Mutual nga kalihokan, ang mga batan-ong babaye sa among ward nagtinabangay aron makaabot sa kinatumyan sa bukid nga nag-umbaw sa Walog sa Utah.
Unsa nga mga problema o mga hagit ang giatubang nimo ug niadtong naglibot nimo? Unsa ang nakapalisod niini nga mga hagit? Naghunahuna ka ba kon makadawat ba gayod ka og tabang nga imong gikinahanglan aron mabuntog ang imong mga hagit? Si Pablo nag-atubang og daghang lisod nga mga hagit sa iyang kinabuhi, lakip na ang pagkabilanggo diha sa panimalay didto sa Roma. Atol niini nga mga kahimtang nagsulat siya og mga epistola ngadto sa mga Santos sa Filipos ug Colosas ug nagtudlo kanila sa pagdangop ngadto ni Jesukristo alang sa kalig-on. Kini nga leksiyon makatabang nimo sa pag-ila nga pinaagi kang Jesukristo makakaplag ka og kalig-on sa pag-atubang sa imong mga hagit.
Pagtabang sa mga estudyante nga makatudlo. Ang paghatag og mga kahigayonan alang sa mga estudyante sa pagtudlo sa usag usa makatabang nila nga mas makasabot ug makapahimulos sa mga kamatuoran nga ilang nakat-onan.
Pag-andam sa estudyante: Dapita ang mga estudyante sa pagmemorya sa Mga Taga-Filipos 4:13 .
Posible nga mga Kalihokan sa Pagkat-on
Mga hagit ug mga problema nga giatubang sa kabatan-onan
Ikonsiderar ang pagdapit sa mga estudyante nga isulat sa pisara ang ilang mga tubag sa unang pangutana diha sa ubos alang sa pakisayran sa tibuok nga leksiyon.
Unsa ang pipila ka komon nga mga problema o mga hagit nga giatubang sa kabatan-onan sa inyong dapit?
Asa niini nga mga problema o mga hagit sa imong hunahuna ang dili mabuntog sa kabatan-onan nga sila lang? Ngano man?
Diha sa imong journal sa pagtuon, ilha ang imong kaugalingong mga hagit ug mga problema ug ipasabot nganong lisod kini alang nimo. Ilakip ang mga hunahuna kon nganong nagkinahanglan ka og tabang sa pagbuntog niini.
Niini nga leksiyon ikaw adunay kahigayonan sa pag-andam ug pagtudlo og mubo nga leksiyon gamit ang mga sulat ni Pablo ngadto sa mga Taga-Filipos ug Mga Taga-Colosas. Samtang magtuon ka niini nga mga sulat, pangitaa kon sa unsang paagi nga ang mga pulong ni Pablo makatabang nimo ug sa uban nga mosalig ni Jesukristo atol sa mga panahon sa hagit.
Ikonsiderar ang pagdapit og usa ka estudyante sa pagbasa og kusog o pag-summarize sa mosunod nga parapo aron matabangan ang klase nga masabtan ang konteksto sa Mga Taga-Filipos ug Mga Taga-Colosas.
Si Apostol Pablo nag-atubang og daghang problema ug mga hagit. Ang Mga Taga-Filipos ug Mga Taga-Colosas malagmit nga parehong gisulat samtang si Pablo gidakop didto sa Roma, apan sa talagsaong paagi atol niining lisod nga panahon nga misulat si Pablo bahin sa ‘kalinaw sa Dios nga dili matugkad sa tawo’ ( Mga Taga-Filipos 4:7). Kining duha ka mga sulat kanunay nga positibo ug malaumon, ug naglangkob kini og pipila sa labing klaro ug labing kinasingkasing nga mga pagtulon-an ni Pablo mahitungod ni Jesukristo. Mitudlo si Pablo nga kon magpuyo kita diha sa hugot nga pagtuo ug kamapasalamaton, mapauswag sa Ginoo ang katuyoan sa ebanghelyo pinaagi kanato—bisan unsa pa ang mga kahimtang nga anaa kita—ug nga pinaagi sa pagtukod diha sa pundasyon ni Jesukristo makalikay kita sa pagkahisalaag tungod sa kalibotanong mga pilosopiya ug mga tradisyon” (New Testament Student Manual [2014], 433; tan-awa usab sa Giya ngadto sa mga Kasulatan, “Taga-Filipos, Epistola ngadto sa Mga” ug “Taga-Colosas, Epistola ngadto sa Mga,” scriptures.ChurchofJesusChrist.org).
Kon ang mga estudyante gidapit sa pagmemorya sa Mga Taga-Filipos 4:13 isip pagpangandam alang niini nga leksiyon, pagdapit og usa o mas daghan pa nga mga estudyante nga isaysay ang bersikulo karon.
Basaha ang Mga Taga-Filipos 4:13, nga mangita sa unsay gipaambit ni Pablo mahitungod sa kaimportante ni Jesukristo sa iyang kinabuhi.
Sa imong hunahuna nganong usa kini ka importante nga pagtulon-an nga kinahanglang mahibaloan?
Si Jesukristo makatabang kanato sa atong mga hagit
Hunahunaa ang mga problema ug mga hagit nga giatubang sa kabatan-onan sa inyong dapit, ingon man ang imong kaugalingong mga hagit. Gamita ang mga lakang A, B, ug C sa ubos aron sa pag-andam og lima ka minuto nga leksiyon. Pagtutok sa unsay imong matudlo mahitungod ni Jesukristo nga makatabang nimo ug sa uban nga mabuntog ang mga hagit.
Ipakita ang mosunod nga latid sa leksiyon ug mga instruksiyon aron matabangan ang mga estudyante sa pag-andam sa ilang mga leksiyon. Samtang nagtrabaho ang mga estudyante, paglakaw-lakaw libot sa lawak ug tabangi sila kon gikinahanglan. Hatagi sila og igong panahon sa pag-andam sa ilang mga leksiyon.
Ang mga estudyante makaandam sa ilang mga leksiyon nga sila ra o magtrabaho nga magpares aron makompleto ang kalihokan. Matag estudyante diha sa managpares mahimong magtuon sa katunga sa mga tudling nga sila ra, dayon hisgotan ang ilang mga tudling ngadto sa ilang pares. Dayon ang managpares mahimong magdungan sa pag-andam ug pagtudlo sa leksiyon.
A. Tun-i ang mosunod nga mga tudling, nga mangita sa mga kamatuoran nga sa imong pamati makatabang nimo ug sa uban:
B. Pagpili og usa ka bersikulo o grupo sa mga bersikulo ug pag-ila og usa ka kamatuoran nga imong itudlo mahitungod sa ebanghelyo sa Manluluwas. Sama pananglitan, usa ka kamatuoran nga makita diha sa Mga Taga-Colosas 1:12–14 mao nga ang Langitnong Amahan mipadala sa Iyang Anak aron kita makalingkawas gikan sa kangitngit ug mapasaylo sa sala.
C. Paglakip og usa o mas daghan pa sa mosunod nga mga elemento diha sa imong leksiyon:
Pagpaambit og kasinatian nga imong nasinati o nasinati sa laing tawo nga naghulagway sa kamatuoran. Dapita ang imong mga gitudloan sa pagpaambit usab og mga kasinatian. Mahimo usab ka nga mopaambit og mga ehemplo o mga kasinatian gikan sa mga kasulatan o mga pakigpulong sa kinatibuk-ang komperensiya. Pananglitan, ang mga kasinatian nga may kalabotan sa pinabaga nga pagkasulat nga kamatuoran sa ibabaw mahimong magtutok sa Manluluwas nga mipasaylo sa usa ka tawo o mipalingkawas kaniya gikan sa kangitngit.
Pangita og makatabang nga mga cross-reference. Pananglitan, alang sa pinabaga nga pagkasulat nga kamatuoran sa ibabaw, mahimo nimong ipaambit ang Mosiah 16:9 o 2 Pedro 2:9. Dapita ang imong mga gitudloan sa pagpangita og dugang nga mga cross-reference gamit ang mga kapanguhaan sama sa Giya sa mga Kasulatan.
Pangita og makatabang nga pamahayag gikan sa usa ka lider sa Simbahan. Pananglitan, ang pinabaga nga pagkasulat nga kamatuoran gihulagway sa mosunod nga pamahayag ni Sister Reyna I. Aburto sa Kinatibuk-ang Kapangulohan sa Relief Society:
Imahe
Opisyal nga Litrato ni Sister Reyna Aburto. Gilitratohan niadtong 2017.
Kon ikaw kanunayng giliyokan sa “gabon sa kangitngit” [1 Nephi 8:23], dangop ngadto sa Langitnong Amahan. Walay bisan unsa sa imong nasinati ang makausab sa mahangturong kamatuoran nga ikaw Iyang anak ug nga Siya nahigugma kanimo. Hinumdumi nga si Kristo mao ang imong Manluluwas ug Manunubos, ug ang Dios mao ang imong Amahan. Sila nakasabot. Ihanduraw Sila nga anaa duol kanimo, naminaw ug nagtanyag og suporta. “[Sila] mohupay kanimo sa imong mga kasakit” [Jacob 3:1]. Buhata ang kutob sa imong mahimo, ug salig sa maulaong grasya sa Ginoo.
Dapita ang mga estudyante nga andam motabang sa pagtudlo sa klase. Sa alternatibong paagi, dapita ang gagmay nga mga grupo sa mga estudyante sa pagtudlo sa usag usa sa ilang mga leksiyon.
Awhaga ang mga estudyante nga magmatinuoron ug mohatag sa ilang labing maayo nga mga paningkamot samtang sila magtudlo ug tudloan. Dapita sila sa pagpangayo og tabang sa ilang kaugalingong mga hagit samtang maminaw sila og maayo sa mga leksiyon sa ilang mga klasmeyt.
Samtang magtudlo ug magkat-on kita pinaagi sa Espiritu kita malig-on (tan-awa sa Doktrina ug mga Pakigsaad 50:22–23). Diha sa imong journal sa pagtuon, isulat unsay imong nakat-onan ug gibati nga makatabang nimo nga makadawat og kalig-on gikan ni Jesukristo samtang nag-atubang sa imong mga hagit. Pangayo og tabang sa Langitnong Amahan pinaagi sa Espiritu Santo aron matino unsay Iyang ipabuhat nimo aron makadawat og kalig-on sa Manluluwas. Sunda ang mga pag-aghat nga imong madawat.
Awhaga ang mga estudyante sa pagtudlo sa ilang mga leksiyon ngadto sa ilang mga pamilya diha sa panimalay. Tingali makatabang nga padad-an og mensahe ang mga ginikanan aron mapahibalo sila bahin niini nga leksiyon aron makaawhag sila sa mga estudyante sa pagtudlo sa ilang mga leksiyon diha sa panimalay.
Komentaryo ug Background nga Impormasyon
Mga Taga-Filipos 2:12–13. Mitudlo ba si Pablo nga kinahanglan kitang maningkamot nga atong hinagoan ang atong kaugalingong kaluwasan?
Bisan kon ang mga buhat nga nagpakita og hugot nga pagtuo diha ni Jesukristo mahinungdanon, importante nga moila nga dili posible nga atong “hinagoan” ang kaluwasan (tan-awa sa 2 Nephi 2:8 ; Mosiah 2:24 ; Alma 22:14). Ang Mga Taga-Filipos 2:13 nagpasabot nga ang Dios naglihok diri nato aron sa pagtabang nato sa pagbuhat sa mga butang nga dili nato mabuhat sa atong mga kaugalingon (tan-awa sa Giya ngadto sa mga Kasulatan, “ Grasya,” scriptures.ChurchofJesusChrist.org ). Kini nga tabang ug kalig-on kasagaran gitawag og grasya sa Manluluwas ug mao ang gahom diin Siya nagluwas nato (tan-awa sa Mga Taga-Efeso 2:8).
Mga Taga-Filipos 4:13. Unsa ang gipasabot nga “Mahimo ko ang tanang butang pinaagi ni Kristo”?
Si Sister Michelle D. Craig sa Kinatibuk-ang Kapangulohan sa Young Women mipasabot:
Imahe
Ang opisyal nga litrato ni Michelle D. Craig.
Siyempre, kitang tanan mapakyas sa atong balaanong potensyal, ug dunay kamatuoran sa pagkaamgo nga kon mag-inusara kita ang atong paningkamot dili igo. Pero ang maayong balita sa ebanghelyo mao nga pinaagi sa grasya sa Dios, kita igo na. Pinaagi sa tabang ni Kristo, mahimo nato ang tanang butang [Mga Taga-Filipos 4:13]. Ang mga kasulatan misaad nga “makakaplag kitag grasya nga makatabang kanato sa panahon sa pagpanginahanglan” [Mga Hebreohanon 4:16 ].
Opisyal nga Litrato ni Presidente Dallin H. Oaks nga gikuha niadtong Marso 2018.
Naghisgot sa pipila sa iyang kaugalingong mga hagit sa kinabuhi, si Apostol Pablo misulat, “Mahimo ko ang tanang butang pinaagi ni Kristo nga nagapalig-on kanako” (Mga Taga-Filipos 4:13).
Ug sa ingon atong nakita nga tungod sa Iyang Pag-ula, ang Manluluwas adunay gahom sa pagtabang—sa pag-abag—sa tanang sakit ug kasakit sa kinabuhi. Usahay ang Iyang gahom moayo og usa ka kahuyang, apan ang kasulatan ug ang atong kasinatian nagtudlo nga usahay Siya motabang o moabag pinaagi sa paghatag kanato og kalig-on o pailob sa paglahutay sa atong mga kahuyang.
Ang Mga Taga-Filipos 2:12–13 mahimong mahagiton nga tudling. Dapita ang mga estudyante sa pagtuon niini og maayo ug pag-ila sa unsay gitudlo ni Pablo. Ikonsiderar ang pagdapit nila nga tun-an ang impormasyon diha sa seksiyon sa “Komentaryo ug Background nga Impormasyon” diha sa Mga Taga-Filipos 2:12–13 ug ang sinugdanan alang niini nga tudling diha sa Dali, Sunod Kanako—Alang sa mga Indibidwal ug mga Pamilya: Bag-ong Tugon 2023. Hangyoa sila sa pagpasabot sa unsay ilang nakaplagan nga nakatabang nila nga mas masabtan ang importante nga doktrina bahin sa mga buhat, grasya, ug kaluwasan. Dapita sila sa pagpaambit kon sa unsang paagi nga kini nga kahibalo makapalig-on sa ilang hugot nga pagtuo ug gugma alang ni Jesukristo.
Dapita ang mga estudyante sa pagpangita niini nga mga bersikulo sa mga ngalan, titulo, ug mga tahas ni Jesukristo. Ang mga estudyante mahimong dapiton sa pagpaambit og mga ehemplo gikan sa mga kasulatan, sa ilang kaugalingong mga kinabuhi, o sa mga kinabuhi niadtong ilang nailhan diin ang Manluluwas mipakita og ehemplo gamit niini nga mga ngalan, mga tahas, o mga titulo. Dapita ang mga estudyante sa pagpaambit og usa ka tahas nga labing makahuloganon kanila ug sa unsang paagi nga nakaimpluwensya kini sa ilang mga pagbati ngadto ni Jesukristo.
Dapita ang mga estudyante sa pagpaambit kon unsa sa ilang hunahuna ang buot ipasabot sa “pagkinabuhi … diha kang [Kristo]” (Mga Taga-Colosas 2:6). Dapita sila sa pagtuon sa mosunod nga mga tudling, nga mangita sa unsay buot ipasabot sa pagkinabuhi diha kang Kristo: Mga Taga-Colosas 1:9–18; Mga Taga-Colosas 2:6; Mga Taga-Colosas 3:1–11. Mahimo usab nila nga tun-an kini nga pamahayag ni Presidente Henry B. Eyring:
Imahe
Ang opisyal ng litrato ni Henry B. Eyring.
Unsay buot ipasabot sa paglakaw uban sa Ginoo? Nagpasabot kana sa paghimo unsay Iyang gihimo, sa pagserbisyo sama sa Iyang pagserbisyo. Gisakripisyo Niya ang kaugalingon Niyang kaharohay sa pagpanalangin niadtong nanginahanglan, mao nga kana ang paningkamotan natong buhaton. Ingon og piho Niyang gitagad ang mga tawo nga nataligam-an ug sinalikway sa katilingban, mao nga paningkamotan usab nato kana. Maisugon apan mapinanggaon Siyang mipamatuod sa tinuod nga doktrina nga Iyang nadawat gikan sa Iyang Amahan, bisan og dili ganahan ang uban niini, ug mao usab kita. Miingon Siya sa tanan, “Umari [kamo] kanako” (Mateo 11:28), ug moingon kami sa tanan, “Duol kamo Kaniya.”
Dapita ang mga estudyante sa pagpaambit sa ilang mga nakaplagan ug sa pagpangayo og tabang sa Langitnong Amahan sa paghimo og plano kon unsaon nga sila mas hingpit nga maglakaw diha ni Kristo.