Rebyo 21 sa Doktrinal nga Kahanas

Gamita ang mga Tudling sa Doktrinal nga Kahanas

Mga young adult nga nagtan-aw sa mga kasulatan.

Ang usa ka katuyoan sa doktrinal nga kahanas mao ang pagtabang kanimo nga mas makasabot sa mga pagtulun-an sa Manluluwas, makapasabot niini sa imong kaugalingong mga pulong, ug makagamit niini sa imong kinabuhi. Kini nga leksiyon maghatag kanimo og kahigayonan sa pagbansay sa paggamit sa mga tudling sa doktrinal nga kahanas sa Bag-ong Tugon ngadto sa nagkalainlain nga mga kahimtang.

Pagpangandam sa estudyante: Dapita ang mga estudyante sa pagpili og usa ka piho nga tudling sa doktrinal nga kahanas sa Bag-ong Tugon nga nakatabang kanila ug sa pag-andam sa pagpaambit ngadto sa klase giunsa niini pagtabang kanila.

Posible nga mga Kalihokan sa Pagkat-on

Pagribyo sa mga tudling sa doktrinal nga kahanas

Ang tudling sa doktrinal nga kahanas nga leksiyon kinahanglang itudlo isip puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor sa lugar o rehiyon o koordinitor aron maseguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.

Ikonsiderar ang pagdapit sa mga estudyante sa paghatag og pasulit sa usag usa o sa paggamit og lain nga paagi sa pagrebyo sa mga tudling sa doktrinal nga kahanas ug sa mahinungdanong hugpong sa mga pulong sa kasulatan. Mahimong gamiton sa mga estudyante ang Mahinungdanon nga Dokumento sa Doktrinal nga Kahanas (2022) o ang app sa Doktrinal nga Kahanas aron sa pagrebyo sa mga tudling. Ang laing mga tudling sa doktrinal nga kahanas mahimong gamiton puli sa mosunod nga mga tudling.

Irebyo ang mga pakisayran sa kasulatan ug ang mahinungdanong hugpong sa mga pulong sa kasulatan alang sa mosunod nga mga tudling sa doktrinal nga kahanas. Paghunahuna kon sa unsang paagi ang doktrina sa matag tudling mahimong magamit sa imong kinabuhi.

Mga Hebreohanon 12:9 : Ang Langitnong Amahan mao “ang Amahan sa mga espiritu.”

Santiago 1:5–6 : “Kon aduna man kaninyoy nakulangan og kaalam, papangayoa siya sa Dios.”

Santiago 2:17–18 : “Ang [hugot nga] pagtuo patay kon kini walay binuhatan.”

1 Pedro 4:6 : “Ang maayong balita [gi]wali hangtod ngadto sa mga patay.”

Pinadayag 20:12 : “Ug ang mga patay gipanaghukman … pinasikad sa ilang mga binuhatan.”

Gamita ang doktrina nga gitudlo sa mga tudling sa doktrinal nga kahanas

Ang booklet nga Alang sa Kalig-on sa mga Kabatan-onan naghatag sa mosunod nga tambag: “Tun-i ang mga kasulatan matag adlaw ug gamita ang inyong nabasa nganha sa inyong kinabuhi. Ang mga kasulatan gamhanan nga tinubdan sa personal nga pagpadayag ug paggiya ug usa ka makanunayon nga kusog sa imong pagpamatuod” ([2011], 42).

• Unsa nga mga matang sa mga butang ang imong gibuhat nga nagtabang kanimo sa paggamit sa unsay imong nakat-onan diha sa mga kasulatan ngadto sa imong kinabuhi?

Mahimong basehan sa mga estudyante ang ilang pagpangandam sa klase samtang tubagan ang mosunod nga pangutana.

• Unsa ang tudling sa doktrinal nga kahanas nga nakatabang nimo sa imong kinabuhi? Giunsa niini pagtabang kanimo?

Ang mosunod nga pagbansay makatabang kanimo nga mabansay ang paggamit og piho nga mga tudling sa doktrinal nga kahanas diha sa imong kaugalingong kinabuhi. Diha sa imong pagkompleto sa pagbansay, pag-andam sa pagdawat sa personal nga pagpadayag. Ang Espiritu Santo mahimong magdasig kanimo og mga panghunahuna o mga ideya kung unsaon nimo paggamit ang mga kasulatan sa imong kaugalingong kinabuhi. Mahimong andam sa pagsulat og bisan unsang mga pangaghat nga imong madawat.

Hatagi ang matag estudyante og usa ka piraso sa papel, ug dapita sila sa pagkompleto sa unang lakang sa ubos. Dayon dapita ang mga estudyante sa pagpasa sa ilang papel ngadto sa laing miyembro sa klase, kinsa mokompleto sa ikaduhang lakang. Ipadayon ang pagpasa sa papel ngadto sa lainlaing mga estudyante alang sa ikatulo ug ikaupat nga lakang. Ang mga estudyante mahimo usab mokompleto niini nga kalihokan sa usa ka digital nga himan nga adunay app sa pagmensahe.

Sa dili pa magsugod ang mga estudyante, mahimo silang makabenepisyo gikan sa usa ka ehemplo sama sa mosunod: 1. Usa ka estudyante naghunahuna kon ang Langitnong Amahan nakaila ba kon kinsa sila. 2. Mga Hebreohanon 12:9 mahimong makatabang tungod kay kini nagtudlo nga ang Dios mao ang Amahan sa atong mga espiritu. 3. Ang usa ka estudyante mahimong mopaambit og usa ka kasinatian diin siya mibati nga ang Dios nasayod kaniya. 4. Kon mawad-an ko og kadasig, makahinumdom ko nga Ako anak sa Dios.

Kon ang mga estudyante nagkinahanglan og tabang sa paghunahuna og usa ka tinud-anay nga senaryo, mahimong maghatag og pipila ka mga ehemplo nga magamit sa mga estudyante.

1. Ihulagway ang usa ka tinud-anay nga senaryo o pangutana og may kalabotan sa usa o daghan pa sa mga tudling sa kasulatan sa doktrinal nga kahanas niini nga leksiyon ( Mga Hebreohanon 12:9 ; Santiago 1:5–6 ; Santiago 2:17–18 ; 1 Pedro 4:6 ; Gipadayag 20:12).

2. Pag-ila og usa ka tudling sa kasulatan sa doktrinal nga kahanas sa Bag-ong Tugon, ug ipasabot kon sa unsang paagi kini makatabang kanimo sa pagtubag sa senaryo o pangutana.

3. Pagpaambit og usa ka kasinatian nga may kalabotan sa doktrina nga gitudlo sa tudling. Kini mahimong usa ka personal nga kasinatian, usa ka kasinatian sa usa ka tawo nga imong kaila, o usa ka kasinatian nga narekord sa mga kasulatan.

4. Ipakigbahin kon sa unsang paagi nimo magamit ang doktrina sa imong kaugalingong kinabuhi o unsay natabang niini kanimo nga makasabot mahitungod sa Langitnong Amahan o ni Jesukristo.

Kon ang mga estudyante mahuman na, dapita sila sa pagbasa sa mga tubag nga anaa sa ilang mga papel ngadto sa klase. Ang mga estudyante mahimo dayong mopaambit unsa ang ilang nakat-onan gikan sa pagkadungog sa mga panglantaw sa ubang mga estudyante. Kon aduna pay panahon, mahimong sublion sa mga estudyante ang pagbansay gamit ang lain nga mga tudling sa doktrinal nga kahanas.

• Unsa ang imong mabuhat karong semanaha nga magtabang kanimo nga magamit ang mga kasulatan sa imong kinabuhi?

• Sa unsang paagi nga ang pagbuhat niini makatabang kanimo nga mas mahiduol ngadto sa Manluluwas?

Dapita ang mga estudyante sa pagbasa sa mga kasulatan sa adlaw-adlaw ug sa paggamit sa unsay ilang nakat-onan diha sa ilang kaugalingong mga kinabuhi. Pagpamatuod sa mga panalangin sa adlaw-adlaw nga pagtuon sa kasulatan.