1–2 Mga Taga-Tesalonica

Kinatibuk-ang Pagpasabot

Sa iyang epistola ngadto sa Mga Taga-Tesalonica, si Pablo midayeg sa mga Santos sa ilang pagkamatinud-anon ug kalamposan sa pagtabang sa uban nga moduol kang Jesukristo pinaagi sa ilang maayong mga ehemplo. Iyang gitubag ang daghan sa ilang mga pangutana mahitungod sa Ikaduhang Pag-anhi ni Jesukristo ug mipatin-aw sa pipila sa ilang mga sayop nga nasabtan. Iyang gipanagna nga ang Ikaduhang Pag-anhi ni Jesukristo dili moabot hangtod nga mahitabo og una ang pagsupil, o apostasiya.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang mahimong kinahanglan nga andamon nang daan para sa kada leksiyon:

1 Mga Taga-Tesalonica 1–3

Katuyoan sa leksiyon: Kini nga leksiyon gituyo aron matabangan ang mga estudyante nga makapanalangin ug makaimpluwensiya sa uban diha sa ilang pagpaningkamot sa pagpangalagad sama sa gibuhat sa atong Manluluwas nga si Jesukristo.

Pagpangandam sa estudyante: Dapita ang mga estudyante nga maghunahuna og usa ka higayon sa dihang ilang nabati ang gugma sa Manluluwas tungod kay adunay usa ka tawo nga nangalagad kanila. Dasiga sila sa pagpangandam sa pagpakigbahin sa unsang paagi nga ang pagserbisyo niining tawhana nakatabang kanila sa pagkagusto nga mosunod kang Jesukristo.

Mga hulagway: Pagpakita og pipila ka mga hulagway nga nagpakita kang Jesukristo nga nangalagad ngadto sa uban.
Bidyo: “Pagpangalagad sama sa Gibuhat sa Manluluwas” (13:04; tan-awa gikan sa time code nga 0:45 hangtod sa 1:54)

1 Mga Taga-Tesalonica 4–5

Katuyoan sa leksiyon: Kini nga leksiyon gituyo aron matabangan ang mga estudyante nga makasabot sa mga paagi nga sila makapuyo nga mahimong magtabang kanila nga maandam alang sa panahon diin si Jesukristo mobalik dinhi sa kalibotan.

Pagpangandam sa estudyante: Hangyoa ang mga estudyante nga maghanduraw kon mahisama kaha sa unsa ang pagbalik pag-usab sa Manluluwas. Dapita sila sa pagtubag sa mosunod nga mga pangutana sa ilang journal sa pagtuon o sa usa ka piraso sa papel: Unsay nakapahinam [excite] nimo mahitungod sa Ikaduhang Pag-anhi? Unsa man ang nakapakulba nimo?

Hulagway: Pagpakita og usa ka hulagway nga nagpakita sa Ikaduhang Pag-anhi ni Jesukristo.
Mga Handout: Pag-andam og mga kopya sa mga handout sa leksiyon aron adunay igong kopya alang sa matag estudyante nga makabaton og labing menos sa usa sa tulo ka mga handout.

Sugyot sa pagtudlo pinaagi sa videoconference: Usa ka paagi sa paghimo sa tulo ka mga kalihokan sa pagtuon sa estudyante mao ang paggamit sa video chat nga feature aron pagbahin sa mga estudyante ngadto sa tulo ka mga breakout room. Pag-assign og usa ka lider sa grupo sa kada room, ug ipadala sa mga lider sa grupo ang content sa handout. Sultihi ang matag grupo sa pagsunod sa mga instruksiyon nga naa sa handout. Kon mahuman na sila, tugoti ang lider sa grupo nga mo-assign og usa ka tigpamulong aron mopaambit ngadto sa klase unsa ang nahisgotan sa grupo.

2 Mga Taga-Tesalonica 2

Katuyoan sa leksiyon: Kini nga leksiyon makatabang sa mga estudyante nga makasabot sa reyalidad sa Apostasiya sa Simbahan sa Bag-ong Tugon ug ang pagkinahanglan sa pagpahiuli sa Simbahan sa Manluluwas sa ulahing mga adlaw.

Patambonga sila nga andam mopaambit unsa ang ilang nakat-onan o sa pagpangutana sa bisan unsa nga mga pangutana nga aduna sila.

Handout: Pag-andam og usa ka kopya sa “Pagsabot sa Apostasiya ug ang Pagkinahanglan alang sa Pagpahiuli” alang sa matag estudyante, o pag-andam og usa ka paagi sa pagpakita sa mga content sa handout.

Sugyot sa pagtudlo pinaagi sa videoconference: Mahimong dapiton ang usa ka tawo nga walay apil sa klase nga motambong ug modala sa papel sa usa ka investigator sa sinugdanan sa leksiyon. Tugoti ang mga estudyante sa pagtudlo niining tawhana mahitungod sa Dakong Apostasiya ug sa Pagpahiuli.

Doktrinal nga Kahanas: 2 Mga Taga-Tesalonica 2:1–3

Katuyoan sa leksiyon: Kini nga leksiyon makatabang sa mga estudyante nga makamemorya sa pakisayran sa doktrinal nga kahanas ug sa mahinungdanong hugpong sa pulong sa kasulatan alang sa 2 Mga Taga-Tesalonica 2:1–3 , makapasabot sa doktrina, ug makagamit sa mga baroganan sa pag-angkon og espirituhanong kahibalo sa tinuod nga kahimtang sa kinabuhi.

Pagpangandam sa estudyante: Dapita ang mga estudyante sa pagpamalandong sa mosunod nga pangutana ug motambong nga andam sa pagpasabot unsaon nila pagtubag niini: “Nganong gikinahanglan man sa Dios magpakita ngadto kang Joseph Smith aron mapahiuli ang Iyang Simbahan kon ang Kristiyanismo natukod na ug daghang mga tawo ang mituo na sa Biblia?”

Sugyot sa pagtudlo pinaagi sa videoconference: Alang sa pagbansay sa paggamit nga kalihokan, mahimong bahinon ang mga estudyante ngadto sa tulo ka mga grupo ug ibutang ang matag grupo sa usa ka breakout room. Ang matag grupo mahimong mag-andam og tubag sa usa sa mga baroganan sa pag-angkon og espirituhanong kahibalo, ug dayon ang tulo ka mga grupo mahimong mag-uban og balik ug mopaambit.

Sukda ang Imong Nakat-onan 10

Katuyoan sa leksiyon: Kini nga leksiyon gituyo sa pagtabang kaninyo nga makatimbang-timbang sa mga tumong nga inyong gitakda ug sa personal nga paglambo nga inyong nasinati atol sa inyong pagtuon sa Bag-ong Tugon.

Pagpangandam sa estudyante: Dapita ang mga estudyante sa paghunahuna mahitungod sa mga tumong nga ilang gitakda sa ilang pagtuon sa Mga Taga-Galacia hangtod sa 2 Mga Taga-Tesalonica. Paandama sila aron mopaambit sa paglambo nga ilang nabuhat ug sa mga babag nga ilang nasugatan diha sa ilang pagpaningkamot aron makab-ot ang maong mga tumong.

Content nga ipakita: Hulagway sa una [before] ug pagkahuman [after] sa usa ka butang nga kinahanglang ipahiuli, sama sa usa ka sakyanan. Hulagway sa usa ka tawo nga nagsul-ob og kalasag [armor]. Mahimo usab kining idrowing sa pisara.