dakong Apostasiya lahi gikan sa personal nga apostasiya, diin sa higayon nga ang mga indibidwal nagrebelde o nagmasupilon sa kamatuoran (tan-awa ang Giya ngadto sa mga Kasulatan, “ Hingpit nga Pagbiya ,” scriptures.ChurchofJesusChrist.org).

Sa unsang paagi nga ang mga pulong ni Pablo nagpakita sa pag-atiman ug pagpakabana sa Dios alang sa mga Santos nga Taga-Tesalonica?

Usa sa mga kamatuoran nga atong makat-onan gikan niining mga bersikulo mao nga gipanagna na sa karaan nga una pa ang Ikaduhang Pag-anhi ni Jesukristo, usa ka apostasya gikan sa Iyang Simbahan mahitabo.

Ngano sa imong hunahuna nga importante kini nga kamatuoran nga masabtan?

Si Presidente M. Russell Ballard sa Korum sa Napulog Duha ka Apostoles mipasabot nganong ang mga panahon sa apostasiya mahitabo.

Ang atong Langitnong Amahan naghigugma sa tanan Niyang mga anak, ug Siya buot nga silang tanan makaangkon sa mga panalangin sa ebanghelyo sa ilang mga kinabuhi. Ang espirituhanong kahayag wala mawala tungod ang Dios mitalikod sa Iyang mga anak. Hinoon, ang espirituhanong kangitngit miresulta sa dihang ang Iyang mga anak naghiusang mitalikod Kaniya. Kini natural nga sangpotanan sa sayop nga mga pagpili nga gihimo sa mga indibidwal, mga komunidad, mga nasod, ug sa tanang mga sibilisasyon.

(M. Russell Ballard, “Pagkat-on sa mga Leksyon sa Nangagi,”,” Liahona, Mayo 2009, 32)

Unsa ang nagpatigbabaw alang kanimo niini nga pamahayag? Ngano man?

Tungod kay ang Langitnong Amahan nahibalo sa tanang mga butang (tan-awa ang 2 Nephi 9:20), ang Dakong Apostasiya wala miabot isip usa ka katingala ngadto Kaniya. Siya naghigugma sa tanan Niyang mga anak (tan-awa ang Juan 3:16), busa Siya mihatag og paagi sa pagbuntog niining Dakong Apostasya pinaagi sa Pagpahiuli sa Simbahan ni Jesukristo ug sa ebanghelyo (tan-awa ang Mga Buhat 3:19–21 ; Mga Taga-Efeso 1:10).

Palawoma ang imong pagsabot sa Dakong Apostasiya

Ang mosunod nga kalihokan makatabang kanimo aron mas makasabot giunsa pagkahitabo sa Dakong Apostasiya ug nganong ang Simbahan sa Manluluwas gikinahanglan nga ipahiuli sa ulahing mga adlaw.

Tun-i ang mosunod nga mga tudling sa kasulatan ug ang pamahayag ni Presidente Russell M. Nelson, ug dayon tubaga ang mga pangutana sa ubos.

1 Nephi 13:24–28 : Si Nephi nakakita og usa ka panan-awon unsa ang mahitabo sa importanteng mga kamatuoran sa Biblia.
Amos 8:11–12 : Gitagna ni Amos nga moabot ang usa ka espirituhanong kagutom.
Mga Buhat 20:29–30 : Nagpasidaan si Pablo nga ang mga miyembro sa Simbahan sa Manluluwas mahisalaag gikan sa ebanghelyo.
Si Presidente Russell M. Nelson mitudlo:

“Ang buhi natong Dios mapinanggaon nga Dios! Gusto Siya nga ang Iyang mga anak makaila Kaniya ug kang Jesukristo, kinsa Iyang gipadala! Ug gusto Siya nga ang Iyang mga anak makabaton ug imortalidad ug kinabuhing dayon!

“Tungod niining mahimayaong katuyoan, ang atong mga misyonaryo nagtudlo sa Pagpahiuli. Nahibalo sila nga mga 2,000 ka tuig nang milabay, ang Ginoo miestablisar sa Iyang Simbahan. Human sa Iyang Pagkalansang ug pagkamatay sa Iyang mga Apostoles, giusab sa mga tawo ang Simbahan ug ang doktrina niini. Dayon, human sa mga henerasyon sa espirituhanong kangitngit, ug sigon sa gipanagna sa miaging mga propeta, ang Langitnong Amahan ug si Jesukristo mipahiuli sa Simbahan, doktrina, ug awtoridad sa priesthood. Tungod niana nga Pagpahiuli, ang kahibalo ug importanteng mga ordinansa sa kaluwasan ug kahimayaan mahimong maangkon na usab sa tanang tawo. Human niana, kana nga pagkahimaya naghimo natong tanan nga makauban ang atong pamilya sa presensiya sa Dios ug ni Jesukristo sa hangtod!”

Russell M. Nelson, “Pahimusli ang Panahon,” Liahona, Mayo 2013, 46

Unsa ang imong nakat-onan mahitungod sa Dakong Apostasiya?

Unsa ang imong nakat-onan mahitungod sa Langitnong Amahan ug ni Jesukristo pinaagi niini nga mga pagtulun-an?

Base sa unsa ang imong nakat-onan, nganong gikinahanglan man ang Pagpahiuli?

New Testament Seminary Teacher Manaul - 2023

Kini mahimong gamiton aron makatabang sa pagpalawom sa pagsabot sa mga estudyante kon tinguhaon.

Human mahatagan ang mga estudyante og igong panahon sa pagtuon, dapita sila sa pagpaambit sa ilang mga tubag sa mga pangutana diha sa handout. Hangyoa sila sa pagpaambit hain sa ilang mga pangutana ang natubag ug hain ang nagpabilin pa. Dapita ang ubang mga estudyante sa pagpaambit og mga panabot nga mahimong makatabang pagtubag niadtong mga pangutanaha.

Taposa ang klase sa mosunod nga kalihokan ug mga pangutana.

Si Elder Jeffrey R. Holland sa Korum sa Napulog Duha ka Apostoles mipaambit og mga pangutana nga lagmit aduna siya ug ang iyang asawa kon sila nabuhi pa panahon sa Dakong Apostasiya: “Unsa ang kulang dinhi? Unsay atong gipangandoy nga aduna unta kita? Unsay atong gilaoman nga ihatag sa Dios agig tubag sa atong espirituhanong pangaliya?” (“Usa ka Hingpit nga Kahayag sa Paglaom,” Liahona, May 2020, 81). Pamalandong og susama nga mga panghunahuna ug mga pagbati nga lagmit aduna ka kon ikaw nabuhi pa unta niadtong panahona.

Unsa kaha ang imong kinabuhi kon wala sa imoha ang kahingpitan sa ebanghelyo ni Jesukristo?
Sa unsa ka labing mapasalamaton mahitungod sa gipahiuli nga Simbahan sa Manluluwas? Ngano man?
Unsa ang imong gibati nga gusto sa Langitnong Amahan nga imong mahibaloan, mabati, o mahimo gumikan niini nga leksiyon?

Komentaryo ug Background nga Impormasyon

Ang mga Kristiyanos ba nga nabuhi sa wala pa ang Pagpahiuli nakamatikod sa Apostasiya?

Ang repormador nga si Martin Luther (1483–1546) mitudlo:

Wala akoy laing gitinguha lapas sa pagreporma sa Simbahan nga nahiuyon sa Balaang mga Kasulatan. … Ako yanong moingon nga ang Kristiyanismo wala na maglungtad taliwala niadtong angay untang magpreserbar niini.

(Sa E. G. Schwiebert, Luther and His Times: The Reformation from a New Perspective [1950], 509)

Ang lider sa Early American Christian nga si Roger Williams (1603–83) mipasabot:

Ang apostasiya … mihugaw sa tanan nga wala nay pagkaayo gikan niana nga apostasiya hangtod mopadala si Kristo og bag-ong apostoles aron sa pagtukod pag-usab sa mga simbahan.

(Sa Philip Schaff, The Creeds of Christendom, 3 ka mga bol. [1877], 1:851)

Ang Dutch nga pilosopo nga si Erasmus (1466–1536) mitudlo:

Ang tanan karon nalambigit pag-ayo niini nga mga pangutana [sa doktrina] ug mga mando nga dili gani kita mangahas sa pagtawag sa kalibotan balik ngadto sa tinuod nga Kristiyanismo.

(The Praise of Folly, hubad ni Clarence H. Miller, 2nd ed. [2003], 155–56)

Aduna bay usa lamang ka apostasiya?

Sa tibuok panahon, adunay daghang mga dispensasyon nga natapos sa apostasiya. Ang Ginoo dayon sa Iyang kaluoy mipahiuli sa Iyang ebanghelyo dinhi sa yuta pinaagi sa pagtawag og mga propeta.

6:55

Unsaon nato pagtan-aw ang maayo nga mga tawo sa lain nga mga tinuohan?

Si Presidente Dallin H. Oaks sa Unang Kapangulohan mipasabot:

Kita nagtuo nga kadaghanan sa mga lider ug mga sumusunod sa relihiyon mao ang matinguhaong magtutuo kinsa nahigugma sa Dios ug nakasabot ug moserbisyo Kaniya kutob sa ilang mahimo. Kita may utang kabubut-on sa mga tawo kinsa padayong naghupot sa kahayag sa hugot nga pagtuo ug pagkat-on sulod sa daghang siglo hangtod karon. Kita kinahanglan lamang motandi sa gamay nga kahayag nga anaa taliwala sa mga tawo nga dili pamilyar sa mga ngalan sa Dios ug ni Jesukristo aron makaamgo sa dakong kontribusyon nga nahimo sa Kristohanong mga magtutudlo latas sa mga katuigan. Kita nagpasidungog kanila ingong mga alagad sa Diyos.

(Dallin H. Oaks, “Apostasy and Restoration,” Ensign, Mayo 1995, 85)

Dugang nga Kalihokan sa Pagkat-on

Alternatibo nga sinugdanan sa leksiyon

Pagpakita og usa ka buhi nga tanom ug patay o himatyon nga tanom (o patay nga sanga nga gitisok sa gamayng yuta). Dapita ang mga estudyante sa pagpamalandong ug pagtubag sa mosunod nga mga pangutana:

Ngano kaha nga kini nga mga tanom managlahing tan-awon sa usag usa?
Sa unsang paagi kining mga tanom nagrepresentar sa lainlain nga mga kondisyong espirituwal?

Dayon dapita ang mga estudyante sa pagkonsiderar sa unsang paagi kini nga analohiya nahimong may kalabotan ngadto sa Dakong Apostasiya. Kon mahimo, dapita sila sa pagtuon sa Amos 8:11–12 aron makahimo og mga pagdugtong sa dili pa tun-an ang 2 Mga Taga-Tesalonica 2:1–4 .