“Ako Nag-antus sa Kapildihan sa Tanang mga Butang … Aron Ako Makadaug kang Kristo”
Imahe
1st illustration: A warm loving image of Christ, eyes looking out towards the reader. 2nd illustration: stars and the galaxy
Unsa ang andam nimong isakripisyo aron makasunod kang Jesukristo ug mahimong Iyang disipulo? Si Apostol Pablo daghan og gitalikdan dihang iyang gipili nga mosunod sa Manluluwas, lakip ang iyang maimpluwensiyahong kahimtang sa katilingban sa Judio isip usa ka Pariseo (tan-awa ang Mga Taga-Filipos 3:5). Kini nga leksiyon mahimong makatabang kanimo nga makasabot sa importansiya sa paghimo og mga sakripisyo aron makaila kang Jesukristo.
Pagtugot sa kahilom. Ang epektibong mga pangutana nagkinahanglan og panahon sa pagtubag. Tugoti ang mga estudyante og panahon nga makapamalandong sa mga pangutana. Kon ang mga estudyante dili motubag sa mga pangutana diha dayon, likayi ang tintasyon sa pagtapos sa kahilom sa hinanali pinaagi sa pagtubag sa pangutana. Ang panahon nga gigahin sa mga estudyante sa pagpamalandong sa mga pangutana mahimong maggiya ngadto sa inspirasyon ug makapalawom sa pagpamatuod.
Pagpangandam sa estudyante: Kon mahimo, dapita ang mga estudyante sa pagkolekta og mga asoy gikan sa mga sakop sa pamilya o mga katigulangan kinsa nakahimo og mga pagsakripisyo aron mosunod kang Jesukristo. Awhaga sila nga motambong nga andam mopakigbahin niining mga kasinatian ngadto sa klase.
Posible nga mga Kalihokan sa Pagkat-on
Unsa ang ihatag nimo?
Mahimong gamiton ang mosunod nga asoy aron sugdan ang klase, o pagdrowing og mga asoy nga gidala nga andam ipaambit sa mga estudyante.
Basaha o tan-awa ang mosunod nga asoy ni Presidente Dallin H. Oaks sa Unang Kapangulohan mahitungod sa usa ka batan-ong lalaki kinsa mipaambit kang Presidente Gordon B. Hinckley (1910–2008) sa mga sakripisyo nga andam niyang himoon aron mahimong usa ka miyembro sa Simbahan.
Imahe
Official Portrait of President Dallin H. Oaks taken March 2018.
Kaniadto nadunggan dinhi ang bahin sa batan-ong lalaki nga nakakaplag sa gipahiuling ebanghelyo samtang nag-eskwela sa Estados Unidos. Sa hapit na siya mouli sa iyang nasod, si Presidente Gordon B. Hinckley nangutana niya unsay mahitabo niya kon mopauli na siya isip Kristiyano. “Masagmuyo ang akong pamilya,” mitubag ang batan-ong lalaki. “Mahimong palayason ko nila ug isipon nga patay na. Sa akong kaugmaon ug panginabuhi, tanang oportunidad mahimong mawala.”“Andam ka ba nga mobayad og dakong bili alang sa ebanghelyo?” Nangutana si Presidente Hinckley.
(Dallin H. Oaks, “Sakripisyo,” Liahona, Mayo 2012, 21)
Sa imong hunahuna giunsa kaha pagtubag sa batan-ong lalaki? Ngano man?
Hatagi ang mga estudyante og igong panahon sa pagtubag sa sunod nga pangutana. Mahimong dapiton ang mga estudyante nga mamalandong sa hilom ug irekord ang ilang mga tubag una pa nila kini ipaambit sa klase.
Unsa kaha ang makapadasig sa usa ka tawo sa pagtalikod sa daghan kaayong mga butang aron mosunod kang Jesukristo?
Diha sa imong pagtuon sa Mga Taga-Filipos 3 , hunahunaa unsa ang imong gisakripisyo alang sa ebanghelyo ni Jesukristo ug sa unsang paagi ikaw napanalanginan sa pagbuhat sa ingon. Sa lain pang bahin, ang pagsakripisyo aron mas mahiduol sa Manluluwas mahimong usa ka dili pamilyar nga konsepto kanimo. Bisan unsa pa man ang imong kahimtang, ang Manluluwas matinguhaon sa pagtabang kanimo nga mouswag. Sa tibuok leksiyon, hatagig pagtagad ang mga hunahuna ug mga pagbati gikan sa Espiritu Santo nga mahimong makatabang kanimo nga makasabot sa tahas sa pagsakripisyo diha sa imong kinabuhi.
Ang ebanghelyo ni Jesukristo takos sa matag sakripisyo
Hinumdomi nga sa wala pa ang pagkakabig ni Pablo ngadto kang Jesukristo sa dalan paingon sa Damasco (tan-awa ang Mga Buhat 9), siya usa ka Pariseo, usa ka tawo nga taas ug relihiyoso ug sosyal nga posisyon taliwala sa mga Judio (tan-awa ang Mga Taga-Filipos 3:5). Tungod kay gipili niya ang pagsunod ni Jesukristo ug gigahin ang iyang kinabuhi sa pagsangyaw sa ebanghelyo, si Pablo nakasinati og grabeng pagpanggukod, kalisdanan, pisikal nga kasakit, ug emosyonal nga kapit-os (tan-awa ang 2 Mga Taga-Corinto 11:23–28). Atong nabasa sa Mga Taga-Filipos 3:7–17 unsa ang gibati ni Pablo mahitungod sa iyang pagtalikod sa kanhing kinabuhi aron sa pagsunod ni Jesukristo ug sa mga panalangin nga miabot isip resulta.
Ang mga estudyante lagmit magkinahanglan og tabang sa pagsabot sa pipila sa mga pulong diha sa block sa kasulatan. Mahimong isulat ang mosunod nga mga kahulugan sa pisara o mahimong libre sa imong higayon aron matabangan ang mga estudyante diha sa ilang pagtuon.
Basaha ang Mga Taga-Filipos 3:7–14 , nga mangita kon unsa ang andam nga talikdan ni Pablo aron makaila ug mosunod kang Jesukristo.
Ikonsiderar ang pagbahin sa mga estudyante sa managpares o diha sa gagmay nga mga grupo aron kompletohon ang mosunod nga kalihokan. Hatagig pagtagad ang mga estudyante kinsa lagmit nagkinahanglan og dugang nga tabang sa pagsulat og balik sa mga tudling sa ilang kaugalingong mga pulong.
Pagpili og duha ka mga tudling o mga hugpong sa pulong gikan sa Mga Taga-Filipos 3:7–14 ug isulat og balik ang mensahe ni Pablo sa imong kaugalingong mga pulong. Pananglitan, usa ka paagi sa pagsultig balik sa mensahe sa Mga Taga-Filipos 3:7 mao “Ang mga butang nga importante kanako kaniadto, karon wala nay bili kanako tungod ni Jesukristo.” Kon mahuman na ka, tubaga ang mosunod nga mga pangutana.
Unsa ang pipila sa mga panalangin nga nadawat ni Pablo gumikan sa iyang pagsakripisyo alang sa Ginoo?
Unsa ang pipila sa mga panalangin nga iya gihapong gipaningkamotan nga makab-ot pinaagi sa iyang mga sakripisyo?
Unsang mga baroganan ang atong makat-onan gikan sa ehemplo ni Pablo sa pagsakripisyo?
Usa ka baroganan nga atong makat-onan gikan sa ehemplo ni Pablo mao nga kon atong biyaan ang tanan nga gikinahanglan ngari kanato aron sa pagsunod ni Jesukristo ug mopadayon sa unahan diha sa hugot nga pagtuo, kita makaila Kaniya ug makaangkon og kinabuhing dayon. Ikonsiderar ang pagsulat niini nga baroganan diha sa imong mga kasulatan o sa journal sa pagtuon.
Paggahin og higayon sa pagpamalandong sa unsang paagi kini nga baroganan may kalabotan kanimo.
Unsa nga mga hunahuna, mga pangutana, o mga pagbati ang aduna ka?
Dapita ang mga estudyante nga buot motubag sa miaging pangutana. Kon ang mga estudyante walay kahigayonan sa sinugdanan sa leksiyon sa pagpaambit og mga asoy sa mga sakop sa pamilya o mga katigulangan nga nagsakripisyo alang sa ebanghelyo, mahimong dapiton sila sa pagbuhat sa ingon karon.
Kon makaayo sa mga estudyante ang pagkat-on mahitungod sa dugang nga mga ehemplo sa sakripisyo, ikonsiderar ang paggamit sa mga ideya ubos sa “Mga ehemplo gikan sa Basahon ni Mormon” diha sa “Dugang nga mga Kalihokan sa Pagkat-on” nga seksiyon sa leksiyon. Ikonsiderar usab ang pagpaambit og personal nga kasinatian o pagpamatuod.
Personal nga sakripisyo
Hinumdomi ang pangutana nga gipakita ni Presidente Hinckley sa sinugdanan sa leksiyon kalabot sa pagkaandam sa batan-ong lalaki sa pagsakripisyo og dako kaayo alang sa ebanghelyo. Basaha ang nahabilin nga asoy nga gipaambit ni Presidente Dallin H. Oaks.
Imahe
Official Portrait of President Dallin H. Oaks taken March 2018.
Nagluha-luha ang batan-ong lalaki nga mitubag, “Tinuod kini, dili ba?” Sa dihang namatud-an, mitubag siya, “Busa unsa pay angay nga kabalak-an?” Kana ang diwa sa sakripisyo sa atong bag-ong mga miyembro.
(Dallin H. Oaks, “Sakripisyo,” Liahona, Mayo 2012, 21)
Unsa ang nakapadayeg kanimo mahitungod niining batan-ong lalaki?
Sa unsang paagi nga ang kinabuhi, pangalagad, ug Pag-ula sa Manluluwas mao ang hingpit nga ehemplo sa sakripisyo?
Unsa nga mga hunahuna o mga pagbati ang anaa nimo kon ikaw mamalandong unsa ang andam isakripisyo ni Jesukristo alang kanimo?
Una pa kompletohon sa mga estudyante ang mosunod nga kalihokan, lagmit makatabang ang pagdapit kanila sa pagkonsiderar og posible nga mga pagsakripisyo nga ipabuhat sa ilaha sa umaabot ug mopaambit og mga ehemplo sa usag usa. Mahimo usab nga maglista ang mga estudyante diha sa pisara og lainlaing mga sakripisyo nga gihimo sa kabatan-onan aron mosunod kang Jesukristo.
Paghunahuna mahitungod sa sunod nga lima ka mga tuig sa imong kinabuhi ug pagsulat og sulat alang sa imong umaabot nga kaugalingon. Ilakip sa imong sulat ang mosunod nga mga detalye:
Mga butang nga tingali kinahanglan nimong isakripisyo sa sunod nga lima ka tuig aron mas makaila sa Ginoo ug makaandam alang sa kinabuhing dayon.
Mga babag nga mahimo nimong masugatan samtang mohimo ka og mga sakripisyo ug “[mopadayon] paingon … sa ganti” ( Mga Taga-Filipos 3:14).
Unsa ang imong nakat-onan mahitungod sa kaimportansiya sa pagsakripisyo ug ang mga panalangin nga moabot isip resulta.
Sa unsang paagi nga ang pagsakripisyo mahimong makatabang nimo aron mas mahisama sa Manluluwas.
Komentaryo ug Background nga Impormasyon
Mga Taga-Filipos 3:14 . Unsa ang gipasabot ni Pablo dihang siya miingon, “Ako nagpadayon paingon sa dauganan”?
Si Elder Edward Dube sa Kapitoan nagtudlo sa mosunod.
Imahe
Official Portrait of Elder Edward Dube. Photographed March 2017.
Ang pagpadayon paingon sa dauganan mao ang matinud-anon nga pagpadayon diha sa “higpit ug pig-ot nga dalan nga mopadulong sa kinabuhi nga dayon” [ 2 Nephi 31:18 ] uban sa atong Manluluwas ug sa atong Amahan sa Langit. Gitan-aw ni Pablo ang iyang mga pag-antos nga “dili takos nga ikatandi sa himaya nga ipadayag ra unya kanato.” [ Mga Taga-Roma 8:18 ; tan-awa usab ang 2 Mga Taga-Corinto 1:3–7 ]. Ang sulat ni Pablo ngadto sa Mga Taga-Filipos, nga iyang gisulat dihang gigapos siya sulod sa prisohan, usa ka sulat kabahin sa hilabihang kalipay ug pagmaya ug pagdasig alang kanatong tanan, ilabi na niining malisod nga panahon sa walay kasigurohan. …
Makaikag kaayo, ang pag-awhag ni Pablo nato sa pagpadayon sa unahan, samtang nagtudlo nato sa pagkalimot sa nangagi—atong nangaging mga kahadlok, atong mga gikahinaman, atong mga kapakyasan, ug nangaging kagul-anan.
Unsaon nako pagkahibalo unsa nga mga sakripisyo ang akong kinahanglang buhaton aron mas mahiduol kang Jesukristo?
Si Elder Larry R. Lawrence sa Kapitoan mitudlo nga ang labing maayong higayon sa matinahuron nga pagkonsiderar unsa nga mga sakripisyo ang atong himoon alang sa Ginoo mao ang panahon sa ordinansa sa sakramento.
Imahe
Official Portrait of Elder Larry R. Lawrence. Photographed March 2017.
Niining hilom nga palibot, samtang padulong sa langit ang atong mga hunahuna, sa kalumo mosulti ang Ginoo kanato unsay sunod natong buhaton. Sama ninyo, nakadawat ko og daghang mensahe gikan sa Espiritu sulod sa mga katuigan kon unsaon nako nga molambo. …
Tingali ang Espiritu moingon ninyo nga kinahanglan mo nga mopasaylo sa lain. O makadawat mo og mensahe nga kinahanglan mong mopili og maayong salida nga tan-awon o musika nga paminawon. Tingali madasig mo nga mas magmatinuoron sa inyong negosyo o mohatag og mas daghang halad sa puasa. Ang mga posibilidad walay kinutoban.
Unsa ang pipila ka mga sakripisyo nga gihimo sa mga miyembro sa Ang Simbahan ni Jesukristo sa mga Santos sa Ulahing mga Adlaw sa pagsunod sa Manluluwas?
Si Presidente Dallin H. Oaks sa Unang Kapangulohan milista og daghang mga sakripisyo nga gihimo sa mga miyembro sa gipahiuli nga Simbahan sa Ginoo. Mahimo nimong basahon ang iyang pakigpulong nga “Sakripisyo,” Liahona, Mayo 2012, 19–22, o tan-awa ang bidyo nga “Sakripisyo” (16:30), anaa sa ChurchofJesusChrist.org.
Human makatubag ang mga estudyante sa pangutana kon sa unsang paagi ang kinabuhi, pangalagad, ug Pag-ula sa Manluluwas mao ang labing maayong ehemplo sa sakripisyo, ikonsiderar ang pagsusi sa Mga Taga-Filipos 2:6–11 ug dapita ang mga estudyante sa pagpangita kon unsay gitalikdan sa Manluluwas ug unsay gipanalangin sa Langitnong Amahan Kaniya isip resulta.
Mga ehemplo gikan sa Basahon ni Mormon
Usa ka ehemplo gikan sa Basahon ni Mormon nga naghulagway sa baroganan sa sakripisyo mao ang pamilya ni Lehi nga nagbiyahe ngadto sa gisaad nga yuta. Hinumdomi nga sila si Laman ug Lemuel mibagulbol ug nakulangan og pagtuo sa instruksiyon sa Ginoo nga biyaan ang yuta nga ilang kabilin (tan-awa ang 1 Nephi 2:11–13). Mahimong gikuwestiyon usab ni Nephi ang sugo sa pagbiya sa Jerusalem, apan mipadayon siya sa pagsakripisyo pinaagi sa “[pagpangamuyo] ngadto sa Ginoo” (tan-awa ang 1 Nephi 2:16).
Basaha ang 1 Nephi 2:16–20 ug ilista o markahi ang mga panalangin nga nadawat ni Nephi tungod sa iyang pagkamasulondon ug pagsakripisyo.
Mahimong makaayo usab sa mga estudyante ang pagkat-on mahitungod sa amahan ni Haring Lamoni ug sa iyang pagkaandam sa pagsakripisyo sa tanan niyang mga sala aron makaila sa Ginoo (tan-awa ang Alma 22:15–23).