Sukda ang Imong Nakat-onan 10
Mga Taga-Galacia–2 Mga Taga-Tesalonica
Kini nga leksiyon gituyo aron matabangan ka sa pagtimbang-timbang sa mga tumong nga imong gitakda ug sa personal nga pag-uswag nga imong nasinati sa panahon sa imong pagtuon sa Bag-ong Tugon.
Paghatag ug bili sa mga kontribusyon sa mga estudyante. Ang matag tinun-an adunay kapasidad nga makatampo sa nakat-onan sa uban. Tabangi ang mga estudyante sa pagsabot nga samtang mosalmot sila sa klase, mahimong aduna silay positibong epekto sa ubang mga estudyante. Dasiga ang mga estudyante nga sinserong maminaw samtang ang ilang mga kauban nagsulti ug sa pagtubag sa komentaryo sa usag usa. Ang matag estudyante nagdala og usa ka talagsaon nga panglantaw ngadto sa klase nga makapanalangin sa ubang mga estudyante.
Pagpangandam sa estudyante: Dapita ang mga estudyante sa paghunahuna mahitungod sa mga tumong nga ilang gitakda samtang sila nagtuon sa Mga Taga-Galacia hangtod sa 2 Mga Taga-Tesalonica. Paandama sila aron mopaambit sa paglambo nga ilang nabuhat ug sa mga babag nga ilang nasugatan diha sa ilang pagpaningkamot aron makab-ot ang maong mga tumong.
Posible nga mga Kalihokan sa Pagkat-on
Ang imong espirituwal nga pag-uswag
Kini nga leksiyon gituyo aron matabangan ang mga estudyante sa pagtimbangtimbang sa mga tumong nga ilang gitakda, sa ilang abilidad sa pagpasabot sa mga pagtulon-an sa Bag-ong Tugon, ug kon sa unsang paagi nausab ang ilang mga kinaiya, mga tinguha, ug abilidad sa pagsunod sa ebanghelyo. Ang pagtuon sa klase sa Mga Taga-Galacia-2 Mga Taga-Tesalonica posibleng nagtudlo og mga kamatuoran nga lahi ra niadtong anaa sa mosunod nga mga kalihokan. Kon mao kana, ang mga kalihokan mahimong ipahiangay nga ilakip kadto nga mga kamatuoran.
Paghunahuna og usa ka abilidad, talento, o kinaiya nga imong gipalambo nga nagkinahanglan og regular ug makanunayon nga paningkamot.
-
Unsa ang nakapadasig nimo nga mogahin og panahon ug paningkamot nga gikinahanglan aron molambo?
-
Diha sa imong pagpaningkamot nga mouswag, unsa ang imong gilaoman nga mahitabo nga nagtabang kanimo nga mahibalo nga ang imong mga paningkamot mapuslanon?
Aduna kitay daghang mga kahigayonan sa atong panahon sa kalibotan sa pagpaningkamot paingon sa pagkahimong mas susama sa Manluluwas, nga nag-andam kanato sa pagbalik pagpuyo kauban Niya ug sa atong Langitnong Amahan. Mahimong makatabang ang matag karon og unya nga pagtimbang-timbang sa atong pag-uswag ug paghimo sa bisan unsang gikinahanglang mga pagpahiangay.
Ang katuyoan niini nga leksiyon mao ang paghatag kanimo og mga kahigayonan sa pagtimbang-timbang sa imong espirituhanong pag-uswag. Makabaton ka og kahigayonan sa pagsusi unsa ang imong nakat-onan gikan sa Bag-ong Tugon ug sa pagsukod sa imong pag-uswag nga may kalabotan sa mga tumong nga imong gitakda tungod sa unsa ang imong nakat-onan.
Paggahin og higayon sa paghunahuna mahitungod sa imong bag-ohay lang nga pagtuon sa Bag-ong Tugon ug sa imong gipangbuhat gumikan sa unsay imong nakat-onan. Lagmit gusto nimong irebyo unsa ang imong nasulat sa imong journal o unsa ang imong bag-o lang gimarkahan sa imong mga kasulatan aron maila ang mga tumong nga imong gitakda ug ang mga impresyon nga imong nadawat.
Ang mga estudyante mahimong morekord sa ilang mga hunahuna diha sa ilang mga journal. Kon ang mga estudyante adunay igong panahon, dapita sila sa pagpaambit sa unsay ilang nasulat. Ang mosunod nga mga pangutana makatabang sa mga estudyante nga masayod unsa ang ipaambit.
-
Unsa ang imong nakat-onan gikan sa Bag-ong Tugon nga nakatabang kanimo aron mahiduol kang Jesukristo?
-
Unsa ang imong nakat-onan mahitungod Kaniya gikan sa Bag-ong Tugon nga mipatigbabaw diha kanimo?
Kon ang mga estudyante mopaambit og importanteng kasinatian sa pagkat-on nga lahi gikan sa kadtong nalista sa ubos, paggahin og higayon sa pagtabang kanila nga masusi unsa ang ilang nakat-onan ug giunsa nila paglambo tungod sa ilang mga kasinatian. Kon dili man gani, gamita ang usa o ang tanan sa mosunod nga mga kalihokan.
Kalihokan A: Pagpasabot sa Dakong Apostasiya ug sa Pagpahiuli
Tan-awa kining duha ka mga hulagway, ug paghunahuna mahitungod sa unsa ang ipasabot niini nga ipahiuli ang usa ka butang.
-
Ngano nga adunay kinahanglan nga ibalik?
-
Sa unsa nga paagi kini nga mga hulagway ikatandi sa Apostasiya ug sa Pagpahiuli?
Aron marebyo ang koneksiyon tali sa Apostasiya ug sa Pagpahiuli, kompletoha ang mosunod nga mga kalihokan:
Hunahunaa nga ang mga misyonaryo nagtudlo sa usa sa imong mga higala sa imong panimalay. Gihangyo ka nila nga motudlo sa bahin sa sunod nga leksiyon sa Apostasiya ug sa Pagpahiuli. Nasayod ka nga ang imong higala pamilyar sa Biblia, mao nga ingon og maayo nga ideya ang paggamit og pipila ka mga bersikulo gikan sa Bag-ong Tugon atol sa leksiyon.
Gamit ang Mga Buhat 3:21 ; Mga Taga-Efeso 1:10 ; Mga Taga-Efeso 2:19–22 ; ug 2 Mga Taga-Tesalonica 2:1–3 (o lain pang mga bersikulo nga imong gipili), isulat unsa ang lagmit nimong isulti panahon sa leksiyon aron matabangan ang imong higala nga makasabot nganong ang Manluluwas nagkinahanglan nga mopahiuli sa Iyang ebanghelyo sa kalibotan.
Ang mga estudyante mahimong dapiton sa pagpaambit sa ilang mga tubag nga magkapares, sa gagmayng mga grupo, o isip usa ka klase.
Kalihokan B. Pagdugang sa imong gugma alang kang Jesukristo ug sa imong tinguha nga moalagad Kaniya
Kon ang mga estudyante nagsulat og sulat sa ilang umaabot nga mga kaugalingon sa leksiyon sa “Mga Taga-Filipos 3,” mahimong gamiton ang mosunod nga kalihokan aron matabangan sila nga masusi ang ilang gugma alang sa Dios.
Sa leksiyon sa “Mga Taga-Filipos 3,” gihatagan ka og kahigayonan sa pagsulat og usa ka sulat sa imong umaabot nga kaugalingon diin ikaw miila sa mga sakripisyo nga mahimo nimong buhaton nga makatabang kanimo aron mas mahibalo kang Jesukristo ug makaandam alang sa kinabuhing dayon.
Kon imong gidawat kini nga kahigayonan, basaha ang sulat nga imong gisulat. Itandi ang imong kasamtangang pagbati mahitungod kang Jesukristo o sa imong mga tinguha sa pag-alagad Kaniya ngadto sa mga pagbati ug mga tinguha nga anaa kanimo sa dihang imong gisulat ang maong sulat. Kon adunay bisan unsa nga gusto nimong idugang sa sulat base sa imong bag-ong mga kasinatian, buhata kini karon.
Ikonsiderar ang pagdapit og mga boluntaryo aron mopaambit og bisan unsang mga panabot o mga hunahuna nga aduna sila sa dihang ilang girebyo ang ilang mga sulat. Ang mosunod nga mga pangutana lagmit makatabang sa mga estudyante sa pagpamalandong ug pagpaambit sa ilang mga hunahuna.
-
Samtang imong girebyo ang imong sulat, namatikdan ba nimo ang bisan unsang mga pagbag-o mahitungod sa imong gugma alang kang Jesukristo? Kon mao, ngano sa imong hunahuna nga kini nabag-o?
-
Unsa nga bag-ong kasinatian ang nakapadugang sa imong gugma alang sa Dios ug sa imong pagkaandam nga moalagad Kaniya?
-
Unsa sa imong pamati ang pipila sa sunod nga mga lakang nga imong buhaton aron makatabang kanimo nga madugangan ang imong gugma alang sa Dios?
Kalihokan C: Pagsul-ob sa tibuok hinagiban sa Dios
-
Unsa ang imong nahinumdoman mahitungod sa hinagiban sa Dios? Unsa ang imong nahinumdoman mahitungod sa kahulogan sa matag piraso? Kon nagkinahanglan ka og tabang, tan-awa ang Mga Taga-Efeso 6:14–18 alang sa mga tubag.
Ikonsiderar ang pagdrowing niini nga hulagway ngadto sa pisara ug ang pagdapit sa mga estudyante sa pagduol ug pagsulat sa espirituhanong kahulogan alang sa matag piraso sa hinagiban.
-
Unsaon kaha nimo pagpamubo [summarize] sa unsa ang buot ipasabot sa “pagsul-ob sa tibuok hinagiban sa Dios”? ( Mga Taga-Efeso 6:11).
Pagdrowing og tukog nga porma [stick figure] sa imong journal.
-
Unsa nga mga paningkamot ang imong gihimo aron masul-ob ang hinagiban sa Dios?
Pagdrowing og usa ka piraso o mga piraso sa hinagiban nga nagrepresentar niadtong mga paningkamot.
-
Nakasinati ka ba sa bisan unsang mga resulta gikan sa imong mga paningkamot? Kon mao, unsa ang imong nasinati? Kon wala, unsa nga mga resulta ang sa imong hunahuna mahimong moabot pinaagi sa pagpadayon sa imong mga paningkamot?