Mga Taga-Colosas 1–2

“Nakagamot ug [Nakabarog nga Lig-on diha Kaniya]”

Sama nga adunay natural nga mga pwersa nga maka-ibot o makaguba sa usa ka kahoy, adunay mga pwersa nga mosulay sa pag-ibot sa matag usa kanato gikan sa atong espirituhanong mga pundasyon diha ni Jesukristo (tan-awa sa Helaman 5:12). Gisulat ni Pablo ang iyang sulat ngadto sa mga taga-Colosas tungod kay ang ilang pagtuo gihulga sa sayop nga mga pagtulun-an ug mga buhat. Kini nga leksiyon makatabang kanimo nga makaila sa mga pwersa nga naghulga sa imong hugot nga pagtuo ug mga paagi nga ikaw mahimong mas lig-on diha kang Jesukristo.

Paggamit og mga butang ug mga hulagway. Ang mga butang ug mga hulagway makatabang sa mga estudyante sa paghanduraw sa mga tawo, mga lugar, mga panghitabo, mga butang, ug mga simbolo diha sa mga kasulatan. Usa ka paagi sa pagtabang sa mga estudyante nga makahanduraw mao ang pagdapit kanila sa pagdrowing og mga butang nga nahisgotan sa mga kasulatan.

Pagpangandam sa estudyante: Dapita ang mga estudyante sa pagdrowing o pagkuha og hulagway sa ilang paborito nga klase sa kahoy nga mamunga og prutas ug dalhon kini nga hulagway sa klase. Hangyoa sila sa paghunahuna og espirituwal nga mga leksiyon nga atong makat-onan gikan sa mga kahoy.

Posible nga mga Kalihokan sa Pagkat-on

Sa unsang paagi nga ikaw sama sa usa ka kahoy?

Mahimong magdapit og usa ka boluntaryo sa pagdrowing og usa ka kahoy diha sa pisara. Gamita ang mga tubag sa estudyante sa mosunod nga kalihokan aron sulatan ang hulagway sa pisara. Dapita usab ang mga estudyante sa pagdugang sa ilang kaugalingong hulagway o drowing gikan sa pagpangandam sa estudyante nga kalihokan. Dasiga ang mga estudyante sa pagpadayon pagdugang og mga ideya sa tibuok leksiyon.

Pagdrowing og hulagway sa imong paboritong kahoy nga mamunga og prutas. Imo kining dugangan samtang nagpadayon ang tibuok leksiyon.

Paghunahuna mahitungod sa giunsa nimo pagkasama niini nga kahoy. Pananglitan, paghunahuna og mga pwersa nga misulay pag-ibot o pagguba sa imong hugot nga pagtuo kang Kristo. Paghunahuna mahitungod kon nganong ikaw nagkinahanglan og tabang aron lig-on nga makabarog batok niadtong mga pwersa aron matagamtam ang mga bunga sa ebanghelyo.

Gigamit ni Pablo ang simbolo sa usa ka kahoy aron matabangan ang mga Santos sa Colosas nga mas klarong makakita sa importansiya sa ilang relasyon ngadto kang Jesukristo. Gigamit usab niya kini aron mapalig-on sila batok sa bakak nga mga pagtulun-an ug mga buhat nga naghulga sa ilang hugot nga pagtuo kang Jesukristo. Pagtinguha og inspirasyon gikan sa Espiritu Santo aron mas makasabot sa mga pulong ni Pablo ug paningkamot nga magamit kini.

Mga bunga sa kahoy

Paghunahuna mahitungod sa bunga nga gikan sa kahoy nga imong gidrowing ug nganong ganahan ka niini.

Basaha ang Mga Taga-Colosas 1:10–22 . Pangitaa ang mga “bunga” (o mga panalangin) nga gihulagway ni Pablo, ug paghunahuna mahitungod kon nganong imong gitinguha kini nga mga bunga. Pagdrowing og mga bunga sa imong kahoy ug sulati kini sa mga pagtulun-an ni Pablo.

• Unsa nga mga bunga o mga panalangin ang giila ni Pablo?

Mahimong dapiton ang mga estudyante sa pagtubag sa mosunod nga mga pangutana diha sa ilang mga journal sa pagtuon ug dayon pagdapit og mga boluntaryo sa pagpaambit ngadto sa klase unsa ang ilang gisulat.

• Hain niini nga mga bunga ang imong gitagamtam sa kasamtangan?

• Hain niini ang gusto nimong matagamtaman? Ngano man?

Isulat sa imong journal sa pagtuon ang mosunod nga pamahayag, ug ilakip ang imong mga tubag ngadto sa miaging pangutana sa unang blangko:Kon gusto nako ________________, kinahanglan nako nga ________________.

Basaha ang Mga Taga-Colosas 1:23 , nga mangita kon unsa ang gisulti ni Pablo nga gikinahanglan ngare kanato aron makadawat niining mga bunga. Isulat diha sa ikaduhang blangko kon unsa ang imong nakita.

Niay usa ka paagi sa pagkompleto niini nga kamatuoran: Kon gusto ko nga malig-on ug makadawat sa katubsanan ug kalinaw pinaagi ni Kristo, kinahanglan kong magpadayon sa pagtuo nga lig-on ug dili matarog. Lig-on ug dili matarog mahimo usab magpasabot nga maayong pagkatukod ug dili mairog o “makanunayon ug dili mausab” ( Mosiah 5:15).

• Unsa ang hitsura sa “pagpadayon sa hugot nga pagtuo nga gilig-on ug gipahiluna”? ( Mga Taga-Colosas 1:23).

• Unsa ang imong nahibaloan mahitungod kang Jesukristo nga nagpadasig kanimo sa pagpadayon nga lig-on ug dili matarog ngadto Kaniya?

• Unsang dugang nga mga kamatuoran mahitungod Kaniya ang imong nakita niini nga mga bersikulo nga nakapataas sa imong pagsalig o tinguha nga magmalig-on ug dili matarog ngadto Kaniya?

Basaha ang Mga Taga-Colosas 2:6–7 , nga mangita kon unsa ang gitudlo ni Pablo mahitungod sa mga gamot sa atong kahoy. Sulati ang yuta sa palibot sa imong kahoy base sa unsa ang iyang gisulti.

• Asa man nagtudlo si Pablo nga kinahanglan nato itanom ang atong mga gamot?

• Unsa sa imong hunahuna ang gipasabot sa “nakagamot” diha kang Kristo?

• Sa unsang paagi nga ang paggamot sa atong kaugalingon diha kang Jesukristo nagtabang kanato nga magmalig-on ug dili matarog? Unsa kaha kana tan-awon?

Paghunahuna og usa ka kaila nimo kinsa nagpakita og pagkalig-on, pagka dili matarog, ug pagkagamot diha kang Kristo.

Kon ang mga estudyante makabenepisyo gikan sa ehemplo, mahimong mopaambit og usa o duha sa mosunod nga mga ehemplo.

Ang mosunod mao ang duha ka mga ehemplo sa mga tawo nga nakagamot kang Kristo. Ang Kinatibuk-ang Presidente sa Young Men nga si Steven J. Lund mipaambit ug usa ka ehemplo sa iyang grabeng nagmasakiton nga anak nga lalaki nga matinud-anong nagpadayon sa pagtuman sa iyang mga tahas sa pagkapari. Kon mahimo, tan-awa ang “Pagkaplag og Kalipay diha kang Kristo” gikan sa time code 0:09 hangtod sa 3:57 aron madungog kini nga sugilanon.

Si Brother M. Joseph Brough, kinsa nagserbisyo sa Kinatibuk-ang Kapangulohan sa Young Men, mipaambit og usa ka sugilanon mahitungod sa iyang batan-ong anak nga babaye nga matinud-anong naglahutay sa mga hagit sa pagbalhin ngadto sa usa ka bag-ong dapit ug nagpili nga moalagad og usa ka misyon. Kon mahimo, tan-awa ang “Ihangad ang Imong Ulo ug Pagmaya” gikan sa time code 5:48 hangtod sa 7:48 aron madungog kini nga sugilanon.

Dapita ang mga estudyante sa pagpaambit sa ilang mga hunahuna mahitungod sa mga tawo nga ilang gihunahuna. Tugoti sila nga mopasabot nga magpares o diha sa gagmayng mga grupo unsa ang ilang gidrowing sa mosunod nga kalihokan.

Pagdrowing og lawom ug lig-on nga mga gamot sa imong kahoy. Sulati ang pipila sa mga gamot og mga kinaiya niining mga tawhana o mga lihok nga ilang gibuhat nga pamati nimo lig-on nga nakakonektar kanila ngadto kang Jesukristo.

Rebyoha ang Mga Taga-Colosas 1:23 ; 2:6–7 . Dayon basaha ang Mga Taga-Colosas 2:8, 12 ug ang mosunod nga pamahayag ni Presidente Dallin H. Oaks sa Unang Kapangulohan. Sulati ang mga gamot sa imong kahoy og dugang nga mga paagi nga kita mas lig-ong makakonektar sa atong kaugalingon ngadto sa Manluluwas.

Kinahanglan kitang magtinguha nga lig-ong makagamot ug makabig sa ebanghelyo ni Jesukristo (tan-awa sa Mga Taga-Colosas 2:6–7). Atong makab-ot kining pagkakabig pinaagi sa pag-ampo, pagbasa sa kasulatan, pagserbisyo, ug regular nga pag-ambit sa sakramento aron kanunay nga makabaton sa Iyang Espiritu uban kanato. Kinahanglan usab kitang magtinguha nianang dakong kausaban sa kasingkasing (tan-awa sa Alma 5:12–14) nga mohulip sa daotang mga tinguha ug hinakog nga mga kabalaka sa gugma sa Dios ug sa tinguha nga moserbisyo Kaniya ug sa Iyang mga anak.

(DallinH. Oaks, “Ang Sambingay sa Magpupugas,” Liahona, Mayo 2015, 35)

Dapita ang mga estudyante sa pagpakigbahin sa “mga gamot” nga ilang nailhan. Hisgoti ang pipila o ang tanang mosunod nga mga pangutana kon gikinahanglan:

• Sa unsang paagi ka mibati og mas konektado sa Manluluwas diha nga ikaw misunod sa ehemplo sa kadtong mga lig-on ug dili matarog diha kang Kristo?

• Sa unsang paagi nga ang pagsalmot sa ordinansa sa ebanghelyo sama sa pagbunyag (tan-awa ang Mga Taga-Colosas 2:12) mas lig-on nga nagdugtong kanimo ngadto kang Kristo?

• Unsa kaha ang kalahian sa imong kinabuhi kon ikaw mas lig-on nga natukod ug walay pagkatarog diha kang Kristo?

Daghang mga tawo ang tingali naghimo og mga pagpili nga makapalawom sa ilang mga gamot diha kang Kristo, apan ang paagi sa ilang pagtuman niadtong mga pagpili wala gayod naghatag og makahuluganon nga mga resulta. Pananglitan, ang usa ka tawo mahimong mobasa sa ilang mga kasulatan kada adlaw apan dili mogahin og panahon sa pag-ila, pagpamalandong, ug paggamit sa mga kamatuoran gikan sa mga kasulatan.Pamalandong giunsa nimo pagtuman ang imong mga pagpili ug kon ikaw nagkinahanglan ba og mga pagbag-o.

Pagsugakod sa mga pwersa nga makaibot

Sama nga adunay natural nga mga pwersa nga makaibot o makaguba sa usa ka kahoy, adunay mga pwersa nga mosulay sa pag-ibot kanato gikan sa atong espirituhanong mga pundasyon diha ni Jesukristo.

Palibot sa imong kahoy, pagdrowing og mga hangin o mga bagyo nga mahimong makaibot sa imong kahoy. Sulati kining mga hangin ug mga bagyo sa mga pwersa nga mahimong espirituhanong makaibot kanimo gikan sa pagkahimong lig-on ug pagka dili matarog diha kang Jesukristo. Mahimo kang mobasa sa Mga Taga-Colosas 2:4, 8 aron makita ang pipila sa mga pwersa nga gisinati sa mga Santos sa Colosas.

• Sa unsang paagi nga ang mga gamot nga imong naila karong adlawa makatabang kanimo nga makadawat sa gahom sa Manluluwas sa pagbarog nga lig-on batok sa mga pwersa nga imong nailhan?

Kon mahimo, tan-awa ang “Espirituhanong mga Alimpulos” (2:24). Pangitaa kon sa unsang paagi ang pagkalig-on ug pagkadili matarog diha kang Kristo makatabang kanimo.

Pangayo og tabang sa Langitnong Amahan pinaagi sa Espiritu Santo aron mahibaloan kon unsa na ang imong maayo nga nahimo ug unsa pa ang mas maayo nimong mahimo aron mahimong mas lig-on ug mas dili matarog diha kang Jesukristo. Isulat ang imong mga hunahuna ug mga impresyon diha sa imong journal sa pagtuon, ug ipasalig ang pagtuman niini.

Komentaryo ug Background nga Impormasyon

Nganong kinahanglan man kitang mogamot diha kang Kristo?

Si Elder Neal A. Maxwell (1926–2004) sa Korum sa Napulog Duha ka Apostoles mipasabot:

Ang mga panghitabo ug mga sirkumstansiya sa kataposang mga adlaw naghimo nga gikinahanglan alang kanato isip mga miyembro sa Simbahan nga mahimong mas lig-on, nakagamot, natukod, ug napahimutang (tan-awa ang Mga Taga-Colosas 1:23 ; 2:7 ; 2 Pedro 1:12). Si Jesus miingon ngadto sa Iyang mga disipulo, “Ibutang kini sa inyong mga kasingkasing, nga kamo mobuhat sa mga butang nga Akong itudlo, ug isugo kaninyo.” [AngHubad ni Joseph Smith, Lucas 14:28 ]. Kon wala kaayo napahimutang, ang kaguliyang mahimong grabe. Kon napahimutang, kita dili “mapadpad ngadto-nganhi” [ Mga Taga-Efeso 4:14 ], pinaagi sa mga hungihong, sayop nga mga doktrina, o pinaagi sa pamatasan ug intelektwal nga mga paagi sa kalibotan. …

Bisan pa niana, dili kita mapahimutangsa pagtuman kon unsa ang gisugo ni Jesus gawas kon kita una nga mapahimutang ngadto Kaniya. … Busa, ang atong tahas, mao ang “pagpakig-uli [sa atong mga kaugalingon] ngadto sa kabubut-on sa Dios, ug dili ngadto sa kabubut-on sa … pagkatawhanon” ( 2 Nephi 10:24).

(Neal A. Maxwell, “Overcome … Even As I Also Overcame,” Ensign o Liahona, Mayo 1987, 70)

Mahimo usab nimong tan-awon ang “Pagpangita og Kadangpan gikan sa mga Kalisod sa Kinabuhi” gikan sa time code 0:00 hangtod sa 3:49 aron makita si Elder Ricardo P. Giménez nga nagtanyag og dugang nga mga panabot.

Mga Taga-Colosas 2:13–15 . Unsa ang gitudlo ni Pablo sa mga Santos sa Colosas mahitungod sa simbolo sa Paglansang sa Krus sa Manluluwas?

Si Pablo mipahinumdom sa mga Santos sa Colosas nga ang Dios mipasaylo kanila (tan-awa sa Mga Taga-Colosas 1:14, 20, 22). Ang simbolismo nga gigamit ni Pablo diha sa Mga Taga-Colosas 2:14–15 naghatag og gibug-aton kon sa unsang paagi ang Pag-ula ni Kristo naghimong posible nga mapasaylo ang atong mga sala. Sa kapanahonan ni Pablo nakustombre na sa mga taga-Roma ang pagsulat diha sa usa ka karatula sa mga krimen nga nahimo sa tawo nga pagasilotan. Kon ang nakasala ilansang sa krus, ang karatula ilansang usab sa krus aron makit-an sa tanang nangagi (tan-awa sa Juan 19:19–22). Gigamit ni Pablo kini nga simbolismo diha sa mga bersikulo 13–15 aron sa pagtudlo sa mga taga-Colosas nga napasaylo na sila. Ingon og ang usa ka lista sa tanan nga espirituhanon nga mga sumbong ug mga akusasyon batok sa mga Santos sa Colosas gibutang sa usa ka placard ug gilansang sa krus. Pinaagi sa Pagkalansang ni Jesukristo sa Krus, kini napapas o nawagtang.

Dugang nga Kalihokan sa Pagkat-on

Mga Taga-Colosas 3:12–24 . Kristohanong mga hiyas

Dapita ang mga estudyante sa pagpaambit og pipila sa ilang paboritong mga asoy gikan sa kinabuhi sa Manluluwas. Hangyoa sila sa pag-ila sa mga hiyas nga gipakita sa Manluluwas niadtong mga giasoy. Dayon dapita sila sa paghunahuna og mga tawo nga ilang nailhan kinsa nagpakita niini nga mga hiyas. Hangyoa sila sa pagpaambit og mga rason nga sila nagmalipayon nga makauban kining mga tawhana. Dapita ang mga estudyante sa pagtuon sa Mga Taga-Colosas 3:12–24 , nga mangita og Kristohanong mga hiyas o mga kinaiya. Mahimo usab silang mangita og mga paagi nga ilang mapalambo kini nga mga hiyas. Dapita ang mga estudyante sa pagtinguha sa tabang sa Langitnong Amahan pinaagi sa Espiritu Santo sa pagpili og usa ka hiyas nga gusto nilang pauswagon alang sa sunod bulan o sa sunod nga duha pa ka bulan. Dayon makahimo na sila og plano kon unsaon nila pagtinguha ang tabang sa Langitnong Amahan aron mapalambo kana nga hiyas.